Рʹебәрийа Мәзьна

ӘВ ЧЬ ТЕ ҺʹӘСАБЕ?

Зарʹарʹа лазьм ә рʹебәрийа мәзьна. Һун де-бавно, ви алида һе рʹьнд дькарьн аликʹарийа керһати бьдьнә ԝан. Әв щабдарийа ԝә йә. Һәмьки йед дьн жи дькарьн али ԝә бькьн зарʹа ширәт кьн.

ЧЬМА РʹЕБӘРИЙА МӘЗЬНА ФӘРЗ Ә?

Гәләк ԝәлатада, щаһьл тʹәви мәзьна һьндьк ԝәʹдә дәрбаз дькьн. Дина хԝә бьдьнә ве йәке:

• Зарʹ ԝәʹде хԝә ниве зәʹф дь мәкʹтәбеда дәрбаз дькьн, кʹидәре кӧ һʹәчʹи зәʹф щаһьл ьн, нә кӧ дәрсдар.

• Паши мәкʹтәбе гава зарʹ вәдьгәрʹьн мал, тʹәне дьминьн, чьмки де-бавед ԝан хәбате нә.

• Ԝәлатед Йәкбуйида ль гора леколинәке тедәрхьстьн, ԝәки зарʹед жь 8-12 сали, һәр рʹож ԝәкә 6 сьһʹәт бәр телевизийоне дәрбаз дькьн, мьԛама дьбьһен йан жи видеолистька дьлизьн.a

Кʹьтеба «Hold On to Your Kids» ӧса дьбежә: «Зарʹ мәсәле йан ширәта жь де-бавед хԝә, дәрсдара, йан жь мәрьвед мәзьнә дьн һьлнадьн, ле әԝана чʹәʹв дьдьнә һәвалед хԝә».

ЧЬ ЩУРʹӘЙИ РʹЕБӘРИЙЕ БЬДЬН

Тʹәви зарʹед хԝә ԝәʹдә дәрбаз кә.

ПРИНСИПА КʹЬТЕБА ПИРОЗ: «Зарʹотийеда рʹийа рʹаст һин бькә, гава әԝ кал бә, иди әԝе жь ԝе нәкʹәвә» (Мәтʹәлок 22:6).

Чахе щаһьл мәзьн дьбьн, әԝана дьһа ԛимәт дькьн рʹебәри у ширәтед де-бава, нә кӧ йед щаһьла. Зандар бь наве Лорен Стаинберг кʹьтеба хԝәда «You and Your Adolescent» ӧса ньвисийә: «Де-бав дькарьн гәләк һʹӧкӧм кьн сәр фькьр у рʹабун-рʹуньштьна зарʹед хԝә. Һәрге әԝана тьштәкида тʹәви ԝә ԛайил набьн, йәкә ԝанарʹа һʹәԝас ә бьзаньбьн ньһерʹандьна ԝә сәр ве пьрсе».

Щаһьл һʹәԝще ширәтед де-бава нә. Ләма жи де-бав гәрәке һәр тьшти бькьн, ԝәки әве мәщале бьдьнә хәбате у рʹебәрийа керһати бьдьнә зарʹа. Ԝәʹдә бьвиньн, ԝәки тʹәви зарʹед хԝә хәбәр дьн, ньһерʹандьна хԝә ԝанарʹа бежьн, дьле хԝә вәкьн у бежьн кӧ бона ԝә чь дьһа ԛимәт ә.

Һәвалед баш ԝанрʹа бьвиньн.

ПРИНСИПА КʹЬТЕБА ПИРОЗ: «Һәвале сәрԝахта сәрԝахт дәрте, һәвале ахмаха хьраб дәрте» (Мәтʹәлок 13:20).

Дьԛәԝьмә һун нас дькьн кәсәки ӧса, хәйсәт-һӧнӧред кʹижани ԝә хԝәш те у ԝе бькарьбә бьбә мәсәләкә баш бона зарʹед ԝә. Һун дькарьн ӧса сафи кьн, кӧ әԝ мәрьв тʹәви малбәта ԝә ԝәʹдә дәрбаз кә? Һәмьки әв найе һʹәсабе, кӧ һуне борщдарийа хԝә ча де-бав бькьнә стуйе ԝи мәрьви. Ле һун заньн, кӧ һәрге зарʹа ԝә тʹәв ԝи һәвалтийе бькә, әв йәк ԝе баш сәр ԝи һʹӧкӧм бә у али ԝи бькә. Әԝ мәрьв һинкьрьна зарʹеда, ԝе аликʹарийа мәзьн бьдә ԝә. Жь Кʹьтеба Пироз те кʹьфше, ԝәки сәр Тимотʹейо гәләк баш һʹӧкӧм кьр һәвалтийа ԝи тʹәви Паԝлос; хԝәха Тимотʹейо жи бона Паԝлос һәваләки баш бу (Филипи 2:20, 22).

Иро гәләк малбәт мина бәре ида тʹәвайи маләкеда нажин; мәсәлә, тʹәви кальк-пирька, тʹәви ап, мәтʹ у мәрьвед дьн. Әԝана жь һәв щьһе дьбьн. Һәрге малбәта ԝә жи ӧса нә, ԝе баш бә ԝәки кʹеләка зарʹед тә мәрьвед ӧса бьн, йед кӧ ԝе баш ль сәр ԝана һʹӧкӧм кьн.