Мәләк Дькарьн сәр Жийина Тә Һʹöкöм кьн?

Рʹожа Ләʹде, Кенет у Филомена йед кö дь Киурасаода дьжин, чубун щәм щоте зәwьщи тʹәви кʹижана кö wана һинбуна Кʹьтеба Пироз дәрбаз дькьр.

Кенет дьбежә: «Чахе әм незики мале бун, мә дит кö дәри дадайи йә у авто жи бәр дери нинә. Тебежи тьштәки әз дәвдам, wәки wе жьнькерʹа тʹелехьм».

Әв жьньк тʹела хwә һьлдьдә у дьбежә, кö мере wе нә мал ә, чуйә хәбате. Ле чахе әw педьһʹәсә кö Кенет у Филомена ида бәр дәринә, әw дәри вәдькә у wана тʹәглифи мале дькә.

Әwана тедәрдьхьн wәки жьньк гьрйа бу. Чахе Кенет һинбуна Кʹьтеба Пироз дәстпедькә, жьньк диса дьгьри. Һьнге Кенет у Филомена бь нәрми дәрһәqа һʹале wе педьһʹәсьн.

Жьньк гьли дькә, кö әwе сафи кьрьбу хwә бькöжә, у мере хwәрʹа нәʹма пашьн ледькьр. Ле чахе Кенет тʹеле дьхә, зәнгьле тʹеле wе дьдә сәкьнандьне. Әw wанрʹа гьли дькә кö әw жь бо депресийайе дьчәрчьрә. Кенет у Филомена дина wе дьдьнә сәр һьнә фькьред жь Кʹьтеба Пироз, у әw дьлбинийе дьстинә. Әв бәрдьли wәʹдәда бу у жийина wе хьлас кьр.

Кенет дьбежә «Мә рʹазибуна хwә Йаһоwарʹа да кʹьфше, кö әwи әм һелан кьрьн, али wе кʹöлфәта дьлтәнг бькьн. Илаки кö Әwи бь рʹöһʹе хwәйи Пироз у мәләка, әм һелан кьрьн ве кʹöлфәтерʹа тʹеле хьн!»a

Кенет у Филоменайе баwәр дькьрьн, wәки Хwәде дькарә бь мәләка у рʹöһʹе Хwәйи пироз, һьнә дәрәщада али мә бькә. Ле гәло әв йәк рʹаст ә? Йан әв ньшкева öса qәwьми, кö Кенет wәʹдәда тʹеле хьст?

Әм нькарьн сәд сәләфи бежьн. Ле әʹйан ә, wәки Хwәде мәләкед хwә дьдә хәбате кö рʹöһʹанида али мәрийа бькьн. Кʹьтеба Пироз дьбежә, кö Хwәде мәләк да хәбате сәва кö Филипойе мьзгинван һелан кә, wәки әw али wәзире Әтйупийе кә, кʹьжанира кö рʹебәрийа рʹöһʹани лазьм бу (Кʹаред Шандийа 8:26-31).

Щурʹә-щурʹә религийа дәрһәqа әʹфринед рʹöһʹанийә мәхсус, һин дькьн. Мәсәлә йанчь әwана ча мәләкед qәнщ тенә хöйане, кö qьрара Хwәде тиньн сери, йан жи ча мәләкед мәрьвайә шәхси кö wана хwәй дькьн. Гәләк мәрьв нә тʹәне баwәр дькьн кö мәләк һәнә, ле öса жи баwәр дькьн кö әwана ль сәр жийина wан һʹöкöм дькьн. Ле һәнә мәрьвед öса жи, йед кö qә баwәрийа хwә мәләка найньн.

Гәло мәләк бь рʹасти һәнә? Һәрге öса нә, әwана чаwа пешда һатьнә? Әwана бь рʹасти кʹи нә? Чаwа әwана дькарьн ль сәр жийина тә һʹöкöм кьн? Wәрен әм шеwьр кьн.