Мәрьве Шкәсти Биланийа Хwәде Дьдә Кʹьфше

ЩАРА ДÖДА, чахе Тони чу бал wе жьньке, әwе жьньке диса жи тʹәви wе шәрʹ кьр. Гәло Тони ча хwә да кʹьфше? Әw гьли дькә: «Бона мьн гәләк чәтьн бу, чьмки әз нәһәq нибум кö әwе мьн öса беһöрмәт кьр». Һәла һе ве дәрәщеда жи, Тони диса жь жьньке бахшандьн хwәст у готә жьньке wәки әw фәʹм дькә һʹале wе.

Һәрге һун дәwса Тони буна, wәйе ча хwә бьда кʹьфше? Гәло wәйе мьлукти у нәрми бьда кʹьфше, йан wәрʹа wе чәтьн буйа кö хwә бьгьрьн у һерс нәкʹәвьн? Һәрге һʹәлал бежьн, һеса нинә дәрәща öсада нәрм у рʹьһʹәт бьн. Чахе әм стреседа ньн йан кәсәк һерса мә тинә, бь рʹастийе чәтьн ә кö шкәсти у нәрм бьн.

Ле Кʹьтеба Пироз Мәсиһийа һелан дькә wәки әwана шкәсти у нәрм бьн. Кʹьтеба Пироз әwан һʹöнöра гьредьдә тʹәв биланийе у сәрwахтийе. Аqуб пьрсәкә öса дани: «Нава wәда кʹи сәрwахт у аqьл ә?» Паше әw щаба ве пьрсе дьдә: «Бьра әw бь пʹәргалийа хwәйә qәнщ, кьред хwә бь мьлуктийа сәрwахтийе бьдә кʹьфше» (Аqуб 3:13). Ле гәло чаwа мьлукти у нәрми биланийа жь Хwәде дьдьнә кʹьфше? У чь дькарә али мә бькә wәки чʹәʹв бьдьнә Хwәде wан һʹöнöра?

МӘРЬВЕ ШКӘСТИ БИЛАНИЙЕ ДЬДӘ КʹЬФШЕ

Мьлукти у нәрми дькарьн шәрʹ-дәʹwа бьдьнә сәкьнандьне. «Щаба нәрм һерсе датинә, ле готьна һʹьшк һерсе рʹадькә» (Мәтʹлк. 15:1).

Һерсбун дькарә шәрʹ-дәʹwа һе гöрʹ кә, чьмки һерс ча бежи ньфте бәри сәр агьр дьдә (Мәтʹлк. 26:21). Ле шкәсти у нәрми һерсе датинә у шәрʹ-дәʹwа дьтәмьринә. Мәрьве шкәсти һәла һе дькарә дьле дьжьмьн жи нәрм кә.

Тони ве йәкеда избат бу. Чахе әwе жьньке дит wәки Тони нәрм щаба wе дьда, әw жьньк гьрийа. Әwе жерʹа гот кö әw гәләк дьлтәнг ә жь бо чәтьнайед хwә у малбәта хwә. Тони жерʹа шәʹдәти да. Ахьрийеда, әwе жьньке дәстпекьр һин бә Кʹьтеба Пироз, чьмки Тони тʹәви ве жьньке нәрм у рʹьһʹәт бу.

Чахе мәрьв шкәсти у нәрм ә, әw бәхтәwар дьбә. «Хwәзи ль шкәстийа, чьмки дьнйайе пʹара wан бә» (Мәт. 5:5).

Чьрʹа мәрьвед шкәсти бәхтәwар ьн? Мәрьвед кö бәре һерс бун, чахе һатьнә гöһастьне у бунә нәрм у шкәсти, ньһа бәхтәwар ьн. Әʹмьре wан алийе башда һатә гöһастьне, у әwана заньн wәки ахьрийа баш һивийа wан ә (Колс. 3:12). Адолфо, кʹижан кö Испанйайеда бәрпьрсийаре мьһале йә, тинә бира хwә wәки пешийа әw рʹастийе пеһʹәсийа, әw мәрьвәки ча бу.

Әw дьбежә: «Әз бәхтәwар нибум. Хәйсәте мьн öса бу wәки әз зу һерс дькʹәтьм, öса һерс дькʹәтьм wәки һьнә һәвалед мьн, жь бо хәйсәте мьн дьтьрсийан, чьмки әз гәләк шәрʹуд бум. Ле рʹожәк һат чахе һʹәму тьшт һатә гöһастьне. Нав шәрʹда шәш щара пе кʹере мьн хьстьн у һьндьк дьма әз бьмьрама».

Ле ньһа Адолфо мәрьвед дьн ширәт дькә у һин дькә кö шкәсти у нәрм бьн, ча пе гьлийед хwә öса жи пе рʹабун-рʹуньштьна хwә. У гәләка хwәш те хәйсәте wийи нәрм у һʹәйф. Адолфо дьбежә wәки гәләк ша йә кö әwи хәйсәте хwә гöһаст. У әw гәләк жь Йаһоwа рʹази йә, чьмки әwи али wи кьр кö шкәсти у нәрм бә.

Мәрьвед шкәсти дьле Йаһоwа ша дькьн. «Кöрʹе мьн, сәрwахт бә у дьле мьн ша кә, кö әз бькарьбьм щаба qардаред хwә бьдьм» (Мәтʹлк. 27:11).

Шәйтʹан, дьжмьне Йаһоwайи мәзьн qәрфе хwә wи дькә. У мәʹнийа Хwәде һәйә wәки һерса хwә сәр wи бьрʹежә, ле Кʹьтеба Пироз дьбежә, wәки Йаһоwа сәбьр ә у зу һерс накʹәвә (Дәркʹ. 34:6). Чахе әм жи чʹәʹв дьдьнә Хwәде ве йәкеда кö зу һерс нәкʹәвьн у шкәсти бьн, öса әм биланийе дьдьнә кʹьфше у бь ве йәке дьле Йаһоwа ша дьбә (Әфәс. 5:1).

Әw дьне бь һерсе, шәрʹа у дәʹwа тʹьжә йә. У ве дьнйайеда әм дькарьн рʹасти йед «кʹöбар, бабах, кʹьфьр . . . берʹәʹм, бöхданбеж, тәмсьст,» у зöлмкʹара бен (2 Тимтʹ. 3:2, 3). Ле әw найе һʹәсабе wәки Мәсиһи гәрә сәр хwә нәхәбьтьн кö нәрм у шкәсти бьн. Хәбәра Хwәде дьбежә wәки «сәрwахтийа жорьн . . . әʹдьл ә, мьлук у бәрбьһер ә» (Аqуб 3:17). Һәрге әм мәрьве әʹдьлайиһʹьз бьн у хwәгьрти бьн, бь ве йәке әме избат кьн, wәки мә биланийа жь Хwәде qазанщ кьр. Әw билани wе али мә бькә wәки һерс нәкʹәвьн у нәрм щаба хwә бьдьн wанрʹа йед кö һерса мә тиньн, у öса жи әме һе незики Йаһоwа бьн, йед кö Канийа биланийа мәзьн ә!