Гәләк Ԝе Жь Хьлазийе Хьлаз Бьн Тӧ Жи Дькари

Кʹьтеба Пироз мәрʹа әʹйан дькә, ԝәки ԝәʹде хьлазийе кʹӧтакьрьн ԝе һәбә: «Чьмки һьнге тәнгасикә ӧса мәзьн ԝе бьбә, кӧ жь дәстпебуна дьнйайе һʹәта ньһа мина ԝе нәбуйә у нә жи ԝе бьбә. Һәгәр әԝ рʹож кьн нәбуна, тʹӧ кәс хьлаз нәдьбу, ле бона хатьре бьжартийа әԝ рʹоже кьн бьн» (Мәтта 24:21, 22). Ле Хԝәде мәрʹа соз дьдә кӧ гәләк мәри ԝе хьлаз бьн: «Дьнйайе жи дәрбаз бә, . . . ле әԝе кӧ әʹмьре Хԝәде дьԛәдинә ԝе һʹәта-һʹәтайе бьминә» (1 Йуһʹәнна 2:17).

Һәрге тӧ дьхԝази хьлаз би чахе әԝ дьне дәрбаз бә, у бьжийи «һʹәта-һʹәтайе», тӧ чь гәрәке бьки? Гәло лазьм ә ԝәки тӧ дәстпеки хԝәрʹа тьшта тʹоп ки йан жи бь щурʹед майин һазьрбуна бь физики бьки? На. Кʹьтеба Пироз мә һелан дькә ԝәки әм нетед майин бьдьнә щийе йәке. Әԝ дьбежә: «Һәгәр әв һәр тьшт ԝе бь ви аԝайи ԝеран бьн һәрʹьн, һун гәрәке мәрьвнә чаԝа бьн? Гәрәке һун жийина һʹәлал у хԝәденасийеда бьмәшьн, һивийа Рʹожа Хԝәде бьн у һатьна ԝи ләз хьн» (2 Пәтрус 3:10-12). Жь контексте те кʹьфше ԝәки «әԝ һʹәму тьштед» кӧ ԝе бенә кʹӧтакьрьне, әԝ һәйә сәрԝертийа ве дьнйа нәһәԛ у әԝ мәрьв йед кӧ әԝе сәрԝертийе дьжберьн, нә кӧ сәрԝертийа Хԝәде. Демәк әʹйан ә, кӧ һәрге әм тьштед материали тʹоп кьн, әԝ йәк ԝе мә хьлаз нәкә жь ве кʹӧтакьрьне.

Бь рʹастийе, һәрге әм дьхԝазьн хьлаз бьн, әм гәрәке Хԝәде Йаһоԝарʹа амьн бьн, рʹабунрʹуньштандьна баш һин бьн, у кьред баш бькьн кӧ дьле ԝи хԝәш те (Сефанйа 2:3). Дәԝса кӧ пәй гәләка һәрʹьн, у пьшгӧһе хԝәва бавежьн нишанед әʹйан кӧ әм дьжин ԝәʹде фәрз, мәрʹа лазьм ә рʹожа Йаһоԝа бира хԝәда хԝәй кьн. Шәʹдед Йаһоԝа дькарьн ԝәрʹа шьровәкьн кӧ һун ча дькарьн хьлаз бьн ԝе рʹожа кӧ ԝе бе.