Пешийа кö сәрфьраз бьм, мьн гәләк щара дьда дәр

ЖИЙИНА МЬНӘ БӘРЕ:

Баве мьн сала 1949-да, жь Австралйайе дәрбази Алманийе дьбә, сәва кö хәбате бьвинә. Ль wьр әw дәстпедькә чаwа мәдәнчи (шахтиор) дьхәбьтә, әw ль щийе әләктроәнәржийе жи дьхәбьтә. У әw ль мьһала бь наве Викторийа щиwар дьбә. Ль wьр әw дийа мьн дьстинә у сала 1953-да әз һатьмә буйине.

Чәнд сал шунда, дийа мьн тʹәви Шәʹдед Йаһоwа һинбуна Кʹьтеба Пироз дәстпекьр. Ләма жи һинкьрьнед Кʹьтеба Пироз жь бьчʹуктайе бира мьнда мабун. Баве мьн тʹö религийәк qәбул нәдькьр. Әw йәки гәләк зöлм бу, гьшк wи дьтьрсийан у дийа мьн жи. Әwе дьзикава бәрдәwам дькьр Кʹьтеба Пироз һин дьбу у һинкьрьнед wе qәбул дькьр. Чахе баве мьн малда нибу, дийа мьн мьнрʹа у хушка мьнрʹа гьли дькьр әw йәк, чь кö әw жь Кʹьтеба Пироз педьһʹәсийа. Әwе мәрʹа гьли дькьр дәрһәqа әʹрде щьнәте у öса жи wәки чаwа әм дькарьн бәхтәwар бьн, һәрге ль гора принсипед Кʹьтеба Пироз бьжин (Зәбур 37:10, 29; Ишайа 48:17).

Жь бо зöлмийа баве хwә, 18 салийа хwәда әз мәщбур бум жь мале һәрʹьм. Рʹаст ә мьн баwәр дькьр әw һʹәму тьшт, чь кö дийа мьн әз һин дькьрьм, ле qимәте ве мьн ньзаньбу. Ләма жи мьн нәдьжит ль гора wан һинкьрьна. Мьн дәстпекьр ль мәдәна кʹомьре ча әләктрик бьхәбьтьм. Чахе әз 20 сали бум, әз зәwьщим. Се сал шунда qиз мәрʹа бу у мьн дәстпекьр бьфькьрьм, кö жийина мьнда тьште фәрз чь йә. Мьн заньбу кö Кʹьтеба Пироз дькарә али малбәта мьн бькә, ләма жи мьн дәстпекьр тʹәви Шәʹдед Йаһоwа Кʹьтеба Пироз һин бьм. Ле жьна мьн гәләк мьqабьли Шәʹдед Йаһоwа бу. Чахе әз чумә ль сәр щьватәкә wан, жьна мьн мьнрʹа гот кö әз бьжберьм; йан һинкьрьна Кʹьтеба Пироз бьһельм йан жи малбәта хwә. Әз кʹәтьмә бәр байе жьна хwә у мьн һәләqәтийа хwә тʹәви Шәʹдед Йаһоwа qәтанд. Wәʹдә шунда әз гәләк пʹошман бум, кö мьн нәжбарт әw, чь кö мьн заньбу wәки рʹаст ә.

Рʹожәке һәвал-хәбаткʹаред мьн, порнографи нишани мьн кьрьн. Әв йәк һьм һʹәwас бу, һьм жи мьрʹдар. Кʹурайа дьле хwәда мьн дәстпекьр хwә сущдар кьм. Һинкьрьнед Кʹьтеба Пироз бира мьнда бун, у мьн заньбу кö Хwәде wе мьн щәза кә. Дора мьн тʹьме шькьлед нәщайиз һәбун у сәва мьн әв ида тьштәки нормал бу. Wәʹдә шунда әз ида бь тʹәмами порнографийева һатьмә гьредане.

Нава 20 салед дьн, әз һе дур кʹәтьм жь принсипед кö дийа мьн әз һин дькьрьм. Жь рʹабун-рʹуньштандьна мьн дьһатә кʹьфше, wәки һʹьше мьн бь чь тʹьжә бу. Хәбәрдан у һʹәнәкед мьн жи нәщайиз бун. Ньһерʹандьна мьн сәр сексе хьраб у нәрʹаст бу. Мьн тʹәви жьна хwә дьжит, ле һәләqәтийа мьн тʹәви кʹöлфәтед дьн жи һәбу. Рʹожәке мьн ль нәйнике ньһерʹи у мьн хwәрʹа гот: «Тö бәр чʹәʹве мьн рʹәш и». Мьн ида qәдьре хwә ньзаньбу у хwә нәфрʹәт дькьр.

Зәwаща мьн һьлшийа у жийина мьн жи педа хьрав бу. Паше, мьн бь тʹәмамийа дьле хwә Йаһоwарʹа дöа кьр. Мьн тʹәзәда дәстпекьр Кʹьтеба Пироз һин бьм, чь кö мьн 20 сал пешда дабу сәкьнандьне. Нава wи wәʹдәйида баве мьн мьр, дийа мьн жи һатә ньхöмандьне у бу Шәʹде Йаһоwа.

КʹЬТЕБА ПИРОЗ ЧА ЖИЙИНА МЬН ГÖҺАСТ:

Фьрqийа мәзьн һәбу ортʹа wе йәке чаwа мьн дьжит у чаwа кö Кʹьтеба Пироз һин дькьр. Ле ижар мьн дьхwәст бьстиньм әʹдьлайа кö жь һәр һʹьш-аqьли дәрбазтьр ә, дәрһәqа кʹижани кö Кʹьтеба Пироз соз дьдә. Мьн сафи кьр хәбәрдана хwә тʹәмьз кьм у хәйсәте хwәйә хьраб жи бьгöһезьм. Мьн öса жи сафи кьр жийина хwәйә бенамуси бьһельм, хöмаре нәлизьм у ичкʹе пʹьрʹ вәнәхwьм. Хенщи wе йәке, мьн жь мәзьне хәбате ида дьзи нәдькьр.

Һәвал-хәбаткʹаред мьн фәʹм нәдькьрьн кö чьма мьн хwәст жийина хwәда гöһастьнед öса мәзьн бькьм. Нава се салада wана тʹьме һʹәму тьшт дькьр, сәва кö әз wәгәрʹьм шьхöле хwәйи бәре. Щарна щәм мьн дәрнәдькʹәт хwә бьгьрьм, мәсәлә әз ньшкева һерс дькʹәтьм йан жи гьлийед нәщайиз дәве мьнрʹа дәрдькʹәтьн. Һьнге һәвалед мьн дьготьн: «Аһан! Әв диса Щойе мәйи бәре йә». Әw гьли чьqас дьле мьн дьешандьн! Әз тʹьме дьфькьрим, кö әзе тʹö щар нькарьбьм бемә гöһастьне.

Щийе хәбата мьн тʹьжә порнографийа бу, чаwа бь щурʹе әләктроник öса жи бь щурʹе нәшьркьри. Һәвал-хәбаткʹаред мьн, бь компотәред хwә, шькьлед нәщайиз һәвдöрʹа дьшандьн, чаwа кö мьн бәре дькьр. Әз дьхәбьтим кö жь wе йәке хwә дур бьгьрьм, ле wана һʹәму тьшт дькьр, сәва әз бькʹәвмә бәр байе wан. Мьн аликʹари хwәст жь wи мәрьви, йе кö тʹәви мьн һинкьрьна Кʹьтеба Пироз дәрбаз дькьр. Чахе мьн дьле хwә wирʹа wәдькьр, әwи бь сәбьр гöһ дьда мьн. Әwи һьнә рʹезед жь Кʹьтеба Пироз нишани мьн кьр, wәки чаwа әз дькарьм хwәстьна хwә алт кьм. Әwи öса жи әз һелан кьрьм, wәки тʹьме Йаһоwарʹа дöа бькьм у аликʹарийе бьхwазьм (Зәбур 119:37).

Рʹожәке мьн һʹәму һәвал-хәбаткʹаред хwә тʹоп кьр. Чахе әwана щьвийан, мьн гот wәки дö мәрьварʹа йед кö бәре гәләк ичʹке вәдьхwарьн, бира (ава щәһ) бьдьн. Гьшк дәстпекьрьн бькьнә qарә-qар у готьн: «Тö нькари әве йәке бьки! Әв мәрьв дьхәбьтьн, сәва кö әви хәйсәти тʹәрк бьдьн!» Мьн жи гот: «Нә әз жи, сәр хәйсәте хwә дьхәбьтьм». Жь wе рʹоже дәстпебуйи гьшка фәʹм кьрьн кö әз дьхәбьтьм сәва порнографийе тʹәрк бьдьм. У әwана ида ль сәр мьн һʹöкöм нәдькьрьн, wәки әз wәгәрʹьм шьхöле хwәйә бәре.

Wәʹдә шунда у бь аликʹарийа Йаһоwа, мьн карьбу алт кьм хwәстьна хwә кö порнографийе бьньһерʹьм. Дь сала 1999-да әз wәк Шәʹде Йаһоwа һатьмә ньхöмандьне. У әз гәләк рʹази бум кö мәщала дöда мьнрʹа һатә дайине, сәва кö бь жийинәкә тʹәрбәт у бәхтәwар бьжим.

Ньһа әз фәʹм дькьм, кö чьма Йаһоwа нәфрәт дькә wан тьшта чь кö һаqас wәхт мьн бәре һʹьз дькьр. Йаһоwа чаwа Бав кö зарʹед хwә һʹьз дькә, дьхwәст мьн дур хьста жь wе зийане, кö порнографийа дьдә. Бь рʹасти жи гьлийе жь Мәтʹәлок 3:5, 6 чьqас рʹаст ьн! Wе дәре ньвисар ә: «Бь һʹәмуйа дьле хwә, бь ХÖДАНВА әwлә бьбә [итʹбарийа хwә бинә] у пьшта хwә нәсьперә аqьле хwә. Дь һәр кʹаре кö тö дьки . . . wи нас бькә у әw жи рʹейа тә, дәрхә рʹастийе». Принсипед Кʹьтеба Пироз нә кö тʹәне мә хwәй дькьн, ле öса жи аликʹарийе дьдьн кö сәд сәләфи сәрфьраз бьн (Зәбур 1:1-3).

ЧЬ КʹАР МЬН СТАНД:

Бәре мьн хwә нәфрәт дькьр, ле ньһа әз qәдьре хwә заньм у дьле мьнда әʹдьлайи һәйә. Әз бь жийинәкә тʹәмьз дьжим у тʹәхмин дькьм кö Йаһоwа бахшандийә мьн у пьштгьрийа мьн дькә. Дь сала 2000-да мьн Каролин станд, хушкәкә назьк, кʹижан кö мина мьн Йаһоwа гәләк һʹьз дькә. Мала мә, щи-сьтʹара әʹдьлайе йә. Сәва мә бь рʹасти жи qәдьрәки мәзьн ә, бьбьнә пʹарәк бьратийа һʹәмдьнийайе. Әв бьрати тʹәмьз ә у нава wеда һʹьзкьрьн һәйә.