Гәло, Селибати жь Мәсиһийа те Дәʹwакьрьне?

РЕЛИГИЙЕД тʹәмамийа дьнйайе, мәсәлә Дера Католики йа Рʹомайи, щурʹә-щурʹә деред Ортодоксе, дине Будизм у йед дьн, дәʹwа дькьн wәки сәрwеред религийа wан, созе селибати хwәй кьн. Әв те һʹәсабе wәки әwана гәрәке нәкʹәвнә зәwаще. Гәләк мәрьв дьфькьрьн wәки әв дәʹwакьрьн ләма пешда һат, чьмки жь бо пьрса һәләqәтийа сексуали шәрʹ-дәw дькʹәтә нава сәрwеред религийа.

Ле пьрс пешда те: «Гәло дәʹwакьрьна селибати ль гора Ньвисаред Пироз ә?» Сәва кö щаба ве пьрсе бьдьн, wәрен әм пешийе шеwьр кьн кö дәʹwакьрьна селибати чаwа пешда һатьбу у чаwа Хwәде ль сәр ве йәке дьньһерʹә.

СЕЛИБАТИ ЛЬ ТʹӘРИХИЙА РЕЛИГИЙАДА

Дь фәрһәнга Британида «Еncyclopædia Britannica» дәрһәqа селибати öса шьроwәдькә: «Дәʹwакьрьна кö азәп бьминьн у алийе сексуалида хwәгьрти бьн, бь рʹасти ль гора ньһерʹандьна сәрwеред религийа һатийә кʹьфшкьрьне». Дь сала 2006-да Папа Бәнәдикт XVI готьбу Курийа Рʹомайирʹа wәки дәʹwакьрьна хwәйкьрьна селибати «qәйдәва гьредайи йә, у кö әw дәʹwакьрьн һе зәманед бәреда нава Шандийада жи бәла дьбу».

Бь рʹасти хwәйкьрьна селибати нә ль гора qәйде динед бәре бу, у Мәсиһийед qьрна йәке жи әв дәʹwакьрьн хwәй нәдькьрьн. Паwлосе шанди йе кö qьрна йәкеда дьжит баwәрмәнд ширәт дькьрьн кö фәсал бьн, чьмки һьнәк wе бь щурʹе хwә шьроwәкьн гьлийед ньвисаред пироз у гәләка бьхальфиньн кö һәла һе «һʹал-зәwаще» жи бьдьнә һьлдане (1 Тимотʹейо 4:1-3).

Qьрна дöдада һьнәка дәстпекьрьн хwә ль дәʹwакьрьна селибати бьгьрьн у әw һәла һе жи ль алийе Рʹоавайе сәр деред «Мәсиһтийа» бәла бу. Дь кʹьтебәкеда бь наве «Cеlibacy and Rеligious Traditions» (Селибати у Qәйдед Религийайе), һатьбу готьне wәки пьрса селибатийе «пешда һат ль гора пьрса кö дь Импәрийа Рʹомайида пешда һат, демәк пьрса дәрһәqа хwәгьртьне ль алийе сексуалида».

Qьрнед дьнда ширәткʹаред дере аwа готи Бавед Дере сафи кьрьн, кö сәрwеред религийа гәрәке хwә ль дәʹwакьрьна селибати бьгьрьн. Wана тʹьре кö һәләqәтийа сексуал әв тьштәкә һʹәрам ә у нәдькʹәтә щабдарийа сәрwеред религийа. Хенщи wе йәке дь фәрһәнга «Еncyclopædia Britannica» те готьне кö «дәстпека qьрна 10-да, жьнед гәләк кʹәшиш у пьскопоса һәбун».

Селибатийа сәрwеред религийа һатьбу кʹьфшкьрьне qанунед 1123 у 1139-да, йа Собора Латиранида, кʹижан кö дь Рʹомеда бу. У һʹәта рʹожа иройин әв кʹьфшкьрьн дь Дера Католикайа Рʹомайида фәрми дьминә. Бь ве дәʹwакьрьне, һәбук у һöкöмдари ида нәдьгьһиштә зарʹед кʹәшиша, ле дерерʹа дьма.

НЬҺЕРʹАНДЬНА ХWӘДЕ ЛЬ СӘР СЕЛИБАТИЙЕ

Ньһерʹандьна Хwәде ль сәр селибатийе рʹьнд те кʹьфше жь Хәбәра wи демәк Кʹьтеба Пироз. Ль wьр әм дьхуньн гьлийе Иса дәрһәqа wан йед кö мина wи «бона Пʹадшатийа Әʹзмана» азәп манә (Мәтта 19:12). Паwлосе шанди жи хәбәр дьда дәрһәqа wан Мәсиһийа, йед кö сафи кьрьн мина wи «жь бо Мьзгинийе» азәп бьминьн (1 Корьнтʹи 7:37, 38; 9:23).

Демәк нә Иса у нә жи Паwлос тʹәми нәдьдан кö баwәрмәнд селибатийе хwәй кьн. Иса готьбу кö азәпбун пʹешкʹеш ә кʹижан кö нә бал һʹәму пәйчуйед wи һәбу. Чахе Паwлос ньвиси дәрһәqа wан йед кö qә нәзәwьщи бун, әwи бь әʹшкәрәти öса гот: «Мьн дәрһәqа wанда әʹмьр жь Хöдан нәстандийә, ле тʹәне әз фькьра хwә дьбежьм» (Мәтта 19:11; 1 Корьнтʹи 7:25).

Хенщи wе йәке Кʹьтеба Пироз нишан дькә, кö гәләк Мәсиһийед qьрна йәке, öса жи Пәтрусе шанди зәwьщи бун (Мәтта 8:14; Марqос 1:29-31; 1 Корьнтʹи 9:5). Һьм жи, жь бо wе йәке кö wан чаха дь Рʹомеда кьред бенамуси бәлабуйи бу, Паwлос ньвиси кö һәрге бәрпьрсийаре Мәсиһи зәwьщи йә, әw гәрәке «мере жьнәке бә» у «зарʹед хwә гöрʹа хwәда . . . мәзьн кә» (1 Тимотʹейо 3:2, 4).

Әʹйан ә кö wәʹде бәре дәʹwакьрьна селибати тʹöнә бу, чьмки Кʹьтеба Пироз рʹастә-рʹаст дьбежә кö «мер бьра дәйне [борщ] жьне бьде» у щотед зәwьщи жи гәрәке һәләqәтийа сексуалида «жь һәвдö на-на нәкьн» (1 Корьнтʹи 7:3-5). Әʹшкәрә йә, кö Хwәде селибатийе жь мә дәʹwа нәкә, у нә жи qануна датинә сәва кö хьзмәткʹаред Wи селибатийе хwәй кьн.

ЖЬ БО МЬЗГИНИЙЕ

Һәрге селибати найе дәʹwакьрьне, гәло чьма Иса у Паwлос азәпбун ча тьштәкә баш һʹәсаб дькьн? Чьмки азәпбун мәщаләкә мәзьн у баш дьдә мәрьв, сәва кö йед дьненарʹа мьзгинийа хере бәла кә. Йед азәп дькарьн гәләк тьшт сәва йед дьнена бькьн, у һьм жи әwана дур ьн жь wан хәма, йе кö зәwьщеда һәнә (1 Корьнтʹи 7:32-35).

Wәрен әм бьньһерʹьн мәсәла Даwьд, йе кö дь Шәһәре Мәксикайеда дьхәбьти у зәʹф пʹәрә qазанщ дькьр. Әwи сафи кьр хәбата хwә бьһелә у дәрбази щийед дур бә дь Коста Рикайеда, сәва кö йед дьнена Кʹьтеба Пироз һин кә. Даwьд дьбежә кö азәпбун дәст да wи сәва кö бькарьбә дәрбази щийе дьн бә? Әw зедә дькә: «Һеса нибу һини култур у жийина тʹәзә бьм. Ле жь бо wе йәке кö әз тʹәне бум у гәрәке тʹәне дәрһәqа хwә хәм кьра, мьрʹа һеса бу зу һини ви щийи бьм».

Клаудийа йе кö Мәсиһи йә у азәп ә, дәрбази wан щийа бу кʹидәре кö аликʹарийа мьзгинвана лазьм бу. Әw дьбежә: «Хьзмәта мьн Хwәдерʹа, гәләк мьн хwәш те. Чахе әз дьвиньм кö чаwа Хwәде сәва мьн хәм дькә, һьнге баwәри у һәләqәтийа мьн тʹәви Wи даһа qәwи дьбьн».

Бәле, азәпбун барәки гьран нинә. Клаудийа зедә дькә: «Фьрqи тʹöнә тö зәwащеда ни йан азәп и, тöйе әʹсәйи бәхтәwар би, һәрге сәва Йаһоwа Хwәде һʹәму тьшти дьки у шьхöлед рʹöһʹанива мьжул дьби» (Зәбур 119:1, 2).