Пьрсед Хԝәндәвана

Готара «Наве Тә Пироз бә», жь Бьрща Ԛәрәԝьлийе, йа мәһа Һʹәзиране, сала 2020, фәʹмкьрьна мәйә тʹәзә дәрһәԛа наве Йаһоԝа у сәрԝертийа ԝи, чаԝа дьһа зәлал кьрийә?

Ве готареда, әм пеһʹәсийан кӧ пьрсәкә гәләк фәрз һʹәму мәрьва у һʹәму мәләка дькʹәвә. Әв пьрс дәрһәԛа пирозкьрьна наве Йаһоԝа йә. Пʹара ве пьрсе йа лапә фәрз әԝ ә, кӧ сәрԝертийа Йаһоԝа йа һәрә баш ә. Амьнийа мәрьва жи пʹарәкә ве пьрсе йә.

Гәло наве Йаһоԝа у пирозкьрьна наве ԝи, чьрʹа пʹара сәрәкә йа ве пьрсе йә? Ԝәрә әм се мәʹнийа шеԝьр кьн.

Йа пешьн, Мире-щьна сәрԝертийа Йаһоԝа кьрә бьн шьке. Бахче Еденеда, Мире-щьна бь нета хьраб пьрсәк да Һеԝайе. Нета пьрса ԝи әԝ бу, кӧ Йаһоԝа Хԝәде мәрʹд нинә у тʹәмийед кӧ Әԝи дабунә Адәм у Һеԝайе, бь һәԛи нибун. Паше, Мире-щьна гьлийед Йаһоԝа бь щурʹе нәрʹаст ԝәкʹьланд у гот, кӧ Хԝәде йәки дәрәԝин ә. Пе дәрәԝед хԝә әԝи бӧхдан авитә наве Йаһоԝа. Әԝ бу «Мирещьн», демәк бӧхданбеж (Йуһʹәнна 8:44). Һеԝайе дәрәԝед Мире-щьна баԝәр кьр, у ләма жи әԝе гӧрʹа Хԝәде нәкьр. Ӧса Һеԝа һьмбәри сәрԝертийа Хԝәде дәркʹәт (Дәстпебун 3:1-6). Жь ԝи чахива, Мире-щьна наве Хԝәде рʹәш дькә у дәрһәԛа Ԝи дәрәԝа бәла дькә. Кʹе кӧ ван дәрәԝа баԝәр дькә, ԝе нә жи гӧрʹа Йаһоԝа бькә. Бона щьмәʹта Хԝәде, бӧхдана сәр наве Йаһоԝайә пироз, нәһәԛикә лапә мәзьн ә. Мәʹнийа сәрәкә йа кӧл-дәрда у хьрабийе, хут әв бӧхдан ә.

Йа дӧда, бона кʹара инсанәте у мәләка, Йаһоԝа ԝе наве хԝә пироз кә у жь һʹәму дәрәԝа тʹәмьз кә. Әв йәк бона Йаһоԝа тьштәкә һәрә фәрз ә. Ләма жи, әԝ ӧса дьбежә: «Әз е наве хԝәйи мәзьн . . . пироз бькьм» (Һәзәԛел 36:23). У Иса бь зәлали гот, кӧ гәрәке әм дӧайед хԝәда бәри пешьн ӧса бежьн: «Наве тә пироз бә» (Мәтта 6:9). Гәләк рʹезед Кʹьтеба Пирозда те кʹьфше, ԝәки рʹумәткьрьна наве Йаһоԝа гәләк фәрз ә. Ԝәрә әм чәнд мәсәла шеԝьр кьн: «Шькьрийе бьдьнә рʹумәта наве Хӧдан» (1 Дирок 16:29; Зәбур 96:8). «Бьстьрен әшԛи рʹумәта наве Ԝи» (Зәбур 66:2). «Һʹәта-һʹәтайе рʹумәте бьдьмә наве Тә» (Зәбур 86:12). Щарәке Иса пʹарьстгәһа Оршәлимеда ӧса готә Йаһоԝа: «Баво, наве хԝә бьльнд кә». Йаһоԝа жь әʹзмана щаб да у гот: «Мьн бьльнд кьр у әзе диса бьльнд кьм!» (Йуһʹәнна 12:28).a

Йа сьсийа, нета Йаһоԝа һәртʹьм пирозкьрьна наве ԝива гьредайи йә. Паши щерʹьбандьна хьлазийе, йа кӧ ԝе пәй Сәрԝертийа Мәсиһйә Һʹәзарсали бе, чь ԝе бьԛәԝьмә? Ԝи чахи гәло һʹәму мәрьв у мәләк ԝе дәрһәԛа наве Йаһоԝа чь бьфькьрьн? Бона щаба ве пьрсе ԝәрә әм диса сәр һәр дӧ пʹаред фәрз йед ве пьрсе бьфькьрьн, демәк амьнийа мәрьва у сәрԝертийа Йаһоԝа. Һьнге ԝе ида нәлазьм бә, ԝәки мәрьв амьнийа хԝә избат кьн, чьмки әԝана ԝе беԛьсур бьн у амьнийа ԝан ԝе бь тʹәмами ида һатьбә щерʹьбандьне. Жийина һʹәта-һʹәтайе ԝе пешийа ԝан бә. Ӧса жи, һәԛийа Сәрԝертийа Йаһоԝа, ԝе ида бе избаткьрьне. Һьнге ԝе һʹәму мәләк у мәрьв йәктийеда бьн у ԝе Сәрԝертийа Йаһоԝа ԛәбул кьн. Ле гәло һьнге жи наве Йаһоԝа ԝе бона хьзмәткʹаред ԝи һәри фәрз бә?

Ԝи чахи һәр кәс ԝе рʹастийа дәрһәԛа Йаһоԝа бьзаньбә, у наве ԝи ԝе бь тʹәмами бе пирозкьрьне. Наве Йаһоԝа ԝе һәртʹьм бона хьзмәткʹаред ԝи йед сәр әʹзмана у йед сәр әʹрде, лапи фәрз бә. Гәло чьрʹа? Чьмки әԝан ԝе бьвиньн, кӧ чаԝа Йаһоԝа бәрдәԝам дькә шьхӧлед гьринг бькә. Дина хԝә бьдьне: Гава Иса Мәсиһ бь мьлукти һʹәму сәрԝерти тʹәсмили Йаһоԝа кә, Хԝәде ԝе бона һәр кәси бьбә һәр тьшт (1 Корьнтʹи 15:28). Паши ве йәке, мәрьвед сәр әʹрде ԝе жь «азайи у рʹумәта зарʹед Хԝәде» шабуне бьстиньн (Рʹомайи 8:21). Йаһоԝа ԝе нета хԝә, кӧ һʹәму мәрьв у мәләк бьбьн мина малбәтәкә мәзьн, бь тʹәмами бинә сери (Әфәси 1:10).

Әв һʹәму тьшт ԝе сәр малбәта Йаһоԝайә сәр әʹзмана у йа сәр әʹрде чаԝа һʹӧкӧм кә? Һәмьки, әме бь дьл у щан бьхԝазьн пәсьне наве Йаһоԝа бьдьн. Жь бина бәр Хԝәде, Даԝьд Пʹадша ӧса ньвиси: «Шькьр жь Хӧдан Хԝәдерʹа . . . Һәр тʹьм пәсьне наве Ԝийи хԝәйирʹумәт бьдьн» (Зәбур 72:18, 19). Дьнйа тʹәзәда әме тʹьме мәщала бьгәрʹьн, ԝәки наве Йаһоԝа рʹумәт кьн.

Наве Йаһоԝа дәрһәԛа ԝи һәр тьшти избат дькә. Гава әм дәрһәԛа наве Йаһоԝа дьфькьрьн, бәри пешьн һʹәзкьрьна ԝи дькʹәвә бира мә (1 Йуһʹәнна 4:8). Әме һәртʹьм биньн бира хԝә, кӧ Йаһоԝа әм жь һʹәзкьрьна мәзьн әʹфьрандьнә, кӧ Әԝи жь бо һʹәзкьрьне әʹмьре Иса Мәсиһ бәрва дайә, у кӧ Әԝи жь бо һʹәзкьрьна хԝә, рʹастийа сәрԝертийа хԝә избат кьрийә. Әме һʹәта-һʹәтайе бьвиньн, кӧ Йаһоԝа ча һʹәзкьрьне һьндава мәда дьдә кʹьфше. Һʹәта-һʹәтайе әме бь дьл у щан бьхԝазьн дьһа незики Баве хԝәйи әʹзман бьн у бона пәсьндайина наве ԝи, кʹьлама бьстьрен (Зәбур 73:28).