Һʹәрфа Ибранийә Бьчʹук Чьда Мә Дьдә Баwәркьрьне

Әм бь рʹасти баwәр дькьн, кö созед Хwәде wе бенә сери? Иса ве йәкеда дöдьли нибу, у бь һинкьрьнед хwә, әwи гöһдаред хwә һелан дькьр баwәр бькьн. Wәрен әм шеwьр кьн әw мәсәлә, йе кö Иса ль сәр Чʹийайе Зәйтʹуне гöһдаред хwәрʹа гот, кʹижан кö Мәтта 5:18-да ньвисар ә: «Әз рʹаст wәрʹа дьбежьм, бәри дәрбазбуна әʹрд у әʹзман, дәqәк йан жи һʹәрфәкә бьчʹук жь Qануне wе öнда нәбә, һʹәта кö һʹәму бенә сери».

Һʹәрфәкә бьчʹук йа алифбәйа Ибрани һәйә, י (йод). Әв һәрфа пешьн ә Тетраграматоне йа наве Хwәдейи пироз, Йаһоwа.a Хенщи wе йәке һәр хәбәр у һәр «һʹәрфәкә бьчʹук» жь Qануна Хwәде, qанунзан у Ферьс һʹәсаб дькьрьн ча тьштәкә пʹьрʹ мöһим.

Иса дьгот кö әʹрд у әʹзман wе бькарьбьн дәрбаз бьн, ле һәр һʹәрфәкә бьчʹукә жь Qануне wе дәрбаз нәбә у әʹсәйи wе бе сери. У жь Ньвисаред Пироз жи әм педьһʹәсьн кö әʹзман у әʹрд wе тʹö щар öнда нәбьн у wе һәр-һәйи бьн (Зәбур 78:69). Ләма жи әв йәк дьдә кʹьфше, кö һәр һʹәрфәкә бьчʹукә жь Qануне, wе öса нәминә у бе сери.

Гәло ле Йаһоwа Хwәде дина хwә дьдә тьштед бьчʹук? Бәле. Һәла дина хwә бьдьнә ве йәке: Бәре, щьмәʹта Исраелерʹа һатьбу готьне, кö әwана гәрәке һәстуйед бәрха Щәжьне нәшкеньн (Дәркʹәтьн 12:46). Әв ида тьштәкә бьчʹук бу. Ле гәло wана фәʹм дькьр, кö чьма әwана гәрәке тʹö һәстуйед бәрхе нәшкеньн? Дьбә кö на. Йаһоwа Хwәде заньбу, кö әв тьштәкә бьчʹук, тьште пʹехәмбәртийе бу. Демәк әʹйанкьрьна wе йәке бу, кö тʹö һәстуйед Мәсиһ wе нәһата шкенандьне, чахе ль сәр стуна щәфайе әw гәрәке дардакьрьна (Зәбур 34:20; Йуһʹәнна 19:31-33, 36).

Жь wан гьлийе Иса әм чь һин дьбьн? Әм жи дькарьн бь тʹәмами баwәр кьн, кö һʹәму созед Йаһоwа Хwәде һур бь һʹур wе әʹсәйи бенә сери. Бь рʹасти жи жь wан һʹәрфед бьчʹукә Ибрани, баwәрийа һьндава созед Йаһоwа чьqас мәзьн дьбә!