Аликʹари бона Мәрьвед кӧ Малда Рʹасти Зорбәтийе Тен

Тʹәшкиләта Сахләмийейә Һʹәмдьнйайе ӧса дьбежә: «Зорбәти һьндава жьнада мина нәхԝәшийе йә, кӧ нав тʹәмамийа дьнйайеда зу бәла дьбә. Ләма жи гәләк фәрз ә бь ләз тьштәки бькьн, кӧ бьдьнә сәкьнандьне». Ль гора һʹәсабе ве тʹәшкиләте, ԝәкә 30 сәләф «кʹӧлфәт алийе меред хԝә йан жи йаред хԝәда рʹасти зорбәтийа физики у сексуали тен». Һʹәсабәкә һәрсалида йа Тʹәшкиләта Мьләтед Йәкбуйи дьһатә готьне, ԝәки сала пар, тʹәмамийа дьнйайеда рʹоже 137 кʹӧлфәт һатьнә кӧштьне жь дәсте мер, йар йан жи нәфәрәки хԝәйи дьн.a

Һʹәсаб дькарә бьдә кʹьфше, ԝәки проблема зорбәтийа малбәтеда чьԛас зедә дьбә, ле надә кʹьфше кӧ әв зорбәти алийе физики у емосийалида ешәкә чьԛас мәзьн тинә.

Һун жи малбәтеда рʹасти зорбәтийе тен? Йан жи һун кәсәки нас дькьн, кӧ жь бо зорбәтийе дьчәрчьрә? Һәрге әре, фькьред жь Кʹьтеба Пироз, кӧ әме ньһа шеԝьр кьн, ԝе али ԝә бькьн.

Зорбәтийа малбәтеда нәһәԛийа тә нинә

Тӧ дькари аликʹарийе бьстини

Тӧ тʹәне нини

Зорбәтийа малбәтеда ԝе бе һьлдане

Һун чаԝа дькарьн али ԝан бькьн, йед кӧ рʹасти зорбәтийе тен

Зорбәтийа малбәтеда нәһәԛийа тә нинә

Кʹьтеба Пироз чь дьбежә: «Жь мә һәр кәсе бона хԝә щабе ль бәр Хԝәде бьдә» (Рʹомайи 14:12).

Бир нәкә: Йе кӧ һьндава тәда зорбәти кьрийә, бона кьред хԝә әԝ ә щабдар.

Һәрге жи йе зордар ԝе йәкеда тә нәһәԛ дькә, бьзаньбә ԝәки әԝ нәрʹаст ә. Кʹӧлфәт һежайи һʹьзкьрьне нә, нә кӧ зордарийе (Колоси 3:19).

Щарна сәбәба кьред мәрьве зордар әԝ ә, ԝәки әԝ алийе психикида нәхԝәш ә, малбәта хԝәда жь бьчʹуктайе зорбәти дитийә, йан жи ичʹке гәләки вәдьхԝә. Чь жи һәбә, йәкә әԝ бона кьред хԝә бәр Хԝәде щабдар ә. У әԝ борщдар ә рʹабун-рʹуньштьна хԝә бьгӧһезә.

Тӧ дькари аликʹарийе бьстини

Кʹьтеба Пироз чь дьбежә: «Ле бь сайа гәләк ширәткʹара әԝ тенә сери» (Мәтʹәлок 15:22).

Бир нәкә: Һәрге тӧ хԝә бехоф у хԝәйкьри тʹәхмин наки у ньзани чь бьки, аликʹарийе бьхԝазә.

Чьрʹа дьбәкә тәрʹа аликʹарийа мәрьвед дьн лазьм бә? Зорбәти малбәтеда проблемәкә гәләк мәзьн ә. Сәва кӧ сафикьрьна баш бьвини, тӧ гәрәке ԝан тьшта һьлди һʹәсаб у бьфькьри, кӧ чь дьһа фәрз ә:

• Бехофийа тә

• Һʹалхԝәшийа зарʹа

• Һʹале тә алийе материалида

• Һʹьзкьрьна тә һьндава һәвалпʹаре тә

• Хԝәстьна кӧ һәләԛәтийа хԝә хԝәй кьн, һәрге һәвалпʹар бе гӧһастьне

Һәрге тӧ ньзани ве дәрәщеда чь бьки у хальфи йи, әв йәк тʹәбийәти йә. Ле кʹи дькарә али тә бькә?

Һәваләкә бь итʹбар йан нәфәрәкә мале дькарә тьштәкә керһати сәва тә бькә у алийе емосийалида жи пьштгьрийа тә бькә. Хәбәрдана тʹәви кәсе кӧ бона тә хәм дькә, дькарә гәләк али тә бькә.

Тʹәшкиләтед кӧ аликʹарийе дьдьнә йед кӧ рʹасти зордарийе тен, дькарьн тә бьпарезьн у аликʹарийа бь ләз бьдьн. Хәбатчийед ве тʹәшкиләте дькарьн али тә бькьн кӧ тедәрхи, дәрәща хԝәда чь бьки, ԝәки хԝә бьпарези. Һәрге һәвалпʹаре тә фәʹм дькә кӧ әԝ нәһәԛ ә у бь рʹасти дьхԝазә бе гӧһастьне, хәбатчийед ве тʹәшкиләте дькарьн ширәте бьдьнә ԝи, кӧ ча әве йәке бькә.

Тʹәшкиләтед дьн бона аликʹарийа бь ләз дькарьн али тә бькьн ԝе дәрәщеда, гава жийина тә бьн ԛәзийеда нә. Дькʹәвә нава ве йәке аликʹарийа дохдьра, у мәрьвед дьн, йед кӧ ве пьрседа щерʹьбанди нә.

Тӧ тʹәне нини

Кʹьтеба Пироз чь дьбежә: «Хӧдан [Йаһоԝаb, ДТʹ] незики дьлшкәстийа йә у мәʹрьм-бәләнгаза дьдәбьринә» (Зәбур 34:18).

Бир нәкә: Хԝәде соз дьдә, кӧ ԝе али тә бькә.

Йаһоԝа гәләк бона тә хәм дькә (1 Пәтрус 5:7). Әԝ һәст у емосийед тә фәʹм дькә. Әԝ дькарә бь Хәбәра Хԝә, демәк бь Кʹьтеба Пироз, дьлбинийе бьдә тә. Әԝ һьм жи тә һелан дькә, кӧ ԝирʹа дӧа бьки. Чахе тӧ дӧа дьки, дькари жь ԝи һиви ки, кӧ биланийе у ԛәԝате бьдә тә, сәва кӧ фәʹм бьки дәрәща хԝәда чь бьки (Ишайа 41:10).

Зорбәтийа малбәтеда ԝе бе һьлдане

Кʹьтеба Пироз чь дьбежә: «Ле бәле ԝе һәр кәс дь бьн меԝа хԝәда у дь бьн даре хԝәйи һежиреда рʹунен у йе кӧ ԝан бьтьрсинә тʹӧнә бә» (Миха 4:4).

Бир нәкә: Кʹьтеба Пироз соз дьдә ԝәки ԝе ԝәʹдәки ӧса бе, кӧ мал ԝе бона һʹәму мәрьва щийе бехоф бә.

Тʹәне Йаһоԝа Хԝәде дькарә һʹәму проблемед мә сафи кә. Кʹьтеба Пирозда созәки ӧса те дайине: «Әԝе жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:4). Һьнге ԝе һәла һе жи һʹәму тьштед хьраб бенә биркьрьне у тʹәне тьштед баш ԝе бира мәда бьн (Ишайа 65:17). Кʹьтеба Пироз һәма дәрһәԛа ахьрийа ӧса бехоф у бь әʹдьлайе тʹьжә, дьбежә.