Тʹәшкиләта мәда, тʹәреԛ тʹӧнә нә, йед кӧ пʹәра һьлдьдьн. Чахе щьвата Мәсиһийа һатә сазкьрьне, меред щерʹьбанди һатьнә кʹьфшкьрьне, сәва кӧ «шьвантийе щьвина Хԝәде бькьн» (Кʹаред Шандийа 20:28). Рʹуспи, меред щерʹьбанди у маԛул ьн, әԝана щьватеда шьвантийе йане рʹебәрийе һьлдьдьн сәр хԝә, «нә кӧ бе дьл, ле бь дьл у щан» әви шьхӧли дькьн, «чаԝа Хԝәде дьхԝазә, нә кӧ бона кʹара хԝә, ле бь рʹәзәдьли» (1 Пәтрус 5:1-3). Ньһа әме пебьһʹәсьн, әв чь шьхӧл ә кӧ әԝана дькьн.

Рʹуспи бона мә хәм дькьн, у мә хԝәй дькьн. Рʹуспийед щьвате жь Кʹьтеба Пироз рʹебәрийе дьдьн у бь ве йәке али щьвате дькьн, ԝәки әԝ рʹӧһʹанида пешда һәрʹә. Рʹуспи заньн, кӧ Йаһоԝа шьхӧләки гәләк фәрз дайә ԝан, әԝана һʹӧкӧми ль сәр әндәмед щьвате накьн, ле бона һʹалхԝәши у шабуна мә жь алийе хԝәда һʹәму тьшти дькьн (2 Корьнтʹи 1:24). Мина шьванәки, йе кӧ әшԛ у дьл мьԛати һʹәму пәзед хԝә дьбә, рʹуспи жи мәщала дьгәрʹьн кӧ тʹәви һәр әндәмед щьвате бьбьнә нас (Мәтʹәлок 27:23).

Рʹуспи мә һин дькьн, чаԝа ԛьрара Хԝәде бьԛәдиньн. Һәр һʹәфтийе рʹуспи ль сәр щьвате готара дьхуньн, у бь ве йәке баԝәрийа мә ԛәԝи дькьн (Кʹаред Шандийа 15:32). Хенщи ве йәке, әв меред амьн рʹебәрийе һьлдьдьн ль сәр хԝә, кӧ тʹәви мә мьзгинийе бәла кьн, у һʹәму алийава мә һин дькьн, кӧ чаԝа хьзмәт кьн.

Рʹуспи һʹәмуйа дьлгәрм дькьн. Сәва кӧ али мә бькьн һәләԛәтийа мә тʹәви Йаһоԝа һе бьшьдә, рʹуспи дькарьн бенә мала мә йан жи Ода Щьватеда тʹәви мә хәбәр дьн, ԝәки жь Кʹьтеба Пироз дьлбинийе бьдьнә мә у мә ԛәԝи кьн (Аԛуб 5:14, 15).

Хенщи хьзмәткьрьна щьватеда, әԝана ӧса жи мьԛати нәфәред мала хԝә дьбьн у дьхәбьтьн жи. Сәр ԝан һʹәму шьхӧла гәләк ԝәʹдә те хәрщкьрьне. Ләма жи әв бьред хәбатһʹәз, һежа нә кӧ әм ԛәдьре ԝан бьгьрьн (1 Тʹесалоники 5:12, 13).

• Рʹуспи ча али щьвате дькьн?

• Бь чь шьхӧли рʹуспи нишан дькьн, кӧ бона һʹәмйа хәм дькьн?

Кʹьтеба Пироз сәр ԝан мера, йед кӧ мьԛати щьвате дьбьн дьбежә «бәрпьрсийар» йан жи «бәрдәстийед щьвине» (Филипи 1:1). Һʹәму щьватада чәнд бьред ӧса һәнә, сәр кʹижана те готьне бәрдәстийед щьвате. Ԝәрә әм пебьһʹәсьн шьхӧле ԝан чь йә.

Бәрдәстийед щьвате али рʹуспийа дькьн. Фьрԛи тʹӧнә, бәрдәстийе щьвате щаһьл ьн йан әʹмьрда мәзьн ьн, әԝана меред амьн у хирәт ьн, у һьм жи һәләԛәтийа ԝан тʹәви Йаһоԝа ԛәԝи йә. Әԝана сәва щьвате шьхӧле керһати дькьн. Бь сайа ԝе йәке, кӧ әԝана һәргав шьхӧл дькьн, рʹуспийед щьвате ида дькарьн бь тʹәмами дина хԝә бьдьнә шьхӧле һинкьрьне у шьвантийе.

Бәрдәстийед щьвате шьхӧлед фәрз дькьн. Мәсәлә һьнә бәрдәстийед щьвате бәр дәри дьсәкьньн у ԝан һʹәмуйа сьлав дькьн, йед кӧ тенә щьвате. Һьнәк щабдар ьн бона апаратура сәва дәнгбьһистьне, йан жи бәлакьрьна әʹдәбйәта, һьнәк щабдар ьн кӧ хәрщед щьвате һʹәсаб кьн, һьнәк жи щабдар ьн ԝәки щийе кʹьфшкьри сәва бәлакьрьна мьзгинийе бьдьнә хушк-бьра. Хенщи ԝан тьшта бәрдәстийед щьвате хәм дькьн бона тʹәмзайа Ода Щьвате. Рʹуспийед щьвате дькарьн бежьнә бәрдәстийед щьвате, ԝәки әԝана али ԝан әндәмед щьвате бькьн, йед кӧ әʹмьрда мәзьн ньн. Бь рʹасти жи бәрдәстийед щьвате, һʹәму шьхӧла йед кӧ ԝанарʹа те дайине бь һазьрбуне дькьн, ләма жи әндәмед щьвате ԛәдьре ван бьра дьгьрьн (1 Тимотʹейо 3:13).

Ча меред Мәсиһи әԝана мәсәләкә баш ьн. Бәрдәстийед щьвате жь бо хәйсәт-һʹӧнӧред хԝәйә баш тенә кʹьфшкьрьне. Бь хәбәрдана хԝә ль сәр щьвате әԝана баԝәрийа мә ԛәԝи дькьн. Һьм жи әԝана дәртенә хьзмәтийе, у бь ԝе йәке һелана дьдьнә мә кӧ әм жи бь хирәт хьзмәт кьн. Чахе бәрдәстийед щьвате тʹәви рʹуспийа шьхӧлкʹарийе дькьн, шабун у йәктийа щьвате һе зедә дьбә (Әфәси 4:16). Ԝәʹдә дәрбаз дьбә, у бәрдәстийе щьвате дьбә йәки щерʹьбанди, әԝ ида дькарә ча рʹуспи хьзмәт кә.

• Кʹи нә бәрдәстийед щьвате?

• Бәрдәстийед щьвате ча али щьвате дькьн, ԝәки һʹәму тьшт щи-ԝар бә?

Мьзгинида гәләк щар, те гьликьрьне дәрһәԛа Барнабас у Паԝлосе шанди. Ԝана хьзмәт дькьр ча бәрпьрсийаред рʹеԝи, у тʹәсәлийа щьвата дькьрьн. Әԝана бь дьл у щан хәм дькьрьн, ԝәки бьрайед щьвата, рʹӧһʹанида пешда һәрʹьн. Щарәке Паԝлос готә Барнабас, «ԝәрә әм вәгәрʹьн сәрики бьдьнә ԝан хушк-бьра» (Кʹаред Шандийа 15:36). Рʹожа иройин жи нета бәрпьрсийаред мьһале диса әԝ ә, ԝәки щьват рʹӧһʹанида пешда һәрʹьн.

Бәрпьрсийаред мьһале тен ԝәки мә бьшьдиньн. Һәр бәрпьрсийарәки мьһале тʹәсәлийа ԝәкә 20 щьвата дькә, у сале дӧ щара тʹәви һәр йәк жь ван щьвата, һәр щаре һʹәфтеки хьзмәт дькә. Бь рʹасти жи әм жь бәрпьрсийаред мьһале у жь кʹӧлфәтед ԝан һәрге зәԝьщи нә, гәләк кʹаре дьстиньн у дьшьдьн. Әԝана тʹәви щаһьла у һьм жи тʹәви йед әʹмьрда мәзьн, дьбьнә нас. Әԝана дьбьнә һәвалкʹаред мә шьхӧле бәлакьрьна мьзгинийеда у һинкьрьна Кʹьтеба Пирозда. Бәрпьрсийар тʹәви рʹуспийа шьвантийе дькьн, у бь тʹемед һʹәԝас ль сәр щьвата у щьватед мәзьн, мә ԛәԝи дькьн (Кʹаред Шандийа 15:35).

Бәрпьрсийаред мьһале һьндава һʹәмуйада дьлован ьн. Әԝана гәләк хәм дькьн, ԝәки щьват рʹӧһʹанида пешда һәрʹә. Әԝана тʹәви рʹуспи у бәрдәстийед щьвате дьщьвьн у тʹәвайи дәрһәԛа пешдачуйина щьвате дьшеԝьрин, у бәрпьрсийар ширәтед лазьм бона щабдарийа ԝан дьдьнә ԝан. Ӧса жи бәрпьрсийаред рʹеви али пешәнга дькьн, ԝәки әԝана хьзмәта хԝәда пешда һәрʹьн. Әԝана насийа хԝә дьдьнә мәрьвед кӧ тʹәзә һатьнә щьвате у дәрһәԛа пешдачуйина ԝан педьһʹәсьн. Бәрпьрсийаред мьһале һьндава һʹәмуйада дьлован ьн, һьм жи «һәвал у хәбаткʹаре» мә нә (2 Корьнтʹи 8:23). Ԝәрә әм жь баԝәрийа ԝан у амьнийа ԝан, мәсәле хԝәрʹа һьлдьн (Ибрани 13:7).

• Бь чь нете бәрпьрсийаред мьһале тʹәсәлийа щьвата дькьн?

• Ча тӧ дькари жь бәрпьрсийаред мьһале кʹаре бьстини?

Чахе тʹәшԛәлә дьԛәԝьмьн, Шәʹдед Йаһоԝа перʹа-перʹа дәстпедькьн аликʹарийе у дьлбинийе бьдьнә бьратийа хԝә, йед кӧ жь бо ван бәла зийане кʹәтьнә. Аликʹарийа ӧса, рʹьнд нишан дькә һʹәзкьрьна мәйә бь дьл, һьндава һәв (Йуһʹәнна 13:34, 35; 1 Йуһʹәнна 3:17, 18). Ле әм ча аликʹарийе дьдьнә ԝан?

Әм пʹәра ԛӧрбан дькьн. Чахе Щьһустанеда хәлайикә гьран дәстпебу, Мәсиһийед Әнтакйайе али бьратийа хԝә кьрьн, ԝанарʹа пʹәрә шандьн (Кʹаред Шандийа 11:27-30). Рʹожа иройин жи, чахе әм педьһʹәсьн кӧ ԝәлатәкида хушк-бьред мә рʹасти тәʹли-тәнгийа һатьнә, әм һьм пʹәра һьм жи тьштед ԝанарʹа лазьм бь сайа щьвате дьшиньн (2 Корьнтʹи 8:13-15).

Әм аликʹарийа лазьм дьдьн. Рʹуспийед щьвата ԝи щийи, пешийе дәстпедькьн һәр әндәмед щьвате бьгәрʹьн у ԝан щийе бехофда щиԝар кьн. Комитейа кʹомәкдайине жи, сәва ԝан хәм дькә у хԝарьне, ава тʹәмьз, кʹьнща, аликʹарийа дохдьртийе у щийе сьтаре дьдә ԝан. Гәләк Шәʹдед Йаһоԝа кʹи чь дькарә, бь рʹәзәдьли у кʹиси хԝә дьчьн, сәва кӧ малед зийанбуйи у Одед Щьвата ава кьн. Әԝ йәк кӧ тʹәшкиләта мәда йәкти һәйә, у әм дьбьнә щерʹьбанди чахе тʹәвайи дьхәбьтьн, али мә дькә, ԝәки ԝәʹде чәтьнайа перʹа-перʹа шьхӧлкʹарийе бькьн у аликʹарийе бьдьнә зийанкʹеша. Рʹаст ә әм али «хушк у бьрайен» хԝә дькьн, ле әм али ԝан мәрийа жи дькьн, йед кӧ нә жь дине мә нә (Галати 6:10).

Әм дьлбинийе жь Кʹьтеба Пироз дьдьнә мәрийа. Кʹи кӧ жь хәзәбе зийан стандийә, ԝанарʹа әʹсәйи дьлбини лазьм ә. Ԝан чаха әм ԛәԝате дьстиньн жь Йаһоԝа, йе кӧ һәйә «Хԝәдейе һʹәму бәрдьлийе» (2 Корьнтʹи 1:3, 4). Әм тʹәви ԝан мәрьвед зийанкʹеш дәрһәԛа созед Хԝәде жь Кʹьтеба Пироз бь шабун хәбәр дьдьн у ԝана дьдьнә баԝәркьрьне, кӧ зутьрәке Пʹадшатийа Хԝәде ԝе һʹәму хәзәба кӧ мәрʹа еше у щәфе тинә, бьдә һьлдане (Әʹйанти 21:4).

• Чьрʹа чахе тʹәшԛәлә дьԛәԝьмьн, Шәʹдед Йаһоԝа перʹа-перʹа дәстпедькьн аликʹарийе бьдьнә мәрийа?

• Әм чь дьлбинийа рʹӧһʹани, дькарьн бьдьнә мәрьвед зийанкʹеш?

Пешийа мьрьна хԝә Иса Мәсиһ тʹәви шагьртед хԝә, Пәтрус, Аԛуб, Йуһʹәнна у Әндраԝьс башԛә хәбәр да. Чахе Иса ԝанрʹа дәрһәԛа нишана һатьна хԝәйә ԝәʹде рʹожед пашьн шьровәдькьр, әԝи пьрсәкә гәләк фәрз да ԝан: «Аԝа кʹи йә әԝ хӧламе амьн у сәрԝахт, кӧ ахайе ԝи әԝ сәр хӧламед хԝә сәрԝер кʹьфш кьр, кӧ ԝәхтда хԝарьна ԝан бьдә ԝан?» (Мәтта 24:3, 45; Маркос 13:3, 4). Аха, Иса Мәсиһ ә. Демәк, Иса соз дьдә шагьртед хԝә кӧ әʹсәйи ԝе һьнә кәса бьжберә, кӧ рʹожед хьлазийе хԝарьна рʹӧһʹани ԝәхтда бьдьнә ԝан. Ле дәрһәԛа кʹижан хԝарьне Иса хәбәр дьдә? Ль вьр Иса хәбәр надә дәрһәԛа нан-хԝарьна һәррʹожи. Иса хԝарьне бәрамбәри занәбуна дәрһәԛа Хԝәде дькә. Ле кʹи йә әԝ хӧлам, кӧ гәрәке занәбуна дәрһәԛа Хԝәде ԝәхтда бьда шагьртед Иса?

Әв кʹомәкә бьчʹук жь шагьртед Иса йә, йед кӧ бь рʹӧһʹ кʹьфшкьри нә. Әв «хӧлам» һʹәму хьзмәткʹаред Йаһоԝарʹа ԝәхтда хԝарьна рʹӧһʹани дьдә. Әм жь хӧлам һʹәԝщә нә, ԝәки «ԝәхтда хԝарьна» рʹӧһʹани бьстиньн (Луԛа 12:42).

Хӧлам мьԛати хьзмәткʹаред Йаһоԝа дьбә у рʹебәрийе дьдә ԝан. (1 Тимотʹейо 3:15) Чьмки пʹарәкә тʹәшкиләта Йаһоԝа сәр әʹрде йә, ләма Иса Мәсиһ шьхӧләки фәрз да ви хӧлами, ԝәки әԝана рʹебәрийа шьхӧле ве пʹара тʹәшкиләте бькьн. Демәк хәм бькьн дәрһәԛа хәрщед тʹәшкиләте, рʹебәрийа шьхӧле бәлакьрьна мьзгинийе бькьн, у мә бь сайа щьвата һин бькьн. Ләма жи, «хӧламе амьн у сәрԝахт», сәва кӧ һʹәму тьшти чь кӧ мәрʹа лазьм ә у чахе лазьм ә бьдә мә, бәла дькә хԝарьна рʹӧһʹани бь әʹдәбйәта кӧ әм ԝәʹде хьзмәтийе дьдьнә хәбате, ӧса жи бь сайа һинкьрьне кӧ әм сәр щьвата у щьватед мәзьн дьстиньн.

Хӧлам һьндава рʹастийа Кʹьтеба Пироз у һьм жи һьндава шьхӧлед бәлакьрьна мьзгинийа хере, амьн ә. Бь рʹасти жи, әԝана бь сәрԝахтийе хәм дькьн дәрһәԛа һәбун у һʹәму тьштед Иса Мәсиһ сәр әʹрде (Кʹаред Шандийа 10:42). Йаһоԝа кʹәрәм дькә шьхӧле ԝан пе хԝарьна рʹӧһʹани у пе зедәкьрьна Шәʹдед Йаһоԝа (Ишайа 60:22; 65:13).

• Иса кʹи кʹьфш кьр, сәва кӧ хԝарьна рʹӧһʹани бьдә шагьртед ԝи?

• Хӧламе амьн у сәрԝахт, чьда амьн у сәрԝахт ә?

Ԛьрʹна йәкеда Оршәлимеда, һьнә меред Мәсиһи «шанди у бәрпьрсийар» һәбун, йед кӧ ча кʹома рʹебәрийе хьзмәт дькьрьн. Әԝана һʹәму пьрсед фәрз нав щьвата Мәсиһийед кӧ кʹьфшкьри бун, сафи дькьрьн (Кʹаред Шандийа 15:2). Әԝана дәрһәԛа һʹәму пьрса тʹәви һәв дьшеԝьрин, ԝәки пебьһʹәсьн һәла чь дьбежә Кʹьтеба Пироз дәрһәԛа ԝан пьрса, у бь сайа ве йәке әԝана һʹәму тьштида һәврʹа ԛайил дьбун. Бь ве йәке ԝана дьһишт, кӧ рʹӧһʹе Хԝәде сәр ԝан һʹӧкӧм кә (Кʹаред Шандийа 15:25). Иро жи Кʹома Рʹебәрийе бь ви щурʹәйи дькә.

Хԝәде ԝана дьдә хәбате, сәва кӧ ԛьрара хԝә бинә сәри. Әв бьред жь алийе Хԝәдеда кʹьфшкьри, йед кӧ Кʹома Рʹебәрийеда хьзмәт дькьн, Кʹьтеба Пирозда гәләк кʹур дьбьн у леколине дькьн. Ләма жи әԝана шьхӧле хԝәда гәләк щерʹьбанди нә у рʹьнд заньн ча әм дькарьн шьхӧле хԝә рʹьнд бькьн, у пьрсед рʹӧһʹани жи гәләк рʹьнд шьровәдькьн. Кʹома Рʹебәрийе һәр һʹәфтийе дьщьвьн, сәва кӧ дьшьрмиш бьн дәрһәԛа һʹәԝщед бьратийа мәйә һʹәмдьнйайе. Ча жи ԛьрʹна йәкеда дьһатә кьрьне, әԝана бь нәʹма, бь бәрпьрсийаред рʹеԝи у йед майин, сәр һʹиме Кʹьтеба Пироз рʹебәрийе дьдьн. Әв йәк али щьмәʹта Хԝәде дькә, ԝәки фькьред ԝан у шьхӧлед ԝан йәк бә (Кʹаред Шандийа 16:4, 5). Кʹома Рʹебәрийе мьԛати һазьркьрьна хԝарьна рʹӧһʹани дьбә, у һелана дьдә һʹәмушка сәва кӧ шьхӧле бәлакьрьна мьзгинийе щәм ԝан, сәр щийе пешьн бә. Әԝана ӧса жи щабдар ьн бона кʹьфшкьрьна бьра сәр щурʹә-щурʹә шьхӧла.

Кʹома Рʹебәрийе пәй рʹебәрийа Хԝәде дьчә. Әԝана рʹебәрийа Йаһоԝа Хԝәдайе һʹәму Зорайийе дьгәрʹьн, ӧса жи рʹебәрийа Иса Мәсиһ, демәк Сәре щьвате (1 Корьнтʹи 11:3; Әфәси 5:23). Тʹӧ кәс жь Кʹома рʹебәрийе, хԝә ча сәроке щьмәʹта Хԝәде һʹәсаб накә. Әԝана тʹәви һʹәму Мәсиһийед кʹьфшкьри «пәй Бәрх [Иса] дьчьн, кʹӧда кӧ әԝ дьчә» (Әʹйанти 14:4). Кʹома Рʹебәрийе гәләк жь мә рʹази нә, чахе әм сәва ԝан у хәбата ԝан дӧа дькьн.

• Ԛьрʹна йәкеда, кʹи кʹома рʹебәрийеда хьзмәт дькьр?

• Ча рʹожа иройин, Кʹома Рʹебәрийе рʹебәрийа Хԝәде дьгәрʹьн?

Бәйтʹәл әв хәбәрәкә Ибрани йә, йа кӧ те һʹәсабе «Мала Хԝәде» (Дәстпебун 28:17, 19). Әв нав лайиԛи ԝан авайа йә, кʹидәре кӧ Шәʹдед Йаһоԝа һʹәму ԝәлатада хьзмәт дькьн, у жь кʹидәре шьхӧле бәлакьрьна мьзгинийе те сазкьрьне у пешда дьчә. Кʹома Рʹебәрийе, Нийу-Йоркеда, Дәԝләтед Йәкбуйида филиала һәри мәзьнда хьзмәт дькьн, у шьхӧлед Шәʹдед Йаһоԝа нав тʹәмамийа дьнйайе, жь ԝьр те рʹебәрикьрьне. Ӧса жи жь ԝьр әԝана пәй филиала дьньһерʹьн, йед кӧ щурʹә-щурʹә ԝәлатада ньн. Сәр ԝан мәрийа, йед кӧ ван авайада хьзмәт дькьн, дьбежьн әндәмед малбәта Бәйтʹәле. Мина малбәтәке, әԝана тʹәвайи дьжин, дьхԝьн, дьхәбьтьн, тʹәвайи жи Кʹьтеба Пироз һин дьбьн. Әван һʹәму тьшта малбәта Бәйтʹәле бь йәкти дькә (Зәбур 133:1).

Бәйтʹәл щики мәхсус ә, кʹидәре кӧ әндәмед ԝи рʹәзәдьли хьзмәт дькьн. Һʹәму Бәйтʹәлада, мер у жьнед Мәсиһи бь амьнийе шьхӧле Хԝәде дькьн, у һʹәму ԝәʹде хԝә дьдьнә шьхӧле бәлакьрьна мьзгинийе (Мәтта 6:33). Рʹаст ә тʹӧ кәс жь ԝана пʹәра йан һәԛ сәва ви шьхӧли настинә, ле ԝанрʹа отʹах, хԝарьн у ӧса жи пʹәре щева ԝан сәва һʹәԝщед ԝани һәррʹожи, дьдьн. Һәр кәс Бәйтʹәледа щурʹә-щурʹә шьхӧл дькә. Һьнәк жь ԝан, нәшьрханеда шьхӧл дькьн, һьнәк жи хԝарьне һазьр дькьн, кʹьнща дьшон, йан жи дьдьнә һәв у ӧса жи шьхӧлед майин дькьн.

Бәйтʹәл щийе шьхӧлкʹарийе йә, йед кӧ пьштгьрийа шьхӧле бәлакьрьна мьзгинийе дькә. Нет-мәрәма һәр Бәйтʹәләке әԝ ә, ԝәки рʹастийа Кʹьтеба Пироз бьгьһинә гәләк мәрийа. Әва брошура жи ве йәке избат дькә. Әԝ бьн рʹебәрийа Кʹома Рʹебәрийе һатийә ньвисаре, бь текста електроник әв брошур ԝәкә бь сәда кʹомед тʹәрщьманарʹа һатийә шандьне, у ԝан Бәйтʹәлада кʹидәре нәшьрханә һәйә, әв әʹдәбйәт бь мәкʹинед кӧ зу-зу дьхәбьтьн, һатийә дәрхьстьне. Паше жи әв әʹдәбйәт 110 000 щьватарʹа зедәтьр һатийә шандьне. Бь ван һʹәму шьхӧла, нәфәред Бәйтʹәле пьштгьрийа шьхӧләкә гәләк фәрз дькьн, демәк шьхӧле бәлакьрьна мьзгинийе (Маркос 13:10).

• Кʹи Бәйтʹәледа хьзмәт дькә, у ча дәрһәԛа һʹәԝщед ԝан дьшьрмиш дьбьн?

• Нәфәред Бәйтʹәле пьштгьрийа кʹижан шьхӧле фәрз дькьн?

Бәйтʹәледа хушк-бьра щурʹә-щурʹә идарада хьзмәт дькьн. Әԝана кʹомед тʹәрщьманийеда дьхәбьтьн, әʹдәбйәта нәшьр дькьн, бәлга һәвва дькьн у кʹьтеба чедькьн, ӧса жи әʹдәбйәта щи дькьн у дьпʹечʹьн. Һьнәк жи бәрһәмед аудио у видеойе дәрдьхьн, у диса щурʹә-щурʹә шьхӧл сәва ԝәлате хԝә дькьн. Әԝана хәм дькьн сәва пешдачуйина шьхӧле бәлакьрьна мьзгинийе, ԝәлатәкида йан жи чәнд ԝәлатада.

Комитейа филиале бона шьхӧлкьрьне, бәрпьрсийартийе дькә. Кʹома Рʹебәрийе, шьхӧле һәр филиаләки тʹәсмили Комитейа Филиале дькә. Комитейа Филиаледа, сьсе йан һе зедә рʹуспийед маԛул у щерʹьбанди хьзмәт дькьн. Комитейа Филиале, әʹлами Кʹома Рʹебәрийе дькә дәрһәԛа пешдачуйин у проблемед ԝан ԝәлата, сәва кʹижани жи әԝана щабдар ьн. Әв әʹламәти, али Кʹома Рʹебәрийе дькә, ԝәки сафи кьн, кӧ дәрһәԛа чь, әʹдәбйәтада, щьватада у щьватед мәзьнда гәрәке бе шьровәкьрьне. Ԝәкʹиле Кʹома Рʹебәрийе тʹьме тʹәсәлийа Бәйтʹәла дькьн, у рʹебәрийе дьдьнә Комитейа Филиала, дәрһәԛа шьхӧлед ԝан (Мәтʹәлок 11:14). Әԝ тʹема мәхсус һазьр дькә, у бь ве тʹеме һʹәму кәсед кӧ Бәйтʹәледа хьзмәт дькьн, ԛәԝи дькә.

Аликʹари щьватарʹа. Филиалада һәнә бьред щабдар, йед кӧ ԛәбул дькьн сазкьрьна щьватед тʹәзә. Әԝана ӧса жи рʹебәрийе дьдьнә ԝан пешәнга, мисйонера у бәрпьрсийаред мьһала, йед кӧ ԝан ԝәлатада хьзмәт дькьн, бона кʹижана филиала ԝан щабдар ә. Әԝана ӧса жи һазьр дькьн щьватед мәзьн, у бона авакьрьна Одед Щьватед тʹәзә щабдар ьн, у хәм дькьн, ԝәки әԝ әʹдәбйәтед кӧ щьватарʹа лазьм ьн, ԝанрʹа бенә шандьне. Бь аликʹарийа ван һʹәму шьхӧла, йед кӧ филиалада тенә кьрьне, шьхӧле бәлакьрьна мьзгинийе рʹьнд у тʹәрбәти те кьрьне (1 Корьнтʹи 14:33, 40).

• Ча Комитейа Филиала али Кʹома Рʹебәрийе дькә?

• Бона чь филиал щабдар ә?

Сәва кӧ әм һе рʹьнд «мьзгинийе» дәрбази «һʹәму мьләта, бәрәка, зьмана у щьмәʹта» бькьн, әм әʹдәбйәтед хԝә ль сәр ԝәкә 750 зьмана нәшьр дькьн (Әʹйанти 14:6). Ле чаԝа әм әви шьхӧле нәһеса пешда дьбьн? Әве йәке әм бь аликʹарийа ньвискʹара у бь аликʹарийа кʹома тʹәрщьмана дькьн, йед кӧ Шәʹдед Йаһоԝа нә.

Текста орижинал, пешийе ль сәр зьмане Инглизи те һазьркьрьне. Кʹома Рʹебәрийе щабдар ә бона шьхӧле Идара Ньвискʹарийе, йед кӧ филиала мәйә һәрә мәзьнда ньн. Идара ньвискʹарийе, ньвискʹарарʹа хәбате кʹьфш дькә. Әв ньвискʹар филиала һәри мәзьнда у филиалед дьнда жи хьзмәт дькьн. Ӧса жи әԝана щурʹә-щурʹә мәри нә. Бь сайа ве йәке, әʹдәбйәтед мәда тʹемед ӧса тенә ньвисаре, кӧ ль сәр мәрийед жь щурʹә-щурʹә мьләта һʹӧкӧм дьбә у әв әʹдәбйәт гәләк мәрийа хԝәш тен.

Ньвисаре тʹәрщьманарʹа дьшиньн. Паши ԝе йәке чахе ньвисар сәва нәшьркьрьне һазьр дьбә, у те ԛәбулкьрьне, әв бь електроник һʹәму кʹомед тʹәрщьманарʹа нав тʹәмамийа дьнйайеда те шандьне. Кʹома тʹәрщьмана тексте тʹәрщьмә дькә, паше дьньһерʹә у рʹаст дькә. Тʹәрщьман һʹәму тьшти дькьн, кӧ хәбәред рʹаст бьжберьн, ԝәки һʹәму фькьред текста Инглизи рʹаст дәрбаз кьн ль сәр ԝи зьмани, ль сәр кʹижани әԝана ԝәлдьгәрʹиньн (Ԝаиз 12:10).

Бь сайа компӧтәре хәбат пешда дьчә. Рʹаст ә компӧтәр нькарә дәԝса ньвискʹар у тʹәрщьмана бьгьрә, ле хәбата ԝан бь сайа компӧтәре дькарә һе зу пешда һәрʹә, чьмки компӧтәра ԝанда һәйә фәрһәнг, әʹдәбйәтед дәрһәԛа зьман у әʹдәбйәтед дьне сәва леколине. Хенщи ԝе йәке, Шәʹдед Йаһоԝа саз кьрьн бәрнамәк, йе кӧ ԝерʹа дьбежьн MEPS. Бь сайа ве бәрнаме, текст бь сәда зьмана дькарә тʹоп бә, паше ван текстада шькьла зедә дькьн у дьшиньн, сәва кӧ бе нәшьркьрьне.

Ле чьрʹа әм һаԛас ԛәԝат хәрщ дькьн, ԝәки һәла ль сәр ԝан зьмана жи ԝәлгәрʹиньн, сәр кʹижани тʹәне чәнд һәзар мәри хәбәр дьдьн? Чьмки Йаһоԝа дьхԝазә, ԝәки «һʹәму мәрьв хьлаз бьн у рʹастийе нас кьн» (1 Тимотʹейо 2:3, 4).

• Ча әʹдәбйәтед мә тенә ньвисаре?

• Чьрʹа әм әʹдәбйәтед хԝә, сәр гәләк зьмана ԝәлдьгәрʹиньн?

Тʹәшкиләта мә һәр сал бь сәда милйона Кʹьтеба Пироз у әʹдәбйәтед дьне нәшьр дькә, у бе пʹәрә бәла дькә. Әм Одед Щьвата у филиала ава дькьн, у һьнәка жи тʹәзә дькьн. Ӧса жи әм бь һʹәзара малбәтед Бәйтʹәла у мисйонера хԝәй дькьн, әм ӧса жи кʹомәке дьдьнә ԝан мәрийа, йед кӧ ԝәʹде хәзәба дькʹәвьнә тәнгасийа. Дьбәк тәрʹа әʹщебмайи йә, гәло пʹәра бона ԝан һʹәму тьшта жь кʹӧ те?

Әм накьнә ль сәр мәрийа, ԝәки пʹәра бьдьн. Рʹаст ә хәрщед шьхӧле бәлакьрьна мьзгинийе зәʹф ә, ле әм пʹәра жь мәрийа нахԝазьн. Ԛьрʹна пешда, Бьрща Ԛәрәԝьлийейә дәрхьстьна дӧдада һатьбу готьне, ԝәки әм баԝәр дькьн кӧ Йаһоԝа али мә дькә, ләма жи әме «тʹӧ щар жь мәрийа рʹәща у лавайа нәкьн, ԝәки али мә бькьн», у мә рʹасти жи тʹӧ щар ӧса нәкьрийә! (Мәтта 10:8)

Шьхӧлкʹарийа мә бь ԛӧрбанед рʹәзәдьли те кьрьне. Гәләк мәри ԛимәт дькьн шьхӧле мәйи бәлакьрьна мьзгинийе, у жь бо ве йәке пʹәра ԛӧрбан дькьн. Шәʹдед Йаһоԝа жи бь рʹәзәдьлийа хԝә, ԝәʹде хԝә, ԛәԝата хԝә, пʹәре хԝә у тьштед дьн ԛӧрбан дькьн, сәва кӧ ԛьрара Хԝәде сәр тʹәмамийа дьнйайе бе сәри (1 Дирок 29:9). Одед Щьватада у Одед Щьвата Мәзьнда һәнә ԛӧтʹийед бона ԛӧрбанкьрьне, у кʹи кӧ дьхԝазә, дькарә пʹәра бавеже. Ниве зәʹф жь ван пʹәра, йед кӧ тенә ԛӧрбанкьрьне, жь алийе мәрьвед нәдәԝләти тенә ԛӧрбанкьрьне. У ӧса жи мәрьв дькарьн бь аликʹарийа малпәра мә ԛӧрбана бькьн. Гәләк жь ԝана мина ԝе жьнәбийа бәләнгаз ьн, дәрһәԛа кʹижани Иса гьли кьр, кӧ әԝе дӧ пол авитә пʹәрәданга пʹарьстгәһе (Луԛа 21:1-4). Бь ԝи щурʹәйи һәр кәс, дьле ԝирʹа «чьԛас дәрбаз дьбә», дькарә ԛӧрбан кә (1 Корьнтʹи 16:2; 2 Корьнтʹи 9:7).

Әм баԝәр дькьн, ԝәки Йаһоԝа диса жи ԝе һелана бьдә ԝан мәрийа, кʹи кӧ дьхԝазә бь һәбуна хԝә пьштгьрийа шьхӧле бәлакьрьна мьзгинийе бькә, ԝәки ԛьрара Хԝәде бе сери у наве ԝи жи һӧрмәт бә (Мәтʹәлок 3:9).

• Чь фьрԛи һәйә ортʹа тʹәшкиләта мә у һʹәбандьнед дьн?

• Ԛӧрбанед бь рʹәзәдьли ча тенә дайине?

Чахе әм Ода Щьватеда тʹоп дьбьн, ԝедәре әм һинкьрьнед Кʹьтеба Пироз шеԝьр дькьн, йед кӧ дина мә дьдьнә сәр Пʹадшатийа Хԝәде. У ԝәʹде хьзмәтийа хԝә жи Иса гәләк дина хԝә дьда Пʹадшатийе (Луԛа 8:1).

Әм тʹоп дьбьн щийе хьзмәткьрьна Йаһоԝарʹа, һәр кәс мьһала хԝәда. Одед Щьвата әв һәнә авайи, жь кʹидәре Шәʹдед Йаһоԝа саз дькьн шьхӧле бәлакьрьна мьзгинийе, мьһалед хԝәда (Мәтта 24:14). Чап у щурʹед авайед Одед Щьвата дькарә щурʹә-щурʹә бә, әв авайи хәмьланди у йе бәрбьчʹәʹв ниньн. Чьмки әм зу-зу жь бәр һәв зедә дьбьн, ләма жи ван салед пашьнда, мә ԝәкә бь дәһа һʹәзара Одед Щьвата ава кьрийә (демәк рʹоже ԝәкә пенщ тенә авакьрьне). Ле гәло әв йәк чаԝа пек те? (Мәтта 19:26)

Әм ава дькьн бь ԝе ԛӧрбандайине, кӧ сәва авакьрьна Ода Щьвате һатийә ԛӧрбанкьрьне. Пʹәред ԛӧрбанкьри дьшиньн филиале, паше ван пʹәра дьдьнә ԝан щьвата, кʹидәре кӧ һʹәԝщә йә, ԝәки Ода Щьвате бе авакьрьне йан тʹәзәкьрьне.

Мәрьвед жь щурʹә-щурʹә мьләта, бе пʹәрә у бь рʹәзәдьли дьхәбьтьн, у Одед Щьвата ава дькьн. Гәләк ԝәлатада Кʹомед Авакьрьна Одед Щьвате һатьнә сазкьрьне. Ԝан кʹомада хушк-бьра бь рʹәзәдьли дьхәбьтьн. Әԝана жь щьватәке дәрбази щьвата дьн дьбьн, йед кӧ ԝәлате ԝанда нә, щарна дьчьнә щийед дур жи, ԝәки бона авакьрьна Ода Щьвата али ԝан бькьн. Ԝәлатед дьнда жи Мәсиһийед щерʹьбанди һатьнә кʹьфшкьрьне, ԝәки пәй авакьрьн у тʹәзәкьрьна ԝан Одед Щьвата бьньһерʹьн, йед кӧ тʹәсмили ԝан кьрьнә. Хенщи ԝе йәке, һәнә бьред ӧса, кӧ шьхӧле авакьрьнеда пʹешәкʹар ьн, у әԝана жи бь рʹәзәдьли кʹомәке дьдьн. Сәр һәр щийе авакьрьне, ниве зәʹф кʹи кӧ шьхӧл дькьн, әв хушк-бьред ԝе щьвате нә, сәва кʹе жи әв Ода Щьвате те авакьрьне. Бь сайа рʹӧһʹе Йаһоԝа у бь сайа хьзмәткʹаред ԝи, кӧ бь дьл у щан хԝә дьдьнә ви шьхӧли, әв һʹәму тьшт бь рʹасти жи пешда дьчә (Зәбур 127:1; Колоси 3:23).

• Нета авакьрьна Одед Щьвата чь йә?

• Бь сайа чь шьхӧле авакьрьна Одед Щьвате тʹәмамийа дьнйайеда пешда дьчә?

Һәр Одәкә Щьвата Шәʹдед Йаһоԝа, наве Хԝәдейи пироз рʹумәт дькә. Ләма жи әм тʹәхмин дькьн кӧ әм гәрәке жь һʹәму алийава тʹәмзайа щьвате хԝәй кьн. Әв ԛәдьрәки мәзьн ә у һьм жи әв пʹарәкә фәрз ә жь хьзмәткьрьна мәйә пироз. Гьшк жи дькарьн бькʹәвьнә нава ви шьхӧли.

Паши щьвате бь рʹәзәдьли оде дьдьнә һәв. Паши һәр щьвата, хушк у бьра әшԛ у дьл Ода Щьвате дьдьнә һәв у һʹәму тьшти щиԝар дькьн. Ле һʹәфтийе щарәке әԝана оде һе рʹьнд дьдьнә һәв у тʹәмьз дькьн. Рʹуспи йан бәрдәстийед щьвате рʹебәрийа ви шьхӧли дькьн, у әԝана тʹьме дьньһерʹьн ԝе рʹебәрийе, кʹидәре кӧ ньвисар ә ча әви шьхӧли гәрәке бькьн. Кʹидәре ча һʹәԝщә йә, хушк у бьра бь рʹәзәдьли һәма ӧса жи дькьн. Мәсәлә, гези дькьн, әʹрде дьшон, йан бь мәкʹина тʹозһьлдане тʹозе һьлдьдьн, кʹӧрсийа рʹаст дькьн, ӧса жи әԝана дәставе дьшон у дезинфексйайе дькьн, пʹәнщәра у нәйнька дьшон, гәмаре дәрдьхьн давежьн, дәр-доре щьвате тʹәмьз дькьн у пәй бахчә дьньһерʹьн. Лапә кем сале щарәке, рʹож те кʹьфшкьрьне, сәва кӧ бь тʹәмами у һе рʹьнд Ода Щьвате тʹәмьз кьн. Әм дьхԝазьн, ԝәки зарʹед мә жи ԛимәт кьн щийе һʹәбандьне, ләма әм ԝанарʹа жи мәщале дьдьн ԝәки әԝана Ода Щьвате бьдьнә һәв (Ԝаиз 5:1).

Кʹомәкдари бона щурʹә-щурʹә шьхӧл. Һәр сал, Ода Щьвата һур бь һур һьндӧрʹва у дәрвава те ньһерʹандьне. Бь сайа ве ньһерʹандьне, шьхӧлед тʹәзәкьрьне те кьрьне, ӧса Ода Щьвате рʹьнд те хԝәйкьрьне у хәрщ зедә набьн (2 Дирок 24:13; 34:10). Ода Щьвате тʹәмьз у рʹьнд хԝәйкьри, щийе лайиԛ ә, сәва һʹәбандьна Хԝәдерʹа. Чахе әм Ода Щьвате тʹәмьз у рʹьнд хԝәй дькьн, әм дьдьнә кʹьфше кӧ әм Йаһоԝа һʹәз дькьн у ԛимәт дькьн щийе һʹәбандьна хԝә (Зәбур 122:1). Әв йәк ӧса жи рʹьнд һʹӧкӧм дьбә сәр мәрийед дор-бәр (2 Корьнтʹи 6:3).

• Чьрʹа әм гәрәке Ода Щьвате тʹәмьз хԝәй кьн?

• Сәва тʹәмзайа Ода Щьвате чь те кьрьне?

Дьхԝази һьнә леколина бьки, сәва кӧ занәбуна хԝә дәрһәԛа Кʹьтеба Пироз һе зедә ки? Дьбәк тӧ дьхԝази һе зедә пебьһʹәси дәрһәԛа һьнә гьлийед жь Кʹьтеба Пироз, йан жи дәрһәԛа һьнә мәрийа, щийа, у диса гәләк тьштед дьн дәрһәԛа чь жи Кʹьтеба Пирозда те готьне? Йан дьбәк жи тӧ дьфькьри, гәло Хәбәра Хԝәде дькарә проблемед мьнда али мьн бькә? Һәрге тӧ дьхԝази щаба һьнә пьрсед хԝә бьвини, тӧ дькари бейи кʹьтебхана мә, йе кӧ Ода Щьватеда нә.

Кʹьтебханада һәнә әʹдәбйәт сәва леколине, кӧ аликʹарийе дьдьн. Дьбәк щәм тә сәр зьмане тә, нә һʹәму әʹдәбйәтед Шәʹдед Йаһоԝа һәнә. Ле кʹьтебхана Ода Щьватеда, гәләк әʹдәбйәт һәнә. Мәсәлә, вьра щурʹә-щурʹә ԝәлгәрʹандьнед Кʹьтеба Пироз һәнә, фәрһәнгед рʹьнд, у диса кʹьтебед дьн, йед кӧ дькарьн аликʹарийе бьдьнә тә. Пешийа щьвате йан жи паши щьвате, тӧ дькари һәрʹи кʹьтебхане. Һәрге кʹьтебханеда компӧтәр һәйә, ве компӧтәреда ӧса жи Кʹьтебхана Бьрща Ԛәрәԝьлийе тӧ дькари бьвини. Әв һәйә бәрнама електроник, кʹидәре кӧ щурʹә-щурʹә әʹдәбйәтед мә һәнә. Бь сайа ве бәрнаме тӧ дькари һеса әʹламәтийа бьгәрʹи у леколине бьки.

Шагьртед Щьвина йа Бьжин у Хьзмәт кьн, жь кʹьтебхане кʹаре дьстиньн. Һәрге тәрʹа дәрсәк данә, тӧ дькари һәрʹи кʹьтебханә щьвате, сәва кӧ ль ԝьр дәрса хԝә һазьр ки. Бәрпьрсийаре Щьвине йа Бьжин у Хьзмәт кьн, щабдар ә бона кʹьтебхане. Әԝ хәм дькә у мьԛат дьбә, ԝәки әʹдәбйәтед тʹәзә жи кʹьтебханеда һәбьн у ԝәки әԝана щида бьн. Бәрпьрсийаред мәкʹтәбе, йан жи әв мәри йе кӧ тʹәви тә һинбуна Кʹьтеба Пироз дәрбаз дькә, дькарьн тәрʹа нишан кьн, ԝәки ча тӧ дькари әʹламәтийед зедә, йе кӧ тәрʹа лазьм ьн, бьвини. Һәр кʹьтеб гәрәке щида бе хԝәндьне у жь кʹьтебхане нәйе дәрхьстьне. Әм ӧса жи гәрәке мьԛати ван кʹьтеба бьн, сәр ленәкьн у нишана данәйньн.

Кʹьтеба Пирозда ньвисар ә, кӧ һәрге әм дьхԝазьн занәбуне дәрһәԛа Хԝәде бьстиньн, әм гәрәке һазьр бьн леколине бькьн, у занәбуне кӧ ча «хьзнә» вәшарти йә, бьгәрʹьн (Мәтʹәлок 2:1-5). Бәле, кʹьтебхана Ода Щьвате дькарә али тә бькә, ԝәки тӧ дәстпеки бьгәрʹи.

• Кʹижан щурʹә-щурʹә әʹдәбйәт, кʹьтебхана Ода Щьватеда һәнә?

• Кʹи дькарә али тә бькә, ԝәки тӧ кʹьтебханеда бькарьби һе рʹьнд леколине бьки?

Иса Мәсиһ готә шагьртед хԝә: «Бьра рʹонайа ԝә бәр мәрьва шәԝԛ бьдә, кӧ әԝана кьрьнед ԝәйә ԛәнщ бьбиньн у пәсьне Баве ԝәйи әʹзмана бьдьн» (Мәтта 5:16). Ван пашԝәхтийа, әм һʹәму текʹноложийа тʹәзә бь тʹәмами дьдьнә хәбате, мәсәлә йәк жь ԝан әв һәйә компӧтәр. Малпәра мәйә фәрми һәйә jw.org, кʹидәре кӧ һәйә әʹламәти, дәрһәԛа баԝәри у шьхӧлкʹарийа Шәʹдед Йаһоԝа. Ле нета ве малпәре чь йә?

Щабед Кʹьтеба Пироз сәр һʹәму пьрса. Ве малпәреда тӧ дькари щаба ԝан пьрсед фәрз бьвини, йед кӧ мәрьв тʹьме дәрһәԛа ԝан дьфькьрьн. Мәсәлә, бәлавокед Гәло ԝе бе әԝ Ԝәʹдә, Чахе Кӧл у Дәрд ида Тʹӧнә бьн? у Гәло бь Рʹасти Мәри ԝе жь Мьрьне Рʹабьн? тӧ дькари малпәра мәда бьвини. Әв бәлавок сәр 600 зьмана зедәтьр һәнә. Ӧса жи тӧ дькари бьвини Кʹьтеба Пироз Ԝәлгәрʹандьна Дьнйа Тʹәзә сәр 130 зьмана зедәтьр у һьм жи әʹдәбйәтед сәр һʹиме Кʹьтеба Пироз сәва һинкьрьне. Мәсәлә, кʹьтеба Чь Һин Дькә Кʹьтеба Пироз? у диса журналед Бьрща Ԛәрәԝьлийе у Һʹьшйар Бьн! дәрхьстьнед тʹәзә. Әван әʹдәбйәта тӧ дькари малпәреда бьхуни йан жи бьбьһейи, ӧса жи тӧ дькари ԝана дәрбази компӧтәра хԝә бьки бь формата аудио (MP3), PDF, йан EPUB. Хенщи ве йәке, һәрге кәсәк сәр зьмане хԝә әʹдәбйәта дьхԝазә, тӧ дькари һьнә рʹупʹела жь ԝан әʹдәбйәта сәр кʹахаза дәрхи, у бьди ԝи мәрьви. Ӧса жи сәр зьмане нишанкьрьне, демәк сәва кәрʹ-лала, гәләк видео-әʹдәбйәт һәнә. Тӧ ӧса жи дькари хԝәндьна Кʹьтеба Пироз бь драматик у кʹьламәкә хԝәш компӧтәра хԝәда бьди кʹьшандьне, у ԝәʹде һесабуне бьбьһейи.

Әʹламәтийа рʹаст, дәрһәԛа Шәʹдед Йаһоԝа. Сәр ве малпәре ӧса жи һәнә әʹламәтийед тʹәзә у видео, дәрһәԛа шьхӧлед мәйи һʹәмдьнйайе. Һьм жи һәнә әʹламәти дәрһәԛа кʹомәкдайина мә, у дәрһәԛа ԝан ԛәԝьмандьна, йед кӧ тʹәви Шәʹдед Йаһоԝа тʹәвгьредайи нә. Хенщи ве йәке тӧ дькари пебьһʹәси щарәкә дьн кʹәнге щьвата мәзьн ԝе дәрбаз бә, у ӧса жи бьвини әʹламәти сәва теклибуна тʹәви филиалед мә.

Бь ван йәка рʹонайа рʹастийе һʹәта сәре дьнйайе шәԝԛ дьдә. Мәри жь һʹәму ԝәлата һʹәта жь щийед лапә сар у дур жи, мәсәлә Антарктике, жь ве рʹонайа рʹастийе кʹаре дьстиньн. Әм дӧа дькьн, ԝәки хәбәра Йаһоԝа сәр тʹәмамийа дьнйайе зу бәла бә, сәва кӧ Хԝәде һӧрмәт-ԛимәт бә (2 Тʹесалоники 3:1).

• Ча малпәра мәйә jw.org, али һе зедә мәрийа дькә, пебьһʹәсьн рʹастийа Кʹьтеба Пироз?

• Тӧ сәр малпәра мә чь дьхԝази бьньһерʹи?