Йаһоwа Wана Кʹәрәм Дькә, Йед кö ль Wи Дьгәрʹьн

1, 2. а) Баwәри у һʹьзкьрьн ча һәвва гьредайи нә? б) Әме кʹижан пьрса шеwьр кьн?

ӘМ ЙАҺОWА һʹьз дькьн, «чьмки әwи пешда әм һʹьзкьрьн» (1 Йуһʹн. 4:19). Йаһоwа öса жи һʹьзкьрьна хwә дьдә кʹьфше бь ве йәке, кö хьзмәткʹаред хwәйи амьн кʹәрәм дькә. Әм чьqас зәʹф Хwәде һʹьз дькьн, һаqас зәʹф баwәрийа мә qәwи дьбә. Әм qайим баwәр дькьн, wәки Йаһоwа wан хәлат дькә кʹижана һʹьз дькә. (Бьхунә Ибрани 11:6.)

² Йаһоwа мәрьва кʹәрәм дькә, у әw йәк дьдә кʹьфше кö әw йәки ча нә у чь дькә. Һәрге әм дöдьли нә, wәки Йаһоwа wе кʹәрәм кә wан йед кö ль wи дьгәрʹьн, wәки öса нә баwәрийа мә кем ә. Чьмки баwәри әw ә, чахе әм «дöдьли ниньн, wәки чь кö әм һивийе нә, wе бе сери» (Ибрн. 11:1, ДТʹ). Бәле, һәрге баwәрийа мә һәйә, әме һивийа кʹәрәмед Хwәде бьн, кʹижан кö әwи соз дайә мә. Ле һәрге әм баwәр дькьн кö Йаһоwа wе мә кʹәрәм кә, әw чь кʹаре дькарә мәрʹа бинә? Гәло ча Йаһоwа бәре хьзмәткʹаред хwә кʹәрәм дькьр у ча иро кʹәрәм дькә? Wәрә әм шеwьр кьн дәрһәqа wе йәке.

ЙАҺОWА СОЗ ДЬДӘ КÖ ХЬЗМӘТКʹАРЕД ХWӘ КʹӘРӘМ КӘ

3. Малахи 3:10-да дәрһәqа кʹижан созе Хwәде те готьне?

³ Йаһоwа Хwәде соз да кö хьзмәткʹаред хwә хәлат кә. Ләма жи әw дьхwазә wәки әм чь кö дькарьн һʹәму тьшти бькьн, сәва кö кʹәрәмед wи бьстиньн. Йаһоwа дьбежә: «Мьн бь вейа бьщерʹьбиньн, Хöдане артешан дьбежә, ма гәло әзе . . . әʹзмана жь wәрʹа вәнәкьм у qаси кö тʹера wә дькә зедәтьр әзе бәрәкʹәте сәр wәва нәрьжиньм?» (Малх. 3:10). Бәле, Хwәде мәщале дьдә мә, wәки әм wи бьщерʹьбиньн. У чахе әм әве мәщале дьдьнә хәбате, бь ве йәке әм рʹазибуна хwә жерʹа дьдьнә кʹьфше.

4. Чьрʹа әм дькарьн баwәрийа хwә гьлийед Иса биньн, кʹижан кö Мәтта 6:33-да ньвисар ьн?

⁴ Иса готә шагьртед хwә, кö һәрге әwана Пʹадшатийа Хwәде дайньн щийе пешийе, Хwәде wе али wан бькә. (Бьхунә Мәтта 6:33.) Иса әw гьли гот чьмки әwи заньбу, wәки һʹәму созед Хwәде тʹьме тенә сери (Иша. 55:11). Ләма әм жи гәрәке баwәр бьн, кö һәрге әм бь тʹәмами баwәрийа хwә Йаһоwа биньн, әw wе созе хwә бинә сери. Хwәде хwәха мәрʹа соз да: «Әзе тʹö щар жь тә нәчьм у тʹö щар тә бәрʹнадьм» (Ибрн. 13:5). Әw созе Йаһоwа али мә дькә, wәки баwәрийа хwә гьлийед Иса биньн кö Мәтта 6:33-да ньвисар ьн.

5. Чьрʹа әw щаба кö Иса да Пәтрус, баwәрийа мә qәwи дькә?

⁵ Щарәке, Паwлосе шанди жь Иса пьрси: «Мә һʹәму тьшт һиштийә у пәй тә һатьнә, ле ахьрийа мә wе чаwа бә?» (Мәт. 19:27). Иса сәва wе пьрсе Паwлос сущдар нәкьр. Дәwсе әwи готә шагьртед хwә, кö әwана wе жь бо хьзмәтийа хwә бенә хәлаткьрьне. Әw шандийед амьн у бьжартийед дьн, wе тʹәви Иса ль әʹзмана сәрwертийе бькьн. Ле иро жи хьзмәткʹаред Хwәде хәлате дьстиньн. Иса гот: «Һʹәмуйед кö мала хwә, йан бьред хwә, йан хушкед хwә, йан баве хwә, йан дийа хwә, йан жьна хwә, йан зарʹед хwә, йан әʹрдед хwә бона наве мьн һьштьнә, әwе сәд qат бьстинә у wе жийина һʹәта-һʹәтайе жи wар бә» (Мәт. 19:29). Шандийед Иса йед кö бона Пʹадшатийа Хwәде тьштәк жь хwә кем дькьрьн, әʹсә wе бьстандана кʹәрәмед һе мәзьн. Гәло әм хwәха ша набьн wәки чь жи мә бона Пʹадшатийе жь хwә кем кьр, мә тьштед һе qимәт qазанщ кьр, мәсәлә ча Иса гот, бав, де, бьра, хушк у зарʹед рʹöһʹани?

БАWӘРИ БОНА МӘ «ЛӘНГӘРӘ ЙӘ»

6. Чьрʹа Йаһоwа соз да хьзмәткʹаред хwә, кö wе wана хәлат кә?

⁶ Йаһоwа соз дьдә хьзмәткʹаред хwә, wәки wе әʹсә wан хәлат кә. У әw созе wи али wан дькә, wәки әwана тәнгасийада у щерʹьбандьнада амьн бьминьн. Хьзмәткʹаред Йаһоwайи амьн хенщи wан кʹәрәма кö иро дьстиньн, ахьрийеда wе кʹәрәмед дьһа мәзьн бьстиньн (1 Тимтʹ. 4:8). Бәле, һәрге әм дöдьли ниньн wәки Йаһоwа wе «wан хәлат кә, кʹижан кö ль wи дьгәрʹьн», әме баwәрийеда qәwи бьн (Ибрн. 11:6).

7. Чьрʹа әм дькарьн бежьн, кö бона мә баwәри һәйә ча ләнгәр?

⁷ Иса wәʹде хьзмәтийа сәр чʹийе гот: «Әшq у ша бьн, чьмки һәqе wә ль әʹзмана гәләк ә. Бь ви щурʹәйи пʹехәмбәред кö бәри wә һәбун, зерандьн» (Мәт. 5:12). Хенщи wан йед кö wе жийина ль әʹзман бьстиньн, диса wе гәләк бьстиньн жийина һʹәта-һʹәтайе сәр әʹрде, у әw йәк бь рʹастийе мәʹни йә, wәки әм «әшq у ша бьн» (Зәб. 37:11; Луqа 18:30). Фьрqи тʹöнә әме сәр әʹрде бьжин, йан сәр әʹзмана, баwәрийа мә сәва ахьрийе бона мә ча «ләнгәрәкә һʹимгьрти» у qәwи йә (Ибрн. 6:17-20). Ча ләнгәрә wәʹде фьртонә гәмийе хwәй дькә, öса жи баwәрийа мә кö Хwәде wе кʹәрәма бьдә мә, һʹәму алийава мә хwәй дькә. Әw баwәри qәwате дьдә мә, wәки әм wәʹде тәнгасийада сәбьр кьн.

8. Баwәрийа һьндава созед Хwәде ча хәмед мә кем дькьн?

⁸ Һивийа мә сәр ахьрийе, qәwате дьдә мә сәва кем хәма бькьн. Созед Хwәде бона мә ча дәрман ә, кʹижан кö дьле мә рʹьһʹәт дькә. Рʹасти жи чьqас әм дьлгәрм дьбьн, чахе әм баре хwә дьдьнә сәр Йаһоwа, у әм заньн wәки әw wе али мә бькә (Зб. 55:22). Әм гәрәке сәд сәләфи баwәр бьн, wәки Хwәде «дькарә . . . жь тьште кö әм дьхwазьн йан жи дьфькьрьн һе гәләк зедәтьр бькә» (Әфәс. 3:20, ИМ). Бьдьнә һʹәсабе хwә, wәки Йаһоwа бона мә дькарә нә кö гәләк бькә, ле «гәләк зедәтьр» бькә!

9. Чьрʹа әм гәрәке дöдьли нибьн, wәки дькарьн кʹәрәмед Йаһоwа бьстиньн?

⁹ Сәва кö жь Йаһоwа хәлате бьстиньн, әм гәрәке бь тʹәмами баwәрийа хwә wи биньн, у гöрʹа тʹәми у рʹебәрийед wи бькьн. Муса готә щьмәʹта Исраел: «Хöдан wе әʹсә дöа ль тә бькә ль сәр wи әʹрди, кö Хöдан Хwәдейе тә чаwа мьлкʹ дьдә тә кö qазьнщ ки. Тʹәне тö рʹьнд гöһдарийа дәнге Хöдан Хwәдейе хwә бькә у тʹам ви әʹмьре кö әз иро ль тә әʹмьр дькьм, бькә кö бьqәдини. Чьмки Хöдан Хwәдейе тә wе дöа ль тә бькә, чаwа кö wи готә тә» (Qан. Дщр. 15:4-6). Һәрге тö Йаһоwарʹа амьн дьмини, тö баwәр дьки wәки әw wе әʹсә тә кʹәрәм кә? Бь рʹастийе мәʹни һәйә, wәки тö ве йәкеда гәрәке qә дöдьли ниби.

ЙАҺОWА ӘWАНА ХӘЛАТ ДЬКЬРЬН

10, 11. Йаһоwа ча Усьв кʹәрәм кьр?

¹⁰ Кʹьтеба Пироз бона кʹара мә һатә ньвисаре. Ведәре һәнә гәләк сәрһати, кö чаwа Хwәде хьзмәткʹаред хwәйи амьн кʹәрәм дькьр (Рʹом. 15:4). Wәрә сәрһатийа Усьв шеwьр кьн. Бьред wи нәмамийа wи кьрьн у wи дилти фротьн, паше жьна ахайе wи шәрʹ авитә wи, у ләма Усьв кʹәтә кәла Мьсьре. Ле гәло Хwәде Усьв wи һʹалида һишт? Тö щар на! Йаһоwа «тʹәви Усьв бу у һʹöба хwәйә амьн да кʹьфше . . . Хöдан тʹәви wи бу у һʹәму шьхöле wи Хöдан жерʹа ль һәв дани» (Дәстп. 39:21-23). Wан тәнгасийада, Усьв бь сәбьр һивийа Йаһоwа бу, wәки әwе чʹарәке бькә.

¹¹ Öса жи qәwьми, чәнд сала шунда, Фьрәwьн жь кәле Усьв аза кьр у әw хöламе мьлук, бу мәрьвәки дöда паши Фьрәwьн (Дәстп. 41:1, 37-43). Чахе Усьврʹа дö кöрʹ бун, Усьв наве кöрʹе хwәйи пешьн дани Мьнашә, чьмки әwи гот кö «Хwәде һʹәму дәрд-кöле мьн у мала баве мьн жь бира мьн дәрхьстьн». Ле наве йе дöда дани Әфрайим у гот: «Хwәде wи wәлате зәлулийа мьнда, бәдәна мьн шин кьр» (Дәстп. 41:51, 52). Чьмки Усьв Йаһоwарʹа амьн ма, ләма жи Йаһоwа әw öса кʹәрәм кьр, wәки әwи һьн Мьсьри һьн жи Исраели жь бьрчибуне хwәй кьр. Әʹйан ә, wәки Усьв фәʹм дькьр әw кʹәрәм жь Йаһоwа нә, у дәсте Хwәде тʹәви wи йә (Дәстп. 45:5-9).

12. Иса ча амьн ма wәʹде тәнгасийа?

¹² Иса Мәсиһ жи, wәʹде тәнгасийед гьранда гöрʹа Хwәде дькьр у жерʹа амьн ма, у сәва ве йәке әw һатә кʹәрәмкьрьне. Ле гәло чь али Иса кьр, wәки wан тәнгасийада сәбьр кә? Хәбәра Хwәде дьбежә: «Бона wе шабуна пешийа хwә әwи стун һьлани, шәрм бәр тьштәки һʹәсаб нәкьр» (Ибрн. 12:2, ДТʹ). Бона Иса шабунәкә мәзьн бу, wәки әwи дькарьбу наве Хwәде рʹумәт кә. Иса һатә хәлаткьрьне бь ве йәке, кö Хwәде жь wи рʹази бу у гәләк шьхöлед мәзьн да дәсте wи. Кʹьтеба Пироз дьбежә, wәки Иса «кʹеләка Хwәдейә рʹасте сәр тʹәхт рʹуньшт». Хенщи ве йәке, Кʹьтеба Пирозда әм дьхуньн: «Хwәде әw һе бьльнд кьр у навәки öса пʹешкʹеши wи кьр, кö жь һʹәму нава бьльндтьр ә» (Фили. 2:9).

ЙАҺОWА КЬРЕД МӘ БИР НАКӘ

13, 14. Йаһоwа ча дьньһерʹә сәр кьред мә?

¹³ Әм гәрәке дöдьли нәбьн, wәки Йаһоwа qәwата мә дьшекьринә, кʹижан кö әм бона хьзмәтийа wи хәрщ дькьн. Әw мә фәʹм дькә чахе әм сьст ьн йан чахе әм хwәда дöдьли дьбьн. Әw дькʹәвә һʹале мә у бәр дьле мәда те, чахе дьвинә кö мәрʹа чәтьн ә жерʹа хьзмәт кьн жь бо чәтьнайед пʹәрава гьредайи, йан сьһʹәт-qәwате, йан жи дьлтәнгбуне. Әм гәрәке бь тʹәмами баwәр бькьн, wәки әw гәләк qимәт дькә чахе әм һʹәму тьшти дькьн сәва wирʹа амьн бьминьн. (Бьхунә Ибрани 6:10, 11).

¹⁴ Öса жи бира хwәда хwәй кьн, wәки Йаһоwа дöа дьбьһе. Ләма тʹö щар дöдьли нәбьн wәки әw әʹсә wе щаба дöайед wә бьдә (Зәб. 65:2). «Баве дьлшәwатийе у Хwәдейе һʹәму бәрдьлийе», wе әʹсә аликʹарийе бьдә мә, ча емосийалида öса жи рʹöһʹанида. Мәсәлә, дьбәкә әw бь сайа хушк-бьред мә аликʹарийе бьдә мә (2 Корн. 1:3). Дьле Йаһоwа гәләк ша дьбә чахе әм һьндава мәрьва дьлшәwат ьн. «Йе кö аликʹарийа кʹәсиб дькә, әw дәйн дьдә Хöдан у Хöдане жи бәр дайина wива, wи хәлат кә» (Мәтʹлк. 19:17; Мәт. 6:3, 4). Жь ве рʹезе әм дьвиньн wәки чахе әм аликʹарийе дьдьнә wан йед кö тәнгасийеда ньн, Йаһоwа әван кьред мәйи баш һʹәсаб дькә ча дәйн сәр хwә, демәк әм ча бежи Жерʹа дәйни дьдьн. У әw соз дьдә, wәки wе мә кʹәрәм кә бона qәнщийа мә.

ӘW МӘ КʹӘРӘМ ДЬКӘ ИРО ЖИ У ҺʹӘТА-ҺʹӘТАЙЕ

15. Һун һивийа кʹижан кʹәрәма нә? (Бьньһерʹә шькле әʹwльн.)

¹⁵ Мәсиһийед кö бь рʹöһʹе пироз һатьнә кʹьфшкьрьне, һивийе нә wәки wе бьстиньн «кʹофийа рʹастийе, йа кö Хöдан, Һʹакьме рʹаст» wе бьдә wан (2 Тимтʹ. 4:7, 8). Ле һәрге һун һивийа ве кʹәрәме ниньн, ле һивийе нә кö бьжин һʹәта-һʹәтайе сәр әʹрде, әw найе һʹәсабе wәки Хwәде wә һе кем qимәт дькә. Бь милйона мәрьв, бь дьл у щан һивийе нә кö wе жийина һʹәта-һʹәтайе щьнәтеда бьстиньн. Әwана «хер-хwәшийева wе хьне бьн у ша бьн» (Йуһʹн. 10:16; Зәб. 37:11).

16. Әм чь бәрдьлийе дьстиньн жь 1 Йуһʹәнна 3:19, 20?

¹⁶ Щара, әм дьбәкә дьфькьрьн wәки әм шьхöле Хwәде гәләк һьндьк дькьн, йан жи дьбәкә әм дöдьли дьбьн һәла Йаһоwа qимәт дькә чь кö әм дькьн. Дьбәкә щара әм һәла һе дöдьли бьн, кö гәло әм һежа нә wәки кʹәрәма Хwәде бьстиньн. Чахе фькьред öса тенә һʹьше wә, wәрә әм бир нәкьн wәки «Хwәде жь дьле мә мәстьр ә у һәр тьшти занә». (Бьхунә 1 Йуһʹәнна 3:19, 20.) Чахе әм баwәрийа хwә Йаһоwа тиньн, у жь һʹьзкьрьне чьqас дькарьн һʹәму тьшти дькьн, әw wе әʹсә мә кʹәрәм кә, һәрге жи әм һʹәсаб дькьн wәки әм бона wи гәләк һьндьк дькьн (Марq. 12:41-44).

17. Ньһа әм чь кʹәрәма дьстиньн?

¹⁷ Һәла һе ве дьнйа хьрабда жи кö wе зутьрәке кʹöта бә, Йаһоwа щьмәʹта хwә кʹәрәм дькә. Әw хәм дькә, wәки хьзмәткʹаред wийи рʹаст wе щьнәʹта рʹöһʹанида пешда һәрʹьн, кʹижан кö бь хwарьна рʹöһʹани тʹер-тʹьжә йә (Иша. 54:13). Чаwа Иса соз да, Йаһоwа ида ньһа мә кʹәрәм дькә, бь ве йәке кö малбәта мәйә рʹöһʹани һәйә, кö жь хушк-бьра йә нав тʹәмамийа дьнйайеда (Марq. 10:29, 30). Хенщи ве йәке, әwед кö ль Хwәде дьгәрʹьн дьлрʹьһʹәт у бәхтәwар ьн (Фили. 4:4-7).

18, 19. Хьзмәткʹаред Йаһоwа ча qимәт дькьн кʹәрәмед wи?

¹⁸ Хьзмәткʹаред Йаһоwа нав тʹәмамийа дьнйайе, кʹәрәмед пʹьрʹ баш дьстиньн. Мәсәлә, Бйанка кö жь Алманйайе йә, гьли дькә: «Әз чь жи бькьм йәкә нькарьм бь тʹәмами рʹазибуна хwә Йаһоwарʹа бьдьмә кʹьфше, жь бо ве йәке кö әw тʹьме али мьн дькә чахе әз дьлтәнг ьм у һәр рʹож кʹеләка мьн ә. Әва дьнйа һәвкʹәти йә у теда дьлсари йә. Ле чахе әз хwә ль Йаһоwа дьгьрьм, дәсте wида әз хwә хwәйкьри тʹәхмин дькьм. Чахе әз бона wи qöрбана дькьм, әw тʹьме бь сәда щара зедәтьр мьн кʹәрәм дькә».

¹⁹ Wәрә бьньһерʹьн мәсәла Паула, кö 70 сали йә. Нәхwәшийа wейә пьште һәйә, у бона ве йәке жерʹа чәтьн ә рʹе һәрʹә. Әw дьбежә: «Кем рʹе дьчьм найе һʹәсабе кем хьзмәт кьм. Әз бь щурʹә-щурʹә метода мьзгинийе бәла дькьн, мәсәлә пе тʹеле у нәформал. Дәфтʹәрәкә мьн һәйә, кʹижанеда әз рʹезед жь Кʹьтеба Пироз у фькьред жь әʹдәбйәтед мә дьньвисьм, у сәва дьлрʹьһʹәт бьм щара әз ве дәфтʹәре дьхуньм. Әве дәфтʹәре әз нав дькьм ‹Дәфтʹәра Мьнә Хьлазкʹар›. Һәрге әм сәр созед Йаһоwа дьфькьрьн, дьлтәнги wәʹдәлу йә. Йаһоwа тʹьме кʹеләка мә йә, wәки дәсте хwә дьрежи мә кә, у фьрqи тʹöнә әм чь дәрәщада ньн». Дьбәкә дәрәща wә öса нинә ча йа Бйанка йан Паула. Ле һун дькарьн бьфькьрьн, wәки Йаһоwа ча wә у йед дор бәре wә кʹәрәм дькә. Чьqас рʹьнд ә кö әм дьвиньн, Йаһоwа ча ньһа мә кʹәрәм дькә, у öса жи дьдьнә бәр чʹәʹве хwә чаwа wе ахьрийеда мә кʹәрәм кә!

20. Һәрге әм бәрдәwам дькьн Йаһоwарʹа бь дьл у щан хьзмәт дькьн, әм дькарьн һивийа чь бьн?

²⁰ Тʹö щар бир нәкьн, wәки Хwәде дöайед wәйи бь дьл wе әʹсә qәбул кә у кʹәрәм кә. У дöдьли нәбьн, wәки һәрге «һун әʹмьре Хwәде биньнә сери», һуне «бьгьһижьнә созе wи» (Ибрн. 10:35, 36). Дә wәрә әм бәрдәwам кьн баwәрийа хwә һе qәwи кьн у бь дьл у щан шьхöле Йаһоwа бькьн. Бәле, әм баwәр ьн wәки Йаһоwа бона ве йәке wе әʹсә мә хәлат кә! (Бьхунә Колоси 3:23, 24.)