«Гöһ Бьдьнә Ширәта Һуне Сәрwахт бьн»

1. Чаwа әм дькарьн сәрwахтийе qазанщ кьн, у әw чьда али мә дькә?

ЙАҺОWА Канийа сәрwахтийе йә, у әw ви һʹöнöри бь мәрʹданийе дьдә мәрьва жи. Аqуб 1:5-да әм дьхуньн: «Һәгәр сәрwахтийа йәки жь wә тʹера wи накә, бьра һиви жь Хwәде бькә у wе жь wирʹа бе дайине». Чахе әм ширәткьрьна Йаһоwа qәбул дькьн, әм сәрwахтийе жь Хwәде дьстиньн. Әw сәрwахти мә хwәй дькә, wәки әм жь хьрабийе дур бьн у рʹöһʹанида зийане нәстиньн (Мәтʹлк. 2:10-12). Wи щурʹәйи, әме «хwә нава wе һʹьзкьрьна Хwәдейә һьндава хwәда хwәй кьн . . . кö жийина һʹәта-һʹәтайе бьдә» мә (Щьһуд. 21).

2. Чаwа әм дькарьн ширәткьрьна Хwәде бьшекьриньн?

² Әм гьшк гöнәкʹар ьн, у бь щурʹә-щурʹә һатьнә мәзьнкьрьне, ләма щара мәрʹа чәтьн ә ширәткьрьне qәбул кьн у рʹаст бьньһерʹьн сәр ве йәке чахе ширәта дьдьнә мә. Ле чахе әм дьвиньн кö ширәткьрьна Хwәде ча кери мә те, әм фәʹм дькьн кö әw чьqас мә һʹьз дькә. Мәтʹәлок 3:11, 12-да те готьне: «Лаwе мьн, ширәта Хöдан пьшт гöһе хwәва нәвежә . . . чьмки Хöдан һʹьзкьрийе Хwә ширәт дькә». Бәле, wәрә әм бир нәкьн кö Йаһоwа тʹьме кʹара мә дьхwазә. (Бьхунә Ибрани 12:5-11.) Хwәде мә бь тʹәмами нас дькә, ләма жи ширәткьрьна wи тʹьме рʹаст ә у wәʹдәда йә. Wәрә әм ве готареда шеwьр кьн дәрһәqа чар тьштед ширәткьрьнева гьредайи: 1) хwәрʹасткьрьн, 2) ширәткьрьна де-бава, 3) ширәткьрьна кö әм жь щьвате дьстиньн, у 4) әв, чь кö жь еша ширәткьрьне хьрабтьр ә.

ХWӘРʹАСТКЬРЬН СӘРWАХТИЙЕ ДЬДӘ КʹЬФШЕ

3. Чаwа зарʹ дькарә һин бә хwәха хwә рʹаст кә? Мәсәле биньн.

³ Хwәрʹасткьрьн әв те һʹәсабе кö әм рʹабун-рʹуньштьна хwә у фькьред хwә контрол дькьн. Әм гәрәке хwә һини ве йәке бькьн, wәки хwә рʹаст кьн. Wәрә мәсәләке шеwьр кьн: Чахе зарʹ щара пешьн һин дьбә кö бисиклете бажо, пешийе де йан жи бав али зарʹе дькә, бисиклете дьгьрә сәва нәкʹәвә. Ле паше чахе зарʹ ида дькарә хwә сәр бисиклете бьгьрә, де йан жи бав ләʹзәке wи бәрʹдьдьн, ле паше чахе әwана дьвиньн кö зарʹ рʹьнд дажо, ида wи бь тʹәмами бәрʹдьдьн. Мина ве йәке, чахе де-бав тʹьме бь сәбьр зарʹед хwәйи бьчʹук «бь ширәт у һинкьрьна Хöдан» мәзьн дькьн, бь ве йәке али зарʹед хwә дькьн, кö һин бьн хwә рʹаст кьн у сәрwахт бьн (Әфәс. 6:4).

4, 5. а) Чьрʹа хwәрʹасткьрьн пʹарәкә фәрз ә йа «мәрьве ну»? б) Чьрʹа әм гәрәке бәрхwә нәкʹәвьн һәрге әм шашийа дькьн?

⁴ Әв принсип öса жи бона wан ә, йед кö ида мәзьн ьн чахе тенә сәр рʹийа рʹаст. Рʹаст ә фәрәсәте wан кö хwә рʹаст кьн һәйә, ле әwана рʹöһʹанида һе гьһишти ниньн. Ле чахе әwана һин дьбьн «мәрьве ну ль сәр хwә wәргьрьн» у чʹәʹв дьдьнә Иса, ида рʹöһʹанида гьһишти дьбьн (Әфәс. 4:23, 24). Бәле, хwәрʹасткьрьн у һинкьрьн гәләк фәрз ә. Wи щурʹәйи әм һин дьбьн «нәпʹакийе у дьлһавьжийед дьнйайе инкʹар кьн у аqьлда гьран, бь рʹастийе у хwәденасийе бьжин ль ве дьне» (Тито 2:12).

⁵ Әм гьшк жи гöнәкʹар ьн (Wаиз 7:20). Ләма чахе әм шашийа дькьн, әв найе һʹәсабе кö әм qә нькарьн хwә бьгьрьн у рʹаст бьн. Мәтʹәлок 24:16-да те готьне: «Һәгәр йе рʹаст һʹәфт щара бькʹәвә, wе диса рʹабә». Ле гәло чь wе али мә бькә кö пешда һәрʹьн? Тʹәне рʹöһʹе Хwәдейи пироз, нә кö qәwата мә. (Бьхунә Филипи 4:13.) Хwәгьртьн кö дькʹәвә нав бәре рʹöһʹе пироз, гьредайи йә тʹәви хwәрʹасткьрьне.

6. Чаwа әм дькарьн хwә һини леколинкьрьна Хәбәра Хwәде бькьн? (Бьньһерʹә шькле әʹwльн.)

⁶ Сәва кö әм һин бьн хwә рʹаст кьн, лазьм ә дöа кьн, Кʹьтеба Пироз леколин бькьн, у бьфькьрьн сәр хwәндьне. Ле дьбәкә wәрʹа чәтьн ә Хәбәра Хwәде леколин кьн, йан жи һʹьз накьн леколина бькьн. Бәрхwә нәкʹәвьн, Йаһоwа ве йәкеда wе али wә бькә, һәрге һун рʹе бьдьнә wи. Әw дькарә али wә бькә wәки «һʹәйра» Хәбәра Wида бьн (1 Пәт. 2:2). Пешийе, Йаһоwарʹа дöа бькьн, сәва али wә бькә һун хwә һини леколинкьрьне бькьн. Паше, ль гора дöайед хwә гава бавежьн. Дьбәкә пешийе һун һьндьки леколин бькьн, ле wәʹдә шунда, леколинкьрьн wе wәрʹа дьһа һеса у һʹәwас бә! Әw wәʹдә бона wә wе бь рʹасти хwәш бә, чьмки һун дәрһәqа фькьред Йаһоwайә qимәт пебьһʹәсьн (1 Тимтʹ. 4:15).

7. Хwәрʹасткьрьн ча али мә дькә wәки бьгьһижьнә нетед хwәйә рʹöһʹани?

⁷ Хwәрʹасткьрьн али мә дькә, wәки бьгьһижьнә нетед хwәйә рʹöһʹани. Дина хwә бьдьнә мәсәла бьраки мә, кö зәwьщи йә. Әwи гьли кьр кö wәʹдәки әwи хирәта хwә öнда кьрьбу, у хwәрʹа нет дани wәки бьбә пешәнг. Әwи дәрһәqа хьзмәтийа пешәнгти әʹдәбйәтед мәда готар дьхwәндьн. Һьн жи әwи Хwәдерʹа дöа дькьр, у әwан һʹәму тьшта, wи рʹöһʹанида һʹьшйар кьрьн у шьдандьн. Öса жи чахе әwи дькарьбу, ча пешәнге кʹомәкдар хьзмәт дькьр. Ахьрийа ве йәке чь бу? Тʹö тьшти рʹе wи нәгьрт, кö нета хwә бинә сери. Әw гьһиштә нета хwә у бу пешәнг.

ЗАРʹЕД ХWӘ БЬ ШИРӘТКЬРЬНА ЙАҺОWА МӘЗЬН КЬН

8-10. Чь дькарә али де-бава бькә, wәки зарʹед хwә öса мәзьн кьн кö Йаһоwарʹа хьзмәт кьн? Мәсәле биньн.

⁸ Йаһоwа qәдьрәки мәзьн дайә де-бава кö «бь ширәт у һинкьрьна Хöдан» зарʹед хwә мәзьн кьн (Әфәс. 6:4). Ле әw йәк ве дьнйа хьрабда һеса нинә (2 Тимтʹ. 3:1-5). Зарʹ жь буйина хwә рʹасти у хьрабийе жь һәв дәрнахьн, у исафа wан жи һинкьри нинә (Рʹом. 2:14, 15). Зандарәки Кʹьтеба Пироз шьровәкьр wәки хәбәра Йунани кö те wәлгәрʹандьне «ширәткьрьн», дькарә öса жи бе һʹәсабе «мәзьнкьрьна зарʹа».

⁹ Зарʹед кö бь һʹьзкьрьне тенә ширәткьрьне, хwә хwәйкьри тʹәхмин дькьн. Әwана педьһʹәсьн кö азайеда синор һәнә, у кö һәр сафикьрьн у рʹабун-рʹуньштьн, йан ахьрийа баш йан жи ахьрийа хьраб тинә. Ләма жи гәләк фәрз ә, кö де-бав мәзьнкьрьна зарʹада рʹебәрийа Йаһоwа бьгәрʹьн. Әʹйд-qәйдед мәзьнкьрьна зарʹада щурʹә-щурʹә wәлатада щурʹә-щурʹә йә. Ле де-бавед кö гöһ дьдьнә Хwәде, гәләк бәрхwә накʹәвьн кö чаwа зарʹед хwә мәзьн кьн у ве пьрседа чʹәʹв надьнә биланийа ве дьнйайе.

¹⁰ Жь мәсәла Нöһ әм дькарьн хwәрʹа дәрсе һин бьн. Чахе Йаһоwа готә wи wәки гәмийе ава кә, Нöһ ньзаньбу ча ава кә, чьмки тʹö щар гәми ава нәкьрьбу. Ле әwи бь тʹәмами итʹбарийа хwә Йаһоwа ани, у «öса жи кьр» чаwа Йаһоwа жерʹа гот (Дәстп. 6:22). Ахьри чь бу? Әwи гәми рʹьнд ава кьр чаwа Йаһоwа жерʹа гот, у әw нәфәред хwәва хьлаз бун. Нöһ öса жи бавәки баш бу, чьмки әwи итʹбарийа хwә сәрwахтийа Хwәде дьани. Пешийа селаве wәʹдәки гәләк хьраб бу, ле әwи зарʹед хwә рʹьнд мәзьн кьр у мәсәла баш бу бона wан (Дәстп. 6:5).

11. Чьрʹа фәрз ә де-бав зарʹед хwә һин кьн?

¹¹ Де-бавно, ле һун ча дькарьн «öса жи» бькьн ча Хwәде дьхwазә? Гöһ бьдьнә Йаһоwа. Бьһельн wәки әw мәзьнкьрьна зарʹада али wә бькә бь сайа Хәбәра хwә у рʹебәрийе, кö әм жь тʹәшкиләта wи дьстиньн. Wәʹдә дәрбаз бә, зарʹед wә wе щәфед wә бьшекьриньн. Бьраки ньвиси: «Әз жь де-баве хwә гәләк рʹази мә кö wана әз чь щурʹәйи мәзьн кьрьмә. Wана алийе хwәда һәр тьшт кьр сәва рʹастийе бьгьһиньнә дьле мьн. Пешдачуйина мьн алийе рʹöһʹанида һʹәчʹи зәʹф бь сайа wан ә». Ле щара де-бав чь жи дькьн, йәкә һьнә зарʹ Йаһоwа дьһельн. Исафа wан де-бава тʹәмьз ә, йед кö алийе хwәда һәр тьшт кьрьнә сәва рʹастийе бькьнә дьле зарʹа хwә. Әwана öса жи дькарьн баwәр бьн wәки рʹожәке зарʹа wан wе вәгәрʹә бал Йаһоwа.

12, 13. а) Де-бав ча нишан дькьн кö гöрʹа Хwәде дькьн, чахе зарʹа wан жь щьвате дәрхьсти йә? б) Малбәтәке чь кʹар станд кö гöрʹа Йаһоwада ман?

¹² Де-бавед кö зарʹа wан жь щьвате һатийә дәрхьстьне, һәләqәтийа wан тʹәви ве зарʹе дьбә щерʹьбандьна wанә лапә мәзьн. Дина хwә бьдьнә мәсәла хушкәке, qиза кʹе жи жь щьвате һатә дәрхьстьне у жь мал чу. Әw де гьли дькә: «Мьн әʹдәбйәтед мәда мәʹни дьгәрʹийа, сәва кö бькарьбьм тʹәви qиза хwә у нәбийа хwә wәʹдә дәрбаз кьм. Ле малхе мьн мьнрʹа бь нәрми гот, wәки әз фәʹм кьм кö qиза мә ньһа дәсте Хwәдеда йә у әм гәрәке нәкʹәвьнә нав wи шьхöли».

¹³ Wәʹдә шунда qиза wе вәгәрʹийа щьвате. Де гот: «Ньһа дькарьм бежьм qиза мьн һәр рʹож мьнрʹа тʹеле дьхә йан жи дьньвисә! У әw гәләк qәдьре мьн у баве хwә дьгьрә, чьмки занә кö әм гöрʹа Хwәдеда бун. Әм гәләк һәврʹа незик ьн». Һәрге зарʹа wә жь щьвате дәрхьсти йә, гәло һуне «бь тʹәмамийа дьле хwә» итʹбарийа хwә Йаһоwа биньн, йан «һʹьше хwә»? (Мәтʹлк. 3:5, 6). Бир нәкьн, Йаһоwа чахе кәсәки щәза дькә, ве йәкеда билани у һʹьзкьрьна wи те кʹьфше. Öса жи тʹö щар бир нәкьн, wәки әwи Кöрʹе хwә бона һʹәмуйа да, демәк бона зарʹа wә жи. Хwәде нахwазә кәсәк öнда бә. (Бьхунә 2 Пәтрус 3:9.) Ләма жи итʹбарийа хwә ширәткьрьн у рʹебәрийа Йаһоwа биньн, һьнге жи гава wәрʹа чәтьн ә. Гöһ бьдьнә ширәткьрьна Хwәде, мьqабьли wи нәчьн.

ЩЬВАТЕДА

14. Ча әм кʹаре дьстиньн жь ширәткьрьна Йаһоwа кö әw бь сайа «wәкʹилхәрще амьн» дьдә мә?

¹⁴ Йаһоwа соз дайә кö wе щьвата Мәсиһити хwәй кә, ширәт кә у һин кә. Әве йәке әw бь гәләк тьшта дькә. Мәсәлә, әwи щьват да дәсте Кöрʹе хwә Иса. Иса жи «wәкʹилхәрще амьн» кʹьфш кьр, сәва wәʹдәда хwарьна рʹöһʹани бьдә (Луqа 12:42). Әв хwарьна рʹöһʹани бь гәләк щурʹа дәстдькʹәвә, у бь сайа ве йәке әм һин дьбьн у ширәта дьстиньн. Qә öса буйә кö wә щьватеда готар бьһист йан жи журналед мә хwәндьн, у паши ве йәке wә фькьр йан жи кьред хwә гöһаст? Һәрге әре, һун гәрәке ша бьн, чьмки бь ве йәке һун дьһельн wәки Йаһоwа wә бьгöһезә у wә ширәт кә бона кʹара wә (Мәтʹлк. 2:1-5).

15, 16. а) Чь кʹаре әм дькарьн бьстиньн жь «пʹешкʹеш бь щурʹе мәрьва»? б) Чаwа әм дькарьн пьштгьрийа шьхöле рʹуспийа бькьн?

¹⁵ Щьватеда öса жи һәнә «пʹешкʹеш бь щурʹе мәрьва», демәк рʹуспийед кö шьвантийе кәре пәзед Хwәде дькьн (Әфәс. 4:8, 11-13, ДТʹ). Ле әм ча дькарьн кʹаре бьстиньн жь wан пʹешкʹеша? Мәсәлә, әм дькарьн чʹәʹв бьдьнә баwәри у мәсәла рʹуспийа. Öса жи ширәтед wан кö сәр һʹиме Кʹьтеба Пироз ьн, qәбул кьн. (Бьхунә Ибрани 13:7, 17.) Бир нәкьн, wәки рʹуспи мә һʹьз дькьн у дьхwазьн әм рʹöһʹанида мәзьн бьн. Бәʹса хәбәре, һәрге әwана дьвиньн кö әм щьвата бәрʹдьдьн йан жи хирәта хwә öнда дькьн, әwана wе әʹсәйи незики мә бьн сәва аликʹарийе бьдьнә мә. Әwана wе гöһ бьдьнә мә, бь дьлшәwати мә бьшьдиньн у бь Кʹьтеба Пироз ширәт кьн. Ле һун әве аликʹарийа wан һʹәсаб дькьн ча һʹьзкьрьна Йаһоwа һьндава хwә?

¹⁶ Бир нәкьн wәки щара рʹуспийарʹа һеса нинә незики wә бьн сәва ширәте бьдьнә wә. Биньн бира хwә мәсәла Натʹан. Гәло жерʹа һеса бу незики Даwьд Пʹадша буйа, сәва гöне wийи гьран бьда рʹуйе wи? (2 Сам. 12:1-14). Паwлосрʹа жи лазьм бу мерхаси, сәва Пәтрусе кö жь 12 шандийа бу, ширәт кә, чьмки әwи һьндава бьред Щьһу дöрʹути кьр (Галт. 2:11-14). Ле һун чь дькарьн бькьн сәва рʹуспийарʹа һеса бә незики wә бьн? Мьлук, шекьр, у нәрм бьн. Аликʹарийа wан һʹәсаб кьн ча һʹьзкьрьна Хwәде һьндава хwә. Wи щурʹәйи һуне нә кö тʹәне хwәха кʹаре бьстиньн, ле öса жи рʹуспи wе шьхöле хwәда шабуне öнда нәкьн.

17. Хушкәкә мә чь кʹар станд жь аликʹарийа рʹуспийа?

¹⁷ Хушкәкә мә бона әʹмьре хwәйи бәре, дöдьли дьбу кö Йаһоwа wе һʹьз дькә йан на. Әwе гьли кьр: «Чахе әз дьфькьрим дәрһәqа әʹмьре хwәйи бәре у диса тьштед дьн, әз qайим кʹәтьмә депресийе. Мьн заньбу wәки лазьм ә әз тʹәви рʹуспийа хәбәр дьм. Хәбәрданеда wана әз беһöрмәт у нәһәq нәкьрьм, дәwсе бәр дьле мьнда һатьн у мьн qәwи кьрьн. Паши һәр щьвате, фьрqи тʹöнә шьхöле wан чьqас бу, йәк жь wан әʹсә незики мьн дьбу дьпьрси әз чаньм. Бәле, жь бо әʹмьре хwәйи бәре, мьнрʹа чәтьн бу баwәр кьм, wәки әз һежайи һʹьзкьрьна Хwәде мә. Ле Йаһоwа бь сайа щьвате у рʹуспийа тʹьме мьнрʹа избат дькә, wәки мьн һʹьз дькә. Әз лавайи wи дькьм wәки әw нәһелә әз жь wи дур кʹәвьм».

ЖЬ ЕША ШИРӘТКЬРЬНЕ ХЬРАБТЬР ЧЬ ЙӘ?

18, 19. Чь жь еша ширәткьрьне хьрабтьр ә?

¹⁸ Рʹаст ә чахе мә ширәт йан жи щәза дькьн, дьле мә дешә, ле жь ве еше хьрабтьр әw ә чахе әм ширәта qәбул накьн у зийане дьстиньн (Ибрн. 12:11). Дина хwә бьдьнә мәсәла дö мәрьва, Qайин у Тʹсәдәкийа. Чахе Qайин дәстпекьр бьре хwә Һабил нәфрʹәт кә, Хwәде Qайин ширәт кьр у готе: «Тö чьма һерс кʹәтийи? У тә чьма сәре хwә бәржер кьрийә? Һәгәр тö рʹастийе бьки, гәло те сәре хwә бьльнд нәки? Ле wәки тö рʹастийе нәки ва йә гöнә ль бәр дери кʹәтийә у хwәха жи һʹәйра тәда йә, ле бькә кö тö һʹöкöми ль сәр бьки» (Дәстп. 4:6, 7). Ле Qайин гьлийед Хwәде пьшт гöһе хwәва авит, у кʹәтә бьн һʹöкöме гöнә. Qайин хwәха ешәкә мәзьн у кöл-дәрд хwәрʹа ани (Дәстп. 4:11, 12). Һәрге әwи гöһ бьда ширәта Йаһоwа, wе әw еш нәдита чь кö һе чәтьн бу, нә кö еша ширәткьрьне.

¹⁹ Тʹсәдәкийа кö пʹадше хьраб у сьст бу, wи wәʹдәйи дьжит чахе һʹале Оршәлиме хьраб бу. Йерәмйа пʹехәмбәр чәнд щара Тʹсәдәкийа ширәт кьр, wәки кьред хьраб бьһелә, ле әwи ширәтед wи бәр тьштәки һʹәсаб нәдькьр. Бона ве йәке әwи жи ахьрийа хьраб станд (Йерәм. 52:8-11). Йаһоwа тʹö щар нахwазә әм кöл-дәрда бькʹьшиньн. (Бьхунә Ишайа 48:17, 18.)

20. Чь ахьри һивийа wан ә йед кö ширәткьрьна Хwәде qәбул дькьн, у чь һивийа wан ә, йед кö qәбул накьн?

²⁰ Дьнйайеда, ширәткьрьн у хwәрʹасткьрьне гәләк щар һʹәсаб дькьн ча тьштәки сьвьк у кʹән. Ле зутьрәке әwед кö ширәткьрьна Хwәде qәбул накьн, wе ахьрийа хьраб бьстиньн (Мәтʹлк. 1:24-31). Wәрә әм тʹьме «гöһ бьдьнә ширәта» у «сәрwахт бьн». Мәтʹәлок 4:13-да Хwәде мәрʹа дьбежә: «Ширәтед мьн qәwин бьгьрә у дәсте хwә жь wе нәкә, тö wе хwәй кә, чьмки әw ә әʹмьре тә».