Йаһоwа Хьзмәткьрьна Мьн Кʹәрәм кьр

ӘЗ ҺАТЬМӘ буйине сала 1926 дь Круксвиледа, Оһайода, Дәwләтед Йәкбуйида. Де у баве мьн тʹәви тʹӧ религийа нибун, ле wана мә һʹәйшт зарʹарʹа дьготьн кӧ әм һәрʹьнә дере. Әз чумә Дера Методисте. Чахе әз 14 сали бум, хьзмәткʹарәки wе дере пʹешкʹеш да мьн бона ве йәке, кӧ нава саледа, мьн рʹожа Ләʹде хьзмәткьрьн бәрнәдьда.

Wи wәʹдәйи, щинарәкә мә бь наве Маргарет Wолкер, йа кӧ Шәʹде Йаһоwа бу, дьһатә щәм дийа мьн у дәрһәqа Кʹьтеба Пироз тʹәви wе хәбәрдьда. Рʹожәке мьн сафи кьр кӧ тʹәви wан рʹунем. Дийа мьн дьфькьри кӧ әзе wана әʹщьз кьм wәʹде һинбуне, ләма әwе мьнрʹа гот кӧ жь мал дәрем. Ле мьн бәрдәwам дькьр шеwьркьрьна wан дьбьһист. Паши һьнә шеwьркьрьна, Маргарете жь мьн пьрси: «Тӧ зани наве Хwәде чь йә?» Мьн гот: «Һәр кәс занә кӧ наве wи Хwәде йә». Әwе мьнрʹа гот: «Һьлдә Кʹьтеба хwәйә Пироз у бьньһерʹә Зәбур 83:18». Мьн ӧса жи кьр, у мьн дит кӧ наве Хwәде Йаһоwа йә. Әз рʹәвийам щәм һәвалед хwә у мьн wанрʹа гот: «Чахе һун еваре һәрʹьнә мал, Кʹьтеба Пирозда бьньһерʹьн Зәбур 83:18 у һуне бьвиньн кӧ наве Хwәде чь йә». Һун дькарьн бежьн кӧ мьн дәрберʹа дәстпекьр шәʹдәтийе бьдьм.

Паше мьн дәстпекьр Кʹьтеба Пироз һин бьм у сала 1941 һатьмә ньхӧмандьне. Зутьрәке паши ньхӧмандьне, әз һатьмә кʹьфшкьрьне кӧ щьватеда һинбуна кʹьтебе дәрбаз кьм. Мьн дийа хwә у хушк-бьред хwә һелан кьр кӧ бенә сәр щьвате, у wана гьшка жи дәстпекьрьн бенә сәр щьвате йа һинбуна кʹьтебе, кʹижан кӧ мьн дәрбаз дькьр. Ле әw йәк баве мьн хwәш нәдьһат.

ПӘЙКʹӘТЬН МАЛЕДА

Дь щьватеда һе зедә щабдари данә мьн, у мьн хwәха кʹьтебхана әʹдәбйәтед мә саз кьр. Щарәке, баве мьн дина хwә да сәр кʹьтебед мьн у гот: «Тӧ әван һʹәму тьшта дьвини? Әз дьхwазьм wана жь мале дәрхьм, у тӧ жи дькари һәрʹи». Әз жь мале дәркʹәтьм у мьн незики Зенесвиле Оһайойеда отʹахәк дәстхьст у теда мам, ле сәва кӧ нәфәред мале qәwи кьм, әз щара дьчумә мале.

Баве мьн мьqабьли дийа мьн дәрдькʹәт кӧ әw нәчә щьвине. Щара чахе дийа мьн рʹеда бу кӧ һәрʹә щьвате, баве мьн дьда пәй wе у әw зоре дьбьрә мале. Ле дийа мьн дәрберʹа дәрики дьнрʹа дәрдькʹәт у дьчу сәр щьвате. Мьн дийа хwәрʹа гот: «Бәрхwә нәкʹәвә. Әw wе паше бьwәстә у ида пәй тә нәкʹәвә». Паше wәʹдә дәрбаз бу, у баве мьн ида пәй дийа мьн нәдькʹәт, у әw бе шәрʹ-дәʹw дьчу сәр щьвате.

Сала 1943 щьвата мә дәстпекьр дәрбаз кә Мәкʹтәба Даннасинкьрьне, у әз бь готара дәрдькʹәтьм. Ширәтед кӧ мьн дьстанд паши готаред мьнә сәр мәкʹтәбе, али мьн кьрьн кӧ хәбәрдана хwә һе баш кьм.

ТʹӘВНӘБУЙИН WӘʹДЕ ШӘРʹ

Wи чахи, мьләта шәрʹ дькьрьн дь Шәрʹе Һʹәмдьнйайе II-да. Сала 1944 гази мьн кьрьн кӧ һәрʹьм әскәрийе. Әз чумә офиса әскәрийе дь Оһайойеда, у ль wедәре сьһʹәт-qәwата мьн ньһерʹин, у документәк данә мьн у мьн тʹьжи кьр. Мьн ӧса жи офисеред әскәрийерʹа гот кӧ әзе нәбьмә әскәр. Wана әз бәрдам. Паши чәнд рʹожа, офисере полисе һатә бәр дәре мьн у мьнрʹа гот: «Корwин Робисон, изьна мьн һәйә кӧ тә бьгьрьм».

Паши дӧ һʹәфтийа, дь диwанеда һʹакьм гот: «Һәрге дәсте мьнда буйа, мьне сәр тʹәмамийа әʹмьре тә, тӧ бькьрайи кәле. Тӧ дьхwази тьштәки бежи?» Мьн щаба хwә да: «Йа Һʹакьм, әз хьзмәткʹаре Хwәде мә. Шемика һәр дәрийа бона мьн щийе бәлакьрьна мьзгине йә, у мьн ида гәләкарʹа әв мьзгина дәрһәqа Пʹадшатийе бәла кьрийә». Һʹакьм готә кʹома аликʹарчийаa: «Һун нә бона wе йәке ль wьр ьн кӧ тедәрхьн, һәла әw мәрьв хьзмәткʹар ә йан на. Һун ләма wьра нә wәки сафи кьн һәла әwи әw газикьрьн ани сери йан на». Паши нив сьһʹәти кемтьр, кʹома аликʹарчийа вәгәрʹийан бь ве сафикьрьне кӧ әз нәһәq ьм. Һʹакьм пенщ сал да мьн, у әз кьрьмә кәла Ашланде дь Кентукеда.

ЙАҺОWА МЬН КӘЛЕДА ХWӘЙ ДЬКӘ

Дӧ һʹәфтийа әз дь кәла Колумбусе дь Оһайойеда бум, у рʹожа пешийе әз ода хwәйә кәледа мам. Мьн Йаһоwарʹа дӧа кьр: «Әз нькарьм пенщ сала ве одеда бьм. Әз ньзаньн һʹале мьн wе чаwа бә».

Рʹожа дьн, нобәдара изьн данә мьн кӧ дәрем дәрва. Әз чумә бәр пʹәнщәре кʹидәре кӧ гьртики бәжн-бьльнд у намьл-бәр сәкьни бу. Әwи жь мьн пьрси: «Тӧ бона чь кʹәти вьр, Бощи?». Мьн гот: «Әз Шәʹде Йаһоwа мә». Әwи мьнрʹа гот: «Әре? Ижа, тӧ чьма wьрʹа йи?» Мьн гот: «Шәʹдед Йаһоwа начьнә шәрʹ у мәрьва накӧжьн». Әwи гот: «Wана тә кьрьнә кәле чьмки тӧ мәрьва накӧжи. Ле мәрьвед дьн дькьнә кәле, чьмки әwана мәрьва дькӧжьн. Әwа бь логики йә?» Мьн гот: «На».

Паше әwи гьли кьр: «Әз 15 сала кәла дьнда бум, у wедәре мьн һьнә әʹдәбйәтед wә хwәндийә». Һьнге мьн дӧа кьр: «Йаһоwа, али мьн бькә кӧ әв мәрьв алийе мьн бә». Һәма һьнге, Паул, әw наве wи мәрьви бу, мьнрʹа гот: «Һәрге жь wан гьртийа кәсәк дәсте хwә бьдә тә, тӧ тʹәне бькә гази. Ида әз заньм әзе чь сәре wан бькьм». Жь бо ве йәке, проблемед мьн тʹәви 50 гьртийед кӧ ве сектореда бун тʹӧнә бун.

Чахе офисеред кәле әз дәрбази кәла Ашланде кьрьм, әз wедәре пеһʹәсийам кӧ гәләк бьред мәйи щерʹьбанди wедәре нә. Хәбәрдана тʹәви wан али мьн у йед майин кьр кӧ рʹӧһʹанида qәwи бьминьн. Wана бәрнама хwәндьна Кʹьтеба Пироз саз дькьрьн, у һәр һʹәфти мәрʹа дьготьн кӧ кʹижан сәрийа жь Кʹьтеба Пироз бьхуньн. У мә пьрс у щаб һазьр дькьрьн, бона щьвине кʹижан кӧ бьра саз дькьрьн. Wедәре һәбу бьра кӧ щабдар бу бона мьһалед сәва хьзмәткьрьне. Әм гәләк мәрьв дь одәкә мәзьнда дьман, кʹидәре кӧ щи-ньвин рʹәх диwара бун. Әwе кӧ щабдар бу бона мьһале, дьготә мьн: «Робисон, тӧ щабдари бона wи у wи щи-ньвина. Мьһала тә әw ә, демәк хwәйе ван щи-ньвина. Пешийа чуйина әwан һәр кәса, тӧ гәрәке баwәр би кӧ тә жерʹа шәʹдәти дайә». Ӧса мә бь организә мьзгини бәла дькьр.

ПАШИ ДӘРКʹӘТЬНА ЖЬ КӘЛЕ

Шәрʹе Һʹәмдьнйайе II сала 1945 хьлаз бу, ле әз диса һе һьнәк wәʹдә кәледа бум. Әз хәмгин дьбум жь бо малбәта хwә, чьмки баве мьн готә мьн: «Һәрге әз жь тә хьлаз бьм, әз дькарьм йед дьнена дәсте хwәда бьгьрьм». Паши дәркʹәтьна мьн жь кәле, мьн шабунәкә пʹьрʹ мәзьн сьтанд. Һʹәфт кәс жь малбәта мьн дьчунә сәр щьвате у хушкәкә мьн һатә ньхӧмандьне.

Чахе сала 1950 Корейайеда шәрʹ дәстпебу, щара дӧда гази мьн кьрьн кӧ һәрʹьмә әскәрийе. Паше мьнрʹа тест дан бона щерʹьбандьна аqьле мьн, у офисере әскәрийе готә мьн: «Тесте әʹйан кьр кӧ аqьле тә пʹьрʹ баш ә». Мьн гот: «Әw баш ә, ле әз начьмә әскәрийе». Мьн жерʹа рʹеза 2 Тимотʹейо 2:3 әзбәри гот, у мьн зедә кьр: «Әз ида әскәре Мәсиһ мә». Әwи ләʹзәке хwә кәрʹ кьр, у паше гот: «Тӧ дькари һәрʹи».

Паши һьнә wәʹдә, әз сәр щьвата мәзьнә дь Синсинатеда, Оһайойеда, чумә сәр щьвина Бәйтʹәле. Бьре Милтон Һеншел мәрʹа гот кӧ һәрге бьра дьхwазьн дь шьхӧле Пʹадшатийеда гәләки бьхәбьтьн, тʹәшкиләт дькарә wана Бәйтʹәледа бьдә хәбате. Мьн бланка Бәйтʹәле тʹьжә кьр, у әз һатьм qәбулкьрьне, у әз һатьмә кʹьфшкьрьне ль Бәйтʹәла Бруклинеда мәһа Тʹәбахе сала 1954. Һьнгеда әз Бәйтʹәледа хьзмәт дькьм.

Дь Бәйтʹәледа епʹещә хәбата мьн һәбу. Бь сала, әз мьqати боилеред мәкʹинед нәшьркьрьне у йед офиса бум, ӧса жи мьн мәкʹинә у кʹупе кʹьлита тʹәзә дькьрьм. Әз ӧса жи дьхәбьтим дь Ода Щьвата Мәзьнә дь Нийу Йоркеда.

Мьн Бәйтʹәледа гәләк һʹьз кьр, кӧ ча wәʹдә сәр шьхӧлед рʹӧһʹани дьһатә хәрщкьрьн. Мәсәлә, qӧльхкьрьна шәбәqе у Һинбуна «Бьрща Qәрәwьлийе» тʹәви малбәте у ӧса жи хьзмәткьрьна тʹәви щьвате. Һәрге һун бьфькьрьн сәр ве йәке, әw һʹәму тьшт дькарә һәбә у гәрәке һәр малбәта Шәʹдед Йаһоwада һәбә. Чахе де-бав у зарʹ тʹәвайи рʹеза рʹоже шеwьр дькьн, у тʹьме Qӧльхкьрьна Малбәте дәрбаз дькьн, ӧса жи дь щьватеда у шьхӧле бәлакьрьна мьзгинеда гәләк кʹар дькьн, бь wе йәке һәр нәфәр wе рʹӧһʹанида qәwи бә.

Бәйтʹәледа у щьватеда мьн хwәрʹа гәләк һәвал дитьн. Жь wана һьнәк рʹункьри бун у ида хәлата хwәйә әʹзмана стандьнә, ле йед дьн нәрʹункьри нә. Ле чаwа һʹәму хьзмәткʹаред Йаһоwа, ӧса жи йед дь Бәйтʹәледа гӧнәкʹар ьн. У ләма жи чахе хәйд дькʹәвә ортʹа мьн у бьра, әз тʹьме дьхәбьтьм кӧ әʹдьлайе хwәй кьм. Wи чахи әз дьфькьрьм сәр Мәтта 5:23, 24 у ча жь мә те хwәстьне кӧ әм әwе дәʹw-дозе сафи кьн. Бәле, бахшандьне бьхwазьн нәһеса йә. Ле әз дьвиньм кӧ чахе әз дьбежьм бьбахшинә, тʹәк щара дәʹw-доз дьреж дькʹьшинә.

КʹАР ЖЬ ХЬЗМӘТКЬРЬНА МЬН

Жь бо әʹмьре мьни мәзьн, мьнрʹа чәтьн ә кӧ мал бь мал мьзгине бәла кьм. Ле әз бәрхwә накʹәвьм. Әз һьнәки зьмане Чинайи йа Мандарини һин бумә, у әз шабуне дьстиньм чахе сәр кʹуче мәрьвед Чинайирʹа мьзгине бәла дькьм. Щара ӧса дьqәwьми кӧ шәбәqе мьн 30 йан 40 журнал бәла дькьр.

Мьн һәла һе жи сәрледана дӧбарә Чинеда кьр! Рʹожәке, кәчʹькәкә щаһьл реклама дькʹана емиш бәла дькьр. Әwе бь бәшәра хwәш мьн ньһерʹи, у әз жерʹа кʹәнийам у мьн журналед «Бьрща Qәрәwьлийе» у «Һʹьшйар Бьн!» йед сәр зьмане Чинайи дайе. Әwе һьлда у гот кӧ наве wе Кети йә. Паши wе йәке чахе Кетийе әз дьдитьм, әw незики мьн дьбу у тʹәви мьн хәбәрдьда. Мьн наве емиша у щурʹә-щурʹә шинкайа сәр зьмане Инглизи әw һин дькьр, у әwе жи әw хәбәр дьwәкʹьландьн. Мьн ӧса жи жерʹа рʹезед жь Кʹьтеба Пироз шьровәкьр, у әwе һьлда кʹьтеба «Чь Һин Дькә Кʹьтеба Пироз?». Паши чәнд һʹәфтийа, әw ида нәдьһатә кʹьфше.

Паши чәнд мәһа, кәчʹькәкә дьн кӧ реклам бәла дькьр, жь мьн чәнд журнал һьлда. Һʹәфтийа дьн, чахе мә һәв дит, әwе тʹела хwә да дәсте мьн у гот: «Тӧ Чинерʹа хәбәрдьди». Мьн гот: «Әз тʹӧ кәси нас накьм дь Чинеда». Ле әwе зоре мьн кьр кӧ әз хәбәрдьм, у ләма мьн тʹел һьлда у гот: «Рʹожхера wә, наве мьн Робисон ә». Дәнг жь тʹеле те: «Робби, әwа әз ьм Кети. Әз пашда вәгәрʹийамә Чине». Мьн гот: «Чине?». Кети щаба хwә да: «Әре. Робби, тӧ зани әв qизька кӧ тʹел дайә тә кʹе йә? Әw хушка мьн ә. Әз жь тә тьштед гәләк баш пеһʹәсийам. Жь кʹәрәма хwә wан тьшта хушка мьнрʹа жи гьли кә». Мьн жи гот: «Әзе әwе йәке бькьм чьqас дькарьм. Зәʹф рʹази мә кӧ тә мьнрʹа гот кӧ тӧ кʹидәрейи». Паши wе йәке, зутьрәке мьн ида щара пашьн тʹәви хушка Кети хәбәрда. Фьрqи тʹӧнә әw дӧ кәчʹьк ньһа кʹидәре нә, йәкә әз баwәр ьм кӧ әwана wе һе зедә дәрһәqа Йаһоwа пебьһʹәсьн.

Ида 73 сал ә кӧ әз Йаһоwарʹа хьзмәт дькьм. Әз гәләк бәхтәwар ьм кӧ әwи али мьн кьр тʹәвнәбуйине хwәй кьм у кәледа жи wирʹа амьн бьминьм. Ӧса жи, хушк у бьред мьни һʹәлал мьнрʹа гьли дькьн, кӧ wана мерхаси дьстандьн, чахе дьдитьн кӧ ча баве мә пәй мьн дькʹәт, ле йәкә әз нәдьһатьмә шкенандьн. Ахьрийеда, дийа мьн у 3 хушк у 3 бьред мьн һатьнә ньхӧмандьне. Һәла һе баве мә жи нәрм бу, у пешийа бьмьра, чәнд щара һатә сәр щьвина щьвате.

Һәрге Хwәде бьхwазә, нәфәред мала мьн у һәвалед мьнә кӧ мьрьнә, wе сах бьн дьнйа тʹәзәда. Бьдьнә бәр чʹәʹве хwә әве шабуне, чахе әм тʹәви мәрьвед хwәйә һʹьзкьри Йаһоwарʹа хьзмәт кьн.b