Мьн Һәр Тьшт Һишт сәва Пәй Иса Һәрʹьм

ЛЕ ЧЬРʹА баве мьн öса һерс кʹәт? Әзе ньһа wәрʹа гьли кьм. Әз сала 1929-да 29 Тирмәһе һатьмә буйине, у гöндда мәзьн бум, кʹижан кö провинсийа Булаканеда нә (Филипин). Мә дәwләти нәдьжит. Чахе әз щаһьл бум, ордийа Жапони Филипин зәфт кьрьбун. Ле гöнде мә гәләк дур бу жь wи шәһәри, ләма жи әw шәрʹ дури мә бу. Wедәре нә радио бал мә һәбу, нә телевисийон у нә жи рʹожнамә. Дәрһәqа шәрʹ әм жь мәрьва педьһʹәсийан.

Жь һʹәйшт зарʹа, әз йе дöда бум, у кальк у пирька мьн әз бьрьн мала хwә кö тʹәви wан бьжим. Һьнге әз һʹәйшт сали бум. Рʹаст ә әм Католик бун, ле кальке мьн һʹьз дькьр дәрһәqа щурʹә-щурʹә религийа пебьһʹәсә, у ләма әwи әʹдәбйәтед религи тʹоп дькьр, кʹижан кö һәвалед wи дьданә wи. Те бира мьн чахе әwи бәлавокед сәр зьмане Тагалог нишани мьн кьр, кʹидәреда һинкьрьнед рʹелигийа qәлп әшкәрә дькьрьн, у öса жи әwи Кʹьтеба Пироз нишани мьн кьр. Мьн һʹьз дькьр Кʹьтеба Пироз бьхуньм, илаһи чар кʹьтебед пешьн йед мьзгини. Бь сайа wе йәке мьн нет хwәрʹа дани кö пәй Иса һәрʹьм (Йуһʹн. 10:27).

ҺИН ДЬБЬМ ПӘЙ ИСА ҺӘРʹЬМ

Сала 1945-да Жапонйа зәфтькьрьн данә сәкьнандьн. Һьнге де-баве мьн готьнә мьн кö әз вәгәрʹьмә мал, у кальке мьн ширәт да мьн кö әз һәрʹьм, у әз жи чум.

Һьнә wәʹдә шунда, сала 1945 мәһа Кануна Пешьн, кʹомәкә Шәʹдед Йаһоwа жь шәһәре Ангат һатьнә гöнде мә сәва мьзгинийе бәла кьн. Шәʹдәки әʹмьрда мәзьн һатә мала мә у мәрʹа шьровәкьр кö Кʹьтеба Пироз чь дьбежә дәрһәqа «рʹожед ахьрийе» (2 Тимтʹ. 3:1-5). Әwи әм тʹәглиф кьрьн һәрʹьнә гöнде незики мә сәр һинбуна Кʹьтеба Пироз. Де-баве мьн нәһатьн, ле әз чум. Wедәре wәкә 20 мәри һатьн, у һьнәк жь wан пьрсед Кʹьтеба Пирозва гьредайи дьдан.

Рʹаст бежьм мьн фәʹм нәдькьр кö әwана дәрһәqа чь хәбәр дьдан, ләма жи мьн сафи кьр кö жь щьвине һәрʹьм. Ле гава wана дәстпекьр кʹьлама Пʹадшатийе бьстьрен, әз мам, чьмки әwе кʹьламе гәләк дьле мьн гьрт. Паши ве кʹьламе у дöа, әм гьшк һатьнә тʹәглифкьрьне кö һәрʹьн Ангате сәр щьвине кö Ләʹде гәрәке бьбуйа.

Жь мә чәнд мәри, рʹийа wәкә 8 км ньга чун, сәва һәрʹьн сәр щьвине, кʹижан кö малбәта Крузда дәрбаз дьбу. Wәкә 50 мәрьв һатьбун ве щьвине. Әз әʹщебмайи мам кö һәла һе зарʹед бьчʹук жи сәр пьрсед чәтьн щаба хwә дьдан. Паши чәнд щьвина, Дамеан Сантос бьра, йе кö пешәнг бу у әʹмьрда мәзьн бу, әз тʹәглиф кьрьм кö шәв мала wида бьминьм. Мә тʹәмамийа шәве дәрһәqа Кʹьтеба Пироз хәбәр да.

Һьнге, гәләк жь мә рʹастийед Кʹьтеба Пироз зу qәбул кьрьн. Паши чәнд щьвина, бьра жь мьн у жь йед дьн пьрсин: «Һун дьхwазьн бенә ньхöмандьне?» Мьн гот: «Бәле, әз дьхwазьм». Мьн дьхwәст кö «Хöдан Мәсиһрʹа ... хöламтийе» бькьм (Колс. 3:24). Әм чунә бәр чʹәме незики мә, у wедәре әм дö мәрьв һатьнә ньхöмандьне сала 1946-да, 15 Сьбате.

Мә фәʹм кьр кö әм чаwа Мәсиһи, гәрәке чʹәʹв бьдьнә Иса у тʹьме хьзмәт кьн. Әw йәк баве мьн хwәш нәдьһат, әwи готә мьн: «Тö һе бьчʹук и wәки бьби мьзгинван. Тö кö нöqи ава чʹем буйи, бь wе йәке тö наби мьзгинван». Мьн жерʹа шьровәкьр кö qьрара Хwәде йә, wәки әм мьзгинийа Пʹадшатийе бәла кьн (Мәт. 24:14). Öса жи мьн готә wи: «Әз гәрәке сонда хwә кö мьн бәр Хwәде хwәр, биньм сери». Әw һәма әw дәрәщә бу чахе баве мьн әз дамә тьрсандьне, чаwа мьн жоре гьли кьр. Бәле, әwи рʹе мьн дьгьрт, wәки әз хьзмәт нәкьм. Әw һәма әw wәʹдә бу, кʹәнге мьн щара пешьн бона нетед рʹöһʹани, һәр тьшт пьшт хwәва һишт.

Малбәта Круз әз тʹәглиф кьрьм, wәки Ангатеда тʹәви wан бьжим. Паше wана әз у qиза хwәйә бьчʹук Нора, һелан кьрьн кö әм бьбьнә пешәнг. Мә һәрда жи 1 Мьждаре сала 1947 пешәнгти дәстпекьр. Норайе шәһәрәки дьнда хьзмәт дькьр, ле мьн бәрдәwам дькьр Ангатеда хьзмәт кьм.

ДӘРӘЩА ДЬН КʹИЖАНЕДА ҺӘР ТЬШТИ ДЬҺЕЛЬМ

Әз се сал ида ча пешәнг бум, чахе бьрак жь филиале Ерл Стйуард, Ангатеда щийе кö гәләк мәрьв тʹоп дьбьн готар хwәнд, у 500 мәрьви зедәтьр һатьн. Әwи сәр зьмане Инглизи хәбәр дьда, у паши готара wи мьн сәр зьмане Тагалоги фькьред сәрәкә жь готара wи wәкʹьланд. Әз тʹәне һʹәта кʹома һʹәфта һин бумә. Мәкʹтәбеда дәрсдаред мьн тʹьме сәр зьмане Инглизи хәбәр дьдан. Диса чь али мьн кьр wәки зьмане Инглизи һин бьм, әw бу кö бь зьмане Тагалог әʹдәбйәтед сәр һʹиме Кʹьтеба Пироз һьндьк бун. Ләма жи мьн гәләк жь әʹдәбйәтед мә сәр зьмане Инглизи леколин дькьр. Öса әз зьмане Инглизи рʹьнд һин бум у ида мьн дькарьбу готар тʹәрщмә кьра.

Ве рʹоже, Стйуард бьра щьвата ве мьһалерʹа гот, wәки филиал дьхwазә дö бьра тʹәглифи Бәйтʹәле кә. Филиалерʹа аликʹарийа wан лазьм бу, һʹәта кö мисйонер жь wәлат бьчуна сәр Щьвата Мәзьн бь наве «Пешдачуйина Теократийайе», кʹижан кö сала 1950 Нийу Йоркеда дәрбаз дьбу. Жь wан бьра йед кö тʹәглифи Бәйтʹәле кьрьбун, йәк әз бум. Сәва кö шьхöле Бәйтʹәледа аликʹарийе бьдьм, мьн диса һәр тьшт пьшт хwә һишт. Диса әз һини чь жи бьбум, мьн әw һʹәму тьшт пьшт хwә һиштьн.

Сала 1950, 19 Һʹәзиране, әз һатьмә Бәйтʹәле у мьн дәстпекьр шьхöле хwә биньм сери. Бәйтʹәл маләкә мәзьн у кәвьнда бу, дор бәре кʹижани гәләк бахед мәзьн һәбун. Wедәре гәләк бьред азәп хьзмәт дькьрьн. Шәбәqе мьн хwарьнгәһеда аликʹари дьда. Паше незикайа сьһʹәта нәһа, мьн щийе кʹьнщшуштьнеда кʹьнщ утʹи дькьр. У паши нанхwарьне жи мьн öса дькьр. Рʹаст ә мисйонер жь щьвата мәзьнә һʹәмдьнйайе вәгәрʹийан һатьн, йәкә мьн бәрдәwам дькьр Бәйтʹәледа хьзмәт кьм. Мьн журнал дьпечʹан бона шандьне, документ тʹьжә дькьр кö журнала кʹöда бьшиньн, у öса жи әз чаwа секретар бум. Мьн әw шьхöл дькьрьн, кʹижан кö жь мьн дьхwәстьн.

ФИЛИПИНЕ ДЬҺЕЛЬМ У ДЬЧЬМ МӘКʹТӘБА ГИЛӘД

Сала 1952-да, әз у 6 бьра жь Филипине тʹәглифи Мәкʹтәба Гиләд кьрьн. Шабуна мьн беһʹәсаб бу. Амәрикайеда гәләк тьшт бона мә тʹәзә бун у нәнас бун. Әw гәләк щöдә дьбу жь гöнде бьчʹук кʹидәре мьн дьжит.

Мәсәлә, әм гәрәке һин буна кö ча һащәт у фьраqед мәрʹа нәнас, бьдьнә хәбате. У хенщи ве йәке, һәwа жи гәләк сар бу! Шәбәqе гава әз дәркʹәтьм дәрва, мьн дит һʹәму тьшт сьпи йә. Әw щара пешьн бу чахе мьн бәрф дит. Әw гәләк бәдәw бу, ле мьн дәрберʹа фәʹм кьр кö qайим сар ә.

Чахе әз Мәкʹтәба Гиләдда һин дьбум, әw һʹәму гöһастьн бәр чʹәʹве мьн нәдьһатьн. Һинкьрьнеда дәрсдара щурʹә-щурʹә методед керһати дьданә хәбате. Әм һин бун кö леколина кʹур бькьн. Һинбуна Мәкʹтәба Гиләдда, гәләк али мьн кьр кö рʹöһʹанида һе qәwи бьм.

Чахе мьн әв мәкʹтәб хьлаз кьр, сәр wәхтәки әз һатьм кʹьфшкьрьне ча пешәнге мәхсус Бронкседа, (Нийу Йорк). Сала 1953, мәһа Тирмәһе, әз чумә сәр щьвата мәзьн, кʹижан кö Бронкседа дәрбаз дьбу. Паши ве щьвате әз һатьмә кʹьфшкьрьне Филипинеда.

ШӘҺӘРЕ КОМФОРТ ДЬҺЕЛЬМ

Бьред жь филиале готьн: «Ньһа тöйе хьзмәт ки ча бәрпьрсийаре мьһале». Әwе кʹьфшкьрьне дьһа зәʹф мәщал да мьн кö рʹастә-рʹаст пәй Иса һәрʹьм, кʹижан кö дьчу шәһәр у гöндед дур, wәки али щьмәʹта Йаһоwа бькә (1 Пәт. 2:21). Әw мьһала кö мьн гәрәке ча бәрпьрсийаре мьһале wедәре хьзмәт кьра, територйакә мәзьн бу. Әw Лусонайа Навәнд бу, кʹижан кö Филипинеда гьравәкә һәрә мәзьн ә. Провинсийа Булакан, Нуева-Есижа, Тарлак, у Замбалес дькʹәтьнә нава ве територийайе. Сәва тʹәсәлийа һьнә шәһәра бькьм, әз гәрәке Чʹийайед Сийера Мадрейә чʹәʹл-кʹорʹтрʹа дәрбаз бума. Нә отобус дьчунә ль wан щийа, нә жи трен, ләма жи мьн жь хwәйед әʹрәбед баркʹеш һиви дькьр сәр кʹерана рʹунем, кʹижан wана пе әʹрәба дьбьр. Гәләк щар әwана qайил дьбун, ле рʹаст бежьм һеса нибу.

Гәләк щьватед мьһала мьнда бьчʹук бун у тʹәзә бун. Бьред wан щьватада гәләк рʹази бун кö мьн али wан кьр һе рʹьнд щьвата у öса жи щьватед хьзмәтийе организә кьм.

Wәʹдә шунда әз һатьмә кʹьфшкьрьне региона Биколеда. Wедәре гәләк кʹом һәбун кö щийед гәләк дур бун, у wан щийада щара пешьн пешәнгед мәхсус хьзмәт дькьрьн. Дәстава Маләке әw бу кö әʹрдеда чʹәл кʹолайи бу, кʹидәре һәрдö алийава кʹеран һатьбун данине. Щарәке чахе мьн ньгед хwә дани сәр кʹерана, кʹеран кʹәтьн у әз жи кʹәтьм чʹәле. Мьнрʹа wәʹдә лазьм бу кö хwә тʹәмьз кьм бьшом, у дәстпекьм шьхöле хwә бькьм.

Чахе мьн wе мьһалида хьзмәт дькьр, һьнге мьн дәстпекьр дәрһәqа Норайе бьфькьрьм, йа кö тʹәви мьн Булаканеда пешәнгти дәстпекьр. Һьнге әw пешәнга мәхсус бу, шәһәре Думагетеда, у әз чум тʹәсәлийа wе бькьм. Паши ве йәке, һьнә wәʹдә мә һәвдöрʹа нәʹмә дьньвиси, у сала 1956, мә һәв станд. Һʹәфтеки шунда паши дәʹwата мә, мә тʹәсәлийа щьвата Гьрава Рапу Рапу кьр. Әм чʹийарʹа дәрбаз бун, у ньга гәләк әʹрд чун, ле әw шабунәкә мәзьн бу кö мә тʹәвайи али хушк-бьра дькьр кö щийед дурда дьжитьн!

ДИСА ТʹӘГЛИФИ БӘЙТʹӘЛЕ ДЬКЬН

Паши wәкә чар салед шьхöле бәрпьрсийартийе, мә тʹәглифкьрьн станд кö филиаледа хьзмәт кьн. У сала 1960, мәһа Чьләйе, хьзмәтийа мәйә Бәйтʹәле дәстпебу. Нава wан гәләк салада һʹәта рʹожа иро әз гәләк тьшт һин бумә жь wан бьра, йед кö щабдарийед мәзьн тиньн сери, у Нора жи щурʹә-щурʹә шьхöл дькә Бәйтʹәледа.

Бона мьн кʹәрәмәкә мәзьн бу кö мьн пе чʹәʹве хwә дьдит, wәки Филипинеда чьqас гәләк мәрьв дьбунә хьзмәткʹаред Йаһоwа. Чахе әз щара пешьн щаһьлтийеда һатьмә Бәйтʹәле, тʹәмамийа wәлатда wәкә 10 000 мьзгинван һәбун. Ле иро wедәре 200 000 мьзгинвана зедәтьр һәнә, жь wана бь сәда хьзмәткʹаред Бәйтʹәле нә, йед кö аликʹарийе дьдьнә шьхöле бәлакьрьна мьзгинийе.

Wәʹдә дәрбаз дьбу у лазьм бу кö Бәйтʹәле мәзьн кьн. Ләма жи Кʹома Рʹебәрийе мәрʹа гот кö әʹрд бьгәрʹьн, сәва авайа тʹәзә ава кьн. Әз тʹәви сәркʹаре идара нәшьркьрьне, мал бь мал дьчумә бал щинара кö незики филиале дьжитьн, сәва бьпьрсьн һәла кәсәк әʹрд дьфьрошә. Wедәре гәләк Чинайи дьжитьн. Ле тʹö кәси нәдьфрот, у мәрьвәк һәла һе жи мәрʹа öса гот: «Чинайи нафьрошьн, ле тʹәне дькʹьрʹьн».

Ле рʹожәке, щинарәки мәрʹа гот кö әw дьхwазә әʹрде хwә бьфьрошә мә, чьмки дәрбази Амәрикайе дьбә. Әм гәләк әʹщебмайи ман. Паши ве йәке диса тьштед öса qәwьмин кö мә qә нә жи дькарьбу баwәр кьра. Щинарәки дьн жи хwәст әʹрде хwә бьфьрошә, у әwи йед майин жи һелан дькьр сәва әʹрде хwә бьфьрошьн. Мә һәла һе жи жь wи мәрьви әʹрд кʹьри, кʹижани мәрʹа гот кö «Чинайи нафьрошьн». Wәʹдәки кьнда, мәзьнайа щийе филиале се щара зедәтьр бу. Әз сәд сәләфи баwәр ьм кö әw йәк qьрара Йаһоwа Хwәде бу.

Сала 1950, әз жь әндәмед Бәйтʹәле йе лапи щаһьл бум, ле иро әз жьна хwәва әндәмед лапи әʹмьрда мәзьн ьн. Әз тʹö щар пʹошман набьм кö пәй Иса дьчум, кʹöда жи әwи мьн дьшанд. Рʹаст ә де-баве мьн, әз жь мал дәрхьстьм, ле Йаһоwа малбәтәкә гәләк мәзьн да мьн, у әw малбәт гьшк wи һʹьз дькьн. Әз qә дöдьли ниньм кö Йаһоwа һәр тьшти дьдә мә чь кö мәрʹа лазьм ә, фьрqи тʹöнә әм кʹижан щабдарийа дьстиньн. Әз у Нора гәләк жь Йаһоwа рʹази нә бона һәр qәнщийа wи, у әм йед дьн жи һелан дькьн кö qәнщийа wи бьщерʹьбиньн (Малх. 3:10).

Иса щарәке хәрщгьрәкирʹа наве кʹижани Мәттайе Леwи бу, гот: «Пәй мьн wәрә». Ле Мәтта чь кьр? «Әwи жи һәр тьшт һьшт, рʹабу пәй [Иса] чу» (Луqа 5:27, 28). Мәщалед мьн жи һәбун кö тьшта пьшт хwәва бьһельм сәва пәй Иса һәрʹьм, у әз йед дьн жи һелан дькьм wәки öса бькьн, у wе гәләк кʹәрәма бьстиньн.