Кани бона Бәрнама Щьвине, Бьжин у Хьзмәт кьн
© 2024 Watch Tower Bible and Tract Society of Pennsylvania
3-9 АДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 3
(Мәтʹәлок 3:5)
5 Бь тʹәмамийа дьле хԝә хԝә бьсперә Хӧдан, гӧмана хԝә нәдә ль сәр һʹьше хԝә.
(Мәтʹәлок 3:6)
6 Һʹәму рʹийед хԝәда тӧ Хԝәде нас кә у Әԝе һʹәму шьвәрʹийед тә рʹаст-дуз кә.
(Мәтʹәлок 3:7)
7 Тӧ ль бәр чʹәʹве хԝә хԝә сәрԝахт нәбинә, жь Хӧдан хоф кә у жь хьрабийе дур бә.
Итʹбарийа Хԝә Йаһоԝа Бинә
ijwbv 14 ¶4-5
Мәтʹәлок 3:5, 6—«Гӧмана Хԝә Нәдә ль сәр Һʹьше Хԝә»
«Бь тʹәмамийа дьле хԝә, хԝә бьсперә Хӧдан [Йаһоԝа, ДТʹ]». Әм дьдьнә кʹьфше ԝәки итʹбарийа хԝә Хԝәде тиньн, гава һәр тьшти ӧса дькьн, чаԝа кӧ әԝ мә һин дькә. Әм гәрәке бь тʹәмами итʹбарийа хԝә Хԝәде биньн, демәк бь тʹәмамийа дьле хԝә. Гава Кʹьтеба Пирозда хәбәра «дьл» те хәбьтандьне, әв те һʹәсабе кӧ мәрьв һьндӧрʹда йәки чаԝа нә, демәк нет, фькьр, хԝәстьн у емосийед ԝи. Ләма жи бь тʹәмамийа дьле хԝә итʹбарийа хԝә Хԝәде биньн дьһа зедә тьшт те һʹәсабе, нә кӧ тʹәне һәстед мә. Әв йәк те һʹәсабе, ԝәки бь тʹәмами баԝәр бьн, кӧ Әʹфьрандаре мә занә йа лапә баш бона мә чь йә (Рʹомайи 12:1).
«Гӧмана хԝә нәдә ль сәр һʹьше хԝә». Әм гәрәке итʹбарийа хԝә Хԝәде биньн, чьмки әм мәрьвнә гӧнәкʹар ьн у ньһерʹандьна мә нәԛәданди йә. Һәрге әм итʹбарийа хԝә тʹәне хԝә биньн у изьне бьдьнә һәстед хԝә кӧ мә контрол кьн, әме сафикьрьнәкә ӧса бькьн, йа кӧ серида дькарә баш бе кʹьфше, ле ахьрийеда дькарә зийане бьдә мә (Мәтʹәлок 14:12; Йерәмйа 17:9). Бе шьк, биланийа Хԝәде жь йа мә дьһа зедәтьр ә (Ишайа 55:8, 9). Ләма жи һәрге әм ӧса бьжин, чаԝа кӧ Хԝәде мә һин дькә, ԝи чахи әме пешдачуйи бьн (Зәбур 1:1-3; Мәтʹәлок 2:6-9; 16:20).
ijwbv 14 ¶6-7
Мәтʹәлок 3:5, 6—«Гӧмана Хԝә Нәдә ль сәр Һʹьше Хԝә»
«Һʹәму рʹийед хԝәда тӧ Хԝәде нас кә». Әм гәрәке һʹәму дәрәщед әʹмьре хԝәда у ӧса жи чахе тьштәки фәрз сафи дькьн, ньһерʹандьна Хԝәде һьлдьн һʹәсаб. Сәва ве йәке әм гәрәке дӧада рʹебәрийе жь ԝи бьхԝазьн у ль гора ве йәке бьжин, чь кӧ әԝ бь сайа Хәбәра хԝә, Кʹьтеба Пироз, мәрʹа дьбежә (Зәбур 25:4; 2 Тимотʹейо 3:16, 17).
«Әԝе һʹәму шьвәрʹийед тә рʹаст-дуз кә». Хԝәде рʹийа мә бь ве йәке рʹаст дькә, кӧ али мә дькә ль гора нормед ԝи бьжин (Мәтʹәлок 11:5). Һәрге ль гора нормед ԝи бьжин, әме жь гәләк проблема хԝәйкьри бьн у дьһа бәхтәԝар бьн (Зәбур 19:7, 8; Ишайа 48:17, 18).
be 76 ¶4
Бәрдәԝам кә Пешда Һәрʹә
Гава мәрьв әʹмьре хԝәда рʹасти щурʹә-щурʹә дәрәща те, әв дькарә ӧса бьфькьрә: «Әз ида рʹасти дәрәщәкә ӧса һатьбум у заньм чь бькьм». Гәло бь билани йә ӧса бьфькьрьн? Мәтʹәлок 3:7-да ӧса те готьне: «Тӧ ль бәр чʹәʹве хԝә хԝә сәрԝахт нәбинә». Һәмьки мәрьве сәрԝахт у щерʹьбанди дьһа зедә тьшта һьлдьдә һʹәсаб, чахе гәрәке тьштәки сафи кә. Ле һәрге әм рʹӧһʹанида гьһишти нә, әме фәʹм бькьн, ԝәки әв йәк кӧ әм щерʹьбанди нә, бәс нинә, у бе кʹәрәмед Йаһоԝа әме нькарьбьн пешдачуйи бьн. Бәле, пешдачуйина мә ԝе һьнге әʹйан бә, һәрге әм һʹәму дәрәщед әʹмьре хԝәда рʹебәрийа Йаһоԝа бьгәрʹьн, нә кӧ һәр тьшти һьлдьн дәсте хԝә у хԝәда баԝәр бьн. Пешдачуйина мә ве йәкеда ԝе бе кʹьфше, һәрге әм баԝәр бьн ԝәки тʹӧ тьшт бе изьна Йаһоԝа найе кьрьне. Пешдачуйина мә ӧса жи ԝе жь һәләԛәтийа мәйә незик у ԛәԝи тʹәви Баве мәйи әʹзмана бе кʹьфше.
Хьзна Кʹьтеба Пироз
(Мәтʹәлок 3:3)
3 Бьра дьлшәԝати у рʹасти жь тә дур нәкʹәвьн, ван стуйе хԝәва гьредә, ль сәр тʹәхте дьле хԝә бьньвисә.
(Малахи 2:7, ИМ)
7 Дьве левед кʹаһин занине бьпиарезә. Дьве мәрьв ль һинкьрьна дәве ԝи бьгәрʹьн. Чьмки әԝ ԛасьде Хӧдане Кариндар ә.
ԝ06 15/9 17 ¶7
Фькьред Сәрәкә жь Кʹьтеба Мәтʹәлок
3:3. Әм гәрәке дьлшәԝатийе у рʹастийе ԛимәт кьн у ча бежи мина морийе бьһа бавежьнә стийе хԝә. Ӧса жи әм гәрәке ван һʹӧнӧра сәр тʹәхте дьле хԝә бьньвисьн, ԝәки әԝана бьбьнә пʹара шәхсийәта мә.
10-16 АДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 4
(Зәбур 51:6)
6 Бәле Тӧ рʹастийе дьле мьнда дьхԝази. Дьле мьн кʹур һини сәрԝахтийе кә.
(Мәтʹәлок 4:23а)
23 Жь һәр тьшти зедәтьр мьԛати дьле хԝә бә, чьмки канийа әʹмьр жь ԝи дәрте.
(Мәтʹәлок 4:23б)
23 Жь һәр тьшти зедәтьр мьԛати дьле хԝә бә, чьмки канийа әʹмьр жь ԝи дәрте.
«Мьԛати Дьле Хԝә бә»
ԝ12 1/5 32 ¶2
«Мьԛати Дьле Хԝә бә!»
Әм чьрʹа гәрәке мьԛати дьле хԝәйи симболик бьн? Хԝәде Сьлеман Пʹадша һелан кьр, кӧ бьньвисә: «Жь һәр тьшти зедәтьр мьԛати дьле хԝә бә, чьмки канийа әʹмьр жь ԝи дәрте» (Мәтʹәлок 4:23). Әʹмьре мәйи ньһа у ахьрийа мә, һʹале дьле мәйи симболиква гьредайи йә. Гәло чьрʹа? Чьмки Хԝәде дьле мә дьвинә (1 Самуйел 16:7). «Мәрьве һьндӧрʹе дьлда», демәк әм дьлда чь щурʹәйи нә, роләкә мәзьн дьлизә ве йәкеда, кӧ Хԝәде ԝе мә ча досте хԝә ԛәбул кә йан на (1 Пәтрус 3:4).
Хьзна Кʹьтеба Пироз
(Мәтʹәлок 4:18)
18 Ле бәле рʹийа рʹаста мина рʹонайийа бәрбанге йә, кӧ һеди-һеди дәрте, һʹәта кӧ тʹәмамийа рʹоже рʹонайи дьбә.
17-23 АДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 5
(Мәтʹәлок 5:3)
3 Чьмки жь левед жьна хәриб, чаԝа һьнгьве һелуне же бьньԛьтә у дәве ԝе жи жь рʹун нәрмтьр ә,
(Мәтʹәлок 5:4, 5)
4 ле ахьри тәʹл ә мина зьричʹке у бьрʹайә мина шуре дӧдәви. 5 Ньгед ԝе бәрбь мьрьне дьбьн у гавед ԝе дьгьһиньнә дийаре мьрийа.
(Мәтʹәлок 5:8)
8 Жь ԝе кʹӧлфәте хԝә дур хԝәй кьн у незики дәре мала ԝе нәбьн,
Хԝә жь Бенамусийе Дур Бьгьрьн
ԝ00 15/7 29 ¶1
Һун Дькарьн Дьнйа Бенамусда Тʹәмьз Бьминьн
Ве мәтʹәлокеда мәрьве бенамус те әʹйанкьрьне ча «жьна хәриб» йан жи ԛав. Хәбәред ԝе, бь сайа чь жи әԝ кәсәки зәфти хԝә дькә, мина һьнгьв ширьн ьн у жь бьзьре зәйтʹуне нәрмтьр ьн. Һʹәчʹи зәʹф дәрәщада хәбәрданед ви щурʹәйи дьбьнә бәрбь бенамусийе. Ԝәрә әм дина хԝә бьдьне, кӧ чь гьли дькә ԛизькәкә хԝәшьк бь наве Еми, йа кӧ 27 сали йә у ча секретар дьхәбьтә: «Хәбатчик тʹьме дина хԝә дьдә мьн у мәщала дьгәрʹә ԝәки пʹайе мьн бьдә. Һәмьки һʹәԝас ә чахе дина хԝә дьдьнә тә, ле әз әшкәрә дьвиньм, ԝәки нета ԝи тʹәне әв ә, кӧ тʹәви мьн бькʹәвә һәләԛәтийа сексуали. Ле әзе нәкʹәвьмә бәр байе гьлийед ԝийи ширьн». Бәле, хәбәред ширьн дьла дьһʹәлиньн, ле чахе мәрьв нета дьле ԝи кәси педьһʹәсә, ԝи чахи әԝ һәр тьшти фәʹм дькә. У сәва кӧ нета ԝи мәрьви бьзаньбьн, әм гәрәке сәрԝахт бьн у һәр тьшти һьлдьн һʹәсаб.
ԝ00 15/7 29 ¶2
Һун Дькарьн Дьнйа Бенамусда Тʹәмьз Бьминьн
Ахьрийа бенамусийе мина зьричʹке тәʹл ә у мина шуре дӧдәви туж ә. Бенамуси дьбә мәʹнийа еша дьл у һәла һе мәʹнийа мьрьне жи. Гәләк щар тәʹлайа кьред бенамус дькарьн бьбьнә сәбәбе һʹәмләбуне, исафа мәрьв дькарә ле бьчәрчьринә, йан жи мәрьв дькарә нәхԝәшикә гьран кʹәвә. Дә бьдьнә һʹәсабе хԝә, кӧ мер йан жьна ԝи кәсе нәамьн, ешәкә чьԛас мәзьн дькʹьшинә. Нәамьнийа щоте зәԝаще дькарә бьринәкә ӧса кʹур дьле мәрьвда бьһелә, йа кӧ дькарә тʹәмамийа әʹмьре ԝи ԛәнщ нәбә. Бәле, бенамуси бь рʹасти жи зийанәкә мәзьн тинә.
ԝ00 15/7 29 ¶5
Һун Дькарьн Дьнйа Бенамусда Тʹәмьз Бьминьн
Әм гәрәке һәр тьшти бькьн, ԝәки хԝә дури мәрьвед бенамус бьгьрьн. Әм гәрәке изьне нәдьнә хԝә, ԝәки кʹьламед нәщайиз бьбьһен, програмед бенамусийева гьредайи у порнографийайе бьньһерʹьн (Мәтʹәлок 6:27; 1 Корьнтʹи 15:33; Әфәси 5:3-5). Ӧса жи беаԛьлайи йә, кӧ дина кәсәки бенамус бь сайа флирте, йан жи бь кʹьнщхԝәкьрьна нәщайиз бькʹьшиньн сәр хԝә (1 Тимотʹейо 4:8; 1 Пәтрус 3:3, 4).
Хьзна Кʹьтеба Пироз
(Мәтʹәлок 5:9, ИМ)
9 Йан на, те рʹумәта хԝә бьди кәсед дьн, те салед хԝә бьди мәрьвед зӧлм.
(Мәтʹәлок 28:26)
26 Йе хԝәда гӧман ә, әԝ ахмах ә, ле йе сәрԝахтийеда дьжи ԝе азад бә.
3 Ле һʹәта наве ԛавийе у һәр һʹәрамийе, йан тьмайе жи гәрәке нава ԝәда нәйе һьлдане, чаԝа ль щьмәʹта Хԝәде накʹәвә. 4 Ӧса жи готьнед бемәʹрифәти, йан бефәʹми, йан һʹәнәкед ԛәлпе хьраб, кӧ ль ԝә накʹәвьн, бьра жь дәве ԝә дәрнәйен, ле дәԝсе шькьрдари.
ԝ00 15/7 29 ¶7
Һун Дькарьн Дьнйа Бенамусда Тʹәмьз Бьминьн
Бь ван гьлийа Сьлеман дьдә кʹьфше, кӧ мәрьв чь ӧнда дькә гава бенамусийе дькә. Гава мәрьв ԛавийе дькә әв ԛәдьре хԝә ӧнда дькә. Әв тьштәки чьԛас ньмьз ә, ԝәки изьне бьдьнә хԝә, кӧ һәстед хԝәйә гӧрʹ, йан жи йед кәсәки дьн, рʹази кьн. Һәрге әм изьне дьдьнә хԝә, кӧ тʹәви ԝи мәрьви бькʹәвьнә һәләԛәтийа сексуали, йе кӧ һәвалзәԝаще мә нинә, әв йәк дьдә кʹьфше кӧ әм ԛәдьре хԝә ньзаньн.
24-30 АДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 6
(Мәтʹәлок 6:6)
6 Бехирәто! Һәрʹә щәм мурийа, дина хԝә бьдә рʹе-дьрбед ԝан у сәрԝахт бә.
(Мәтʹәлок 6:7, 8)
7 Нә ахе ԝан һәйә, нә запьде ԝан нә жи сәрԝер, 8 ле бәле хӧрәке хԝә әԝ һавине дьдьн сәр һәв, хԝарьна хԝә жи ԝәхте нандьруне тʹоп дькьн.
(Мәтʹәлок 6:9-11)
9 Бехирәто, һʹәта кʹәнге те пʹалди? Те жь хәԝа хԝә кʹәнге һʹьшйар би? 10 Һʹәта һьнәки рʹазейи, һьнәки бьпʹоньжи, һьнәки дәстед хԝә бьди ль сәр һәв пʹалди, 11 һьнге кʹәсибийа тәйе мина рʹеԝики дьз ль сәр тәда бьгьрә, дәсттәнгийа тәйе жи мина ԛачахәки.
Әм жь Мурьстанга Чь Дькарьн Һин бьн?
it-1 115 ¶1-2
Мурьстанг
Биланийа бь Инстинкте. Биланийа мурьстанга нә кӧ жь һʹьш-аԛьле ԝан ә, ле жь инстинкте йә, йа кӧ Әʹфьрандар кьрийә нава ԝан. Кʹьтеба Пироз дьбежә кӧ мурьстанг хӧрәка хԝә «һавине дьдьн сәр һәв» у «ԝәхте нандьруне тʹоп дькьн» (Мтʹл. 6:8). Йәк жь щурʹед бәлабуйи йа мурьстанга, йед кӧ Палестинайеда һәнә, әв мурьстангед пʹалә нә (Messor semirufus). Бьһаре у һавине әԝана хԝәрʹа гәләк гәньм тʹоп дькьн, сәва кӧ хԝарьна ԝан һьнге жи һәбә, гава чәтьн ә дәстхьн, мәсәлә зьвьстане. Ԝан кʹезька дькарьн ԝедәре бьвиньн, кʹидәре гәләк тʹохьм у гәньм һәйә. Мәсәлә незики ԝан щийа, кʹидәре кӧ гәньм бе дьхьн. Һәрге жь бо баране тʹохьм нем дьбьн, һьнге әв мурьстанг ван тʹохьма дәрдьхьн у бәр тәʹве зьһа дькьн. Ӧса жи әԝана чʹилед гәньм дьхԝьн, ԝәки ԝәʹде хԝәйкьрьне чʹил шин нәбьн. Мала ԝан мурьстанга дькарьн бь сайа щийе тʹәпьсанди тедәрхьн, кʹидәре кӧ әԝана дьчьн-тед у ӧса жи бь сайа ԛалчʹькед гәньм.
Әм жь Мурьстанга Чь Дькарьн Һин бьн. Һʹәму тьштед кӧ мә жоре шеԝьр кьр, дьдьнә кʹьфше ԝәки бь рʹасти жи һежа йә жь мурьстанга һин бьн: «Һәрʹә щәм мурийа, дина хԝә бьдә рʹе-дьрбед ԝан у сәрԝахт бә» (Мтʹл. 6:6). Һʹәԝас нә тʹәне әԝ ә кӧ мурьстанг бь сайа инстинкте бь хирәт хԝәрʹа хԝарьне тʹоп дькьн, ле ӧса жи ԝәки әԝана ԝан тьшта кʹаш дькьн, чь кӧ дӧ щара йан һе зедә жь кʹаша ԝан зедәтьр ә. Рʹийед хьл у хар жи ԝана надьнә сәкьнандьне, һәла һе һьнге жи гава әԝана сәр ван рʹийа дьшьмьтьн у жорда дькʹәвьн. Әԝ кʹезькед тʹәрбәт, һелунед хԝә тʹәмьз хԝәй дькьн у бона мурьстангед дьн жи хәм дькьн. Щарна дькарьн бьвиньн, кӧ ча әԝана аликʹарийе дьдьнә мурьстанга бьриндар йан жи ԝәстийайи, кӧ әԝ бьгьһижә һелуна хԝә.
ԝ00 15/9 26 ¶3-4
Наве Хԝә Хԝәй кә
Әм жи мина мурьстанга гәрәке хәбатһʹәз бьн. Фьрԛи тʹӧнә кәсәк мә дьвинә йан на, йәкә әм гәрәке бь дьл у щан бьхәбьтьн у хәбата хԝә дьһа рʹьнд бькьн. Һәрге әм мәкʹтәбеда һин дьбьн, дьхәбьтьн йан жи шьхӧлед рʹӧһʹанива мьжул дьбьн, әм гәрәке бь хирәт чь жь дәсте мә те бькьн. Мурьстанг хәбатһʹәз ьн у әв йәк ԝанрʹа кʹаре тинә. Хԝәде дьхԝазә, ԝәки әм жи жь «һʹәму кʹәда» дәсте хԝә, ша бьн (Ԝаиз 3:13, 22; 5:18, ИМ). Хәлата бона ве хәбата гьран, ԝе дьле рʹьһʹәт у исафа тʹәмьз бә (Ԝаиз 5:12).
Бь сайа ван дӧ пьрса, Сьлеман дьхԝазә ԝәки мәрьве тʹәмбәл сәр һʹьше хԝәда бе: «Бехирәто, һʹәта кʹәнге те пʹалди? Те жь хәԝа хԝә кʹәнге һʹьшйар би?» У хԝәха жи Сьлеман ча бежи бь дәнге мәрьве тʹәмбәл сәрда зедә дькә: «Һʹәта һьнәки рʹазейи, һьнәки бьпʹоньжи, һьнәки дәстед хԝә бьди ль сәр һәв пʹалди, һьнге кʹәсибийа тәйе мина рʹеԝики дьз ль сәр тәда бьгьрә, дәсттәнгийа тәйе жи мина ԛачахәки» (Мәтʹәлок 6:9-11). Һʹәта кӧ мәрьве тʹәмбәл дәстед хԝә дайә сәр һәв у пʹалда йә, кʹәсиби у дәсттәнги мина ԛачахәки ләзә-ләз һʹьщуми сәр ԝи дькә. Дәштед ԝи бь стьрийа у гәзгәзкева тʹьжә дьбә (Мәтʹәлок 24:30, 31). Шьхӧле ԝи зьраре дьстинә у әԝ дькарә хәбата хԝә ӧнда кә. Гәло мәзьне хәбате ԝе чьԛас ԝәхт хәбатчийе тʹәмбәл сәбьр кә? У зарʹа кӧ нахԝазә мәкʹтәбеда һин бә, гәло ԝе нишанед баш бьстинә?
Хьзна Кʹьтеба Пироз
(Мәтʹәлок 6:16-19)
16 Ванә шәш тьштед кӧ Хӧдан дьжәнә ԝан, һәла һʹәфт ьн кӧ ль бәр Ԝи һʹәрам ьн: 17 Чʹәʹвед кʹӧбар, зьмане дәрәԝин, дәстед кӧ хуна бесущ дьрʹежьн, 18 дьле кӧ тʹьвдира хьраб дәртинә, ньгед кӧ бона хьрабийе зу дьрʹәвә, 19 шәʹде дәрәԝ, кӧ дәрәԝа дькә у бьра бәри һәв дьдә.
ԝ00 15/9 27 ¶3
Наве Хԝә Хԝәй кә
Ве мәтʹәлокеда дәрһәԛа һʹәфт тьштед сәрәкә те готьне, йед кӧ һʹәму щурʹә зӧлми тенә һʹәсабе. «Чʹәʹвед кʹӧбар» у «дьле кӧ тʹьвдира хьраб дәртинә», әв һәнә гӧнед кӧ мәрьв дьле хԝәда дькә. «Зьмане дәрәԝин» у «шәʹде дәрәԝ, кӧ дәрәԝа дькә», әв һәнә гӧнед кӧ мәрьв бь хәбәрдана хԝә дькә. «Дәстед кӧ хуна бесущ дьрʹежьн» у «ньгед кӧ бона хьрабийе зу дьрʹәвә», әв һәнә кьред хьраб. Йаһоԝа илаһи ԝан мәрьва нәфрʹәт дькә, йед кӧ ша дьбьн гава әʹдьлайе ортʹа ԝан мәрьвада хьраб дькьн, йед кӧ дькарьбун йәктийеда бьжитана. Әв йәк кӧ һәжмара зӧлмийе жь шәша дьбә һʹәфт, дьдә кʹьфше, кӧ ԝан рʹезада дәрһәԛа һʹәму щурʹә зӧлмийе найе готьне, чьмки мәрьв зӧлмийеда тʹьме пешда дьчьн.
31 АДАРЕ–6 НИСАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 7
(Мәтʹәлок 7:7-9)
7 ва йә нава щаһьлед сахьке дьле хԝәда, чʹәʹве мьн хортәки бефәʹм кʹәт, 8 кӧ кʹучеда незики әʹнишке хԝә ль рʹийа мала ԝе гьрт, 9 евар бу, рʹо чубу ава, шәв бу, тәʹри кʹәтьбу әʹрде
(Мәтʹәлок 7:10)
10 у ва жьнәкә кʹьнще ԛава ле, бь дьле ԛанщьхи дәркʹәтә пешийа ԝи,
(Мәтʹәлок 7:13-21)
13 Әԝе әԝ хорт гьрт рʹамуса у бе шәрма рʹу готә ԝи: 14 «Мьн дийарийа һәләԛәтийе дайә, созе хԝә иро анийә сери, 15 ләма әз дәркʹәтьмә пешийа тә, кӧ рʹуйе тә бьбиньм, ва мьн тӧ дити. 16 Мьн щи-ньвина хԝә пе сьпичʹала мьсьрейә рʹәнг-рʹәнги хәмьландийә. 17 Мьн ньвина хԝә зьмьр, уд у дарчин кьрийә. 18 Ԝәрә әме хԝәрʹа бькʹәвьнә кʹеф-һʹәнәка һʹәта сьбе, бь шабуне тʹәв дәрбаз кьн. 19 Чьмки мере мьн нә ль малә, рʹекә дурда әԝа чуйә, 20 кʹиське пʹәра хԝәрʹа бьрийә, хьлазийа мәһе әԝе бе мале». 21 Пе зархԝәшийа хԝә әԝ кьрә машоԛе хԝә у заре хԝәйи хԝәш, сәр хԝә бәнги кьр.
(Мәтʹәлок 7:22, 23)
22 Һьнге әԝи зу да пәй ԝе чу, чаԝа га кӧ дьчә ԛәсабхане у мина һʹәйԝанәкә капстукьри, 23 һʹәта кӧ тир щәгәра ԝи бьгьрә, чаԝа кӧ чʹьвик хԝә тʹәлерʹа дьгьһинә у ньзанә кӧ әԝ рʹӧһʹьстине ԝе йә.
Хԝә Дур Бьгьрьн жь Тʹәлька
ԝ00 15/11 29 ¶5
«Тʹәмийед Мьн Хԝәй кә у Те Бьжийи»
Бәри еваре йә у һеди-һеди тәʹри дькʹәвә әʹрде. Сьлеман Пʹадша пʹәнщәрерʹа дьньһерʹә у хортәки дьвинә, кʹижан кӧ йәки хам у нәсәрԝахт ә. Кʹьфш ә, әԝ занә кӧ һатийә кʹижан мьһале у чь ԝедәре дькарә бе сәре ԝи. Әԝи хԝә «ль рʹийа мала ԝе гьрт». Гәло әв мала кʹе йә? У чь һʹьше ԝе кʹӧлфәтеда нә?
ԝ00 15/11 30 ¶4-6
«Тʹәмийед Мьн Хԝәй кә у Те Бьжийи»
Левед ве кʹӧлфәте назьк ьн. Әԝе шәрма рʹуйе хԝә ӧнда кьрийә у бь хәбәрдана хԝә, дьле ԝи хорти дьһʹәлинә. Чахе әԝ бәʹса ве йәке дькә, кӧ Хԝәдерʹа дийарийа һәләԛәтийе, демәк ԛӧрбан анийә, әԝ дьхԝазә хԝә ӧса бьдә кʹьфше, йан чь әԝ мәрьвәкә рʹаст у рʹӧһʹани йә. Пʹарьстгәһа Оршәлимеда ча дийарийа һәләԛәтийе, гошт, ар, рʹун у шәрав дьанин (Ԛануна Кʹаһинтийе 19:5, 6; 22:21; Жьмар 15:8-10). Мәрьве кӧ ԛӧрбан дьани, дькарьбу пʹарәке бона хԝә у малбәта хԝә һьлда. Ӧса әве кʹӧлфәте да кʹьфше, кӧ мала ԝеда епʹещә хԝарьн у вәхԝарьн һәйә. Фәʹмдари йә кӧ әԝ дьхԝазә бежә, ԝәки әԝ хорт дькарә ԝедәре ԝәʹдәки баш дәрбаз кә. Әԝ кʹӧлфәт һʹәма бона ве йәке жь мал дәркʹәт, ԝәки ԝи хорти бьвинә. Дьбәкә кәсәк бежә, әԝ мәрьвәкә чьԛас дьл ә. Лекʹолинкʹарәки Кʹьтеба Пироз дьбежә, кӧ «әԝ бь рʹасти һивийа кәсәки бу, ле гәло әԝ һәма һивийа ви хорти бу? Тʹәне йәки мина ԝи хорте бефәʹм дькарьбу баԝәрийа хԝә гьлийед ԝе кʹӧлфәте бьанийа».
Әв кʹӧлфәт дина ви хорти дькʹьшинә сәр хԝә нә тʹәне бь кʹьнще хԝәйә нәлайиԛ, заре ширьн, һʹәмезе назьк у пачʹкьрьне, ле ӧса жи жерʹа гьли дькә дәрһәԛа щурʹә-щурʹә тьштед бинхԝәш. Әԝ дьбежә: «Мьн щи-ньвина хԝә пе сьпичʹала мьсьрейә рʹәнг-рʹәнги хәмьландийә. Мьн ньвина хԝә зьмьр, уд у дарчин кьрийә» (Мәтʹәлок 7:16, 17). Бәле, әԝе дьле хԝәрʹа щи-ньвине хԝә хәмьландьбу у бинхԝәш кьрьбу.
Әԝ кʹӧлфәт сәре ԝи хорти тʹьжә дькә у дьбежә: «Ԝәрә әме хԝәрʹа бькʹәвьнә кʹеф-һʹәнәка һʹәта сьбе, бь шабуне тʹәв дәрбаз кьн». Әԝе нә кӧ тʹәне дьхԝәст шиве тʹәви ԝи хорти бьхԝә, ле һе зедә тьшт дьхԝәст. Әԝе жерʹа соз да, кӧ ԝе сәре хԝә перʹа дайнә у әԝана ԝе тʹәвайи ԝәʹдәки хԝәш дәрбаз кьн. Бона гәде щаһьл, әԝ тʹәглифкьрьн гәләк һʹәԝас һатә кʹьфше. Хенщи ве йәке, әв жьнька ԛав дьбежә: «Мере мьн нә ль малә, рʹекә дурда әԝа чуйә, кʹиське пʹәра хԝәрʹа бьрийә, хьлазийа мәһе әԝе бе мале» (Мәтʹәлок 7:18-20). Әԝ ԝи дьдә баԝәркьрьне, кӧ әԝана бь тʹәмами пʹарасти нә, чьмки мере ԝе бона шьхӧл чуйә щики дур у ԝе чәндәки ԝедәре бә. Әԝ бь һостәти ви хорте щаһьл дьхальфинә! «Пе зархԝәшийа хԝә әԝ кьрә машоԛе хԝә» у бь «заре хԝәйи хԝәш, сәр хԝә бәнги кьр» (Мәтʹәлок 7:21). Сәва кӧ нәкʹәвә ве тʹәльке, әԝи хорти гәрәке хԝәгьртьнәкә мина йа Усьв бьда кʹьфше (Дәстпебун 39:9, 12). Гәло әв гәде щаһьл ԝе бькʹәвә тʹәлька ԝе?
ԝ00 15/11 31 ¶2
«Тʹәмийед Мьн Хԝәй кә у Те Бьжийи»
Хорт дькʹәвә бәр байе щерʹьбандьне, һʹьше хԝә ӧнда дькә у пәй ве кʹӧлфәте дьчә «чаԝа га кӧ дьчә ԛәсабхане». Әԝ хофийе навинә «һʹәта кӧ тир щәгәра ԝи бьгьрә», демәк һʹәта кӧ бьринәкә ӧса бьстинә, йа кӧ дькарә ԝи бәрбь мьрьна физики у рʹӧһʹани бьбә. Әв дькарә нәхԝәшикә ӧса бьстинә, йа кӧ жь һәләԛәтийа сексуали пешда те у дькарә бьбә сәбәбе мьрьне. Хенщи ве йәке, әв бьрина симболик дькарә бьбә сәбәба ве йәке, кӧ мәрьв рʹӧһʹанида бьмьрә. Әв хорт хофикә мәзьнда нә, чьмки әԝи гӧнәки гьран бәр Хԝәде кьрийә. Әԝ ча бежи дькʹәвә һʹәмеза мьрьне, чаԝа кӧ чʹьвик хԝәха дькʹәвә тʹәльке!
Хьзна Кʹьтеба Пироз
(Мәтʹәлок 7:3)
3 Тʹьлийед хԝәва ԝан гьредә, ль сәр тʹәхте дьле хԝә бьньвисә.
ԝ00 15/11 29 ¶1
«Тʹәмийед Мьн Хԝәй кә у Те Бьжийи»
Сьлеман ньвиси: «Тʹьлийед хԝәва ԝан [тʹәмийед мьн] гьредә, ль сәр тʹәхте дьле хԝә бьньвисә» (Мәтʹәлок 7:3). Әм тʹьме тʹьлийед хԝә дьвиньн у бь сайа ван әм дькарьн чь кӧ дьхԝазьн бькьн. Һәма бь ви щурʹәйи әм гәрәке занәбун у дәрсед жь Кʹьтеба Пироз бира хԝәда хԝәйи кьн у һәр дәрәщед әʹмьре хԝәда бьдьнә хәбате. Әм гәрәке ԝана сәр тʹәхте дьле хԝә бьньвисьн, ԝәки әв бьбьнә пʹара шәхсийәта мә.
7-13 НИСАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 8
(Мәтʹәлок 8:1)
1 Сәрԝахти гази дькә у биланти дькә дәнги!
(Мәтʹәлок 8:4)
4 «Әз гази ԝә дькьм гәли мәрьва у дәнг дьдьмә әԝләдед инсен!
(Мәтʹәлок 8:22)
22 Дәма дәстпекьрьна шьхӧле Хӧдан, әз щәм Ԝи бум, һе бәри кьрьнед Ԝийә пеш.
(Мәтʹәлок 8:30, 31)
30 һьнге әз ль щәм Ԝи чирәдәст бум. Әз шабуна Ԝийә һәр рʹож бум, һәр тʹьм ль бәр Ԝи ша дьбум, 31 әз бь һәр тьштед дьнйа Ԝида ша дьбум у әшԛа мьн әԝләдед инсен бу.
(Мәтʹәлок 8:32)
32 У ньһа, гәли зарʹа, гӧһдарийа мьн бькьн. Хԝәзи ль ԝан, йед кӧ рʹе-дьрбед мьн хԝәй дькьн!
(Мәтʹәлок 8:35)
35 Чьмки кʹе әз дитьмә, жийин дитийә у жь Хӧдан ԝе кʹәрәме бьстинә,
Гӧһ Бьдьнә Биланийе
cf 131 ¶7
«Әз Бав Һʹәз Дькьм»
7 Рʹеза 22-да билани дьбежә: «Дәма дәстпекьрьна шьхӧле Хӧдан, әз щәм Ԝи бум, һе бәри кьрьнед Ԝийә пеш». Ве рʹезеда хәбәра билани дьһа зедә тьшт те һʹәсабе. Йаһоԝа тʹьме һәбу у әԝ тʹьме билан бу, ләма жи дәстпека биланийа ԝи тʹӧнә йә (Зәбур 90:2). Ле Кӧрʹе Хԝәде, «Ньхӧрийе . . . сәр һʹәму әʹфьринарʹа» йә (Колоси 1:15). Жь әʹфринед Йаһоԝа, әԝ йе пешьн бу. Ча жь кʹьтеба Мәтʹәлок те кʹьфше, Кӧрʹе Хԝәде һе гәләк ԝәхт пешийа әʹфьрандьна әʹрд у әʹзмен һәбу. Әԝ Хәбәр бу, демәк һәр тьштида чь кӧ әԝи дьгот, биланийа Йаһоԝа әʹйан дькьр (Йуһʹәнна 1:1).
cf 131-132 ¶8-9
«Әз Бав Һʹәз Дькьм»
8 Гәло Кӧрʹе Хԝәде һʹәта кӧ бьһата сәр әʹрде, беһʹәсаб сал сәр әʹзмана чь дькьр? Рʹеза 30-да те готьне, кӧ әԝ щәм Хԝәде һостәки щерʹьбанди бу. Гәло әв чь те һʹәсабе? Колоси 1:16-да те шьровәкьрьне: «Бь дәсте ԝи һәр тьштед ль әʹрд у әʹзмана әʹфьринә, . . . һәр тьшт бь дәсте ԝи у бона ԝи әʹфьринә». Йаһоԝа, ча Әʹфьрандар, Кӧрʹе хԝә чаԝа һостәки щерʹьбанди да хәбате, ԝәки мәләка бьәʹфьринә, гәрдуна мәзьн, планета мә, щурʹә-щурʹә һʹәйԝан, шинкайи у ӧса жи мәрьв әʹфьранд. Дькарьн бежьн ԝәки һәвкʹарийа ортʹа Бав у Кӧрʹда мина һәвкʹарийа ортʹа архитектор у авакʹарда нә. Авакʹар нета архитектор тинә сери. Чахе әм әʹфринарʹа һʹәйр-һʹӧжмәкʹар дьминьн, әм пәсьне Архитекторе Гьринг дьдьн (Зәбур 19:1). Ле әм гәрәке дәрһәԛа Кӧрʹ жи бир нәкьн, йе кӧ һостәки щерʹьбанди йә, у гәләк ԝәхт бь шабуне тʹәви Баве хԝә һәвкʹари дькьр.
9 Чахе дӧ мәрьвед гӧнәкʹар тʹәвайи һәвкʹарийе дькьн, ԝанрʹа нә һәртʹьм һеса йә зьман һәврʹа бьвиньн. Ле Йаһоԝа у Кӧрʹе ԝи гәләк баш һәвкʹарийе дькьрьн! Беһʹәсаб сал Кӧрʹ тʹәви Баве хԝә һәвкʹари дькьр у ‹һәр тʹьм ль бәр Ԝи ша дьбу› (Мәтʹәлок 8:30). Бәле, Бав у Кӧрʹрʹа һʹәԝас бу тʹәвайи һәвкʹарийе бькьн. У рʹож бь рʹож Кӧрʹ дьһа дьбу мина Бав у чʹәʹв дьда хәйсәт-һʹӧнӧред ԝи. Ләма жи Бав у Кӧрʹ ӧса незики һәв ьн. Тʹӧ һʹәзкьрьн мина һʹәзкьрьна ԝан дьреж у ԛәԝи нинә.
ԝ09 15/4 31 ¶14
Иса Ԛимәт кьн, Демәк Даԝьде Мәзьн у Сьлемане Мәзьн
14 Тʹәне мәрьвәк бь тʹәмами жь Сьлеман билантьр бу. Әԝ Иса Мәсиһ бу, йе кӧ дәрһәԛа хԝә гот, ԝәки әԝ жь «Сьлеман мәзьнтьр» ә (Мәт. 12:42). Иса дәрһәԛа «жийина һʹәта-һʹәтайе» дьгот (Йуһʹн. 6:68). Мәсәлә, Готара сәр Чʹийе али мә дькә дьһа баш принсипед жь мәтʹәлокед Сьлеман фәʹм бькьн. Сьлеман дәрһәԛа чәнд тьшта гот, чьва жи бәхтәԝарийа хьзмәткʹаред Хԝәде гьредайи йә (Мәтʹлк. 3:13; 8:32, 33; 14:21; 16:20). Иса гот, кӧ бәхтәԝарийа рʹаст хьзмәтийа Йаһоԝава у созед Ԝива гьредайи йә. Әԝи гот: «Чьԛас бәхтәԝар ьн кәсед кӧ фәʹм дькьн, ԝәки әԝана һʹәԝще Хԝәде нә, чьмки Пʹадшатийа әʹзмана йа ԝан ә» (Мәт. 5:3). Мәрьвед кӧ ль гора ван принсипа дьжин, йед кӧ һинкьрьнед Исада әʹйан дьбьн, дьһа незики Йаһоԝа дьбьн, йе кӧ «канийа жийане» йә (Зәб. 36:9; Мәтʹлк. 22:11; Мәт. 5:8). Иса Мәсиһ бь тʹәмами чʹәʹв дьдә «сәрԝахтийа Хԝәде» (1 Корн. 1:24, 30). «Рʹӧһʹе . . . фәʹмдарийе» сәр Иса йә, чаԝа Пʹадше Пʹадшатийа Хԝәде (Иша. 11:2, ИМ).
Хьзна Кʹьтеба Пироз
(Мәтʹәлок 8:1-3)
1 Сәрԝахти гази дькә у биланти дькә дәнги! 2 Әԝ ль һеланед жорьн дәве рʹийа у нава шьвәрʹийада дьсәкьнә. 3 Әԝ ль бәр дәргәһе кӧ дькʹәвьнә бажер, ль бәр дәрийе кʹижанирʹа дәрбаз дьбьн дькә гази:
g 5/14 16
Билани «Дькә Гази»—Һун Дәнге Ԝе Дьбьһен?
▪ Әнсиклопедийакеда те готьне, кӧ «кʹьтеба лапә бәлабуйи дьнеда», әв һәйә Кʹьтеба Пироз (The World Book Encyclopedia). «Әв дьһа зедә щар у сәр дьһа зедә зьмана һатийә ԝәлгәрʹандьне, нә кӧ кʹьтебед дьн». Рʹожа иройин Кʹьтеба Пироз бь тʹәмами йан жи пʹаред ве, сәр ԝәкә 2 600 зьмана һәйә, у 90 сәләфи зедәтьр мәрьв дькарьн ве кʹьтебе дәст хьн.
▪ Хенщи ве йәке, билани ча бежи рʹастә-рʹаст «дькә гази». Мәтта 24:14-да те готьне: «Әв мьзгинийа Пʹадшатийе ԝе сәр тʹәмамийа дьнйайе бе бәлакьрьне, кӧ һʹәму мьләтарʹа бьбә шәʹдәти, у һьнге хьлази ԝе бе».
14-20 НИСАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 9
(Мәтʹәлок 9:7, 8а)
7 Әԝе кӧ пекʹәни ширәт дькә, әԝ беһӧрмәтийе сәр хԝәда тинә у йе нәпʹак һьлте, әԝ ләкʹа ԝи ль хԝә дьхә. 8 Пекʹәни ширәт нәкә, кӧ нәбә нәйаре тә, ле йе сәрԝахт ширәт кә, әԝе тә һʹьз бькә.
(Мәтʹәлок 9:8б, 9)
8 Пекʹәни ширәт нәкә, кӧ нәбә нәйаре тә, ле йе сәрԝахт ширәт кә, әԝе тә һʹьз бькә. 9 Йе сәрԝахт ширәт кә у әԝе һе сәрԝахт бә, мәрьве рʹаст һин кә, занәбуна ԝийе һе зедә бә.
(Мәтʹәлок 9:12)
12 Һәгәр тӧ сәрԝахт и, әԝ кʹара тә йә у һәгәр пекʹәни йи, те зийане тʹәне бькʹьшини.
Мәрьвәки Билан бә, нә кӧ Ԛәрфкʹар
ԝ01 15/5 30 ¶1-2
Бь Сайа Биланийе Рʹожед Мә ԝе Зедә бьн
Реаксийа мәрьве билан сәр ширәткьрьне жь йа мәрьве ԛәрфкʹар щӧдә дьбә. Сьлеман ньвиси: «Йе сәрԝахт ширәт кә, әԝе тә һʹьз бькә. Йе сәрԝахт ширәт кә у әԝе һе сәрԝахт бә» (Мәтʹәлок 9:8б, 9а). Мәрьве билан занә, кӧ «рʹаст ә һәр ширәтәк ԝе дәме дьле мәрийа ша накә, ле дешинә, ле бәле паше йед кӧ бь ԝе һинбуйи нә, бәре әʹдьлайийе жь жийина рʹаст дьчьньн» (Ибрани 12:11). Һәмьки һеса нинә ширәтәке ԛәбул кьн, ле нәлазьм ә хԝә һәԛ дәрхьн у кʹине бажон, һәрге әв ширәт дькарә мә дьһа сәрԝахт кә.
Пʹадше билан Сьлеман сәрда зедә кьр: «Мәрьве рʹаст һин кә, занәбуна ԝийе һе зедә бә» (Мәтʹәлок 9:9б). Һинбун тʹӧ щар дәрәнг нинә, у билани һәр кәсирʹа лазьм ә. Шабунәкә чьԛас мәзьн ә, гава әм дьвиньн, кӧ мәрьв әʹмьре хԝәйи мәзьнда рʹастийе ԛәбул дькә у әʹмьре хԝә тʹәсмили Йаһоԝа дькә! Ԝәрә әм тʹьме һин бьн у биланийе ԛазанщ кьн.
ԝ01 15/5 30 ¶5
Бь Сайа Биланийе Рʹожед Мә ԝе Зедә бьн
Әв щабдарийа мә һәр кәси йә кӧ ԛәԝате бьдьнә хәбате, ԝәки биланийе ԛазанщ кьн. Сәва кӧ ве йәке кʹьфше кә, Сьлеман гот: «Һәгәр тӧ сәрԝахт и, әԝ кʹара тә йә у һәгәр пекʹәни йи, те зийане тʹәне бькʹьшини» (Мәтʹәлок 9:12). Һәрге мәрьв билан ә, әв йәк жерʹа кʹаре тинә, ле мәрьве ԛәрфкʹар рʹуйе шашийед хԝәда дьчәрчьрә. Мәрьв чь дьчинә, ве жи дьчьнә, ләма жи ԝәрә әм ‹гӧһ бьдьнә сәрԝахтийе› (Мәтʹәлок 2:2).
Хьзна Кʹьтеба Пироз
(Мәтʹәлок 9:17)
17 «Ава дьзийе ширьн ә, нане дьзива те хԝарьне тәʹм ә».
ԝ06 15/9 17 ¶5
Фькьред Сәрәкә жь Кʹьтеба Мәтʹәлок
9:17—Чь йә «ава дьзийе» у чьрʹа әв «ширьн ә»? Кʹьтеба Пироз һәләԛәтийа сексуали бәрамбәри аве дькә, йа кӧ жь бире дькʹьшә у мәрьва гәш дькә, ле «ава дьзийе», әв һәйә һәләԛәтийа бенамуси, йа кӧ дьзикава те кьрьне (Мәтʹәлок 5:15-17). Әв ав ширьн те кʹьфше, чьмки кʹе ве аве дьдьзә, дьфькьрә кӧ әԝе жь бо ве хьрабийа хԝә нәйе щәзакьрьне.
21-27 НИСАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 10
(Мәтʹәлок 10:4, 5)
4 Дәсте хԝәрʹанәдитийа мерьв бәләнгаз дькә, ле дәсте йе хирәт дәԝләти дькә. 5 Әԝе кӧ һавине дьдә ль сәр һәв, кӧрʹе билан ә, кӧрʹе кӧ дәма нандьруне рʹадьзе, әԝ ԛара баве йә.
(Мәтʹәлок 10:15, 16)
15 Һәбука дәԝләтийа бона ԝан, чаԝа бажарәки зор ә, ле пʹәришанийа фәԛира бәләнгазийа ԝан ә. 16 Кʹәда рʹаста жийин ә, ԛазьнщкьрьна нәпʹака гӧнә.
(Мәтʹәлок 10:22)
22 Дӧайе Хӧдан һәбуке дьдә у кʹәдәре сәрда зедә накә.
Чь бь Рʹасти Әʹмьр Дәԝләмәнд Дькә?
ԝ01 15/7 25 ¶1-3
Мәрьве Рʹаст Тенә Кʹәрәмкьрьне
Мәрьвед рʹаст бь щурʹәки майин жи тенә кʹәрәмкьрьне. «Дәсте хԝәрʹанәдитийа мерьв бәләнгаз дькә, ле дәсте йе хирәт дәԝләти дькә. Әԝе кӧ һавине дьдә ль сәр һәв, кӧрʹе билан ә, кӧрʹе кӧ дәма нандьруне рʹадьзе, әԝ ԛара баве йә» (Мәтʹәлок 10:4, 5).
Гьлийед Сьлеман илаһи бона ԝан мәрьва ԛимәт ьн, йед кӧ нандьрунеда кʹар дькьн. Нандьрун ԝәʹде һесабуне нинә. Ԝәʹде нандьруне гәрәке хԝә паш нәхьн, ле бь хирәт жь бәрбанге һʹәта еваре бьхәбьтьн.
Чахе Иса бәʹса нандьруне дькьр, әԝи нә кӧ дәрһәԛа гәньм дьгот, ле дәрһәԛа мәрьва. Әԝи готә шагьртед хԝә: «Шьхӧле нандьруне гәләк ә, ле хәбаткʹар һьндьк ьн. Ләма, һиви жь Хԝәйе нандьруне [Йаһоԝа Хԝәде] бькьн, ԝәки нандьруна хԝәрʹа хәбаткʹара бьшинә» (Мәтта 9:35-38). Сала 2000-да, 14 милйон мәрьв чунә сәр Евара Биранина мьрьна Иса Мәсиһ, демәк дӧ щара жь һәжмара Шәʹдед Йаһоԝа зедәтьр. Гәло әв йәк избат накә, ԝәки зәви ‹зәр буйә у бона дьруне һазьр ә›? (Йуһʹәнна 4:35) Хьзмәткʹаред Хԝәдейә рʹаст ль гора дӧайед хԝә бь хирәт нандьрунеда кʹар дькьн у шагьрта һазьр дькьн, у жь Хԝәйе хԝә лава дькьн, кӧ Әԝ дьһа зедә хәбаткʹара бьшинә, ԝәки кʹомәке бьдьнә ԝан (Мәтта 28:19, 20). Йаһоԝа щәфе ԝан гәләки кʹәрәм дькә! Сала 2000-да йа сала хьзмәтийе, 280 000 мәрьви зедәтьр һатьнә ньхӧмандьне. Әԝана жи хирәт дькьн кӧ бьбьнә дәрсдаред Хәбәра Хԝәде. Ԝәрә әм ԝәʹде нандьруне шабуне бьстиньн у бь тʹәмами кʹар бькьн ве йәкеда, кӧ шагьрта һазьр кьн.
ԝ01 15/9 24 ¶3-4
Рʹийа Рʹастда Һәрʹьн
Сьлеман да кʹьфше, ԝәки гәләк фәрз ә мәрьвнә рʹаст бьн. Әԝ дьбежә: «Һәбука дәԝләтийа бона ԝан, чаԝа бажарәки зор ә, ле пʹәришанийа фәԛира бәләнгазийа ԝан ә. Кʹәда рʹаста жийин ә, ԛазьнщкьрьна нәпʹака гӧнә» йә (Мәтʹәлок 10:15, 16).
Чаԝа кӧ диԝаред бажер дькарьн бьнәлийа бьпʹарезьн, ӧса жи һәбук дькарә дәрәщед чәтьнда мәрийа бьпʹарезә. Ле һәрге ԛәзи бе сәре мәрьве кʹәсиб, әв дькарә әʹмьре хԝә ӧнда кә (Ԝаиз 7:12). Пʹадше билан, Сьлеман, дьбәкә ӧса жи дьхԝәст бьгота, кӧ чаԝа кʹәсибийеда ӧса жи дәԝләмәндтийеда хофи һәйә. Мәрьве дәԝләмәнд дьбәкә гӧмана хԝә тʹәне бьдә сәр һәбука хԝә у бьфькьрә, кӧ һәбук «мина сурәкә бьльнд» дькарә ԝи бьпʹарезә (Мәтʹәлок 18:11). Ле мәрьве кʹәсиб дькарә шаш бә у бьфькьрә, кӧ гӧмана ԝи тʹӧнә, чьмки әԝ кʹәсиб ә. Бь ви щурʹәйи һәрдӧ жи наве баш бәр чʹәʹве Хԝәде ԛазанщ накьн.
it-1 340
Кʹәрәм
Йаһоԝа Мәрьва Кʹәрәм Дькә. «Дӧайе Хӧдан һәбуке дьдә у кʹәдәре сәрда зедә накә» (Мтʹл. 10:22). Йаһоԝа ԝан мәрьва кʹәрәм дькә, кʹижана кӧ ԛәбул дькә. Әԝ ԝана дьпʹарезә, рʹебәрийе дьдә ԝан, али ԝан дькә ԝәки пешдачуйи бьн у һʹәԝщед ԝан рʹази дькә, әв һʹәму тьшт тʹьме кʹаре ԝанрʹа тинә.
Хьзна Кʹьтеба Пироз
(Мәтʹәлок 10:22)
22 Дӧайе Хӧдан һәбуке дьдә у кʹәдәре сәрда зедә накә.
ԝ06 15/5 30 ¶18
Хԝәйкьрьна Амьнийе Шабуне Пешда Тинә
18 Хьзмәткʹаред Йаһоԝа рʹӧһʹанида пешда дьчьн, чьмки Йаһоԝа ԝана кʹәрәм дькә. У әм баԝәр ьн, кӧ әв кʹәрәм еше сәрда зедә накә (Мәтʹәлок 10:22). Ле һәрге ӧса нә, чьрʹа гәләк хьзмәткʹаред Хԝәдейә амьн рʹасти щурʹә-щурʹә чәтьнайа тен, чь кӧ еше у кӧл-дәрда ԝанрʹа тинә? Се мәʹнийед сәрәкә һәнә. 1) Гӧнәкʹарийа мә (Дәстпебун 6:5; 8:21; Аԛуб 1:14, 15). 2) Мире-щьна у щьнед ԝи (Әфәси 6:11, 12). 3) Әва дьнйа хьраб (Йуһʹәнна 15:19). Рʹаст ә, хьзмәткʹаред Йаһоԝа жь кӧл-дәрда хԝәйкьри ниньн, ле әв кӧл-дәрд жь Йаһоԝа ниньн. Бь рʹасти «һәр дайина ԛәнщ у һәр пʹешкʹеша кʹамьл жь жор ә, жь Бав, жь Әʹфьрандаре рʹонайа те хԝаре» (Аԛуб 1:17). Бәле, кʹәрәмед Йаһоԝа еше пешда найньн.
28 НИСАНЕ–4 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ МӘТʹӘЛОК 11
(Мәтʹәлок 11:9)
9 Мәрьве бехԝәде пе дәве хԝә һәвал-һогьра ӧнда дькә, ле йед рʹаст бь заньстийе хьлаз дьбьн.
(Мәтʹәлок 11:11)
11 Бь дӧайе рʹаста бажар гӧл дьдә, ле бь дәве нәпʹака хьраб дьбә.
(Мәтʹәлок 11:12, 13)
12 Кемаԛьл щинаре хԝә беһӧрмәт дькә, ле мәрьве аԛьл хԝә кәрʹ дькә. 13 Гьлигәрʹо сӧрʹе әʹйан дькә, ле ширһʹәлал ԝе йәке вәдьшерә.
Мьԛати Хәбәрдана Хԝә бьн!
ԝ02 15/5 26 ¶4
Амьни Рʹебәрийа Мәрьвед Рʹаст Дькә
Амьнийа мәрьвед рʹаст у ԛәлпийа мәрьвед хьраб сәр кәсед дьн жи һʹӧкӧм дькә. «Мәрьве бехԝәде пе дәве хԝә һәвал-һогьра ӧнда дькә, ле йед рʹаст бь заньстийе хьлаз дьбьн» (Мәтʹәлок 11:9). Кʹе дькарә инкʹар кә, ԝәки чʹьловиск, бӧхдан, гьлийед хьраб у хәбәрдана пʹучʹ, зийане дьдә? Мәрьвед рʹаст гьлийед ӧса дьдьнә хәбате, йед кӧ тʹәмьз, гьран у бь ԛәдьр ьн. Занәбун али мәрьвед рʹаст дькә у ԝана сәрԝахт дькә, кӧ дәрәԝийа бӧхданбежа тедәрхьн.
ԝ02 15/5 27 ¶2-3
Амьни Рʹебәрийа Мәрьвед Рʹаст Дькә
Бьнәлийед бажер, йед кӧ хԝә ль рʹийа рʹаст гьртьнә, әʹдьлайе пешда тиньн, кәсед дьн һелан у ԛәԝи дькьн. Бь сайа ве йәке бажар пешдачуйи дьбә. Ле мәрьвед кӧ бӧхдана давежә кәсед дьн у дьле мәрьва дешиньн, хәмгини, щӧдәти, нәфәʹмдари у зьраре пешда тиньн, илаһи һәрге әԝ мәрьв щийед бьльнд дьгьрьн. Шәһәред ӧсада ԝе тʹьме тʹәвльһәвбун у рʹӧшәт зедә бә, ле алийе нав-намусийе у економикеда дькарә бькʹәвә.
Принсипа жь Мәтʹәлок 11:11, дькарьн бона щьватед мә жи бьдьнә хәбате. Ван щьватада, кʹидәре кӧ мәрьвед рʹӧһʹани у амьн һәнә, тʹьме шабун, хирәт у һәвкʹари һәйә. Әв һәр тьшт пәсьне Йаһоԝа дьдә у Әԝ жь алийе хԝәда щьватед ӧса кʹәрәм дькә у әԝана рʹӧһʹанида пешда дьчьн. Ле щарна һьнә мәрьв дькарьн нәԛайилбун у нәрʹазибуне һьндава щьватеда бьдьнә кʹьфше. Мәрьвед ӧса дьбьнә мина кʹокәкә «тәʹл», йа кӧ гава шин дьбә, кәсед дьн жәʹрдадайи дькә (Ибрани 12:15). Мәрьвед ӧса гәләк щар дьхԝазьн щийе бьльнд бьгьрьн, у ӧса жи гьлийа бәла дькьн, кӧ рʹуспийед щьвате у хушк-бьра һәԛийе накьн, фьрԛийе дькьн ортʹа мьләта у ӧса жи тьштед дьн. Хәбәрдана ԝан дькарә тʹәвльһәвбуне бькә щьвате. Дәԝса кӧ гӧһ бьдьнә ԝан мәрьва, дьһа баш ә әм рʹӧһʹанида пешда һәрʹьн у щьватеда йәкти у әʹдьлайе хԝәй кьн.
ԝ02 15/5 27 ¶5
Амьни Рʹебәрийа Мәрьвед Рʹаст Дькә
Дә бьдьнә һʹәсабе хԝә, ԝәки мәрьвед кӧ сәрԝахти тʹера ԝан накә, дькарьн зийанәкә чьԛас мәзьн биньн. Хәбәрдана ԝанә нәщайиз, бӧхдан у нәԛайилбуне пешда тинә. Рʹуспи гәрәке дәрберʹа ве йәке тедәрхьн у нәһельн кӧ әв йәк бәла бә. Сәрԝахти тʹера мәрьве кемаԛьл накә, ле йе аԛьл хԝә кәрʹ дькә у «сӧрʹе әʹйан» накә, ле «вәдьшерә». Мәрьве аԛьл занә, кӧ һәрге әԝ зьмане хԝә нькарьбә, әԝ йәк дькарә зийане бинә, ләма жи әԝ хушк-бьрарʹа амьн ә. Сәва кӧ зийане нәдә ԝан, әԝ дәрһәԛа ԝан гьлийа бәла накә. Бь рʹасти жи мәрьвед амьн бона щьвате кʹәрәмәкә мәзьн ьн!
Хьзна Кʹьтеба Пироз
(Мәтʹәлок 11:17)
17 Мәрьве рʹәʹм ԛәнщийе ль хԝә дькә, ле мәрьве берʹәʹм хьрабийе ль хԝә дькә
g20.1 11, чаргошә
Чаԝа Стресе Алт кьн
«БЬ ԚӘНЩИЙЕ СТРЕСЕ АЛТ КӘ»
«Мәрьве рʹәʹм ԛәнщийе ль хԝә дькә, ле мәрьве берʹәʹм хьрабийе ль хԝә дькә» (МӘТʹӘЛОК 11:17).
Кʹьтебәкеда һәйә сәри бь наве «Бь Ԛәнщийе Стресе Алт кә» (Overcoming Stress). Ль гора гьлийед авторе ве кʹьтебе, Тим Кантофер, гава мәрьв һьндава кәсед дьнда ԛәнщ ә, әԝ дьһа бәхтәԝар у сьһʹәт-ԛәԝат ә. Ле мәрьве һерс у сәрт, бәхтәԝар нинә, чьмки кәсед дьн хԝә дури ԝи дьгьрьн.
Хенщи ве йәке, әм дькарьн стреса хԝә кем кьн, һәрге һьндава хԝәда жи ԛәнщ бьн. Мәсәлә, нәлазьм ә гәләк тьштед нәреали жь хԝә дәʹԝа кьн у нәлазьм ә хԝә бекер һʹәсаб кьн. Иса гот: «Мәрьва һʹәз бькә чаԝа тӧ хԝә һʹәз дьки» (Маркос 12:31)
17 Гӧһдарийа рʹебәред хԝә бькьн у гӧрʹа ԝанда бьн. Әԝана бона рʹӧһʹе ԝә хәԝе жь чʹәʹве хԝә дькьн, чьмки ԝе бона ԝә щабдар бьн. Бьра әԝ ԝи шьхӧле хԝә әшԛ у ша бькьн, нә кӧ бь офә-офе, чьмки әԝ йәк кʹаре надә ԝә.