«Һәр Кәсирʹа Әз Бумә Һәр Тьшт»

ҺʹӘТА әw йәк бьqәwьмийа, мьн ида дьхwест дәрһәqа рʹастийе һе зедә пебьһʹәсьм. Бал дийа мьн һьнә әʹдәбйәтед сәр һʹиме Кʹьтеба Пироз һәбун, у мьн әw әʹдәбйәт бь дьл у щан дьхwәнд. Гәләк мьн хwәш дьһатьн шьклед wан әʹдәбйәтада. Баве мьн нәдьхwест wәки дийа мьн дәрһәqа рʹастийе тʹәви мьн хәбәрдә. Ле йәкә, мьн гәләк дьхwәст һе зедә пебьһʹәсьм, у мьн гәләк пьрс дьда wе. Чахе баве мьн малда нибу, дийа мьн тʹәви мьн һинбун дәрбаз дькьр. Ахьрийеда, мьн жи сафи кьр, wәки әʹмьре хwә тʹәсмили Йaһоwа кьм. У сала 1943, чахе әз дәһ сали бум, әз һатьмә ньхöмандьне Блекпʹуледа, (Инглистан).

ДӘСТПЕДЬКЬМ ЙAҺОWАРʹА ХЬЗМӘТ КЬМ

Паши ве йәке, мьн у дийа хwә тʹьме бь хирәт мьзгини бәла дькьр. Сәва бәлакьрьна мьзгинийе, мә фонограф дьда хәбате. Әw фонограф мәзьн у гьран бун, wәкә 4.5 кг. Мьн бьдьнә бәр чʹәʹве хwә, ча әз, гәдәки бьчʹук, мал бь мал әw фонограф тʹәви хwә дьгәрʹанд.

Wи wәʹдәйи әз 14 сали бум, у мьн дьхwәст ча пешәнг хьзмәт кьм. Дийа мьн мьнрʹа гот wәки пешийе әз гәрәке тʹәви бәрпьрсийаре мьһале хәбәрдьм. Бәрпьрсийаре мьһале мьнрʹа ширәт да, wәки әз пʹешәки һин бьм, сәва wәʹде хьзмәтийа хwәйә пешәнгти бькарьбьм хwә хwәй кьм. Мьн öса жи кьр. Паши дö сала, мьн дәрһәqа хьзмәтийа пешәнгти хәбәрда тʹәви бәрпьрсийарәки дьн. Әwи готә мьн: «Һәрʹә у бьгьһижә нета хwә!»

Öса, сала 1949, мәһа Нисане, мьн у дийа хwә һур-муре мале фьрот, у дәрбази Мидлетоне, незики Манчестере бун, у мә ль wедәре дәстпекьр ча пешәнг хьзмәт кьн. Паши чар мәһа, мьн бьрак бьжарт кö тʹәви мьн пешәнг хьзмәт кә. Жь филиале мәрʹа ширәт дан wәки әм дәрбази щьвата тʹәзә бьн Ирламеда. Ле дийа мьн тʹәви хушкәкә дьн щьватәкә дьнда хьзмәт дькьр.

Рʹаст ә әз 17 сали бум, ле мьн у һәвал-хьзмәткʹаре мьнрʹа щабдари дан wәки әм щьвате дәрбаз кьн, чьмки ве щьвата тʹәзәда гәләк һьндьк бьред щерʹьбанди һәбун. Һьнә wәʹдә шунда, әз һатьм тʹәглифкьрьн, wәки дәрбази Щьвата Бакстоне бьм, кʹидәре кö тʹәне чәнд мьзгинван һәбун у аликʹари лазьм бу. Әw һʹәму щабдарийед кö дьданә мьн, әз гәләк тьшт һин кьрьм у һазьр кьрьм сәва щабдарийед ахьрийеда.

Сала 1951, мьн бланк тʹьжә кьр сәва кö һәрʹьмә Мәкʹтәба Гиләд. Ле сала 1952, мәһа Кануна Пешьн, гази мьн кьрьн кö һәрʹьмә әскәрийе. Мьн дьхwәст аза бьм у нәчьмә әскәрийе, ләма мьн гот wәки әз хьзмәткʹаре һәртʹьм ьм. Ле диwане хwәстьна мьн qәбул нәкьр, wәки чаwа хьзмәткʹаре һәртʹьм аза бьм жь әскәрийе, у әз сәр шәш мәһа кьрьмә кәле. Чахе әз кәледа бум, мьн тʹәглифкьрьн станд сәр Мәкʹтәба Гиләд. У сала 1953 мәһа Тирмәһе, әз пе гәмийа бь наве «Щорщик», чумә Нийу Йорке, wәки Мәкʹтәба Гиләдда һин бьм.

Гава әз һатьмә Нийу Йорке, әз чумә сәр щьвата мәзьн бь наве «Щьмәʹта Дьнйа Тʹәзә». Әw сала 1953 бу. Паше, әз пе трене чумә Лансинга Башуре, (Нийу Йорк), кʹидәре кö әз гәрәке һин бума. Щәм мьн гәләк һьндьк пʹәрә һәбу, чьмки әз тʹәзә жь кәле дәркʹәтьбум. Чахе әз жь трене дәркʹәтьм, әз отобуседа рʹуньштьм сәва һәрʹьм Лансинге, ле пʹәре рʹийа мьн кем бу. Мьн жь мәрьве кö отобуседа кʹеләка мьн рʹуньшти бу, 25 сент хwәст, у әwи да мьн.

ХЬЗМӘТКЬРЬН WӘЛАТЕ ХӘРИБДА

Мәкʹтәба Гиләдда мә һинкьрьна гәләк баш станд, wәки чаwа «һәр кәсирʹа» бьбьнә «һәр тьшт» (1 Корн. 9:22, ИМ). Әз, Пол Бран у Раймонд Леч, һатьнә кʹьфшкьрьне кö Филипинеда хьзмәт кьн. Әм чәнд мәһа һивийа визе бун. Әм пешийе пе гәмийе чунә Ротердаме, паше Бәʹра Навбәре, Канала Суезе, Окйануса Һьндийе, Малазйайе, у Һон-Конге, бь тʹәмами рʹийа мә сәр бәʹре 47 рʹожа кʹьшанд! Ахьрийеда әм гьһиштьнә Манилайе. Әw сала 1954, 19 Мьждаре бу.

Жь wи wәʹдәйида әм гәрәке һини мәрьвед тʹәзә, wәлате тʹәзә, у зьмане тʹәзә буна. Ле йәкә әм һәр се бьра һатьнә кʹьфшкьрьне щьвата Кесон Ситида, кʹидәре кö бьнәлийа сәр зьмане Инглизи хәбәрдьдан. Ләма, мә нава шәш мәһа тʹәне чәнд гьлийед Тагалог заньбун. Ле кʹьфшкьрьна тʹәзә ида әв чәтьнайи сафи кьр.

Рʹожәке, мәһа Гöлане, сала 1955, әз у бьре Леч жь хьзмәтийе һатьнә мале, у мә отʹаха хwәда чәнд нәʹмәк дит. Жь нәʹма әм пеһʹәсийан, wәки әм һатьнә кʹьфшкьрьне ча бәрпьрсийаред мьһале. Wи чахи әз 22 сали бум, ле әw щабдарийа тʹәзә мьнрʹа мәщал да wәки «һәр кәсирʹа» бьбьмә «һәр тьшт».

Мәсәлә, мьн ча бәрпьрсийаре мьһале, готара хwәйә пешийе дәрва бәр дькʹана гöнд хwәнд. Мьн фәʹм кьр wәки бона мәрьвед Филипи тʹәбийәти йә, wәки готара бона һʹәмуйа, гәрәке wан щийада бе хwәндьне, кʹидәре кö гәләк мәрьв ьн! Чахе мьн ча бәрпьрсийар тʹәсәлийа щьвата дькьр, мьн готар дьхwәнд базарада, бәр мунисипалитета, сәр мәйдана баскетболе, паркада, у гәләк щар кʹучада. Щарәке, Сан Пабло Ситида баранәкә qайим бари чахе мьн базареда готар дьхwәнд, у мьн ширәт да бьред щабдар, wәки әw готар Ода Щьватеда бе хwәндьне. Паше бьра жь мьн пьрсин кö гәло әwана әwе готаре дькарьн һʹәсаб кьн ча готар бона һʹәмуйа, чьмки әw дәрва бәр һʹәму мәрьва найе хwәндьне, ле тʹәне Ода Щьватеда.

Әз тʹьме мала бьрада дьмам. Рʹаст ә әwана дәwләти нибун, ле малед wан тʹьме тʹәмьз бун. Гәләк щар әз сәр халича тәньк, сәр поле дар рʹадьзам. Ль wедәре щийе сәршуштьне вәкьри бун, у әз һин бум wәки кʹьнщава сәре хwә бьшом. Әз пе отобусе дьчум, у щара бь qәйьке дәрбази гьравед дьн дьбум. Нава тʹәмамийа салед хьзмәтийа мьнда, авта мьн тʹöнә бу.

Хьзмәткьрьн у тʹәсәликьрьна щьвата, али мьн кьрьн wәки әз зьмане Тагалог һин бьм. Әз курсед wи зьмани дәрбаз нәбум, ле бь сайа гöһдайина хушк-бьра wәʹде хьзмәтийе у öса жи бь сайа щьвата, әз әви зьмани һин бум. Ве йәкеда бьра гәләк дьхwәстьн али мьн бькьн, у әз гәләк рʹази бум wәки әwана ча бь сәбьр бун һьндава мьнда у бь дьл у щан пʹайе мьн дьдан.

Wәʹдә дәрбаз дьбу, у мьн кʹьфшкьрьна тʹәзә станд, кʹижан кö мьн һелан кьр һини гöһастьнед тʹәзә бьм. Сала 1956, чахе бьре Нейтан Нор сәрледан кьр, әз һатьмә кʹьфшкьрьне, wәки сәр щьвата мәзьнә һʹәмдьнйайе тʹәви медийа һәвкʹарийе бькьм. Ве йәкеда әз щерʹьбанди нибум, ләма йед дьн бь дьл у щан мьн һин дькьрьн. Саләке кемтьр шунда, щьвата мәзьнә һʹәмдьнйайе йа майин дәрбаз бу, у Фредерик Франсе бьра жь офиса сәрәкә һатә wедәре. Сәр wе щьвате әз бәрпьрсийаре щьвата мәзьн бум, у әз жь Франс бьра һин бум кö бь дьл у щан qәдьре һʹәму мәрьва у әʹдәтед wан бьгьрьм. Чахе Франсе бьра готар хwәнд, бьред wе мьһаледа әʹщебмайи ман у ша бун гава әw дитьн пе кʹьнще «баронг Тагалог», демәк кʹьнще мьләте Филипин.

Чахе әз һатьмә кʹьфшкьрьне ча бәрпьрсийаре нәһийе, мьнрʹа лазьм бу диса һини тьштед тʹәзә бьм. Wи чахи мә филм нишан дькьрьн бь наве «Бәхтәwарийа Щьмәʹта Дьнйа Тʹәзә», у мә һʹәчʹи зәʹф дәрва щийед кö гәләк мәрьв бун әw филм нишан дькьрьн. Щара wәʹде филме, меш-моза әм әʹщьз дькьрьн. Әwана дора мә тʹоп дьбун жь бо лусе, у дькʹәтьнә нава прожектора. Паши wан щьвина, мә wан прожектора тʹәмьз дькьр, у дькарьм бежьм wәки һеса нибу wана тʹәмьз кьн! Бәле мәрʹа һеса нибу кö әwе филме нишан кьн, ле йәкә әм гәләк ша дьбун чахе мә дьдит кö мәрьва ча рʹьнд гöһ дьдан, у ча әwана педьһʹәсийан дәрһәqа тʹәшкиләта Йaһоwайә һʹәмдьнйайе.

Кʹәшишед Католик нав һьнә мәрьвед дәwләте дьдан, сәва әwана изьне нәдьн кö әм щьватед мәзьн дәрбаз кьн. Щара жи wан щийа кʹидәре кö щьвинед мә незики дера дәрбаз дьбун, әw кʹәшиш зәнгьлед дера qайим ледьхьстьн wәки тʹö кәс нькарьбә готара бьбьһе. Ле әв һʹәму тьшти шьхöле мә нә да сәкьнандьне, у рʹожа иройин wи щийида гәләк хьзмәткʹаред Йaһоwа һәнә.

ҺИНИ ЩАБДАРИЙЕД ТʹӘЗӘ ДЬБЬМ

Сала 1959, мьн нәʹмәк станд кʹидәреда дьһатә готьне wәки әз һатьмә кʹьфшкьрьне кö филиаледа хьзмәт кьм. Ве кʹьфшкьрьнеда әз гәләк тьшт һин бумә у щерʹьбанди бум. Wи wәʹдәйи мьнрʹа щабдари дьдан wәки әз һәрʹьм тʹәсәлийа wәлатед дьн бькьм. Wәлатәкида мьн насийа хwә да Щанет Думанд, кʹижан кö Тайландеда мисийонер бу. Мә һьнә wәхт һәв нас дькьр у паше әм һәв стандьн. Әм 51 сала тʹәвайи ча мер у жьн хьзмәт дькьн у шабунәкә мәзьн дьстиньн.

Бь тʹәмами әз чумә 33 wәлата у әз гәләк ша мә wәки тʹәви гәләк хушк-бьра бумә нас. Әз гәләк жь Йaһоwа рʹази мә, wәки әw щабдарийед кö щаһьлтийеда мьн дьстанд, әз һазьр кьрьм сәва әз бькʹәвьмә һʹале щурʹә-щурʹә мәрьва! Тʹәсәликьрьна wәлата, ньһерʹандьна мьн сәр гәләк тьшта гöһаст у али мьн кьр wәки әз пе чʹәʹве хwә бьвиньм wәки Йaһоwа һʹәму щурʹә мәрьва һмәр дькә (Кʹар. Шанд. 10:34, 35).

ДИСА ҺИНИ ГÖҺАСТЬНА ТʹӘЗӘ ДЬБЬМ

Чьqас баш ә wәки әм тʹәви хушк-бьред Филипине хьзмәт дькьн! Ньһа ль wедәре мьзгинван 10 щара зедәтьр һәнә, нә кö чахе щара пешийе мьн дәстпекьр хьзмәт кьм ль wедәре. Әз у Щанет һʹәта ньһа хьзмәт дькьн филиала Филипинеда, кʹижан кö шәһәре Кезон Ситида йә. Ида 60 сала зедәтьр ә ча әз wәлате хәрибда хьзмәт дькьм, у һәла һе ньһа жи әз һазьр ьм wәки Йaһоwа чь кö мьнрʹа бежә әзе әве йәке бькьм. Wан пашwәхтийада тʹәшкиләта мәда гöһастьн һатьнә кьрьне, у ньһа әм ида һини wан гöһастьна дьбьн.

Нета мә тʹьме әw ә wәки рʹебәрийед Йaһоwа qәбул кьн, у әw йәк әʹмьре мәда шабунәкә мәзьн тинә. Әм öса жи һини wан тьшта дьбун, кʹижан кö лазьм бун wәки әм хушк-бьред хwәрʹа бәрдәстийе бькьн. Бәле, әм һазьр ьн wәки qьрара Йaһоwа биньн сери, бь ве йәке кö «һәр кәсирʹа» әм бьбьнә «һәр тьшт».