Тӧ ԛәт Шәʹдед Йаһоԝа нас дьки? Һьнәк жь мә дьбәк щинаред тә нә, һьнәк дьбәк тʹәви тә дьхәбьтьн йан жи тʹәви тә мәкʹтәбеда һин дьбьн. Йан жи мә тʹәви тә дәрһәԛа Кʹьтеба Пироз хәбәр дайә. Ле тӧ зани кʹи нә әм бь рʹасти, у чьрʹа әм дәрһәԛа һʹәбандьна хԝә әшкәрә һʹәмуйарʹа гьли дькьн?

Әм мина һʹәму мәрийа нә. Әм жь щурʹә-щурʹә ԝәлата ньн, у нав мәда мәрийед кʹәсиб жи һәнә у йед дәԝләти жи, хԝәнди у нәхԝәнди жи һәнә. Бәре, һьнәк жь мә ԛәт Хԝәде баԝәр нәдькьрьн, һьнәк жи щурʹәки майин Хԝәде дьһʹәбандьн. Ле пешийа кӧ әм бьбуна Шәʹдед Йаһоԝа, мә кʹур леколина Кʹьтеба Пироз дькьр у һинкьрьнед ԝе дьщерʹьбанд (Кʹаред Шандийа 17:11). Чь кӧ әм һин бун, әм тʹәви ван һʹәму тьшта ԛайил бун у мә әʹмьре хԝәда да хәбате, у паше мә хԝәха әԝ рʹе жьбарт, ԝәки Хԝәде Йаһоԝарʹа хьзмәт кьн.

Әм жь һинбуна Кʹьтеба Пироз кʹаре дьстиньн. Мина һʹәму мәрийа, әм жи рʹасти чәтьнайа тен, у кемасийед мә жи һәнә. Ле чахе мә әʹмьре хԝәйә һәр рʹожида тʹәми у ширәтед жь Кʹьтеба Пироз дьдьнә хәбате, әм тʹәхмин дькьн кӧ әʹмьре мә һе баш дьбә у әм бәхтәԝар дьбьн (Зәбур 128:1, 2). Ләма жи әм ван һинкьрьнед баш, йед кӧ әм жь Кʹьтеба Пироз пеһʹәсийан, дәрбази мәрийед дьнена дькьн.

Әм бь тʹәми у ширәтед Хԝәде дьжин. Тʹәми у ширәтед Хԝәде, йед кӧ Кʹьтеба Пирозда ньвисар ьн, али мә дькьн ԝәки әм һʹалхԝәш бьн, ԛәдьре мәрийа бьгьрьн у һьндава мәрийа ԛәнщ у һʹәлал бьн. Ширәтед Хԝәде ӧса жи али мә дькьн, ԝәки сьһʹәт-ԛәԝата мә баш бә, ԝәки әм пешдачуйи у хԝәнди бьн у сәва мәрьва керһати бьн. Ӧса жи әԝ али малбәта дькә, ԝәки нав нәфәред маледа әʹдьлайи, тʹьфаԛи у нав-намуси һәбә. Жь Кʹьтеба Пироз әм пеһʹәсийан, кӧ «Хԝәде рʹасти жи фьрԛийе накә нава мьләта», ләма жи әм кʹәтьнә нав бьратийа мәйә рʹӧһʹани, нав кʹижани мәрийед жь щурʹә-щурʹә ԝәлата у мьләта нә. Бь сайа ширәтед Хԝәде, әм жь проблемед политике у жь фьрԛийа ортʹа мьләта аза бунә. Бәле, нав мәда щурʹә-щурʹә мәри нә у нав мәда кәс найе һʹәсабе мәхсус, ле тʹәвайи ча щьмәʹт, әм рʹасти жи щьмәʹтәкә мәхсус ьн (Кʹаред Шандийа 4:13; 10:34, 35).

• Чьда Шәʹдед Йаһоԝа, мина һʹәму мәрийа нә?

• Чь тьштед ԛимәт Шәʹдед Йаһоԝа пеһʹәсийан бь сайа һинбуна Кʹьтеба Пироз?

Гәләка тʹьре кӧ Шәʹдед Йаһоԝа әв һәйә наве динәки ну. Ле бь рʹасти, һе 2 700 сал пешда хьзмәткʹаред Хԝәдайе рʹаст дьһатьн навкьрьне ча «шәʹдед» ԝи (Ишайа 43:10-12). Һʹәта сала 1931, наве мә Леколинкʹаред Кʹьтеба Пироз бу. Ле зани чьрʹа мә хԝәрʹа әва нава, Шәʹдед Йаһоԝа, жьбарт?

Әв нав дьдә кʹьфше кӧ Хԝәдайе мә кʹи йә. Жь дәстньвисаред бәре әʹйан дьбә, кӧ Кʹьтеба Пирозда наве Йаһоԝа бь һʹәзара щара һатийә хәбьтандьне. Гәләк ԝәлгәрʹандьнада дәԝса ви нави сәрнавед дьн, мәсәлә Хԝәде у Хӧдан, һатьнә хәбьтандьне. Ле бь рʹасти Хԝәдайе рʹаст хԝәха наве хԝә, Йаһоԝа, Мусарʹа әʹйан кьрьбу у сәрда гьлийед ӧса ԝирʹа готьбу: «Һʹәта-һʹәтайе наве мьн әв ә» (Дәркʹәтьн 3:15). Бь ве йәке Хԝәдайе рʹаст, хԝә жь хԝәдайед ԛәлп башԛә кьр. Сәва мә ԛәдьрәки мәзьн ә, кӧ әм наве ԝи сәр хԝә дьгәрʹиньн.

Әв нав дьдә кʹьфше кӧ борщ у шьхӧле мә чь йә. Нава тʹәрихийеда һәбун мәрьвед кӧ шәʹдәти дьдан дәрһәԛа баԝәрийа хԝә һьндава Йаһоԝа, мәсәлә шәʹде пешьн Һабил бу. Нава тʹәрихийеда һәбун мәрийед ӧса ча, Нӧһ, Бьраһим, Сәраһ, Муса, Даԝьд у йед дьн, кʹижан кӧ кʹәтьнә нава «әʹлаләта шәʹдайә гьран» (Ибрани 11:4-12:1). Мәсәлә, ча һәрге кәсәк бәр диԝане пьшта мәрьвәки рʹаст у нәгӧнәкʹар бьгьрә у шәʹдәтийе бьдә, ӧса жи әм шәʹдәтийе дьдьн дәрһәԛа Хԝәдайе хԝә у бь хирәт рʹастийе бәла дькьн.

Бь ве йәке әм чʹәʹв дьдьнә Иса Мәсиһ. Кʹьтеба Пирозда Иса Мәсиһ те навкьрьне ча: «Шәʹде рʹаст у амьн» (Әʹйанти 3:14). Иса хԝәха жи дьгот, кӧ әви наве Хԝәде да әʹйанкьрьне у шәʹдәти дьда, ԝәки мәрьв дәрһәԛа Хԝәде рʹастийе бьзаньбьн (Йуһʹәнна 17:26; 18:37). Демәк шагьртед Исайә рʹаст жи гәрәке чʹәʹв бьдана ԝи, хԝә бь наве Йаһоԝа навкьрана у бь ве йәке әв нав сәва һʹәму мәрийа әʹйан кьрана. Шәʹдед Йаһоԝа бь дьл у щан, һәма ӧса жи дькьн.

• Чьрʹа Леколинкʹаред Кʹьтеба Пироз, наве хԝә кьрьнә Шәʹдед Йаһоԝа?

• Әв чьԛас ԝәʹдә йә, кӧ сәр әʹрде бона Йаһоԝа шәʹдә һәнә?

• Кʹи йә Шәʹде Йаһоԝайи һәри мәзьн?

Кʹьтеба Пирозда һатьбу пʹехәмбәртикьрьне, кӧ паши мьрьна Иса Мәсиһ дәрсдаред нәрʹаст ԝе пәй шагьртед Иса Мәсиһ кʹәвьн, рʹастийед жь Кʹьтеба Пироз ԝе бьгӧһезьн у нәрʹаст дәрбази мәрийа бькьн (Кʹаред Шандийа 20:29, 30). Әв йәк рʹасти жи ԛәԝьми. Ԝана һинкьрьнед Иса Мәсиһ тʹәви һинкьрьнед пʹутпʹарьста, ләв хьстьн, у ӧса Мәсиһитийа нәрʹаст пешда һат (2 Тимотʹейо 4:3, 4). Ләма жи пьрс пешда те: Жь кʹӧ әм дькарьн бьзаньбьн, һәла фәʹмкьрьна мә дәрһәԛа һинкьрьнед Кʹьтеба Пироз рʹаст ә, йан на?

Хԝәде Йаһоԝа рʹастийе әʹйан дькә. Хԝәде пʹехәмбәрти кьр, кӧ рʹожед ахьрийеда занәбуна рʹаст ԝе зедә бә (Данийел 12:4). Сала 1870-да, кʹомәкә бьчʹук, йе кӧ рʹастийе дьгәрʹийа, тедәрхьст ԝәки һинкьрьнед аԝа готи Мәсиһийа, нә сәр һʹиме Кʹьтеба Пироз бун. Ләма жи ԝана дәстпекьр бьгәрʹьн фәʹмкьрьна рʹаст, дәрһәԛа һинкьрьнед Кʹьтеба Пироз. Йаһоԝа кʹәрәма хԝә да ԝана у али ԝан кьр, ԝәки әԝана Ньвисаред Пироз рʹаст фәʹм кьн.

Меред мьлук Кʹьтеба Пироз һʹимгьрти һин дьбун. Леколинкʹаред Кʹьтеба Пироз, йед кӧ иро әʹйан ьн ча Шәʹдед Йаһоԝа, бь щурʹәки ӧса баш дәстпекьрьн һин бьн Кʹьтеба Пироз, ԝәки һәла һе иро жи әм ве методе дьдьнә хәбате. Ԝана дәрһәԛа һинкьрьнед Кʹьтеба Пироз тʹәви һәв шеԝьр дькьрьн у пьрс сафи дькьрьн. Чахе әԝана рʹасти һинкьрьнед ӧса дьһатьн, кӧ чәтьн дьһатә фәʹмкьрьне, ԝана дәрһәԛа ве йәке Кʹьтеба Пирозда щийед дьн жи дьньһерʹин, сәва кӧ әв пьрс ԝанарʹа һе әʹйан бә. Чахе әԝана дьһатьн ль сәр фәʹмкьрьнәкә ӧса, йе кӧ тʹәви тʹәмамийа Кʹьтеба Пироз ләв дьһат, ԝи чахи ԝана әв һинкьрьн дьньвисин. Бь сайа шьровәкьрьна ԝан, щурʹә-щурʹә һинкьрьнед рʹаст әʹйан бун, мәсәлә, һинкьрьн дәрһәԛа: наве Хԝәде у Пʹадшатийа ԝи, ԛьрара Хԝәде бона инсанәте у әʹрде, һʹале мьрийа у гӧмана сахкьрьна мьрийа. Бь сайа леколина ԝан, әԝана жь гәләк һинкьрьнед нәрʹаст аза бун (Йуһʹәнна 8:31, 32).

Сала 1879-да, Леколинкʹаред Кʹьтеба Пироз тʹәхмин кьрьн кӧ ԝәʹдә гьһишт, ԝәки рʹасти сәва гәләка бе әʹйанкьрьне. Ләма жи дь ԝе саледа ԝана дәрхьст журнала Бьрща Ԛәрәԝьлийе, Дәрһәԛа Пʹадшатийа Йаһоԝа Әʹлам Дькә, йа кӧ һʹәта рʹожа иройин жи те дәрхьстьне. Ньһа әм рʹастийе жь Кʹьтеба Пироз 240 ԝәлатада бәла дькьн, у сәр ԝәкә 750 зьмана мьзгинийе бәла дькьн. Бәле, нава тʹәрихийа дьнйайе занәбуна рʹаст тʹӧ щар ӧса нәһатьбу бәлакьрьне, ча иро!

• Дәрһәԛа рʹастийед жь Кʹьтеба Пироз әм чь педьһʹәсьн, чь ԛәԝьми паши мьрьна Иса Мәсиһ?

• Бь сайа чь, мә рʹастийед жь Кʹьтеба Пироз әʹйан кьр?

Нава гәләк сала мә щурʹә-щурʹә ԝәлгәрʹандьнед Кʹьтеба Пироз дьда хәбате, мә әв кʹьтеб нәшьр дькьрьн у мәрийарʹа бәла дькьр. Ле паше мә дина хԝә дайе, ԝәки мәрʹа ԝәлгәрʹандьна тʹәзә лазьм ә, бь сайа кʹижани мәрьв ԝе һе рʹьнд рʹастийед жь Кʹьтеба Пироз фәʹм кьн, чьмки мә заньбу кӧ ԛьрара Хԝәде әԝ ә, ԝәки һәр кәс занәбуна рʹаст бьстинә (1 Тимотʹейо 2:3, 4). Бона ве йәке, сала 1950-да, мә дәстпекьр ԝәлгәрʹандьна Кʹьтеба Пироз сәр зьмане иройин. Әв ԝәлгәрʹандьн бь зьмане һеса, фәʹмдари у рʹаст һатә чекьрьне, ләма жи наве ве Кʹьтеба Пироз данин Ԝәлгәрʹандьна Дьнйа Тʹәзә. Әв Кʹьтеба Пироз сәр ԝәкә 130 зьмана зедәтьр һатийә ԝәлгәрʹандьне.

Кʹьтеба Пироз гәрәке һеса бьһата фәʹмкьрьне. Ԝәʹдә дәрбаз дьбә ԛәйде хәбәрдане у зьман те гӧһастьне, у ләма жи гәләк ԝәлгәрʹандьнада гьлийед кәвьн у нәфәʹмдари һәнә, жь бо чь жи һьнә щийед жь Кʹьтеба Пироз чәтьн тенә фәʹмкьрьне. Ле ӧса жи дәстньвисаред бәре һатьбун дитьне, йед кӧ һе рʹаст ьн у һе незики орижинале нә. Бь сайа ԝан дәстньвисара әм дькарьн зьмане Ибрани, Арами у Йунанийа кәвьн һе һеса фәʹм бькьн.

Кʹьтеба Пироз гәрәке жь орижинале, рʹаст у зәлал бьһата ԝәлгәрʹандьне. Гәләк фәрз ә ԝәки ԝәлгәрʹ бь амьнийе хԝә Кʹьтеба Пирозә орижинал бьгьрьн. Ле һьнә тʹәрщьман, дәԝса ве йәке, ԝәʹде ԝәлгәрʹандьна Кʹьтеба Пироз һьнә тьшт дьгӧһезьн. Мәсәлә, гәләк ԝәлгәрʹандьнада наве Хԝәде, Йаһоԝа, нәһатийә хәбьтандьне.

Кʹьтеба Пироз гәрәке наве Авторе хԝә һӧрмәт-рʹумәт кә. (2 Тимотʹейо 3:16) Кʹьтеба Пирозә орижиналеда наве Хԝәде ԝәкә 7 000 щар һатийә хәбьтандьне. Жере ль сәр шькьл һун дькарьн бьньһерʹьн дәстньвисарәке, кʹижанеда наве Хԝәде ньвисар ә. Ләма жи мә Кʹьтеба Пирозә Ԝәлгәрʹандьна Дьнйа Тʹәзәда, кʹидәре кӧ наве Хԝәде, Йаһоԝа, гәрәке һәбуйа, әв нав һатийә ньвисаре (Зәбур 83:18). Бь сайа леколине у хәбаткьрьна нава гәләк сала, Кʹьтеба Пирозә Ԝәлгәрʹандьна Дьнйа Тʹәзә, һʹәԝас ә сәва хԝәндьне у нав ԝеда фькьред Хԝәде зәлал тенә кʹьфше. Фьрԛи тʹӧнә сәр зьмане тә Ԝәлгәрʹандьна Дьнйа Тʹәзә һәйә йан на, фәрз әв ә, ԝәки тӧ Хәбәра Йаһоԝа һәр рʹож бьхуни (Йешу 1:8; Зәбур 1:2, 3).

• Чьрʹа мә сафи кьр кӧ мәрʹа лазьм ә Кʹьтеба Пирозә Ԝәлгәрʹандьна Дьнйа Тʹәзә?

• Һәр кәс кʹи дьхԝазә пебьһʹәсә дәрһәԛа ԛьрара Хԝәде, һәр рʹож чь гәрәке бькә?