Рʹасти Дәрһәqа Мәләка

Wәк Хwәде, мәләк рʹöһʹ ьн, «гошт у һәсту» йед wан тʹöнә. Әwана мәләкед амьн ьн, у тʹәви Хwәде ль әʹзмана нә, һьм жи рʹастә-рʹаст дькарьн Wирʹа хәбәр дьн (Луqа 24:39; Мәтта 18:10; Йуһʹәнна 4:24).

Wәхтәки, мәләк хwә дькьрнә дьлqе мәрийа, кö qьрара Хwәде ль сәр әʹрде биньн сери у паши тʹәмамкьрьна шьхöле хwә, әwана диса дьбунә кәсен рʹöһʹ (Һʹакьмти 6:11-23; 13:15-20).

Ча Кʹьтеба Пироз дьбежә, мәләк тʹьме дьлqе мерада хöйа дьбун, ле әв найе һʹәсабе кö әwана сәр дö кʹома пʹарә вәдьбьн, кʹома жьна у кʹома мера. Әwана нә дьзәwьщьн у нә жи зарʹа тиньн. Хенщи wе йәке, мәләк мина мәрьва ль сәр әʹрде нәһатьнә буйине, чаwа кö һьнәк дьфькьрьн wәки әwана зарʹ бун, пашwәхтийе мәзьн бун, паше мьрьн, чун ль әʹзмен у бунә мәләк. Йаһоwа мәләк әʹфьрандьнә; ләма жи Кʹьтеба Пироз wана нав дькә «лаwен Хwәде» (Ибо 1:6; Зәбур 148:2, 5).

Кʹьтеба Пироз гьли дькә дәрһәqа «зьманед мәрьва» у «мьлйакʹәта». Әв йәк дьдә кʹьфше кö мәләк жи хәбәр дьдьн. Рʹаст ә Хwәде мәләк дьданә хәбате, сәва кö мәрийарʹа хәбәр дьн, ле Әwи изьн нәдайә мә кö әм бәр wана та бьн, йан жи wанарʹа дöа бькьн (1 Корьнтʹи 13:1; Әʹйанти 22:8, 9).

Бь һʹәзар у һʹәзара мәләк һәнә, демәк һʹәжмарʹа wан дьгьһижә милйонаa (Данийел 7:10; Әʹйанти 5:11).

Мәләк «хwәйиqәwат ьн», демәк гәләк щар жь мәрьва qәwаттьр ьн, у әwана пʹьрʹ сәрwахт ьн. Әʹшкәрә йә кö әwана дькарьн бь ләзәкә öса мәзьн щигöһасти бьн, кö һәла һе әм нькарьн бьдьн бәр чʹәʹве хwә жи (Зәбур 103:20; Данийел 9:20-23).

Рʹаст ә мәләк пʹьрʹ qәwат у сәрwахт ьн, ле һәнә тьшт, дәрһәqа чь жи әwана ньзаньн (Мәтта 24:36; 1 Пәтрус 1:12).

Мәләк кәс ьн, у әwана бь хәйсәт-һʹöнöред öса һатьнә әʹфьрандьне кö Хwәде хwәш тен. Азайа бьжартьна wан жи һәйә. Ләма жи анәгори мәрийа, әwана хwәха дькарьн бьжберьн qәнщи, йан хьрабийе бькьн. Ле йазьх, һьнә мәләк сафи кьрьн мьqабьли Хwәде дәрен (Щьһуда 6).