Чаwа Һини Щьвата Тʹәзә Бьн?

БЬРАКИ мә бь наве Аленa гьли дькә: «Әз бәрхwә дькʹәтьм чахе дәрбази wьра дьбум. Мьн ньзаньбу әзе бькарьбьн хwәрʹа һәвала бьвиньн йан на у wе ча мьн qәбул кьн щьватеда». Ален һини щьвата хwәйә тʹәзә дьбә, кʹижан кö 1 400 км зедәтьр дури мала wи йә.

Һәрге һун дәрбази щьвата тʹәзә бунә, дьбәкә һун жи бәрхwә дькʹәвьн. Ле чь дькарә али wә бькә кö һини щьвата тʹәзә бьн? Һун чь дькарьн бькьн һәрге һун һивийе нибун кö wе öса чәтьн бә wәрʹа? Ле һәрге һун дәрбази щьвата тʹәзә нәбунә, һун ча дькарьн али wан бькьн, йед кö тʹәзә дәрбази щьвата wә бунә, сәва әwана зу һини щьвате бьн?

ЧАWА ҺИНИ ЩЬВАТЕ БЬН У ПЕШДА ҺӘРʹЬН?

Бьфькьрьн дәрһәqа ве мәсәле: Чахе бах кʹокева рʹадькьн у щигöһасти дькьн, әw дькʹәвә стресе. Гава бах жь әʹрде дәрдьхьн, кʹокед wи һʹәчʹи зәʹф тенә бьрʹине, сәва һеса бә щики дьн дачʹькиньн. Чахе бах ида дадьчʹькиньн, әw зу дәстпекә кʹокед тʹәзә бьдә. Мина ве йәке, чахе һун дәрбази щьвата тʹәзә дьбьн, дьбәкә дькʹәвьнә стресе. Щьвата хwәйә бәреда wә ча бежи ида «кʹокед» хwә дабу, чьмки wә һәвалед баш хwәрʹа дитьбу у wә тʹьме Йаһоwарʹа хьзмәт дькьр. Ле ньһа һун гәрәке ида ча бежи кʹокед тʹәзә бьдьн, сәва кö һини щийе тʹәзә бьн. Ле чь дькарә али wә бькә ве йәкеда? Принсипед Кʹьтеба Пироз дькарьн али wә бькьн. Wәрә әм чәнд принсипа шеwьр кьн.

Кәсе кö тʹьме Хәбәра Хwәде дьхунә мина «дара дәве ава йә, кö wәʹде хwәда бәре хwә дьдә, бәлге ль сәр начʹьльмьсә, чь жи дьхwазә мийасәр дьбә» (Зәб. 1:1-3).

Чаwа бах аве жь канийе дькʹьшинә сәва qәwи бә у шин бә, Мәсиһи жи гәрәке тʹьме пе Хәбәра Хwәде тʹер бә сәва кö рʹöһʹанида qәwи бьминә. Ләма жи бәрдәwам кьн һәр рʹож Кʹьтеба Пироз бьхуньн, у тʹьме һәрʹьнә щьвате. Бьра wәрʹа бьбә хәйсәт кö qöльхкьрьна тʹәви малбәте у һинбуна шәхси дәрбаз кьн. Чаwа щьвата бәреда wә һәр тьшт дькьр сәва һәләqәтийа хwә тʹәви Йаһоwа qәwи хwәй кьн, щьвата тʹәзәда жи һун гәрәке бәрдәwам кьн öса бькьн.

«Авдаррʹа жи аве бе дайине» (Мәтʹлк. 11:25).

Һуне зу һини щьвате бьн у пешда һәрʹьн, һәрге тʹьме хьзмәт бькьн у щьватеда кʹар бькьн. Кевин кö рʹуспи йә дьбежә: «Чахе әм дәрбази щьвата тʹәзә бун, хьзмәтийа ча пешәнгед кʹомәкдар гәләк али мьн у жьна мьн кьр. Мә зу хушк-бьра, пешәнг у мьһал нас кьрьн». Бьраки бь наве Рощер жи дәрбази щьватәкә тʹәзә бу, кʹижан кö 1 600 км зедәтьр дури мала wи йә. Әw гьли дькә: «Йа лапә баш кö чаwа һини щьвате бьн әw ә, кö чьqас дькарьн тʹьме хьзмәт кьн. Öса жи, һун дькарьн рʹуспийед щьвата тʹәзәрʹа бежьн, wәки һун һазьр ьн чьда лазьм ә кʹомәке бьдьн, бәʹса хәбәре, тʹәмьзкьрьна Ода Щьвате, һәрге лазьм бе дәwса кәсәки пʹарәкә щьвате дәрбаз кьн, йан жи пе тʹәмаше дәрен, йан жи кәсәки пе әʹрәбе бьвьнә щьвате. Чахе хушк-бьра бьвиньн кö щьвата wанда йе тʹәзә чьqас хирәт у һʹәйф ә, әwана зу wе wи qәбул кьн у бьхwазьн тʹәви wи һәвалтийе бькьн».

«Дьле хwә . . . вәкьн» (2 Корн. 6:13).

Дьле хwә вәкьн бона һʹьзкьрьна бьрати. Хушкәкә мә Мелиса малбәта хwәва дәрбази щьвата тʹәзә бу. Wана нет данә пешийа хwә, кö һәвалед тʹәзә хwәрʹа бьвиньн. Әw гьли дькә: «Ода Щьватеда һьн пешийа щьвате у һьн паши щьвате мә тʹәви хушк-бьра хәбәр дьда. Әwе йәке мәщал дьда мә, нә кö тʹәне сьлаве бьдьнә һәв, ле һе незик һәвдö нас кьн». Бь сайа ве йәке әwе малбәте зу наве хушк-бьра бира хwәда хwәй кьрьн. Хенщи ве йәке, wана меванһʹьзи дьданә кʹьфше, у әwе йәке али wан кьр һәвалед незик хwәрʹа бьвиньн. Мелиса зедә дькә: «Мә һәжмара тʹелед һәвдö хwәрʹа ньвисин, сәва кö шьхöлед щьватеда у шьхöлед дьнда тʹәви wан кʹар бькьн».

Һәрге wәрʹа чәтьн ә тʹәви мәрьвед тʹәзә хәбәр дьн, хәбәрдане тьштед бьчʹукда дәстпекьн. Мәсәлә, хушк-бьрарʹа бькʹәньн һәрге жи wәрʹа чәтьн ә. Мәрьве бь бәшәра хwәш, мәрьва бәрбь хwә дькʹьшинә. Кʹьтеба Пироз дьбежә: «Рʹонайиа чʹәʹва дьл ша дькә» (Мәтʹлк. 15:30). Хушкәкә мә бь наве Рейчел дәрбази щьватәкә гәләк дур бу. Әw гьли дькә: «Хәйсәтда әз йәкә шәрмокә мә. Щара әз зоре хwә дькьм, wәки щьвата тʹәзәда тʹәви хушк-бьра хәбәр дьм. Әз Ода Щьватеда wан мәрьва дьгәрʹьм, йед кö хwәрʹа кәрʹ-лал рʹуньштьнә, чьмки әw жи мина мьн шәрмокә нә». Ле wе керһати бә кö һун нете дайньн пешийа хwә, wәки пешийа у паши щьвате тʹәви кәсәки бькʹәвьнә хәбәрдане.

Алики дьнва жи, дьбәкә һун дәстпекеда шәрм дькьн тʹәви мәрьвед тʹәзә хәбәр дьн. Ле wәʹдә дәрбаз бә мәрьвед «тʹәзә» жи ида wе «кәвьн» бьн. Ләма һьнге лазьм ә бәрдәwам кьн һәвалед тʹәзә хwәрʹа бьвиньн.

WӘʹДӘ ЛАЗЬМ Ә СӘВА ҺИНИ ЩЬВАТА ТʹӘЗӘ БИ

Һьнә бахарʹа лазьм ә гәләк wәʹдә сәва щийе тʹәзәда кʹокед хwә бьдьн. Мина ве йәке, нә һʹәмушк зу һини щьвата тʹәзә дьбьн. Һәрге һун дәрбази щьвата тʹәзә бунә, у wәʹдә дәрбаз буйә, ле һун һе һини щьвате нәбунә, әван принсипед жь Кʹьтеба Пироз дькарьн али wә бькьн:

«Жь qәнщикьрьне . . . ащьз нәбьн, чьмки әме wәхтда бьчьньн һәгәр әм нәдьнә дәр» (Галт. 6:9).

Дьqәwьмә тәрʹа һе зедә wәʹдә лазьм бе сәва һини щьвате би. Мәсәлә, гәләк мисйонер кö паши Мәкʹтәба Гиләд wәлатед хәрибда һатьнә кʹьфшкьрьне, чәнд сала начьнә wәлатед хwә, сәва кö һини wи щийи, әʹдәтед wедәре у һини хушк-бьред wедәре бьн. Әw йәк али wан дькә кö һәләqәтийа хwә тʹәви wан хушк-бьра qәwи кьн.

Алехандро, йе кö чәнд щара дәрбази щьватед тʹәзә бу, дьбежә кö мәрьв дәрберʹа нькарә һини щьвата тʹәзә бә. Әw гьли дькә: «Щара пашьн кö әм дәрбази щьвата тʹәзә бун, жьна мьн гот: ‹Һʹәму һәвалед мьн щьвата бәреда ньн!›». Алехандро ани бира wе wәки әwе әw гьли 2 сал пешда жи гот, чахе әwана дәрбази щьватәкә дьн бьбун. Ле нава wан дö салада, әw тʹәви хушк-бьред нәнас незик дьбу у әwана жерʹа дьбунә һәвалед незик.

«Чьма рʹожед бәреда жь вана һин жи qәнщтьр бун? нәбежә; жь бәр кö пьрсийара тә йа дь дәрһәqа вейада нә бь занйари йә» (Wаиз 7:10).

Тʹö щар щьвата хwәйә бәре тʹәви йе тʹәзә бәрамбәр нәкьн. Мәсәлә, хушк-бьред жь щьвата тʹәзә дьбәкә хәбәрхwәш у вәкьри ниньн. Дина хwә бьдьнә хәйсәтед wани баш, чаwа кö һун дьхwазьн әwана нав wәда бьвиньн. Һьнә хушк-бьра кö дәрбази щьвата тʹәзә бун, хwә щерʹьбандьн ве пьрседа: «Гәло әз һʹәму бьратийе һʹьз дькьм?» (1 Пәт. 2:17).

«Бьхwазьн һуне бьстиньн» (Луqа 11:9).

Бәрдәwам кьн бона аликʹарийе Йаһоwарʹа дöа бькьн. Бьраки мә бь наве Девид, кö рʹуспи йә дьбежә: «Нәфькьрә кö тöйе бь qәwата хwә бькарьби сәбьр ки. Гәләк тьшт әм дькарьн бькьн тʹәне пе аликʹарийа Йаһоwа. Дöа бькьн бона ве йәке!» Рейчел бәʹса кʹижани мә жоре кьр, гот: «Һәрге әз у мере мьн щара дьфькьрьн кö әм нә пʹара ве щьвате нә, әм рʹастә-рʹаст Йаһоwарʹа дöа дькьн у дьбежьн: ‹Йаһоwа мәрʹа әʹйан кә һәрге әм тьштәки нәрʹаст дькьн кö хушк-бьрарʹа чәтьн дьбә незики мә бьн›. У паше әм гәләк wәʹдә тʹәви хушк-бьра дәрбаз дькьн».

Де-бавно, һәрге зарʹед wәрʹа чәтьн ә һини щьвата тʹәзә бьн, тʹәви wан дöа бькьн дәрһәqа ве йәке. Али wан бькьн wәки һәвалед тʹәзә хwәрʹа бьвиньн, мәсәлә wана тʹәглиф кьн кö wәʹдә дәрбаз кьн.

БОНА ЙЕД ТʹӘЗӘ БЬБЬНӘ ҺӘВАЛ

Һәрге кәсәк тʹәзә дәрбази щьвата wә буйә, чьда һун дькарьн али wи бькьн? Öса бькьн wәки жь дәстпекеда ида wанрʹа һәвалтийе бькьн. Бона wе йәке керһати йә бьдьнә бәр чʹәʹве хwә, кö һәрге һун тʹәзәда дәрбази щьвате буна, һуне чьqас рʹазибуна бона хәмкьрьна йед дьнена (Мәт. 7:12). Мәсәлә, wе баш бә кö йед тʹәзә тʹәглиф кьн сәр qöльхкьрьна тʹәви малбәте, йан жи JW Бродкастинге тʹәвайи бьньһерʹьн. Öса жи тʹәви wан дәркʹәвьнә хьзмәтийе. Һәрге һун wана сәр нанхwарьнәкә бьчʹук жи тʹәглиф кьн, әw меванһʹьзийа wә гәләк wәхт wе бира wанда бьминә. Ле гәло диса чьда дькарьн али wан бькьн?

Бьраки мә бь наве Карлос дьбежә: «Чахе әм һатьнә щьвата тʹәзә шәһәрәки дьнда, хушкәке кʹахаз да мә кʹидәре ньвисар бу кʹижан ьн махазийед арзан. Әwе йәке гәләк али мә кьр». Йед тʹәзә кö жь wәлатед öса һатьнә кʹидәре кö һәwа щурʹәки майин ә, wе гәләк рʹази бьн wәки һун wанрʹа бежьн кʹьнще ча хwә кьн гәрмеда, сәрмеда у чахе шьли йә. Öса жи һун дькарьн али wан бькьн кö хьзмәтийеда пешда һәрʹьн. Мәсәлә, wанрʹа гьли кьн дәрһәqа мьһала хwә у әʹдәт у динед wи щийи.

ҺЕЖА ЙӘ КÖ ГÖҺАСТЬНА БЬКЬН

Ален дәрһәqа кʹижани мә жоре гот, ида саләкә зедәтьр щьвата тʹәзәда нә. Әw дьбежә: «Пешийе, мьнрʹа чәтьн бу насийа хwә бьда хушк-бьра. Ле нака әwана бона мьн ча малбәт ьн у әз гәләк ша мә». Ален фәʹм кьр кö чахе әw дәрбаз бу, нә кö һәвалед хwә öнда кьр, ле әwи һәвалед тʹәзә хwәрʹа дит.