1. Пʹехәмбәртийа Кʹьтеба Пироз чь мәрʹа әʹйан дькә?

ЗУТЬРӘКЕ щьмәʹта Йаһоԝа ԝе рʹасти чь бе? Әм һаш жь ве йәке һәнә. Пʹехәмбәртийед Кʹьтеба Пироз мәрʹа әʹйан дькьн дәрһәԛа ԛәԝьмандьнед фәрз, кӧ ԝе сәр мә һәр кәси һʹӧкӧм бьн. Пʹехәмбәртик мәрʹа әʹйан дькә, кӧ һьнә сәрԝертийед лапә ԛәԝат ԝе чь бькьн. Әв пʹехәмбәрти Данийел сәре 11-да ньвисар ә, у гьли дькә дәрһәԛа дӧ пʹадшед кӧ һәврʹа дьжмьнатийе дькʹьшиньн, әԝ һәнә пʹадше бакӧре у пʹадше башуре. Әв пʹехәмбәрти ниве зәʹф ида һатийә сери, ләма әм дӧдьли ниньн, ԝәки чь кӧ майә, әԝ жи ԝе әʹсә бе сери.

2. Ль гора Дәстпебун 3:15 у Әʹйанти 11:7 у 12:17, әм гәрәке чь бира хԝәда хԝәй кьн, гава пʹехәмбәртийа Данийел леколин дькьн?

² Сәва әм пʹехәмбәртийа Данийел жь сәре 11 фәʹм кьн, әм гәрәке бир нәкьн, ԝәки ԝедәре те готьне дәрһәԛа ԝан сәрԝер у сәрԝертийа, йед кӧ хут пәй щьмәʹта Хԝәде дькʹәтьн. Рʹаст ә һәжмара хьзмәткʹаред Хԝәде һьмбәри бьнәлийед тʹәмамийа дьнйайе гәләк бьчʹук ә, йәкә әԝана дькʹәвьнә чʹәʹва. Чьрʹа? Чьмки әԝана бәр чʹәʹве Шәйтʹан у дьнйа ԝи рʹәш ьн, у ләма нета ԝан әԝ ә кӧ ԛьрʹа хьзмәткʹаред Йаһоԝа биньн. (Бьхунә Дәстпебун 3:15 у Әʹйанти 11:7; 12:17.) Хенщи ве йәке, пʹехәмбәртийа жь кʹьтеба Данийел гьредайи йә тʹәви пʹехәмбәртийед майин. Ләма жи сәва әве пʹехәмбәртийе рʹаст фәʹм кьн, әм гәрәке бәрамбәри рʹезед дьн бькьн.

3. Әме ве готареда у готара дьнда дәрһәԛа чь пебьһʹәсьн?

³ Ве готареда әме шеԝьр кьн кʹьтеба Данийел 11:25-39. Әме пебьһʹәсьн кӧ жь сала 1870 һʹәта сала 1991 пʹадше бакӧре у пʹадше башуре кʹе бун, у әме бьвиньн, кӧ чьрʹа лазьм ә фәʹмкьрьна хԝә һьндава ве пʹара пʹехәмбәртийе, бьгӧһезьн. Ле готара дьнда, әме шеԝьр кьн кӧ пʹара дьн йа ве пʹехәмбәртийе, кʹижан Данийел 11:40–12:1-да ньвисар ә, чь әʹйан дькә дәрһәԛа ԝәʹде жь сала 1991 дәстпекьри һʹәта шәрʹе Һармәгәдоне. Ԝәʹде леколинкьрьна ван дӧ готара, ԝе баш бә дина хԝә бьдьнә чаргоша бь наве «Рʹожед Ахьрийеда Дӧ Пʹадша Һәврʹа Дькʹәвьнә Һʹӧщәте». Йа пешьн, ԝәрә әм пебьһʹәсьн, дӧ пʹадша ве пʹехәмбәртийеда кʹе нә.

ЧА ТЕДӘРХЬН КӦ КʹЕ ЙӘ ПʹАДШЕ БАКӦРЕ У ПʹАДШЕ БАШУРЕ

4. Кʹижан се тьшт али мә дькьн ԝәки тедәрхьн, кӧ кʹе нә пʹадше бакӧре у пʹадше башуре?

⁴ Сәрнав «пʹадше бакӧре» у «пʹадше башуре» пешийе сәр ԝан сәрԝера дьһатә готьне, йед кӧ ԝан щийа пʹадшати дькьрьн, кӧ жь Исраеле алийе бакӧре у башуре бун. Ле чьрʹа әм ӧса дьбежьн? Дина хԝә бьдьне, кӧ мәләк Данийелрʹа чь гот: «Әз һатьм кӧ, кʹа ԝе рʹожед даԝинда чь бе сәре нәтәԝа [щьмәʹта] тә әз тәрʹа бежьм» (Дан. 10:14). Һʹәта Пенщийә Һʹәсабе сала 33 Д.М., мьләте Исраел щьмәʹта Хԝәде бу. Паше Йаһоԝа әшкәрә кьр, ԝәки ида шагьртед Исайи амьн бунә щьмәʹта ԝи. Ләма жи пʹехәмбәртийа Данийел жь сәре 11, дьһа зәʹф нә кӧ дәрһәԛа мьләте Исраеле йә, ле дәрһәԛа шагьртед Мәсиһ йә (Кʹар. Шанд. 2:1-4; Рʹом. 9:6-8; Галт. 6:15, 16). У щурʹә-щурʹә ԝәʹдәда, щурʹә-щурʹә сәрԝер дьбунә пʹадше бакӧре у пʹадше башуре, ле әԝана се тьштада нәдьһатьнә гӧһастьне. Йа пешьн, әԝ һәрдӧ пʹадша пәй щьмәʹта Хԝәде дькʹәтьн. Йа дӧда, әԝ йәк кӧ әԝана ча бун һьндава щьмәʹта Хԝәде, дьда кʹьфше кӧ әԝана Хԝәдейе рʹаст Йаһоԝа нәфрʹәт дькьн. У йа сьсийа, әв һәрдӧ пʹадша бона һʹӧкӧмтийе һәврʹа дькʹәтьнә һʹӧщәте.

5. Жь сала 100 һʹәта сала 1870, гәло пʹадше бакӧре у пʹадше башуре һәбун? Шьровәкьн.

⁵ Ԛьрʹна дӧдада Д.М., Мәсиһийед ԛәлп кʹәтьнә нава щьвата Мәсиһитида. Әԝана һинкьрьнед пʹутпарьста бәла дькьрьн у рʹастийед жь Хәбәра Хԝәде вәдьшартьн. Жь ԝи ԝәʹдәйи, һʹәта хьлазийа ԛьрʹна 19, сәр әʹрде тʹәшкиләта Хԝәде тʹӧнә бу. Мәсиһийед ԛәлп мина зиԝана гәләк бәла бун, ләма жи чәтьн бу тедәрхьн, кӧ бь рʹасти Мәсиһийед рʹаст кʹе нә (Мәт. 13:36-43). Ча те кʹьфше жь сала 100 һʹәта сала 1870 пʹадше бакӧре у пʹадше башуре тʹӧнә бун, чьмки ԝи чахи тʹәшкиләта Хԝәде тʹӧнә бу, кӧ ԝана һʹьщуми сәр кьрана.b Ле паши сала 1870 пʹадше бакӧре у пʹадше башуре хӧйа бун. Чьрʹа әм ӧса дьбежьн?

6. Кʹәнге щьмәʹта Хԝәде диса әʹйан бу? Шьровәкьн.

⁶ Жь дәстпека сала 1870 щьмәʹта Хԝәде дәстпекьр саз бә ча кʹом. Ве сале Чарлз Т. Рассел у пьштгьред ԝи, кʹома леколинкьрьна Кʹьтеба Пироз саз кьрьн. Ль гора пʹехәмбәртийе Рассел бьра у һәвалед ԝи бунә «әʹламчи», кʹижани кӧ пешийа сазбуна Пʹадшатийа Мәсиһити рʹе һазьр кьр (Малх. 3:1, ДТʹ). Һьнгеда щьмәʹта Хԝәде диса әʹйан бу! Ле гәло ԝи ԝәʹдәйи һәбунә сәрԝертийед ӧса, кӧ пәй хьзмәткʹаред Хԝәде дькʹәтьн? Бәле, һәбун у ԝәрә әм шеԝьр кьн кӧ әм ве йәке жь кʹӧ заньн.

ПʹАДШЕ БАШУРЕ КʹЕ ЙӘ?

7. Һʹәта сала 1917, пʹадше башуре кʹе бу?

⁷ Жь сала 1870, Британйа бу империйа һʹәмдьнйайе, ордийед кʹижани лапә ԛәԝи у мәзьн бун. Пʹехәмбәртийеда әԝ империйа бь симболик ча стьруки бьчʹук бу, кʹижан се стьруйед майин рʹакьр, демәк Франса, Испанйа у Нидерланд (Дан. 7:7, 8). Һʹәта сала 1917, Британйа пʹадше башуре бу. Ԝи ԝәʹдәйи, нава дьнйайеда Америка бу ԝәлатәки лапи дәԝләти, у дәстпекьр тʹәви Британйайе һәвкʹарийе бькә.

8. Ԝан рʹожед ахьрийеда кʹе йә пʹадше башуре?

⁸ Шәрʹе Һʹәмдьнйайе I-да, Америкайе у Британйайе ԛәԝата хԝә кьрьнә йәк у бунә пьштгьред һәв. Һьнгеда Британйа у Америка тʹәвайи бунә Империйа Англо-Америкайа Һʹәмдьнйайе. Ча Данийел пʹехәмбәрти кьр, әв пʹадше башуре «артешәки [ордикә] мәзьн у зәʹф хԝӧрт [ԛәԝи]» тʹоп кьр (Дан. 11:25). Нава ԝан рʹожед ахьрийеда, Англо-Америка пʹадше башуре йә.c Ле кʹе бу пʹадше бакӧре?

КʹЕ БУ ПʹАДШЕ БАКӦРЕ?

9. Кʹәнге пʹадше бакӧре диса хӧйа бу, у Данийел 11:25 ча һатә сери?

⁹ Чахе Рассел у һәвалед ԝи кʹома леколинкьрьна Кʹьтеба Пироз саз кьрьн, паше сала 1871 пʹадше бакӧре диса хӧйа бу. Ве сале политик Отто фон Бисмарк, чәнд регион кьрә йәк, у ӧса Алманйа бу Империйа ԛәԝи. Пʹадшаки жь ԝан региона, бь наве Ԝилһелм I, бу императоре пешьн, у әԝи Бисмарк кʹьфш кьр ча сәрокԝәзире пешьн.d Бь дәһа сала шунда, Алманйа дьһа ԛәԝат бу у ԝәлатед Африкайе у територийед Окйануса Мәзьн кьрә бьн дәсте хԝә. Әԝ хԝәст жь Британйайе ԛәԝаттьр бә. (Бьхунә Данийел 11:25.) Әԝи ордийа хԝә ԛәԝи у мәзьн кьр. У шәрʹе һʹәмдьнйайе йәкеда, Алманйайе пе ордийа хԝәйә мәзьн, мьԛабьли дьжмьнед хԝә шәрʹ дькьр.

10. Данийел 11:25б, 26, ча һатә сери?

¹⁰ Паше Данийел пʹехәмбәртийе дькә, ԝәки чь ԝе бе сәре Империйа Алманйайе у ордийа ԝийә мәзьн. Ве пʹехәмбәртийеда дәрһәԛа пʹадше бакӧре те готьне, кӧ әԝ «ԝе нәсәкьнә», демәк ԝе нәминә. Ле мәʹни ԝе чь буйа? Данийел дьбежә кӧ әԝана ԝе мьԛабьли ԝи «дәкʹ у долаба дайньн. Йед хԝарьна ԝийи хԝәшьк хԝарьнә жи ԝи бьшкеньн» (Дан. 11:25б, 26а). Ԝәʹде Данийелда, әԝед кӧ «хԝарьнед хԝәшьк йед ԛьрал» дьхԝарьн, әԝ бун, йед кӧ бәр пʹадша дьсәкьнин у щийе бьльнд дьгьртьн (Дан. 1:5). Ле ве пʹехәмбәртийеда кʹе бун йед кӧ хԝарьнед пʹадша дьхԝарьн? Әԝана әԝ бун, кʹижан кӧ Империйа Алманйайеда щийе бьльнд дьгьртьн, мәсәлә генералед императоре у шеԝьрдаред әскәри. Әԝ мәрьвед кӧ Империйа Алманйайеда щийе бьльнд дьгьртьн, тьштед ӧса кьрьн, кӧ пʹадша һʹӧкӧме хԝә ӧнда кьр у империйа һьлшийа.e Данийел нә тʹәне дәрһәԛа һьлшандьна ве империйайе пʹехәмбәрти кьр, ле ӧса жи дәрһәԛа ахьрийа шәрʹе ԝе тʹәви пʹадше башуре. Пʹехәмбәртийеда дәрһәԛа пʹадше бакӧре, һатийә готьне: «Ԝе артеша ԝи бәлав бьбә у гәләка ԝе бен лехьстьн у бькʹәвьн» (Дан. 11:26б). Чаԝа кӧ һатьбу пʹехәмбәртикьрьне, шәрʹе һʹәмдьнйайе йәкеда, ордийа Алманйайе һәв бәла бу у гәләк мәрьв һатьнә кӧштьне. Нава тʹәрихийа инсанәтеда тʹӧ щар һаԛас мәрьв шәрʹда нәмьрьнә.

11. Пʹадше бакӧре у пʹадше башуре чь кьрьн?

¹¹ Дәрһәԛа ԝәхте пешийа Шәрʹе Һʹәмдьнйайе I, Данийел 11:27, 28-да те готьне, кӧ пʹадше бакӧре у пʹадше башуре ԝе бәр «сьфрәке дәрәԝа» бежьн. Ӧса жи кʹьтеба Данийелда те готьне, ԝәки пʹадше бакӧре ԝе хԝәрʹа һәбука мәзьн тʹоп кә. Әԝ пʹехәмбәрти һәма ӧса һатә сери. Ле чь щурʹәйи? Алманйайе у Британйайе һәврʹа готьн кӧ әʹдьлайе дьхԝазьн, ле әв готьнед ԝан дәрәԝ дәркʹәтьн чахе сала 1914-да шәрʹе һʹәмдьнйайеда ԝана дәстпекьр тʹәви һәв шәрʹ кьн. Ле пешийа сала 1914, нав тʹәмамийа дьнйайеда Алманйайе алийе дәԝләтибунеда щийе дӧда дьгьрт. Паше Алманйа, демәк пʹадше бакӧре, шәрʹ кьр тʹәви пʹадше башуре, ле әԝи да дәр, чаԝа кӧ һатьбу пʹехәмбәртикьрьне Данийел 11:29 у 30а-да.

ӘԜ ҺӘРДӦ ПʹАДША ПӘЙ ЩЬМӘʹТА ХԜӘДЕ ДЬКʹӘВЬН

12. Шәрʹе һʹәмдьнйайе пешьнда, пʹадше бакӧре у пʹадше башуре чь дькьрьн?

¹² Жь сала 1914, әԝ һәрдӧ пʹадша һәврʹа дькʹәтьнә ләще у һәрдӧ жи пәй щьмәʹта Хԝәде дькʹәтьн. Мәсәлә, шәрʹе һʹәмдьнйайе пешьнда, дәԝләта Алманйайе у Британйайе пәй хьзмәткʹаред Хԝәде дькʹәтьн, чьмки ԝана инкʹар дькьр шәрʹда мәрьва бькӧжьн. У дәԝләта Америкайе жи бьред кӧ рʹебәрийа шьхӧле бәлакьрьна мьзгинийе дькьрьн, кьрә кәле. Бь ве йәке пʹехәмбәртийа жь Әʹйанти 11:7-10 һатә сери.

13. Жь дәстпека сала 1933 у ԝәʹде шәрʹе һʹәмдьнйайе дӧда, пʹадше бакӧре чь кьр?

¹³ Паше, ида жь дәстпека сала 1933, у илаһи ԝәʹде шәрʹе һʹәмдьнйайе дӧдада, пʹадше бакӧре щьмәʹта Хԝәде гәләк дьзеранд. Чахе партийа Натсиста, Алманйа һьлданә бьн дәсте хԝә, Һитлер у пьштгьред ԝи, шьхӧле щьмәʹта Хԝәде ԛәдәхә кьрьн. Ԝана бь сәда хьзмәткʹаред Йаһоԝа кӧштьн, у бь һʹәзара зедәтьр кьрьнә гьртигәһе. Данийел дәрһәԛа ԝан зерандьна пʹехәмбәрти кьрьбу. Пʹадше бакӧре шьхӧле бәлакьрьна мьзгинийе ԛәдәхә кьр, у бь ве йәке бь симболик «пʹарьстгәһ» һʹәрам кьр у ԛӧрбанед кӧ тʹьме дьанин, да һьлдане (Дан. 11:30б, 31а). Сәроке ԝи, Һитлер, һәла һе сонд жи хԝар, кӧ ԝе Алманйайеда ԛьрʹа һʹәму хьзмәткʹаред Хԝәде бинә.

ПʹАДШЕ БАКӦРЕЙИ ТʹӘЗӘ ХӦЙА ДЬБӘ

14. Кʹе бьбу пʹадше бакӧре паши шәрʹе һʹәмдьнйайе дӧда? Шьровәкьн.

¹⁴ Паши шәрʹе һʹәмдьнйайе дӧда, дәԝләта Комунисти йа Йәктийа Совйәте, һʹәчʹи зәʹф територийа кӧ Алманйайе зәфт кьрьбу, һьлда бьн дәсте хԝә у бу пʹадше бакӧре. Мина Натсистед берʹәʹм, Йәктийа Совйәте жи әшкәрә нишан кьр, кӧ чьԛас нәфрʹәт дькә ԝан мәрьва, йед кӧ Хԝәдейе рʹаст дьһʹәбиньн у ԛьрара ԝи датиньн щийе пешьн.

15. Чахе Шәрʹе Һʹәмдьнйайе II хьлаз бу, пʹадше бакӧре чь кьр?

¹⁵ Чахе Шәрʹе Һʹәмдьнйайе II хьлаз бу, һьнә ԝәʹдә шунда Йәктийа Совйәте у пьштгьред ԝе, демәк пʹадше бакӧрейи тʹәзә, һʹьщуми сәр щьмәʹта Хԝәде кьр. Ль гора пʹехәмбәртийа жь Әʹйанти 12:15-17, әви пʹадшайи шьхӧле бәлакьрьна мьзгинийе ԛәдәхә кьр у бь һʹәзара хьзмәткʹаред Йаһоԝа аксор кьр. Бь рʹасти нава ԝан рʹожед ахьрийеда, пʹадше бакӧре ча бежи «лейа» зерандьне сәр ԝанда ани, сәва шьхӧле щьмәʹта Хԝәде бьдә сәкьнандьне, ле жерʹа һәв нәһат.f

16. Пʹехәмбәртийа жь Данийел 11:37-39, ча сәр Йәктийа Совйәте һатә сери?

¹⁶ Бьхунә Данийел 11:37-39. Ль гора ве пʹехәмбәртийе пʹадше бакӧре һьндава «Хԝәдейе кал-бавед хԝә, ДТʹ», ԛәдьр нишан нәкьр. Чь щурʹәйи? Йәктийа Совйәте пе ве нете кӧ кʹока религийа бинә, һәр тьшт дькьр сәва ԛәԝата тʹәшкиләтед религи сьст кә. Ләма жи сәрԝеред Совйәте бона ве йәке һәла һе жь сала 1918 фәрманәки ӧса дан, кʹижан кӧ һʹим дани ԝәки мәкʹтәбада атеизм бе һинкьрьне. Ле ль гора пʹехәмбәртийе, пʹадше бакӧре ча пәсьн да хӧдане «бьрща»? Йәктийа Совйәте беһʹәсаб пʹәрә хәрщ кьр, сәва ордийа хԝә ԛәԝи кә, у бь һʹәзара бомбед атоме чекьр, ԝәки ԛәԝата хԝә мәзьн кә. Һьн пʹадше бакӧре һьн жи пʹадше башуре, ахьрийеда хԝәрʹа чʹәкед ӧса ԛәԝи тʹоп кьрьн, кӧ дькарьн ԛьрʹа бь милйарда мәрьва биньн!

ҺӘВКʹАРИЙА ДӦ ПʹАДША

17. «Тьште мәкруһ йе кӧ хьраб дькә», бь симболик чь те һʹәсабе?

¹⁷ Пʹадше бакӧре тʹәне тьштәкида пьштгьрийа пʹадше башуре кьр: Әԝана һәрдӧ жи «тьште мәкруһ йе кӧ хьраб дькә» ава кьрьн (Дан. 11:31). Әԝ «тьште мәкруһ», демәк тьште һʹәрам, бь симболик те һʹәсабе тʹәшкиләта Мьләтед Йәкбуйи.

18. Чьрʹа сәр Мьләтед Йәкбуйи те готьне «тьште мәкруһ»?

¹⁸ Тʹәшкиләта Мьләтед Йәкбуйи бь симболик те һʹәсабе «тьште мәкруһ» йане һʹәрам, чьмки әԝ әʹлам дькә, ԝәки дькарә ве йәке бькә, чь кӧ тʹәне Пʹадшатийа Хԝәде дькарә бькә, демәк әʹдьлайе бинә сәр әʹрде. Ве пʹехәмбәртийеда ӧса жи те готьне, ԝәки әв тьште һʹәрам, демәк тʹәшкиләта Мьләтед Йәкбуйи, ԝе һʹәму религийед ԛәлп кʹӧта кә (Бьньһерʹә чаргошә «Рʹожед Ахьрийеда Дӧ Пʹадша Һәврʹа Дькʹәвьнә Һʹӧщәте»).

ЧЬРʹА ӘМ ГӘРӘКЕ ӘВЕ ТʹӘРИХИЙЕ БЬЗАНЬБЬН?

19-20. а) Чьрʹа әм гәрәке әве тʹәрихийе бьзаньбьн? б) Щаба кʹижан пьрсе әме готара майинда пебьһʹәсьн?

¹⁹ Әм гәрәке әве тʹәрихийе бьзаньбьн, чьмки әԝ избат дькә кӧ жь сала 1870 һʹәта сала 1991, пʹехәмбәртийа Данийел дәрһәԛа пʹадше бакӧре у пʹадше башуре һатийә сери. Ләма жи әм баԝәр дькьн, кӧ пʹара ве пʹехәмбәртийе йа кӧ майә, әԝ жи ԝе бе сери.

²⁰ Сала 1991, Йәктийа Совйәте һьлшийа. Ле кʹе йә иро пʹадше бакӧре? Щаба ве пьрсе әме готара майинда пебьһʹәсьн.

1-2. Әме ве готареда дәрһәԛа чь шеԝьр кьн?

ӘМ Хьлазийа рʹожед ахьрийеда дьжин, у һе әшкәрә избаткьрьнед ве йәке дьвиньн. Зутьрәке, Йаһоԝа у Иса ԝе ԛьрʹа һʹәму сәрԝертийед мәрьва биньн, кʹижан кӧ мьԛабьли Пʹадшатийа Ԝи дәртен. Һʹәта әԝ рʹож бе, пʹадше бакӧре у пʹадше башуре ԝе бәрдәԝам кьн һәврʹа бькʹәвьнә һʹӧщәте у һьн жи пәй щьмәʹта Хԝәде кʹәвьн.

² Ве готареда әме пʹехәмбәртийа жь Данийел 11:40–12:1 шеԝьр кьн. Әме пебьһʹәсьн кӧ иро кʹе йә пʹадше бакӧре у чьрʹа әм гәрәке нәтьрсьн чахе рʹасти тәнгасийа бен, йед кӧ пешийа мә нә.

ПʹАДШЕ БАКӦРЕЙИ ТʹӘЗӘ ӘʹЙАН ДЬБӘ

3-4. Иро пʹадше бакӧре кʹе йә? Шьровәкьн.

³ Сала 1991-да Йәктийа Совйәте һьлшийа. Һьнге хьзмәткʹаред Хԝәде кӧ бьн сәрԝертийа ԝеда дьжитьн, һьнәки «аликʹари» стандьн, демәк ԝәхтәки азайеда бун (Дан. 11:34). Бь сайа ве йәке, ԝана аза мьзгини бәла дькьр, у зутьрәке ԝан ԝәлатада, кʹижан бәре дькʹәтьнә Йәктийа Совйәте, һәжмара мьзгинвана бь сәда һʹәзара зедә бу. Ԝәʹдә шунда, Русйа у ԝәлатед кӧ пьштгьрийа ԝе дькьн, бунә пʹадше бакӧре. У чаԝа мә готара пешийа ԝеда шеԝьр кьр, сәва тедәрхьн кӧ пʹадше бакӧре у пʹадше башуре кʹе нә, әм гәрәке бир нәкьн кӧ кʹижан се тьштада әԝана найенә гӧһастьне: 1) әԝана мьԛабьли щьмәʹта Хԝәде дәрдькʹәвьн, 2) пе ԝан кьред хԝә әԝана әшкәрә дькьн кӧ дьжмьнед Хԝәде у щьмәʹта ԝи нә, у 3) әԝ һәрдӧ пʹадша һәврʹа дькʹәвьнә һʹӧщәте.

⁴ Дина хԝә бьдьне, кӧ чьрʹа әм дьбежьн, ԝәки иро Русйа у пьштгьред ԝе, пʹадше бакӧре нә. 1) Әԝана пәй щьмәʹта Хԝәде кʹәтьнә бь ве йәке, кӧ шьхӧле бәлакьрьна мьзгинийе ԛәдәхә кьрьнә, у бь сәда һʹәзара хушк-бьра дьзериньн, кʹижан дьжин ль щийед кӧ бьн контрола ԝанда ньн. 2) Әв кьред ԝан нишан дькьн, ԝәки әԝана Йаһоԝа у щьмәʹта ԝи нәфрʹәт дькьн. 3) Әԝана сәва һʹӧкӧме хԝә зедә кьн, дькʹәвьнә һʹӧщәте тʹәви пʹадше башуре, демәк Англо-Америка Империйа Һʹәмдьнйайе. Ԝәрә әм пебьһʹәсьн, ԝәки Русйа у пьштгьред ԝе, ча бунә пʹадше бакӧре.

ПʹАДШЕ БАКӦРЕ У ПʹАДШЕ БАШУРЕ ДИСА ҺӘВРʹА ДЬКʹӘВЬНӘ ҺʹӦЩӘТЕ

5. Данийел 11:40-43-да, дәрһәԛа кʹижан ԝәхти те готьне, у чь дьԛәԝьмә ԝи ԝәʹдәйи?

⁵ Бьхунә Данийел 11:40-43. Ве пʹехәмбәртийеда те готьне дәрһәԛа ԝәхте даԝине, демәк рʹожед ахьрийе. Ԝан рʹезада ӧса жи те кʹьфше һʹӧщәтийа пʹадше бакӧре у пʹадше башуре. У ль гора пʹехәмбәртийа Данийел, хьлазийа рʹожед ахьрийеда, пʹадше башуре ԝе тʹәви пʹадше бакӧре «шәрʹ» бькә (Дан. 11:40).

6. Чь избат дькә кӧ һәрдӧ пʹадша һәврʹа дькʹәвьнә һʹӧщәте?

⁶ Пʹадше бакӧре у пʹадше башуре бәрдәԝам дькьн һәврʹа бькʹәвьнә һʹӧщәте, сәва һʹӧкӧме хԝә сәр дьнйайе мәзьн кьн. Мәсәлә, дина хԝә бьдьн чь ԛәԝьми паши Шәрʹе Һʹәмдьнйайе II чахе Йәктийа Совйәте у пьштгьред ԝе ниве Әԝропайе зедәтьр кьрьнә бьн дәсте хԝә. Әԝ кьред пʹадше бакӧре, мәщбур кьрьн пʹадше башуре, ԝәки тʹәви ԝәлатед дьн пәйман гьредә, сәва ордийед хԝә бькьнә йәк, у ӧса тʹәшкиләта бь наве НАТО саз бу. Пʹадше бакӧре у пʹадше башуре бәрдәԝам дькьн һәврʹа дькʹәвьнә һʹӧщәте бь ве йәке, кӧ пʹәре ԛальм хәрщ дькьн, сәва чʹәкед ԝанә лапә ԛәԝи һәбьн. Пʹадше бакӧре тʹәви пʹадше башуре дькʹәтә һʹӧщәте ӧса жи бь ве йәке, кӧ ԝәʹде шәрʹа пьштгьрийа дьжмьнед ԝи дькьр Африкайеда, Асйайеда, у Америкайа Латинида. Ԝан салед пашԝәхтийеда, Русйа у пьштгьред ԝе һʹӧкӧме хԝә дьнйайеда һе зедә дькьн. Пʹадше бакӧре у пʹадше башуре һәв нәһәԛ дькьн ве йәкеда, кӧ пе програмед компӧтәре зийане дьдьнә система һәвә економики у политики. Ль гора пʹехәмбәртийа Данийел, пʹадше бакӧре ӧса жи бәрдәԝам дькә пәй щьмәʹта Хԝәде кʹәвә (Дан. 11:41).

ПʹАДШЕ БАКӦРЕ ДЬКʹӘВӘ «ԜӘЛАТЕ ХԜӘШЬК»

7. Чь йә «ԝәлате хԝәшьк»?

⁷ Данийел 11:41 дьбежә, ԝәки пʹадше бакӧре ԝе бькʹәвә «ԝәлате хԝәшьк». Әԝ чь ԝәлат ә? Бәре ԝәлате Исраеле әʹйан бу ча «хәмла һʹәму ԝәлата» (Һәзԛл. 20:6). Хенщи ве йәке, әв ԝәлат гәләк мәхсус бу, чьмки мәрьвед ԝедәре Йаһоԝа дьһʹәбандьн. Ле жь сала 33 Д.М., әв ида бь симболик «ԝәлат» ә, чьмки иро щьмәʹта Йаһоԝа сәр тʹәмамийа әʹрде бәлабуйи йә. Иро «ԝәлате хԝәшьк» бь симболик щьнәта рʹӧһʹани йә, чь кӧ те һʹәсабе шьхӧлед рʹӧһʹани, мәсәлә һʹәбандьн Йаһоԝарʹа щьватеда у хьзмәтийеда.

8. Пʹадше бакӧре ча кʹәтә «ԝәлате хԝәшьк»?

⁸ Ԝәʹде ԝан рʹожед ахьрийеда, пʹадше бакӧре чәнд щара кʹәтә «ԝәлате хԝәшьк». Мәсәлә, чахе Алманйайа Натсисти пʹадше бакӧре бу, әԝ илаһи ԝәʹде шәрʹе һʹәмдьнйайе дӧда, кʹәтә «ԝәлате хԝәшьк» гава хьзмәткʹаред Хԝәде дьзеранд у дькӧшт. Паши Шәрʹе Һʹәмдьнйайе II, гава Йәктийа Совйәте бу пʹадше бакӧре, әԝ кʹәтә «ԝәлате хԝәшьк» чахе пәй щьмәʹта Хԝәде дькʹәт у аксор дькьр.

9. Ԝан салед пашԝәхтийе, Русйа у пьштгьред ԝе ча кʹәтьнә «ԝәлате хԝәшьк»?

⁹ Ԝан салед пашԝәхтийеда, Русйа у пьштгьред ԝе жи кʹәтьнә «ԝәлате хԝәшьк». Чаԝа? Сала 2017-да, әв пʹадше бакӧре шьхӧле щьмәʹта Йаһоԝа ԛәдәхә кьр у һьнә хушк-бьра кьрә кәле. Әԝи ӧса жи әʹдәбйәтед мә у Кʹьтеба Пирозә «Ԝәлгәрʹандьна Дьнйа Тʹәзә», ԛәдәхә кьр. Хенщи ве йәке, әԝи Русйайеда филиала мә, Одед Щьвата у Одед Щьватед Мәзьн жь мә станд. Паши ве йәке, сала 2018-да, Кʹома Рʹебәрийе әʹлам кьр, кӧ Русйа у пьштгьред ԝе, пʹадше бакӧре нә. Рʹаст ә хьзмәткʹаред Йаһоԝа зәʹф тенә зерандьне, ле әԝана тʹӧ щар мьԛабьли сәрԝера дәрнайен у нә жи тьштәки дькьн сәва сәрԝертийе бьгӧһезьн. Дәԝсе әԝана ширәта Кʹьтеба Пироз тиньн сери у бона «һʹәму сәрԝера» дӧа дькьн, илаһи гава сәрԝер сафикьрьнед ӧса дькьн, кӧ дькарьн сәр азайа һʹәбандьна мә һʹӧкӧм бьн (1 Тимтʹ. 2:1, 2).

ГӘЛО ПʹАДШЕ БАКӦРЕ ԜЕ ПʹАДШЕ БАШУРЕ АЛТ КӘ?

10. Гәло пʹадше бакӧре ԝе пʹадше башуре кʹӧта кә? Шьровәкьн.

¹⁰ Пʹехәмбәртийа жь Данийел 11:40-45, һʹәчʹи зәʹф дәрһәԛа кьред пʹадше бакӧре гьли дькә. Ле гәло әв те һʹәсабе, ԝәки әԝ ԝе пʹадше башуре кʹӧта кә? На. Пʹадше башуре ԝе һәла һе «сах» бә, һʹәта кӧ Йаһоԝа у Иса шәрʹе Һармәгәдонеда ԛьрʹа һʹәму сәрԝертийед мәрьва биньн (Әʹйан. 19:20). Ле чьрʹа әм ве йәкеда баԝәр ьн? Дина хԝә бьдьне, кӧ пʹехәмбәртийед жь кʹьтеба Данийел у Әʹйанти чь дьдьнә кʹьфше.

11. Данийел 2:43-45 чь әʹйан дькә? (Бьньһерʹә шькле рʹуйе журнале.)

¹¹ Бьхунә Данийел 2:43-45. Данийел дәрһәԛа ԝан сәрԝертийа пʹехәмбәрти кьр, йед кӧ щурʹә-щурʹә ԝәʹдәда пәй щьмәʹта Хԝәде дькʹәтьн. Әԝана бь симболик щурʹә-щурʹә пʹаред һәйкәле бун. Сәрԝертийа пашьн бь симболик ньгед ви һәйкәли нә, кӧ жь һʹәсьн у һʹәрʹийа сор ьн. Әв ньг бь симболик тенә һʹәсабе Англо-Америка Империйа Һʹәмдьнйайе. Әв пʹехәмбәрти нишан дькә, ԝәки Империйа Англо-Америка ԝе һәла һе сәрԝертийе бькә, һʹәта кӧ Пʹадшатийа Хԝәде ԛьрʹа һʹәму сәрԝертийед мәрьва бинә.

12. Бь симболик сәре һʹәфта йе щәʹнәԝьр кʹе йә, у чьрʹа фәрз ә ве йәке бьзаньбьн?

¹² Йуһʹәннайе шанди жи дәрһәԛа сәрԝертийед дьнйайе пʹехәмбәрти кьр, йед кӧ пәй щьмәʹта Хԝәде дькʹәтьн. Пʹехәмбәртийа Йуһʹәннада әԝ сәрԝерти бь симболик щәʹнәԝьре пе һʹәфт сәрийа йә. Сәре һʹәфта йе щәʹнәԝьр те һʹәсабе Англо-Америка Империйа Һʹәмдьнйайе. Әва информасийа фәрз ә, чьмки паши ви сәри, ида тʹӧ сәре майин тʹӧнә йә, әԝ йе хьлазийе йә. У әв сәре һʹәфта һәла һе ԝе сәрԝертийе бькә, һʹәта Мәсиһ у ордийед ԝийи әʹзмана әԝи щәʹнәԝьри бь тʹәмами кʹӧта кьнb (Әʹйан. 13:1, 2; 17:13, 14).

ПʹАДШЕ БАКӦРЕ АХЬРИЙЕДА ԜЕ ЧЬ БЬКӘ?

13-14. Кʹе йә «Гог жь ԝәлате Магоге», у чь дьбәкә ԝе һерса ԝи рʹакә, кӧ әԝ пәй щьмәʹта Хԝәде кʹәвә?

¹³ Пʹехәмбәртийа Һәзәԛел мәрʹа дьдә кʹьфше кӧ чь ԝе бьԛәԝьмә пешийа кʹӧтакьрьна пʹадше бакӧре у пʹадше башуре. Һәрге әм бьньһерʹьн пʹехәмбәртийед жь Һәзәԛел 38:10-23; Данийел 2:43-45; 11:44–12:1; у Әʹйанти 16:13-16, 21, әме бьвиньн ԝәки әԝ һʹәму пʹехәмбәрти дәрһәԛа ԝәʹдәки дьбежьн. Ль гора ве йәке, әм дькарьн ахьрийеда һивийа ԝан тьшта бьн.

¹⁴ Һьнә ԝәхт паши дәстпека тәнгасийа мәзьн, «һʹәму пʹадшед дьнйайе» ԝе коалисйа мьләта саз кьн, демәк бьбьнә кʹомәк (Әʹйан. 16:13, 14; 19:19). Әва ԝе әԝ коалисйа бә, кʹижан кӧ Кʹьтеба Пироз нав дькә «Гог жь ԝәлате Магоге» (Һәзԛл. 38:2). Әв коалисйа мьләта, ԝе мьԛабьли щьмәʹта Хԝәде дәркʹәвә у бьхԝазә бь тʹәмами ԛьрʹа ԝе бинә. Ле чьрʹа? Дәрһәԛа ԝи ԝәʹдәйи, Йуһʹәннайе шанди хәԝн-хәйаледа дит, ԝәки тәйрока гьр сәр дьжмьнед Хԝәдеда дьбарә. Әԝ тәйрок бь симболик дьбәкә те һʹәсабе диԝана сәрт, кӧ щьмәʹта Йаһоԝа ԝе мәрьварʹа әʹлам кьн. Дьԛәԝьмә һәма әԝ әʹламәти ԝе һерса Гог жь Магоге рʹакә, сәва мьԛабьли щьмәʹта Хԝәде дәре у сәр рʹуйе әʹрде ԝана бь тʹәмами кʹӧта кә (Әʹйан. 16:21).

15-16. а) Данийел 11:44, 45-да, дәрһәԛа кʹижан ԛәԝьмандьна те готьне? б) Чь ԝе бьԛәԝьмә тʹәви пʹадше бакӧре у Гог жь Магоге?

¹⁵ Дәрһәԛа ве диԝана сәрт у һʹьщумкьрьна сәр щьмәʹта Хԝәде, Данийел 11:44, 45-да жи те готьне. (Бьхунә.) Данийел дьбежә, ԝәки дәнг у бәʹс жь «рʹоһьлате у жь бакӧре» ԝе бен, кӧ пʹадше бакӧре «бькʹәсьриньн», у әԝ ԝе бь һерса мәзьн дәре. Нета пʹадше бакӧре ԝе әԝ бә кӧ «гәләка һәлаԛ бькә», йане ԛьрʹ кә. Ча те кʹьфше, вьра хәбәра «гәләк» сәр щьмәʹта Йаһоԝа те готьне.c Дьԛәԝьмә ԝан рʹезада Данийел нишан дькә, кӧ дьжмьнед Хԝәде ԝе ча щара пашьн һʹьщуми сәр щьмәʹта Хԝәде бькьн.

¹⁶ Әԝ һʹьщумкьрьна пʹадше бакӧре у сәрԝертийед майин, ԝе һерса йе Һьмзор бинә, у Әԝ ԝе шәрʹе Һармәгәдон дәстпекә (Әʹйан. 16:14, 16). Ԝи ԝәʹдәйи пʹадше бакӧре у мьләтед майин кӧ бь симболик Гог жь Магоге тенә һʹәсабе, ԝе бәла хԝә бьстиньн у «кәсәки кӧ аликʹарийе» бьдә ԝан, ԝе «тʹӧнә бә» (Дан. 11:45).

17. «Сәроке мәзьн», демәк Мьхайил кӧ Данийел 12:1-да ньвисар ә, сәр кʹе те готьне, у әԝ ԝе чь бькә?

¹⁷ Бьхунә Данийел 12:1. Ве рʹезеда һур бь һур те шьровәкьрьне дәрһәԛа ве йәке, кӧ ча пʹадше бакӧре у пьштгьред ԝи, ԝе ԛьрʹ бьн у ча Йаһоԝа ԝе щьмәʹта хԝә хьлаз кә. Әԝ рʹез чь те һʹәсабе? Ве рʹезеда Мьхайил, сәрнаве Иса Мәсиһ йә, кӧ бу Пʹадша Пʹадшатийа Хԝәдеда. Жь сала 1914, чахе әԝ Пʹадшати сәр әʹзмана саз бу, һьнгеда Иса бона щьмәʹта Хԝәде сәкьни йә. Ахьрийеда жи әԝ ԝе «рʹабә», демәк ԝе шәрʹе Һармәгәдонеда дьжмьнед Хԝәде кʹӧта кә. Әв шәрʹ ԝе хьлазийа ве ԛәԝьмандьне бә, кӧ Данийел нав дькә «ԝәхтәки тәнгасийе», у кʹижан кӧ нава тʹәрихийа инсанәтеда тʹӧ щар тʹӧнә буйә. Йуһʹәннайе шанди кʹьтеба Әʹйантида әԝи ԝәхти нав дькә «тәнгасийа мәзьн» (Әʹйан. 6:2; 7:14).

НАВЕ ТӘ ԜЕ «ПʹЬРТУКЕДА НЬВИСАНДИ» БӘ?

18. Чьрʹа әм гәрәке жь ахьрийе нәтьрсьн?

¹⁸ Әм гәрәке ахьрийе нәтьрсьн, чьмки пʹехәмбәртийед жь Данийел у жь Йуһʹәнна избат дькьн, ԝәки ԝәʹде тәнгасийа мәзьн һʹәмуйед кӧ Йаһоԝа у Исарʹа хьзмәт дькьн, ԝе хьлаз бьн. Данийел дьбежә кӧ наве ԝан, йед кӧ ԝе хьлаз бьн, ԝе «пʹьртукеда ньвисанди» бьн (Дан. 12:1). Ле әм гәрәке чь бькьн сәва наве мә ве пʹьртукеда бе ньвисандьне? Әм гәрәке пе жийина хԝә избат кьн, ԝәки баԝәрийа хԝә Бәрхе Хԝәде, демәк Иса тиньн (Йуһʹн. 1:29). Әм гәрәке әʹмьре хԝә тʹәсмили Хԝәде кьн у бенә ньхӧмандьне (1 Пәт. 3:21). У әм гәрәке нишан кьн, ԝәки пьштгьрийа Пʹадшатийа Хԝәде дькьн бь ве йәке, кӧ али мәрьва дькьн дәрһәԛа Йаһоԝа пебьһʹәсьн.

19. Әм ньһада гәрәке чь бькьн у чьрʹа?

¹⁹ Ньһа әԝ ԝәʹдә йә, ԝәки әм итʹбарийа хԝә һьндава Йаһоԝа у тʹәшкиләта ԝи ԛәԝи кьн. Ньһа йә ԝәʹдә кӧ алийе Пʹадшатийа Хԝәде бьгьрьн. Һәрге әм ӧса бькьн, әме хьлаз бьн, гава Пʹадшатийа Хԝәде ԛьрʹа пʹадше бакӧре у пʹадше башуре бинә.

Пʹехәмбәртийед сәр ви нәхши ԝәхтәкида дьԛәԝьмьн. Әԝана һʹәмушк избат дькьн, кӧ әм дьжин «ԝәхта даԝине», демәк ԝәхта хьлазийе (Дан. 12:4).

• 

  

  Рʹез: (Әʹйан. 11:7; 12:13, 17; 13:1-8, 12)

  Пʹехәмбәрти: «Щәʹнәԝьр» ида 3 000 сала зедәтьр сәр мәрьва һʹӧкӧмти дькьр. Ԝәхте хьлазийеда сәре һʹәфта бьриндар бу. Ԝәʹдә шунда әԝ сәри ԛәнщ бу у «тʹәмамийа дьнйайе» пәй щәʹнәԝьр чу. Шәйтʹан бь сайа щәʹнәԝьр, тʹәви йед кӧ манә шәрʹ дькә.

  Ча һатә сери: Паши Селаве сәрԝертийед мәрьва кӧ дьжмьнати Йаһоԝарʹа дькьрьн, дәстпекьрьн сәр мәрьва һʹӧкӧмтийе бькьн. Гәләк ԛьрʹнә шунда, ԝәʹде Шәрʹе Һʹәмдьнйайе I, Империйа Британи гәләк сьст бу. Ле паше әԝ диса ԛәԝат бу бь ве йәке, кӧ тʹәви Америкайе бу йәк. Илаһи ԝи ԝәхте хьлазийеда, Шәйтʹан система хԝәйә политики мьԛабьли щьмәʹта Хԝәде дьдә хәбате.

• 

  Рʹез: (Дан. 11:25-45)

  Пʹехәмбәрти: Шәрʹе ортʹа пʹадше бакӧре у пʹадше башуре ԝи ԝәхте хьлазийеда.

  Ча һатә сери: Алманйа у Англо-Америка мьԛабьли һәв шәрʹ дькьрьн. Сала 1945 Йәктийа Совйәте у пьштгьред ԝе бунә пʹадше бакӧре. Сала 1991-да, Йәктийа Совйәте һьлшийа, у һьнә ԝәʹдә шунда Русйа у пьштгьред ԝе, бунә пʹадше бакӧре.

• 

  Рʹез: (Иша. 61:1; Малх. 3:1; Луԛа 4:18)

  Пʹехәмбәрти: Йаһоԝа гәрәке «әʹламчи» бьшанда, сәва рʹийа бәрбь сазбуна Пʹадшатийа Хԝәде һазьр кьра. Әԝ «әʹламчи» кӧ кʹомәкә жь мәрьва йә, гәрәке «мьзгинийе дьлньмьзарʹа» әʹлам кә.

  Ча һатә сери: Жь сала 1870 дәстпекьри, Ч. Т. Рассел у пьштгьред ԝи, бь хирәт дәстпекьрьн рʹастийед Кʹьтеба Пироз леколин кьн у шьровәкьн. Жь сала 1880, ԝана дьда кʹьфше ԝәки гәләк фәрз ә хьзмәткʹаред Хԝәде мьзгинийе бәла кьн. Ԝана готар дәрхьстьн бь наве «Лазьм ә 1 000 Мьзгинван» у «Бона Бәлакьрьна Мьзгинийе Бьжарти нә».

• 

  Рʹез: (Мәт. 13:24-30, 36-43)

  Пʹехәмбәрти: Дьжмьн ль нав гәньмда зиԝан чанд, у һәрдӧ жи һәврʹа дьгьһижьн һʹәта рʹожа нандьруне; Паше зиԝан жь гәньм те башԛәкьрьне.

  Ча һатә сери: Жь дәстпека сала 1870, Мәсиһийед рʹаст дәстпекьрьн жь Мәсиһийед ԛәлп башԛә бьн, у фьрԛийа ортʹа ԝанда һе зәлал дьһатә кʹьфше. Рʹожед ахьрийеда Мәсиһийед рʹаст ча кʹом организә бунә у жь Мәсиһийед ԛәлп бь тʹәмами ԛәтийанә.

• 

  Рʹез: (Дан. 2:31-33, 41-43)

  Пʹехәмбәрти: Һәйкәле кӧ жь щурʹә-щурʹә метала бу, ньгед ԝи жь һʹәсьн у һʹәрʹийа сор бун.

  Ча һатә сери: Һʹәрʹийа сор әԝ һәйә щьмәʹта, кӧ бьн сәрԝертийа Англо-Америкайе дьжин. Әԝ щьмәʹт мьԛабьли ԝе сәрԝертийе дәрте, у ләма жи әԝ сәрԝерти ԛәԝата хԝәйә мина һʹәсьн бь тʹәмами нькарә бьдә хәбате.

• 

  

  Рʹез: (Мәт. 13:30; 24:14, 45; 28:19, 20)

  Пʹехәмбәрти: «Гәньм» дькьнә әʹмбара у «хӧламе амьн у сәрԝахт» һатә кʹьфш- кьрьне сәр «хӧламед мале». «Мьзгинийа Пʹадшатийе» дәстпедьбә «ль нав тʹәмамийа дьнйайе» бәла бә.

  Ча һатә сери: Сала 1919 хӧламе амьн сәр щьмәʹта Хԝәде те кʹьфшкьрьне. Жь ԝи ԝәʹдәйи, Леколинкʹаред Кʹьтеба Пироз дьһа зедә хьзмәт дькьн. Иро Шәʹдед Йаһоԝа 200 ԝәлатада зедәтьр хьзмәт дькьн у сәр 1 000 зьмана зедәтьр әʹдәбйәтед сәр һʹиме Кʹьтеба Пироз дәрдьхьн.

• 

  Рʹез: (Дан. 12:11; Әʹйан. 13:11, 14, 15)

  Пʹехәмбәрти: Щәʹнәԝьре пе дӧ стьруйа, мәрьвед сәр әʹрдерʹа дьбежә кӧ «һʹәйкәләки ԝи щәʹнәԝьри чекьн», у әԝи «рʹӧһʹ бәр һʹәйкәле» щәʹнәԝьрда ани.

  Ча һатә сери: Империйа Англо-Америкайе тʹәшкиләта Лига Мьләта саз кьр. Мьләтед майин жи пьштгьрийа ве тʹәшкиләте кьрьн. Ахьрийеда, пʹадше бакӧре жи бу йәк тʹәви Лига Мьләта, ле тʹәне жь сала 1926 һʹәта 1933. Мәрьва баԝәр дькьрьн, ԝәки Лига Мьләта ԝе сәр дьнйайе әʹдьлайе бинә, чь кӧ тʹәне Пʹадшатийа Хԝәде дькарә бькә. Иро мәрьв сәр тʹәшкиләта Мьләтед Йәкбуйи жи ӧса дьфькьрьн.

• 

  

  Рʹез: (Дан. 8:23, 24)

  Пʹехәмбәрти: Пʹадшаки һерс гәрәке дәркʹәта, кӧ бәлакә ӧса банийа, кʹижан тʹӧ щар тʹӧнә бу.

  Ча һатә сери: Англо-Америка бәлайа ӧса мәзьн ани, кӧ гәләк мәрьв һатьнә ԛьрʹкьрьне. Мәсәлә, ԝәʹде Шәрʹе Һʹәмдьнйайе II, Америкайе дӧ бомбед атоме авитә сәр ԝи ԝәлати, кʹижан кӧ дьжмьне ԝи у Британйайе бу. Тʹӧ щар тʹӧ чʹәки, зийанәкә ӧса мәзьн нәанибу.

• 

  Рʹез: (Дан. 11:31; Әʹйан. 17:3, 7-11)

  Пʹехәмбәрти: «Щәʹнәԝьрәки соре гәвәз» пе дәһә стьруйа жь гәлийе һәй-ԝайе дәрдькʹәвә, әԝ пʹадше һʹәйшта йә. Кʹьтеба Данийел сәр ԝи пʹадшайи дьбежә «тьште мәкруһ йе кӧ хьраб дькә».

  Ча һатә сери: Лига Мьләта ԝәʹде Шәрʹе Һʹәмдьнйайе II ԛәԝата хԝә ӧнда кьр. Паши ԝи шәрʹи, Мьләтед Йәкбуйи щийе ԝи гьрт. Әв жи мина Лига Мьләта пәсьна дьстинә, кʹижан кӧ тʹәне Пʹадшатийа Хԝәдерʹа дькʹәвә. Мьләтед Йәкбуйи ԝе һʹьщуми сәр һʹәму религийа кә.

• 

  

  Рʹез: (1 Тʹеслн. 5:3; Әʹйан. 17:16)

  Пʹехәмбәрти: Мьләт ԝе әʹлам кьн «дьне сәԛьрʹи у бехофи йә», у «дәһә стьру» у «щәʹнәԝьр» ԝе пәй «ԛаве» кʹәвьн у ле ԛьрʹ кьн. Паши ве йәке, хәзәбе сәр ԝан мьләтада бе.

  Ча ԝе бе сери: Мьләт дьбәкә бежьн кӧ әԝана гьһиштьнә әʹдьлайе у бехофийе. Паше әԝ мьләтед кӧ пьштгьрийа Мьләтед Йәкбуйи дькьн, ԝе ԛьрʹа һʹәму религийед ԛәлп биньн. Әв ида ԝе дәстпека тәнгасийа мәзьн бә. Тәнгасийа мәзьн ԝе пе шәрʹе Һармәгәдоне хьлаз бә, кʹидәреда ԝе тʹәмамийа дьнйа Шәйтʹан кʹӧта бә.

• 

  Рʹез: (Һәзԛл. 38:11, 14-17; Мәт. 24:31)

  Пʹехәмбәрти: Гог ԝе әʹрде щьмәʹта Хԝәде зәфт кә. Паше, мәләк ԝе бьжартийа бьщьвиньн.

  Ча ԝе бе сери: Пʹадше бакӧре тʹәви сәрԝертийед дьнйайе ԝе пәй щьмәʹта Хԝәде кʹәвьн. Һьнә ԝәʹдә паши дәстпека пәйкʹәтьне, бьжартийед кӧ манә ԝе сәр әʹзмана бьщьвьн.

• 

  Рʹез: (Һәзԛл. 38:18-23; Дан. 2:34, 35, 44, 45; Әʹйан. 6:2; 16:14, 16; 17:14; 19:20)

  Пʹехәмбәрти: Сийаре «һәспәки боз» ԛьрʹа Гог у ордийа ԝи тинә. «Щәʹнәԝьр» те авитьне нава «гола агьр» у һәйкәле мәзьн һурдәхԝәши дьбә.

  Ча ԝе бе сери: Пʹадше Пʹадшатийа Хԝәде, демәк Иса, ԝе бе һәԝара щьмәʹта Хԝәде. Әԝ тʹәви 144 000 у ордийед мәләка, ԝе ԛьрʹа коалисйа мьләта у тʹәмамийа дьнйа Шәйтʹан бинә.