Тöйе Хәйде жь Дьле Хwә Дәрхи у Әʹдьлайе Хwәй ки?

ЙАҺОWА ХWӘДЕ хьзмәткʹаред хwә ширәт дькә wәки әʹдьлайе хwәй кьн у тʹьфаqийеда бьн. У һәрге әм әʹдьлайиһʹьз ьн, әм һьндава һәвдöда әʹдьлайе хwәй кьн. Чахе әм öса дькьн, әм бәхтәwар дьбьн, чьмки әʹдьлайеда дьжин. Әw әʹдьлайи гәләк мәрьва дькʹьшинә щьвате, йед кö шәрʹ-дәʹwа һʹьз накьн.

Мәсәлә, Мадагәскәреда мерькәк кö бәре щәдубаз бу у мәрьв qәнщ дькьрьн, тʹәхмин кьр wәки Шәʹдед Йаһоwа ча тʹьфаqийеда ньн. Әwи дьле хwәда гот: «Һәрге әз бьхwазьм динәки qәбул кьм, әзе бьбьмә Шәʹде Йаһоwа». Wәʹдә дәрбаз бу у әwи кьред щәдубази тʹәрк да, öса жи ль гора Кʹьтеба Пироз зәwаща хwәда гöһастьн кьр, у бу хьзмәткʹаре Йаһоwа, Хwәдейе әʹдьлайе.

Һәр сал бь һʹәзара мәрьв мина wи мерьки, дьбьнә әндәмед щьвата Мәсиһи, кʹидәре кö әʹдьлайи һәйә чь кö wана тʹьме хwәстийә. Ле Кʹьтеба Пироз дьбежә wәки «һʹәвсудийа хьраб у чʹәʹвнәбари» щьватеда дькарьн һәвалтийе хьраб кьн у чәтьнайа пешда биньн (Аqуб 3:14-16). Ле чьqас баш ә wәки Кʹьтеба Пироз öса жи ширәта дьдә мә, кö әм чаwа дькарьн хwә жь ве йәке хwәй кьн у әʹдьлайе qәwи кьн ортʹа һәвдöда. Wәрә әм ньһа чәнд сәрһатийед хушк-бьра шеwьр кьн у бьвиньн ча wана әʹдьлайи хwәй кьрьнә.

ЧӘТЬНАЙИ У САФИКЬРЬН

«Ортʹа мьн у бьраки кʹижан тʹәви мьн дьхәбьти, һәв кʹәт. Щарәке чахе мә сәр һәв дькьрә qажини, дö мәрьв һатьн у дитьн ча әм һәврʹа шәрʹ дькьн» (КРИС).

«Хушкәк, тʹәви кʹижане мьн тʹьме хьзмәт дькьр, ньшкева ида тʹәви мьн дәрнәдькʹәтә хьзмәтийе. Паше әwе ида тʹәви мьн qә хәбәр жи нәдьда. Мьн фәʹм нәдькьр чьрʹа әw öса дькә» (ЩАНЕТ).

«Мә се бьра тʹәви һәв пе тʹеле хәбәр дьда. Йәки хатьре хwә жь мә хwәст у мьн тʹьре әwи тʹел весанд. Һьнге мьн йе дьнрʹа дәрһәqа wи гьлийед нәбаш гот, ле әwи тʹел венәсандьбу у дьбьһист кö мьн чь сәр wи дьгот» (МАЙКЛ).

«Щьвата мәда дö пешәнга һәврʹа шәрʹ дькьрьн. Wана һерса хwә сәр һәвда дьрʹетьн. Әw шәрʹ-дәʹwе wан гьшка әʹщьз дькьрьн» (ГАРИ).

Аликива бьньһерʹьн, әв чәтьнайед мәзьн ниньн. Ле әwан дәрәща дькарьбун дьле wан мәрьва бьешиньн у рʹöһʹанида зийане бьдьнә wан. Ле ча баш ә wәки әwан хушк-бьра принсипед Кʹьтеба Пироз данә хәбате у әʹдьлайи нав һәвда хwәй кьрьн. Һун ча дьфькьрьн, wана кʹижан принсип данә хәбате?

«Рʹева шәрʹ нәкьн» (Дәстп. 45:24). Бь wан гьлийа Усьв бьред хwә ширәт кьр, гава әwана вәдьгәрʹийанә мала баве хwә. Рʹасти жи әwи ширәтәкә керһати да wан! Чахе кәсәк нькарә хwә бьгьрә у зу һерс дькʹәвә, әw дькарә шәрʹ-дәʹwа һе гöрʹ кә. Крис дәрһәqа кʹижани мә жоре гот, фәʹм кьр wәки жерʹа лазьм ә хwә бьшкенә у ширәта qәбул кә. Әwи хwәст хwә бьгöһезә, у незики wи бьрайи бу тʹәви кʹижани кʹәтьбу дәʹwе, у жь wи бахшандьн хwәст. Паши ве йәке, әw ида сәр хwә дьхәбьти, wәки һерса хwә бьгьрә, у ахьрийеда әw бьра жи һатә гöһастьне. Ньһа әwана һәрдö жи бь шабуне тʹәвайи Йаһоwарʹа хьзмәт дькьн.

«Бе ширәт мәрәм у тʹьвдир бәтал дьбьн» (Мәтʹлк. 15:22). Щанете фәʹм кьр wәки әw гәрәке чәтьнайа ортʹа хwә у хушке сафи кә. Әwе хwәст тʹәви wе хушке хәбәр дә. Wәʹде хәбәрдане Щанете хушкерʹа гот, wәки дьле хwә жерʹа вәкә кö чьрʹа әw хwә жь wе дур дьгьрә. Дәстпекеда хәбәрдан нә һеса бу, ле йәкә паше wана һәврʹа нәрм хәбәр дьдан. Ахьрийеда, әwе хушке фәʹм кьр wәки әwе жь Щанете нәрʹаст фәʹм кьрийә, у кö Щанете тьштәки öса нәкьрийә кö әw бьхәйдә. Әwе жь Щанете бахшандьн хwәст, у әwана диса жи һәвалтийе дькьн у тʹәвайи Йаһоwарʹа хьзмәт дькьн.

«Һәгәр тö һʹәдийа хwә бини сәр горигәһе у ль wьр бе бира тә, кö дьле бьре тә жь тә майә, һʹәдийа хwә wе дәре ль бәр горигәһе бьһелә у пешийе һәрʹә бьре хwәрʹа ль һәв wәрә» (Мәт. 5:23, 24). Әw ширәт Иса да, гава сәр чʹийайе Сәрмоне щьмәʹт һин дькьр. Майкл гәләк хwә нәһәq дькьр, чьмки әwи фәʹм кьр, wәки нәрʹаст бу кö сәр бьра тьштед нәбаш гот. Ләма әwи хwәрʹа сафи кьр кö һәрʹә бал wи бьрайи у һәв бен. Әw рʹасти wи бьрайи һат у бь мьлукти гöне хwә да рʹуйе хwә, чьмки дьле wи ешандьбу. Ахьрийеда чь qәwьми? Майкл дьбежә: «Әwи бь дьл у щан бахшандә мьн». Бәле, әwана диса бунә һәвалед һәв.

«Ль һәв сәбьр кьн у ль һәв бьбахшиньн, һәгәр газьне йәки ль һьндава йәкида һәбә» (Колс. 3:12-14). Мә жоре дәрһәqа дö пешәнга гьли кьр, кʹижан кö һәврʹа дькʹәтьнә дәʹwе. Рʹуспики али wан кьр сәва әwана ль һәв бен. Әwи wанрʹа да кʹьфше кö ча шәрʹ-дәʹwе wан хушк-бьра әʹщьз дькә у хьраб сәр wан һʹöкöм дьбә. Әwи ани бира wан, wәки әwана гәрәке һьндава һәвдöда сәбьр бьн у әʹдьлайе хwәй кьн. Әw дö хушк ширәта рʹуспи qәбул кьрьн, у ньһа әwана тʹьфаqийеда тʹәвайи мьзгинийе бәла дькьн.

Һәрге кәсәки дьле wә ешандийә, wе керһати бә кö гьлийед Колоси 3:12-14 бьдьнә хәбате. Сәва кö бьбахшиньнә мәрьва у шашийед wан бир кьн, гәләк фәрз ә хwә бьшкеньн. Ле һәгәр һун нькарьн хәйде жь дьле хwә дәрхьн, бьдьнә хәбате принсипа жь Мәтта 18:15. Рʹаст ә Иса әв принсип дәрһәqа ве дәрәще гот чахе кәсәк һьмбәри мә гöне мәзьн дькә, ле йәкә әве принсипе әм дькарьн бьдьнә хәбате һәр гав, чахе ортʹа мә у кәсәки хьраб дьбә. Әм дькарьн бь мьлукти у нәрми незики wи бьра йан хушке бьн у һәврʹа һʹәлал хәбәр дьн сәва ль һәв бен.

Бәле, Кʹьтеба Пирозда гәләк ширәтед керһати һәнә. Һʹәчʹи зәʹф жь wан ширәта, дьдьнә кʹьфше кö чьqас фәрз ә бәре рʹöһʹ бьдьнә кʹьфше, демәк «һʹьзкьрьн, шабун, әʹдьлайи, сәбьркьрьн, ширьнайи, qәнщи, амьни, мьлукти, хwәгьртьн» (Галт. 5:22, 23). Чаwа кö бьзьр һʹащәтед мәкʹине нәрм дькә у әw рʹьнд дьхәбьтә, öса жи бь сайа wан һʹöнöра һеса йә бь нәрми чәтьнайед ортʹа һәвдö сафи кьн у әʹдьлайе хwәй кьн.

ЩУРʹӘ-ЩУРʹӘ ХӘЙСӘТ ЩЬВАТЕ ҺЕ ДӘWЛӘТИ ДЬКӘ

Әм хәйсәтда мина һәв ниньн у һʹöнöред мә жи жь һәв щöдә дьбьн. У әw йәк һәләqәтийа мә ортʹа хушк-бьра һе һʹәwас у бәдәw дькә. Ле чьмки әм хәйсәтда жь һәв щöдә дьбьн, щара әм дькарьн һәвдö нәрʹаст фәʹм кьн у һәврʹа бькʹәвьнә дәʹwе. Рʹуспики щерʹьбанди дәрһәqа ве йәке мәсәләк ани: «Мәрьве шәрмокәрʹа дькарә чәтьн бә кö нав wан мәрьвада бә, кʹижан нәшәрмокә нә у хәбәрхwәш ьн. Дьбәкә öса бе кʹьфше кö әw йәк тьштәки бьчʹук ә, ле щара әw дькарә проблемәкә мәзьн пешда бинә». Гәло мәрьвед кö хәйсәтда мина һәв ниньн, qә дькарьн һәврʹа йолә һәрʹьн? Wәрә шеwьр кьн дәрһәqа дö шандийа. Пәтрус мәрьвәки дьлвәкьри бу у чь дьһатә бәр һʹьше wи әw жи дьгот. Ле Йуһʹәнна мәрьвәки бь һʹьзкьрьн бу у кьред хwәда у хәбәрдана хwәда фәсал бу. Бәле, хәйсәте wан щурʹә-щурʹә бу, ле йәкә wана тʹәвайи һәвкʹари дькьрьн (Кʹар. Шанд. 8:14; Галт. 2:9). Иро жи һәрге хушк-бьра хәйсәтда мина һәв ниньн, йәкә дькарьн тʹәвайи һәвкʹарийе бькьн у әʹдьлайеда бьн.

Дьqәwьмә кö щьватеда һун жь хәбәрдан у кьред кәсәки әʹщьз дьбьн. Ле бир нәкьн кö Мәсиһ бона wи жи мьр у кö һун гәрәке бь һʹьзкьрьн бьн тʹәви wи (Йуһʹн. 13:34, 35; Рʹом. 5:6-8). Ләма жи wе нәрʹаст бә кö дәрберʹа һәвалтийа хwә бьбьрʹьн, йан жи тʹәви wи хwә дур бьгьрьн. Пьрсед öса бьдьнә хwә: «Гәло әw бьра qануна Йаһоwа дьтʹәрьбинә? Гәло әw бь һʹәмде хwә дьле мьн дешинә у мьн әʹщьз дькә, йан әм хәйсәтда нә мина һәв ьн?» У пьрсәкә лапә фәрз: «Кʹижан һʹöнöред wи әз дьхwазьм кö щәм мьн һәбьн?»

Пьрса пашьн гәләк керһати йә. Мәсәлә, һәрге кәсәк һʹьз дькә хәбәр дә, ле тö öса нини, бьфькьрә кö тö чь дькари жь wи һин би. Бәʹса хәбәре, тʹәви wи дәркʹәвә хьзмәтийе у дина хwә бьде кö әw ча хәбәрдана хwә дәстпедькә. Йан жи һәрге тö дьвини wәки әw дәствәкьри йә, ле тö һьнәки тьма йи, дина хwә бьде кö әw чьqас шабуне дьстинә гава аликʹарийе дьдә мәрьвед әʹмьрда мәзьн, нәхwәш йан жи кʹе кʹәсиб ә. Бәле, һәрге жи һун хәйсәтда мина һәв ниньн, йәкә дькарьн жь һәвдö тьштед баш һин бьн. Дьбәкә һун һәвалед гәләк незик нибьн, ле һәләqәтийа wә ортʹа һәвдö wе баш бә, у һьн жи wе тʹьфаqи ортʹа wәда һьн жи щьватеда мәзьн бә.

Qьрʹна йәкеда дö хушк Әйодийа у Сьнтиха дьqәwьмә хәйсәтда жь һәв щöдә дьбун ләма ортʹа wанда чәтьнайи һәбу. Ле Паwлосе шанди wана һелан кьр кö «тʹәви Хöдан йәкбуйи» ль һәв бен (Фили. 4:2). Бәле, нета мә жи гәрәке әw бә кö тʹәви хушк бьрʹа һәвкʹарийе бькьн у щьватеда әʹдьлайе хwәй кьн.

НӘҺЕЛЬН ХӘЙД ДЬЛЕ WӘДА БЬМИНӘ

Әм гәрәке зу хәйде жь дьле хwә дәрхьн, чьмки әw йәк дькарә кʹур дьле мәда рʹуне. Мәсәлә, һәрге бахчәки бь кöлирка тʹьжәда зиван мәзьн дьбьн, һәрге wана кʹокева дәрнәхи, бахчә дькарә бәдәwбуна хwә öнда кә. Öса жи хәйд, һәрге әв жь дьле мә дәрнәйе, әw wе һе мәзьн бә, у дькарә сәр щьвате жи хьраб һʹöкöм бә. Ле һәрге әм Йаһоwа у хушк-бьра һʹьз дькьн, әме тʹö щар нәһельн wәки тьштәк зийане бьдә әʹдьлайе, кö нава щьмәʹта Хwәдеда һәйә.

Чахе әм һәр тьшти дькьн сәва әʹдьлайе хwәй кьн, әм дькарьн әʹщебмайи бьминьн кö әw чь бәред баш тинә. Дина хwә бьдьнә сәрһатийа хушкәкә мә, әw гьли дькә: «Мьн тʹәхмин кьр кö хушкәк тʹәви мьн ча тʹәви зарʹа бу. Әw йәк мьн әʹщьз дькьр. Һерса мьн сәр wе рʹабу, әз хәйидим у ида һьндава wе сар бум. Әз öса дьфькьрим: ‹Һәрге әw qәдьре мьн нагьрә, чьрʹа әз гәрәке qәдьре wе бьгьрьм›».

Паше әw хушк фькьри сәр кьред хwә. Әw гьли дькә: «Мьн тедәрхьст wәки хәйсәте мьн хьраб дьбу у әз сәр хwә һерс дькʹәтьм. Мьн фәʹм кьр кö әз гәрәке фькьред хwә бьгöһезьм. Мьн бона ве йәке Йаһоwарʹа дöа кьр. Паше мьн пʹешкʹешәк у нәʹмәкә бьчʹук да wе хушке. Нәʹмеда мьн бахшандьн жь wе хwәст сәва кьред хwәйә нәрʹаст. Мә һәвдö һʹәмез кьр у һәврʹа гот, wәки әве йәке бир бькьн. Паши ве йәке ортʹа мьн у wеда ида тʹö проблем тʹöнә бу».

Һʹәму мәрьв әʹдьлайе дьхwазьн. Ле чахе мәрьв дьвиньн wәки qәдьре wан дькʹәвә, йан жи әwана qöрʹә нә, гәләк жь wан ида әʹдьлайе нагәрʹьн у кьред нәрʹаст дькьн. Әw йәк ве дьнйайеда qәйдә йә, ле нава хьзмәткʹаред кö наве Хwәде сәр wан ә, әʹдьлайи у тʹьфаqи гәрәке һәр гав һәбә. Йаһоwа пе рʹебәрийа рʹöһʹе хwәйи пироз Паwлос һелан кьр кö бьньвисә: «Һиви жь wә дькьм, кö һун öса бьжин, чаwа лайиqи wе газийе йә, кʹижанерʹа һун һатьнә газикьрьне. Һун бь тʹәмамийа мьлуктийе у шкәсти, бь сәбьре һʹьзкьрьнеда ль бәр һәв дахьн. Бьщәʹдиньн, кö йәктийа рʹöһʹ пе һәвгьредана әʹдьлайийе хwәй кьн» (Әфәс. 4:1-3). Бәле, әw «һәвгьредана әʹдьлайийе» беһʹәсаб qимәт ә. Ләма жи wәрә әм алийе хwәда һәр тьшти бькьн, сәва чәтьнайед ортʹа һәвда сафи кьн у әʹдьлайе һе qәwи кьн.