Гәләк мәрьв һʹәсаб дькьн, кӧ Хԝәде гәрәке дьле хԝәда баԝәр кьн, у әʹсәйи нинә һәрʹьн щьвата, дера йан пʹарьстгәһа. Ле кʹара тә чь йә, һәрге тӧ бейи сәр щьвата Шәʹдед Йаһоԝа?

Нава мәрьвед ԛәнщ у дьлован тӧйе шабуне бьстини. Мәсиһийед ԛьрʹна йәке, тʹәвайи тʹоп дьбун у щьват саз дькьрьн, сәва кӧ Хԝәдерʹа хьзмәт кьн. Ль ԝьр әԝана Хәбәра Хԝәде һин дьбун у дьл дьданә һәв (Ибрани 10:24, 25). Чьмки щьватеда һʹәзкьрьн һәбу, ләма жи ԝана тʹәхмин дькьр кӧ әԝана нава һәвалед ԛәнщда ньн, бь рʹасти нава хушк-бьред хԝәйә рʹӧһʹанида ньн (2 Тʹесалоники 1:3; 3 Йуһʹәнна 14). Мәсиһийед бәре мәрʹа мәсәләкә баш һиштьнә, ләма әм жи мина ԝан щьвата дәрбаз дькьн у шабунәкә мәзьн дьстиньн.

Кʹар әԝ ә, кӧ щьватеда тӧйе һин би ча принсипед жь Кʹьтеба Пироз бьди хәбате. Ԝәʹде бәре, ча жи Кʹьтеба Пирозда те гьликьрьне, мер, жьн у зарʹ тʹьме дьщьвийан. Иро жи гава әм тʹәвайи тʹоп дьбьн, меред щерʹьбанди у маԛул сәр һʹиме Кʹьтеба Пироз мә һин дькьн у али мә дькьн, кӧ һе кʹур пебьһʹәсьн, һәла ча әм дькарьн ширәт у принсипед жь Кʹьтеба Пироз әʹмьре хԝәда бьдьнә хәбате (Ԛануна Дӧщари 31:12; Нәһәмийа 8:8). Сәр щьвате, жь мә һәр кәс дькарә щаба хԝә бьдә у пе кʹьлама пәсьне Хԝәде бьдә, бь сайа ве йәке баԝәрийа мә те кʹьфше (Ибрани 10:23).

Һәрге тӧ гӧмана хԝә бьди сәр ԛәԝата Хԝәде, тӧйе кʹаре бьстини. Дәрбәке Паԝлосе шанди щьватәкерʹа гьлийед ӧса готьбу: «Әз гәләки һʹәйра дитьна ԝәда мә, . . . кӧ һун баԝәрийеда бьшьдьн. Аԝа готи әз жи тʹәви ԝә, әм дьл бьдьн бәр һәв, бь ԝе баԝәрийа мьн у ԝәйә һәр дӧ алийава» (Рʹомайи 1:11, 12). Бәле, гава әм тенә щьвате у тʹьме һәв дьвиньн, әм баԝәрийеда дьшьдьн у ԛәԝата мә жи зедә дьбә, ԝәки әм бәр чʹәʹве Хԝәде рʹаст бьжин.

Һун жи дькарьн нете дайньн пешийа хԝә, бенә щьватед мә, ԝәки кʹаре бьстиньн. Әм бь дьл у әшԛ тә тʹәглиф дькьн. Ԝәрә сәр чʹәʹва! Дәре щьвата мә сәва һʹәмуйа вәкьри йә у ԝьра пʹәра тʹоп накьн.

• Мә чʹәʹв дайә кʹе, кӧ әм дьщьвьн?

• Әм чь кʹаре дькарьн бьстиньн, һәрге һәрʹьн щьватед Шәʹдед Йаһоԝа?

Дьхԝази бәрф бә йан багәр бә, йан паши хәбате ԝәстийайи бьн, йәкә әм дьчьнә щьвата хԝә, тʹӧ чәтьнайи нькарә рʹийа мә бьгьрә. Ле зани чьрʹа Шәʹдед Йаһоԝа һаԛас ԛәԝат хәрщ дькьн, ԝәки тʹьме тʹәви хушк-бьред хԝә тʹоп бьн?

Әв йәк сәва һʹалхԝәшийа мә баш ә. «Бона һәвдӧ хәм бькьн», вьра Паԝлос хәбәр дьдә дәрһәԛа хушк-бьред мә, тʹәви кʹижана әм сәр щьвине тʹьме тʹоп дьбьн (Ибрани 10:24). Әв гьлийед Паԝлос ӧса жи те һʹәсабе, кӧ әм гәрәке насийа хԝә бьдьнә һәв. Бь ве йәке Паԝлос һелана дьдә мә, ԝәки әм ӧса жи һьндава һәв дьлован бьн. Чахе әм насийа хԝә дьдьнә хушкәке йан бьраки мә, әм тедәрдьхьн кӧ проблемед ԝан жи мина йе мә нә, у чахе әм жь ԝан педьһʹәсьн кӧ ча әԝана һеса проблемед хԝә сафи дькьн, әм жи ԛәԝи дьбьн у һеса бәр чәтьнайа тәйах дькьн.

Бь сайа ве йәке һәвалтийа ԛайим саз дьбә. Щьватеда әм тʹоп дьбьн нә кӧ ча тʹәви насед хԝә, ле тʹәви һәвалед хԝәйә незик. Әм ӧса жи ԝәʹдә дьвиньн, ԝәки тʹәви хушк-бьра һеса бьн у кʹаре бьдьнә һәв. Бь сайа ве йәке әм һин дьбьн һе зедә һәв ԛимәт кьн, у һʹәзкьрьна мә жи һьндава һәв һе зедә дьбә. Ләма, чахе хушкәк йан бьраки мә чәтьнайеда нә, әм бь дьл у щан дьхԝазьн али ԝан бькьн, чьмки һьндава мә ида һәвалтийа ԛайим саз буйә (Мәтʹәлок 17:17). Бь ве йәке кӧ әм тʹәви һʹәму хушк у бьра тʹоп дьбьн у һәвалтийе дькьн, әм нишан дькьн кӧ әм «һәвдӧрʹа шәԝат» ьн (1 Корьнтʹи 12:25, 26).

Әм һелана дьдьнә тә, ԝәки тӧ хԝәрʹа бьжбери ԝан һәвала, йед кӧ ԛьрара Хԝәде тиньн сери. Һәвалед ӧса тӧйе нава Шәʹдед Йаһоԝа бьвини. Ләма жи изьне нәдә тʹӧ кәси, ԝәки рʹе тә бьгьрьн кӧ тʹәви мә һәвалтийе бьки.

• Чьрʹа тʹопбун у һәвалтийа мә тʹәви хушк бьред мә, кʹаре дькарә мәрʹа бинә?

• Тӧ кʹәнге дьхԝази бейи сәр щьвина мә?

Мәсиһийед пешьн щьватед хԝә дәрбаз дькьрьн һʹәчʹи зәʹф пе кʹьлама, дӧакьрьна, хԝәндьн у шьровәкьрьна ньвисаре (1 Корьнтʹи 14:26). Щьватед мә жи һәма ӧса дәрбаз дьбьн.

Рʹебәри сәр һʹиме Кʹьтеба Пироз ьн у керһати нә. Щьватәк Шәмийе йан Ләʹде дәрбаз дьбә, сәр кʹижани тӧйе готара 30 дәԛәйи бьбьһейи, кʹижан кӧ сәр һʹиме Кʹьтеба Пироз ә. Ван готарада те шьровәкьрьне, ԝәки Кʹьтеба Пироз чь дьбежә дәрһәԛа рʹожед иройин у әʹмьре мә. Һәр кәс сәр щьвине те һелан дьбә, ԝәки хԝәха жи Кʹьтеба Пироз вәкә у дина хԝә бьдә ньвисаре. Паши ве готара 30 дәԛәйи, нава сьһʹәтәке Һинбуна «Бьрща Ԛәрәԝьлийе» дәрбаз дьбә. Ԝәʹде ве һинбуне һәр кәс дькарә щаба хԝә бьдә дәрһәԛа тʹемайе, кӧ жь журнала Бьрща Ԛәрәԝьлийе сәва һинбуне те һьлдане. Әв щьвата пе пьрс у щаба, али мә дькә кӧ әм һин бьн рʹебәрийа жь Кʹьтеба Пироз бьдьнә хәбате. Нав тʹәмамийа дьнйайе, 110 000 щьватада зедәтьр, тʹемайа жь Бьрща Ԛәрәԝьлийе йа кӧ һәр һʹәфтийе дәрбаз дьбә, йәк ә.

Әм сәр щьвата һин дьбьн, кӧ һинкьрьнеда һостә бьн. Нава һʹәфтийеда, әм диса рʹожәке жи тʹоп дьбьн у щьвате дәрбаз дькьн, наве кʹижане йә Мина Иса Мәсиһ Бьжин у Хьзмәт кьн у әв щьват сәр се пʹара пʹаравәдьбә. Әв щьват сәр һʹиме ԝан тʹема йә, йед кӧ тенә дайине һәр мәһ Бәрнама Щьвинеда йа Бьжин у Хьзмәт кьн. Пʹара пешьнә ве щьвате те навкьрьне «Фькьред Ԛимәт жь Хәбәра Хԝәде», йа кӧ али мә дькә рʹьнд фәʹм бькьн ԝан фькьред Кʹьтеба Пироз, чь кӧ щьватеда пешда һатийә хԝәндьне. Паше дәстпедьбә пʹара «Хԝә бона Хьзмәтийе Һазьр кьн», нава кʹижанеда тʹәмашә һәнә кӧ чаԝа тʹәви мәрийа Кʹьтеба Пироз шеԝьр кьн. Ширәткʹар жи дина хԝә дьде, кӧ чь дькарә али шагьрта бькә, ԝәки әԝана хԝәндьн у һинкьрьнеда һе пешда һәрʹьн (1 Тимотʹейо 4:13). Пʹара пашьнә ве щьвате те навкьрьне «Мина Иса Бьжин», кʹидәре те шеԝьркьрьне ԝәки чаԝа әм дькарьн принсипед Кʹьтеба Пироз һәр рʹож бьдьнә хәбате. Нава ве пʹареда һәйә шеԝьркьрьн бь щурʹе пьрс у щаба, чь кӧ али мә дькә Кʹьтеба Пироз һе рʹьнд фәʹм бькьн.

Чахе тӧ бейи сәр щьватед мә, бешьк тӧйе әʹсәйи тʹәхмин ки, кӧ әв һинкьрьна Кʹьтеба Пироз йа кӧ ль ԝьр те дәрбазкьрьне, чьԛас баш, рʹаст у керһати йә (Ишайа 54:13).

• Сәр щьватед Шәʹдед Йаһоԝа тӧйе чь бьбьһейи?

• Щарәкә дьн тӧ дьхԝази бейи сәр кʹижан жь ван щьвата?

Дина хԝә бьдә сәр шькьлед ве брошуре кӧ чахе Шәʹдед Йаһоԝа дьчьнә щьвате, әԝана ча баш кʹьнща хԝә дькьн. Чьрʹа чахе әм дьчьнә щьвате, әм гәләки дина хԝә дьдьнә сәр кʹьнщхԝәкьрьна хԝә?

Сәва кӧ һьндава Хԝәдеда ԛәдьр хԝә нишан кьн. Бь рʹасти Хԝәде дина хԝә дьдә дьла, нә кӧ кʹьнщхԝәкьрьне йан бәдәԝийа мәрийа (1 Самуйел 16:7). Ле чахе әм дьщьвьн кӧ ԝирʹа хьзмәт кьн, хԝәстьна мә әԝ ә кӧ нишан кьн, ԝәки әм һьн ԛәдьре Хԝәдайе хԝә дьгьрьн, һьн ԛәдьре хушк-бьред хԝә. Һәрге кәсәкирʹа бежьн, кӧ әԝ гәрәке бәр пʹадшаки йан сәрԝерәки бьсәкьнә, әԝ ԝе кʹьнщед баш у лайиԛ хԝә кә, ԝәки нишан кә кӧ ԛәдьре сәрԝертийа ԝи дьгьрә. Хԝәде Йаһоԝа һәйә «Пʹадшайе һʹәта-һʹәтайе», ләма жи чахе әм дьчьнә щьвата ԝи, демәк щийе һʹәбандьна ԝи, бь кʹьнщхԝәкьрьна хԝә, әм әʹйан дькьн һәла әм ԛәдьре ԝи дьгьрьн йан на (1 Тимотʹейо 1:17).

Сәва кӧ әʹйан кьн ван ширәт у принсипа бь кʹижана әм дьжин. Кʹьтеба Пироз ширәта дьдә мә, ԝәки әм кʹьнщхԝәкьрьнеда «бь шәрм у бь әʹдәб хԝә бьхәмьлиньн» (1 Тимотʹейо 2:9, 10, Kitabı Mukaddes Şirketi). Кʹижан кʹьнщхԝәкьрьн бе «шәрм» дькарә бе һʹәсабе? Мәсәлә, кʹьнщхԝәкьрьна гәләк вәкьри у нә намуси, йан жи чахе кʹьнщед ӧса хԝә дькьн, ԝәки дина мәрийа гәләки бәрбь хԝә бькʹьшиньн. Ле кʹьнщхԝәкьрьна бе «әʹдәб» те һʹәсабе кʹьнщед сәрʹа-бәрʹа хԝәкьри, нәпʹак йан жи әʹщеб. Ле һәрге тӧ ԝан ширәта бьди хәбате, нәфькьрә кӧ тӧ ида нькари хԝәрʹа кʹьнща бьжбери. Диса гәләк щурʹә кʹьнщед лайиԛ һәнә, кӧ әм дькарьн хԝәрʹа бьжберьн. Бь кʹьнщхԝәкьрьна баш у лайиԛ әм дькарьн бе хәбәрдан «һинкьрьна бона Хьлазкьре мә Хԝәде, һәр алийава бьхәмьлиньн» у «шькьрийе бьдьнә Хԝәде» (Тито 2:10; 1 Пәтрус 2:12). Кʹьнщхԝәкьрьна мәйә баш сәр щьвата, һʹӧкӧм дьбә сәр ньһерʹандьна мәрийа, ԝәки әԝана ԝе чь щурʹәйи сәр хьзмәткьрьна мә бьньһерʹьн.

Һәрге кʹьнщед тәйә сәва щьвате тʹӧнә, әм һелана дьдьнә тә, ԝәки әв нәбә мәʹни кӧ нәйейи щьвате. Әʹсәйи нинә ԝәки кʹьнщ бьһа бә, йан жи гәләк бәдәԝ, фәрз әԝ ә, ԝәки кʹьнщ тʹәмьз у лайиԛ бә.

• Әԝ йәк чьԛаси фәрз ә, һәла чь кʹьнщ мә нә чахе әм Хԝәдерʹа хьзмәт дькьн?

• Бь кʹижан ширәт у принсипа әм рʹебәри дьбьн, чахе хԝәрʹа кʹьнща дьжберьн?

Һәрге тӧ тʹәви Шәʹдед Йаһоԝа Кʹьтеба Пироз һин дьби, һьлбәт тӧ сәва һинбуне тʹьме пешда хԝә һазьр дьки у ԝе тʹеме кӧ һуне дәрбаз бьн, дьхуни. Әм һелана дьдьнә тә, ԝәки сәва щьвата жи хԝә пешда һазьр ки, ԝи чахи тӧйе кʹарәкә мәзьн бьстини. Һәрге тӧ әве йәке хԝәрʹа бьки ԛәйдә, у һини ве йәке би, тӧйе ахьрийа хԝә баш ки.

Сафи кә кʹидәре у кʹәнге һазьр би. Һьнәка сафи кьрьнә ԝәки шәбәԛе пешийа кӧ һәрʹьн хәбате һазьр бьн, һьнәкарʹа жи дәст дьдә еваре, чахе зарʹ ида рʹаза нә. Фьрԛи тʹӧнә кʹәнге у чьԛас ԝәʹдә бьжбери, һәрге жи найе стандьне кӧ гәләк ԝәʹдә бона һазьрбуне хәрщ ки, бәрхԝә нәкʹәвә, фәрз әԝ ә кӧ ԝәʹде хԝәндьне дина тә дәрбази сәр тьштәки дьн нәбә. Хԝәрʹа щики хәԝлә у рʹьһʹәт бьжберә, у ӧса бькә ԝәки дина тә дәрбази тьштәки дьн нәбә. Мәсәлә, радийо, телевизийон, йан жи тʹеле дькари весини. Пешийа кӧ дәстпеки һазьр би, Хԝәдерʹа дӧа бькә, ԝәки али тә бькә ԝе дәме проблемед хԝә бир ки у бькарьби рʹьнд дина хԝә бьди Хәбәра Хԝәде (Филипи 4:6, 7).

Һазьр бә щаба хԝә бьди. Пешийе тедәрхә һәла ве тʹемайеда фькьра сәрәкә кʹижан ә. Сәр наве тʹемайе бьфькьрә, у дина хԝә бьдә бьнсәрийа, ԝәки тедәрхи әԝ чаԝа тʹемайева гьредайи нә. Ӧса жи һʹәму шькьла бьньһерʹә у пьрсед пашьн сәва ԝәкʹьландьне жи бьхунә, чьмки әв жи фькьред фәрз әʹйан дькьн. Паше ида һәр абзасәке йәк-йәк бьхунә, у щабед сәр пьрсед жере ньвисар бьвинә. Һʹәму рʹезед жь Кʹьтеба Пироз кӧ абзаседа тенә дайине, бьхунә, у бьфькьрә, кӧ чаԝа әԝ тʹемайева гьредайи нә (Кʹаред Шандийа 17:11). Чахе тӧ ида дькари щаба хԝә бьди, ԝи чахи һьнә гьлийа йан щьмла кʹьфш кә, ԝәки ԝәʹде щьвате бькарьби щаба хԝә бини бира хԝә. У ӧса ль сәр щьвате һәрге дьхԝази, дькари дәсте хԝә һьлкʹьшини у пе гьлийед хԝә щаба хԝә бьди.

Чахе тӧ тʹемайа кӧ щьватеда һәр һʹәфтийе те шеԝьркьрьне, леколин ки у хԝә һазьр ки, ӧса һәр щар тӧйе фькьрәкә тʹәзә бьки нава «хьзна» хԝәйә занәбуна жь Кʹьтеба Пироз (Мәтта 13:51, 52).

• Кʹәнге тӧ бона щьвате хԝә һазьр дьки?

• Ча тӧ дькари хԝә һазьр ки, сәва кӧ щьватеда щаба хԝә бьди?

Һәла һе бәре жи Хԝәде дьхԝәст кӧ нәфәред мале тʹьме тʹәвайи ԝәʹдә дәрбаз кьн, сәва кӧ һәләԛәтийа хԝә һьндава һәвдӧ у Йаһоԝа бьшьдиньн (Ԛануна Дӧщари 6:6, 7). Ләма жи Шәʹдед Йаһоԝа һәр һʹәфтийе щарәке, ԝәʹдә дьвиньн, сәва кӧ тʹәви малбәта хԝә Хԝәдерʹа хьзмәт кьн. Ԝәʹде ве ԛӧльхкьрьна малбәте әԝана дәрәща һеса у рʹьһʹәтда, тʹәвайи дьшеԝьрьн у дәрһәԛа ԝан тʹемед рʹӧһʹани хәбәр дьдьн, йед кӧ малбәте ԝанрʹа лазьм ьн. Һәрге тӧ тʹәне йи, ԝи чахи ԝе баш бә тӧ әви ԝәʹдәйи диса жи тʹәви Йаһоԝа Хԝәде дәрбаз ки, демәк тʹемәке жь Кʹьтеба Пироз хԝәрʹа бьжбери у һин би.

Ԝәʹде ԛӧльхкьрьна тʹәви малбәте, әм незики Йаһоԝа дьбьн. «Незики Хԝәде бьбьн, у әԝе незики ԝә бьбә!» (Аԛуб 4:8) Чахе әм жь Кʹьтеба Пироз педьһʹәсьн дәрһәԛа хәйсәт-һʹӧнӧр у кʹаред Хԝәде, ԝи чахи әм һе рʹьнд ԝи нас дькьн у һе незики ԝи дьбьн. Әм тʹәвайи дькарьн һеса бь сайа хԝәндьна Кʹьтеба Пироз, ԛӧльхкьрьна тʹәви малбәте дәстпекьн, у ԝе баш бә пе бәрнама хԝәндьна Кʹьтеба Пирозә щьватеда, бьхуньн. Ԝәʹде хԝәндьне әʹсәйи нинә ԝәки тʹәне йәк бьхунә йед дьн бьбьһен, гьшк дькарьн пәй һәврʹа бьхуньн, ле паше һәр кәс дькарә бежә кӧ жь Кʹьтеба Пироз чь һин бу.

Ԝәʹде ԛӧльхкьрьна тʹәви малбәте әм незики һәвдӧ дьбьн. Бь сайа һинбуна Кʹьтеба Пироз тʹәви малбәте, һәләԛәтийа ортʹа мер у жьн, йан де-бав у зарʹа һе баш дьбә. Чахе һинбуна тʹәви малбәте дәрбаз дьбә, һʹәмуйед малбәтеда шабунәкә мәзьн дьстиньн у бь шабуне диса һивийа ве рʹоже нә. Де у бав салед зарʹед хԝә һьлдьдьн һʹәсаб у тʹемәке сәва ԝан дьжберьн, мәсәлә жь журнала Бьрща Ԛәрәԝьлийе, у Һʹьшйар Бьн!, йан жи жь малпәра мә jw.org. Һун дькарьн хәбәр дьн дәрһәԛа ԝан чәтьнайа, йед кӧ рʹасти зарʹед ԝә тен, мәсәлә дәрһәԛа чәтьнайед мәкʹтәбеда. Паше һун дькарьн бәрнамед тʹелевизйоне йа JW Бродкастинг бьньһерʹьн (tv.jw.org) у тʹәвайи шеԝьр кьн. Ӧса жи һун дькарьн кʹьлама кӧ ль щьвате ԝе бьстьрен, пешда малда һазьр бьн кӧ бьстьрен. Һьн жи, паши ԛӧльхкьрьна тʹәви малбәте, һун дькарьн һʹәԝас хԝәрʹа ԝәʹдә дәрбаз кьн у һьнәки һеса бьн.

Әв ԝәʹде мәхсус, йе кӧ һун һәр һʹәфтийе сәва хьзмәткьрьна Йаһоԝарʹа тʹәви малбәте дәрбаз дькьн, ԝе али ԝә бькә кӧ Хәбәра Хԝәдеда кʹаре бьвиньн. Йаһоԝа кьред ԝә ԝе бьшекьринә у әʹсәйи ԝе кʹәрәмед хԝә ль сәр ԝә бьбаринә (Зәбур 1:1-3).

• Чьрʹа әм ԝәʹдә дьвиньн, сәва кӧ тʹәви малбәте Хԝәдерʹа хьзмәт кьн?

• Чь щурʹәйи де-бав дькарьн рʹожа ԛӧльхкьрьна тʹәви малбәте ӧса дәрбаз кьн, ԝәки зарʹарʹа һʹәԝас бә?

Дина хԝә бьде мәрьвед сәр ви шькьли чьԛас ша нә! Әԝана тʹоп бунә сәр щьватәкә мәзьн. Хьзмәткʹаред Хԝәдейә бәрерʹа һатьбу готьне, ԝәки әԝана сале се щара тʹоп бьн сәр щьвата мәзьн, ләма әм жи мина ԝан хьзмәткʹара, дьщьвьн сәр щьвата мәзьн (Ԛануна Дӧщари 16:16). Һәр сал, се щьватед мәзьн дәрбаз дьбьн: Дӧ щьватед мәзьнә йәк рʹожи у щьвата мәзьнә се рʹожи. Ле жь ван щьвата, чь кʹаре әм дьстиньн?

Щьвата мәзьн бьратийа мә ԛәԝи дькә. Ча Исраелийа бь шабун нава «щьвинада» пәсьне Хԝәде дьдан, әм жи бь шабун тʹәвайи тʹоп дьбьн, у ван щьватед мәзьнда Хԝәдерʹа ԛӧльх дькьн (Зәбур 26:12; 111:1). Бь сайа ван щьватед мәзьн һʹәму Шәʹдед Йаһоԝа, жь һʹәму щьвата у щурʹә-щурʹә ԝәлата, тʹәвайи тʹоп дьбьн. Нивро әм бь һәвалти у әʹдьлайи, тʹәвайи нан дьхԝьн (Кʹаред Шандийа 2:42). Ль вьр әм бь чʹәʹве хԝә ԝе һʹәзкьрьне дьвиньн, йа кӧ һʹәму «бьратийа» мәйә һʹәмдьнйайе дькә йәк (1 Пәтрус 2:17).

Щьватед мәзьн али мә дькьн рʹӧһʹанида пешда һәрʹьн. Исраелийа гәләк кʹар дьстандьн, гава «готьнед» жь ньвисаре ԝанарʹа шьровәдькьрьн, ԝәки ԝанарʹа фәʹмдари бә (Нәһәмийа 8:8, 12). Әм жи гәләк ԛимәт дькьн әԝ һинкьрьнед жь Кʹьтеба Пироз, кʹижан кӧ әм сәр щьватед мәзьн дьстиньн. Һәр бәрнамәк сәр һʹиме Кʹьтеба Пироз һатийә сазкьрьне. Бь ван хәбәрданед һʹәԝас, бь тʹәмаша, у бь рʹезед готара, әм һин дьбьн ча ԛьрара Хԝәде әʹмьре хԝәда бьԛәдиньн. Ӧса жи чахе сәр щьватед мәзьн хушк-бьред мә гьли дькьн ча әԝана бәр чәтьнайа тәйах дькьн у ԛанунед Хԝәде хԝәй дькьн, әм рʹӧһʹанида гәләк ԛәԝи дьбьн. Сәр щьвата мәзьнә се рʹожи, әм дькарьн драме бь кʹьнщед бәре бьбиньн, жь сәрһатикә Кʹьтеба Пироз. Жь ван драма әм дәрсед керһати сәва хԝә һьлдьдьн. Сәр һәр щьватәкә мәзьн, мәри тенә ньхӧмандьне. Бь ве йәке әԝана нишан дькьн, кӧ әʹмьре хԝә пʹешкʹеши Хԝәде дькьн.

• Чьрʹа щьвата мәзьн мәʹнийа шабуне йә, сәва мә?

• Щьватед мәзьн чь кʹаре дькарьн тәрʹа биньн?

Пешийа мьрьне Иса шагьртед хԝәрʹа гьлийед ӧса готьбу: «Әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14). Ле гәло чаԝа әв шьхӧле бәлакьрьна мьзгинийе гәрәке бьһата кьрьне? Әв шьхӧле мәзьн тʹәне һьнге ԝе бьһата сери, һәрге Мәсиһийа чʹәʹв бьдана Иса (Луԛа 8:1).

Әм мал бь бал мәрьварʹа мьзгинийе бәла дькьн. Иса Мәсиһ шагьртед хԝә һин дькьрьн, ԝәки мал бь мал хьзмәт кьн (Мәтта 10:11-13; Кʹаред Шандийа 5:42; 20:20). Ԛьрʹна йәкеда, һәр мьзгинванәкирʹа щи һатьбу дайине, кʹидәре кӧ гәрәке хьзмәт кьра (Мәтта 10:5, 6; 2 Корьнтʹи 10:13). Иро жи шьхӧле бәлакьрьна мьзгинийе рʹьнд те рʹебәрикьрьне. Мәсәлә, һәр щьватәкерʹа те дайине щи, йан мьһалә, кʹидәре кӧ әԝана гәрәке хьзмәт кьн. Бь йәке әм дькарьн фәрмана Иса Мәсиһ бьԛәдиньн, демәк һʹәму мәрьварʹа «даннасин кьн у шәʹдәтийе бьдьн» (Кʹаред Шандийа 10:42).

Әм ԝан һʹәму щийа мьзгинийе бәла дькьн, кʹидәре кӧ мәрьв һәнә. Иса Мәсиһ диса ве йәкеда мәрʹа мәсәләкә баш ә, кӧ әԝи мьзгини бәла дькьр ԝан щийа, кʹидәре кӧ мәрьв тʹоп дьбун. Мәсәлә бәр дәве бәʹре, йан жи дь гӧндада (Маркос 4:1; Йуһʹәнна 4:5-15). Әм жи даннасин дькьн ԝан һʹәму щийа, кʹидәре кӧ мәри һәнә. Мәсәлә, ль кʹуче, ль бахчә, ль щийе хәбата мәрийа, йан жи бь телефоне. Әм ӧса жи, чахе мәщал һәйә, мьзгинийе бәла дькьн щинаред хԝәрʹа, бьра-пьсмамед хԝәрʹа, ԝанрʹа тʹәви кʹижана дьхәбьтьн йан жи һин дьбьн. Бь сайа шьхӧлкʹарийа мә, әм дькарьн бь милйона мәрийарʹа мьзгинийа хьлазкьрьне «хьлаз кьрьна» бьдьн бьһистьне (Зәбур 96:2).

Һәла бьфькьрә, тәйе кʹерʹа бькарьбуйа дәрһәԛа мьзгинийа пʹадшатийе гьли кьра, у шьровәкьра кӧ әв мьзгини ахьрийеда ԝе чь кʹаре ԝанрʹа бинә? Әм тә һелан дькьн, ԝәки әве мьзгинийе жь мәрийа вәнәшери, ле дәԝсе дәрбази мәрьва бьки!

• «Мьзгини» дәрһәԛа чь гәрәке бе бәлакьрьне?

• Ча Шәʹдед Йаһоԝа бәлакьрьна мьзгинийеда чʹәʹв дьдьнә Иса Мәсиһ?

«Пешәнг», те готьне сәр ԝан мәрьва, йед кӧ пешийе дьчьн у рʹе вәдькьн, сәва кӧ йед дьне бькарьбьн дәрбаз бьн. Иса жи аԝа готи пешәнг бу, чьмки әв һатә шандьне сәр әʹрде, ԝәки хьзмәт кә у бь ве йәке сәва хьлазбуне рʹе вәкә (Мәтта 20:28). Ләма жи әԝед кӧ пәй Иса дьчьн, чʹәʹв дьдьнә ԝи у гәләк ԝәʹдә хәрщ дькьн сәва кӧ мәрийа «бькьн шагьртед» ԝи (Мәтта 28:19, 20). Һьнәк мәри ве хьзмәтийеда ньн, йа кӧ әм хьзмәтийа пешәнги дьбежьн.

Хьзмәткʹаре һәртʹьм. Һʹәму Шәʹдед Йаһоԝа мьзгинийа хере бәла дькьн. Һьнәка жь ԝан сафи кьрьнә, ԝәки ча пешәнгед һәртʹьм хьзмәт кьн, у мәһе 70 сьһʹәта хьзмәт бькьн. Сәва ве йәке ԝана сафи кьр кем бьхәбьтьн. Һьнәка жи сафи кьрьн хьзмәт кьн ча пешәнгед мәхсус, сәва кӧ ԝан щийа хьзмәт кьн, кʹидәре һʹәԝщә йә. У һәр мәһа әԝана 130 сьһʹәта зедәтьр хьзмәт дькьн. Әв пешәнг пәй һәбуне накʹәвьн у бь әʹмьрәки һеса дьжин, у гӧмана ԝан әԝ ә, кӧ Йаһоԝа дәрһәԛа һʹәԝщед ԝан ԝе хәм бькә (Мәтта 6:31-33; 1 Тимотʹейо 6:6-8). Кʹи кӧ нькарә хьзмәт кә ча пешәнге һәртʹьм, дькарә ча пешәнге кʹомәкдар хьзмәт кә, у мәһе 30 йан 50 сьһʹәта хьзмәт кә.

Пешәнг жь бо һʹәзкьрьна хԝә һьндава Хԝәде у мәрийа әве йәке дькьн. Мина Иса Мәсиһ, әм жи фәʹм дькьн кӧ сәва мәрийа гәләк фәрз ә, пебьһʹәсьн дәрһәԛа Хԝәде у ԛьрара ԝи (Маркос 6:34). Щәм мә һәйә занәбунәкә ӧса, йа кӧ ида иро дькарә али мәрьва бькә у һьм жи гӧмана ԝан дәрһәԛа ахьрийе һе ԛәԝи кә. Жь бо һʹәзкьрьна һьндава мәрийа, пешәнг бь мәрʹдани һʹәму ԝәʹде хԝә у ԛәԝата хԝә дьдьнә ԝе йәке, сәва кӧ али мәрьва бькьн мьзгинийа хере пебьһʹәсьн (Мәтта 22:39; 1 Тʹесалоники 2:8). Бь сайа ве йәке баԝәрийа ԝан һе ԛәԝи дьбә, әԝана һе незики Хԝәде дьбьн, ләма жи әԝана бәхтәԝар ьн (Кʹаред Шандийа 20:35).

• Чь те һʹәсабе хәбәра «пешәнг»?

• Жь бо кʹижан мәʹнийе пешәнгед һәртʹьм хьзмәт дькьн?

Шәʹдед Йаһоԝа бь ԝе йәке тенә наскьрьне, кӧ гәләк мәкʹтәбед ԝан һәнә, йед кӧ сәр һʹиме һинкьрьнед Хԝәде нә. Әԝа һинбуна мәхсус бона ԝан хьзмәткʹара йә, йед кӧ һʹәму ԝәʹде хԝә дьдьнә шьхӧле хьзмәтийе. Әԝана тенә һинкьрьне, ԝәки «ԛӧльхе хԝә [рʹьнд] бьԛәдиньн» (2 Тимотʹейо 4:5).

Мәкʹтәба сәва Пешәнга. Кʹи кӧ саләке ча пешәнг хьзмәт дькә, әԝ те тʹәглифкьрьне сәр мәкʹтәба 6 рʹожи, йа кӧ Ода Щьватеда дәрбаз дьбә. Нета ԝе мәкʹтәбе әԝ ә, кӧ али пешәнга бькә ԝәки әԝана незики Йаһоԝа бьн, һʹәму алийава керһати бьн хьзмәтийеда у бәрдәԝам кьн бь амьни хьзмәт кьн.

Мәкʹтәба бона Мьзгинванед Пʹадшатийе. Әԝ мәкʹтәба дӧмәһи, сәва пешәнгед щерʹьбанди йә, йед кӧ һазьр ьн бь рʹәзәдьли жь мала хԝә дур кʹәвьн, у һәрʹьн ԝи щийи хьзмәт кьн, кʹидәре кӧ һʹәԝщәти йә. Әԝана анәгори ԝан гьлийа дькьн: «Ва әз! Мьн бьшинә». Әԝана чʹәʹв дьдьнә Иса Мәсиһ Мьзгинване һәри мәзьн сәр әʹрде (Ишайа 6:8; Йуһʹәнна 7:29). Әԝана чахе жь мале хԝә дур дькʹәвьн, щарна лазьм ә кӧ һини жийина нә стандарт йани нә комфорт бьн. Хенщи ԝе йәке, әԝана һини чь щурʹә әʹйд-ԛәйд, һәԝа у хԝарьна һатьнә, дьбәкә ԝан щийа әԝ һʹәму тьшт ԝи щурʹәйи нибә. Ӧса жи щара лазьм ә кӧ зьмане тʹәзә жи һин бьн. Әԝ мәкʹтәб али ԝан хушк у бьред азәп у щотед зәԝащеда дькә, йе кӧ әʹмьрда 23 һʹәта 65 сали нә. Бь аликʹарийа ԝе мәкʹтәбе әԝана хәйсәт-һʹӧнӧред рʹӧһʹани бал хԝә зедә дькьн, кʹижан кӧ лазьм тен бона шьхӧлкʹарийе, у фәрәсәтед ӧса зедә дькьн, ԝәки Йаһоԝа у тʹәшкиләта ԝи бькарьбьн ԝана бьдьнә хәбате.

Мәкʹтәба Гиләд. Бь зьмане Ибрани хәбәра «Гиләд», те һʹәсабе «Ԛучʹа Шәʹдә». Мәкʹтәба Гиләд сала 1943-да саз буйә, 8 000 зедәтьр шагьрт жь ԝе мәкʹтәбе һатьбун шандьне чаԝа мисйонер, ԝәки шәʹдәтийе бьдьн «һʹәта сәре дьнйайе». Әве йәке ахьрийе гәләк кʹар ани (Кʹаред Шандийа 13:47). Мәсәлә, чахе шагьрт щара пешьн чунә ԝәлате Перу, ль ԝьр ԛә щьватәк жи тʹӧнә бу. Ле ньһа 1 000 зедәтьр щьват һәнә. Чахе мисйонера дәстпекьрьн хьзмәт кьн Жапонйайеда, ль ԝьр ԝәкә дәһ Шәʹдед Йаһоԝа бун. Ле ньһа 200 000 зедәтьр һәнә. Ԝәʹде һинбуна Мәкʹтәба Гиләд, шагьрт пенщ мәһа Кʹьтеба Пироз бь тʹәмами һин дьбьн. Әԝед кӧ хьзмәт дькьн чаԝа пешәнгед мәхсус, мисйонер, йед кӧ филиаледа хьзмәт дькьн, у бәрпьрсийаред мьһале ве мәкʹтәбеда рʹьнд тенә һинкьрьне, ԝәки бькарьбьн шьхӧле һʹәмдьнйайе ԛәԝи кьн у пешда бьвьн.

• Чь йә нета Мәкʹтәба сәва Пешәнга?

• Мәкʹтәба бона Мьзгинванед Пʹадшатийе сәва кʹе йә?