Чахе Мәрьве Мәйә Незьк, Гьран Нәхwәш ә

ДОРЕН гәләк бәр хwә кʹәт чахе пеһʹәсийа, кö мерʹе ве Wесли, йе кö 54 сали бу гьран нәхwәш ә. Дохдьра, мәжийе wида гьре дитьн.a Әwана готьн кö жийина wи анщах чәнд мәһа wе бькʹьшинә. Дорен дьбежә: «Мьн гöһе хwә баwәр нәкьр. Чәнд һʹәфтийа әз нькарбум бьһатама сәр һьше хwә. Мьн фәʹм нәдькьр, чьма әв йәк гәрәке һәма бьһата сәре мә. Әз qәʹ һазьр нибум».

Йазьх, ле чь кö һатийә сәре Дори тьштәкә тʹәбйәти йә. Чьмки әм жь нәхwәшийед гьран хwәйикьри ниньн у нәжи дькарьн тедәрхьн чь чах әме нәхwәшкʹәвьн. Хенщи wе йәке һежайи пәсна нә әw мәрьв, йед кö һазьр ьн мьqати мәрьвед хwә бьн кʹижан кö гьран нәхwәш ьн. У фәʹмдари йә, wәки әв тьштәки һеса нинә. Ле чь нәфәред мале гәрәке бькьн, сәва кö бәрдьлийе бьдьнә нәхwәша у мьqати wан бьн? Чаwа әwед кö мьqати мәрьвед хwә дьбьн, дькарьн емосийед хwә бьгьрьн? Әм гәрәке һивийа чь бьн, чахе мьрьн незик дьбә? Пешийе wәрен әм шеwьр кьн кö чьма дькарә иро зәʹф чәтьн бә мьqати wан бьн, йед кö бь нәхwәшийа гьран нәхwәш ьн.

МЕДИСИНА ЙА МОДЕРН

Иро медисина дьхәбьтә сәва кö нәхwәшийед гьран бьдә сәкьнандьне у әʹмьре мәрийа һʹәвәки дьреж кә. Гәләк qьрнә пешда һәла һе дәwләтед пешдачуйида жи, әʹмьре мәрийа кьн бу. Мәрьв зу дьмьрийан жь нәхwәшийед мьрдар у qәзийа. Мәрьв нькарьбун бьчуна нәхwәшхане, чьмки әв йәк синоркьри бу. Ләма жи нәфәред мале малда мьqати нәхwәша дьбун, йед кö малда жи дьмьрийан.

Иро медисина дькарә чʹарәке бькә, сәва кö нәхwәшийед гьран бь щурʹәки бьдьнә сәкьнандьне, кö жийина мәрийа дьреж бә. Һәрге бәре жь бо нәхwәшийед гьран мәрьв зу дьмьрийан, иро медисина дькарә сәр гәләк сала әʹмьр дьреж кә. Рʹаст ә жийина мә дьреж дьбә, ле мәрьв бь тʹәмами qәнщ набә. Гәләк жь wан мәрийа öса сьст дьбьн, кö qәwата wан жи нагиһиже мьqати хwә бьн. Ле wан мәрийарʹа йед кö гәрәке мьqати wан нәхwаша бьн, даһа чәтьн дьбә.

ПЕШДА ХWӘ ҺАЗЬР КӘ

Анәгори Дори, иро жи һәчʹи зәʹф жь мәрийа гәләк дьлшкәсти дьбьн, чахе педьһʹәсьн кö мәрьве wанә незик гьран нәхwәш ә. Wи чахи гава тö гәләк хәмгин и, бьн тьрседа ни, у дәрде хwә дькʹьшини, чь дькарә али тә бькә пешда хwә һазьр ки? Хьзмәткʹарәки Хwәдейи амьн, дöайед хwәда гот: «Мә öса һин кә әм рʹожед хwә бьжмьрьн, wәки әм дьләки сәрwахт дәст биньн» (Зәбур 90:12). Бәле, бь дьл у щан Йаһоwарʹа дöа бькьн, сәва кö мә һин кә бь билани «рʹожед хwә бьжмьрьн», демәк бькарьбьн даһа баш, рʹожед пашьн тʹәви мәрьвед незик дәрбаз кьн.

Гәрәке пешда хwә һазьр кьн. Һәрге qәwата мәрьве тәйи незик дьгьһиже кö хәбәр дә у әw һазьр ә дәрһәqа нәхwәшийа хwә шеwьр кә, wе аqьлайи бә жь wи бьпьрсьн кö кʹи wе дәwса wи сафикьрьна бькә, чахе әw ида qöдум бькʹәвә. Нәфәред мале гәрәке вәкьри хәбәр дьн тʹәви мәрьвед хwәйә нәхwәш дәрһәqа wе йәке, кö чаwа әwана wе бәрдәwам кьн алийе медисьнайеда аликʹарийе бьдьне у чь протседура дәрбаз кьн. Чьмки паше qәwата wан wе ида нәгьһиже сафикьрьна бькьн. Әв йәк wе али нәфәред мале бькә, кö хәмед хwә һәвәки сьвьк кьн у жь һәстед хwәсущдаркьрьне дур бьн. Чахе тö пешда дәрһәqа ве йәке тʹәви мәрьве хwә вәкьри хәбәр ди у шеwьр ки, әwе али тә бькә, кö һʹәчʹи зәʹф дина хwә бьди wе йәке, кö мьqати wи би. Кʹьтеба Пироз дьбежә: «Бе ширәт мәрәм у тʹьвдир бәтал дьбьн» (Мәтʹәлок 15:22).

ЧАWА АЛИКʹАРИЙЕ БЬДЬН

Щабдарийа лапә мәзьн йа wан мәрьва йед кö мьqати нәхwәша дьбьн әw ә, wәки бәрдьлийе бьдьнә нәхwәша. Wи мәрьви кö бәр мьрьне йә, гәрәке бьдьнә баwәркьрьне wәки wи һʹьз дькьн у wәки әw тʹәне нинә. Чаwа әве йәке бькьн? Wирʹа тьштәки бьхунә йан бьстьре, у сәва ве йәке бьжберә әʹдәбйәтед öса у кʹьламед öса, йед кö wе дьлбинийе бьдә мәрьве нәхwәш у һʹале wи хwәш кә. Гәләк мәрьвед нәхwәш рʹьһʹәт дьбьн, чахе нәфәред мале дәсте wан дьгьрьн у бь нәрми wанарʹа хәбәр дьдьн.

Wе баш бә, тʹьме дина хwә бьдьне һәла чь щурʹәйи мәрьв тен бал йед нәхwәш. Һʹәсабәкида öса һатьбу готьне: «Бьһистьн, һʹәстәки öса нә, чь кö мәрьв лап хьлазийе öнда дькә. Дьбә кö öса бе кʹьфше кö мәрьв хәwрʹа чуйә, ләма жи бәр wи мәрьви нәбежьн тьштед öса, чь кö тәйе нәхwәста хут wирʹа бежи».

Һәрге дьбә, тʹәвайи дöа бькьн. Кʹьтеба Пироз гьли дькә дәрһәqа qәwьмандьнәке, чахе Паwлосе шанди у һәвал-һогьред wи кʹәтьн бьн барәки гьран, öса кö әwана һевийа хwә жь жийине ида бьрин. Әwана кʹижан аликʹари дьгәрʹийан? Паwлос һәвалед хwәрʹа гот, кö сәва wан дöа бькьн (2 Корьнтʹи 1:8-11). Дöайед бь дьл у щан wәʹде дьлтәнгийе у нәхwәшийед гьран, гәләк qимәт ьн.

БЬ РЕАЛИ БЬНЬҺЕРʹӘ

Ида фькьра wе йәке кö мәрьве мә бәр мьрьне йә, гәләк дьлтәнг дькә. Чь жи һәбә, мьрьн тьштәки әʹщеб ә сәва мә. Әм öса нәһатьнә әʹфьрандьне, кö мьрьне ча пʹарәкә жь жийина хwә qәбул кьн (Рʹомайи 5:12). Хәбәра Хwәде ль сәр мьрьне дьбежә «дьжмьн» (1 Корьнтʹи 15:26). Ләма жи чахе әм нафькьрьн дәрһәqа мьрьна мәрьве хwәйә незик у нәһазьр ьн, әв тьштәки тʹәбйәти йә.

Хенщи wе йәке, чахе нәфәред мале бь реали ль сәр дәрәще дьньһерьн у фәʹм дькьн кö чь дькарә бьqәwьмә, әв йәк дькарә али wан бькә тьрса хwә кем кьн. Öса әwана wе бькарьбьн педа дина хwә бьдьнә wе йәке, кö бәрдьлийа лазьм бьдьнә мәрьве нәхwәш. Әw кö чь дькарә бьqәwьмә бәр мьрьне, те готьне дь ве чаргошеда «Һʹәфтийед Пашьнә Жийине». Һәмьки нә һʹәму мәрьв йед кö бәр мьрьне нә, хwә öса тʹәхмин дькьн чаwа кö дь ве чаргошеда те готьне. Чьмки гәләк жь нәхwәша йед кö ида бәр мьрьне бун, тʹәне һьнәк жь wан гöһастьн ль сәр хwә тʹәхмин кьрьнә.

Паши мьрьна мәрьве незик, wе аqьлайи бә хәбәр дьн тʹәви һәвале хwәйи незик, йе кö пешда һазьр бу аликʹарийе бьдә мә. Дьбә кö wе лазьм бә, wәки нәфәред мале жи бьдьнә баwәркьрьне, кö мәрьве wанә мьри ида начәрчьрә. Әʹфьрандаре инсанәте жи бь һʹьзкьрьн мә дьдә баwәркьрьне: «Мьри . . . тьштәки ньзаньн» (Wаиз 9:5).

АЛИКʹАРЧИЙЕ БЬ ИТʹБАР

Гәләк фәрз ә итʹбарийа хwә Хwәде биньн, нә кö тʹәне wи чахи гава мәрьве мә гьран нәхwәш ә, ле öса жи чахе әм дьлтәнг дьбьн паши мьрьна мәрьве хwә. Хwәде дькарә али тә бькә бь гьли у кьред мәрьвед дьн. Дорен дьбежә: «Әз һин бум инкʹар нәкьм аликʹарийа мәрийа. Әw аликʹарийа кö мә станд, мә qәwи кьр. Мьн мере хwәва öса хwә тʹәхмин дькьр, кö те бежи Йаһоwа хwәха мәрʹа дьгот: ‹Әз тʹәви тә мә, кö ве дәрәщеда али тә бькьм›. Әз әве йәке тʹö щар бир накьм».

Бәле, Йаһоwа Хwәде Аликʹарчийе бь итʹбар ә. Әw Сазкʹаре мә йә, у әw фәʹм дькә еш у дәрде мә. Әw дькарә у дьхwазә аликʹарийа лазьм у һелане бьдә мә, сәва кö әм бькарьбьн чәтнайед хwәда тәйах кьн. Ле һе баш әw ә, кö әwи соз дайә wәки зутьрәке wе мьрьне бьдә һьлдане у бь мьлйона мәрьва йед кö бира wида ньн, wе рʹакә (Йуһʹәнна 5:28, 29; Әʹйанти 21:3, 4). Һьнге әме wәк Паwлосе шанди бькарьбьн бежьн: «Мьрьн, кʹане qиле жәʹра тә? Мьрьн, кʹане сәркʹәтьна тә» (1 Корьнтʹи 15:55).