Әм Һатьнә Әʹфьрандьне, кӧ Һәрһәйи Бьжин

Ве йәкеда тьштәки әʹщебмайи һәйә? Һәмьки на. Жь Ньвисаред Пироз әм педьһʹәсьн, ԝәки Хԝәде хԝәстьна жийина һәрһәйи кьрийә дьле мә (Ԝаиз 3:11). Ӧса жи те готьне, кӧ «Хԝәде һ′ьзкьрьн ә» (1 Йуһʹәнна 4:8). Демәк Хԝәде мә һʹьз дькә у ԝе әв хԝәстьна кӧ һәрһәйи бьжин нәкьра дьле мә, һәрге нькарьбуйа әв йәк бьанийа сери.

Фәʹмдари йә ԝәки тʹӧ кәс нахԝазә бьмьрә. Кʹьтеба Пироз сәр мьрьне дьбежә «дьжмьн» (1 Корьнтʹи 15:26). Зу йан дәрәнг, һәр кәс дькʹәвә дәсте ви дьжмьне хԝә у нькарә жь ви хьлаз бә. Гәләк мәрьв гава дәрһәԛа мьрьне дьфькьрьн, тьрс дькʹәвә дьле ԝан. Ле гәло ԝе бе ԝәʹдә, кӧ әв дьжмьне мә бе алткьрьне?

ҺʹИМЕ ҺЕВИЙА МӘ

Дьбә кӧ һун әʹщебмайи бьминьн, ԝәки Хԝәде бона мәрийа мьрьн ԛьрар нәкьрьбу. Кʹьтеба Дәстпебунеда әм дьвиньн избатийа ве йәке, кӧ ԛьрара Хԝәде бона инсанәте әԝ бу, ԝәки һәрһәйи сәр әʹрде бьжин. Әв ә һʹиме һевийа мә. Йаһоԝа Хԝәдеa әʹрд у һʹәму тьштед дьн әʹфьрандийә, сәва кӧ мәрьв бьжин у бәхтәԝар бьн. Паше Йаһоԝа мәрьве пешьн, Адәм әʹфьранд, у әԝ ль щьнәте бахче Еденеда щиԝар кьр. Паши ԝе йәке, «Хԝәде дина хԝә да һ′әму кьрьна хԝә кӧ ва йе әԝ гәләки ԛәнщ бун» (Дәстпебун 1:26, 31).

Адәм дьлԛе Хԝәдеда беԛӧсур һатьбу әʹфьрандьне (Ԛануна Дӧщари 32:4). Кʹӧлфәта Адәм, Һеԝа жи һʹәму алийава чаԝа бәдәнеда ӧса жи һʹьшда беԛӧсур бу. Йаһоԝа готә ԝан: «Шин бьн у ль һәв зедә бьн, ә′рде т′ьжи кьн у хԝәйитийе ле бькьн, һ′ӧкӧми ль сәр мә′сийед бә′ре тәйрәдед ә′змен у һ′әму һ′әйԝанед ль сәр ә′рдейә кӧ дьһ′әжьн бькьн» (Дәстпебун 1:28).

Ԝәʹдә лазьм бу, кӧ зӧрʹәтед Адәм у Һеԝайе әʹрд тʹьжә кьрана. Һеԝайе гәрәке зарʹ бьанийа, зарʹед ԝе жи гәрәке зарʹ бьанийана у ӧса һеди-һеди ль гора ԛьрара Хԝәде, әʹрд тʹьжә кьрана (Ишайа 45:18). Гәло әв тьштәкә логики йә, кӧ Йаһоԝа Адәм у Һеԝайерʹа фәрманәкә ӧса да, ле ԝана гәрәке тʹәне һаԛас бьжитана, кӧ зарʹед хԝә у нәбийед хԝә бьдитана у бьмьрана?

Дә бьдьнә бәр чʹәʹве хԝә, ԝәки әԝана гәрәке һʹӧкӧми ль сәр һʹәму һʹәйԝана бькьрана. Адәмрʹа һатьбу готьне, ԝәки нава бьдә сәр һʹәйԝана. Сәва ве йәке ԝәʹдә лазьм бу (Дәстпебун 2:19). Ле сәва кӧ хԝәйити ԝан бькьра, Адәм гәрәке гәләк тьшт дәрһәԛа ԝан пебьһʹәсийа. Ӧса жи гәрәке һин буйа кӧ чаԝа мьԛати ԝан бә. Бь рʹасти жи сәва ԝан һʹәму тьшта, гәләк ԝәʹдә лазьм бу.

Демәк әв фәрмана Хԝәде дьдә кʹьфше, ԝәки мәрьвед пешьн һатьбун әʹфьрандьне кӧ дьреж бьжин. У бь рʹасти, жийина Адәм дьреж кʹьшанд.

ЖИЙИНА ԜАН ЙА ГЬШКА ДЬРЕЖТЬР БУ

Жь Кʹьтеба Пироз әм педьһʹәсьн, кӧ ԝәхтәки мәрьв һьмбәри рʹожед иройин дьһа дьреж әʹмьр дькьрьн. Әм дьхуньн: «Т′әмамийа р′ожед ә′мьре хԝәда, Адәм нәсьд си сали ә′мьр кьр». Паше ведәре бәса шәш мәрьвед дьн те кьрьне, кʹижан кӧ 900 сали зедәтьр житьнә! Наве ԝан: Сетʹ, Әнош, Ԛенан, Йаред, Мәтушәла у Нӧһ бун. Һәр кәс жь ԝана пешийа Селаве дьжитьн ԝәʹде Нӧһда. Нӧһ 600 сали бу, гава Селав дәстпебу (Дәстпебун 5:5-27; 7:6; 9:29). Гәло мәʹнийа әʹмьре ԝани дьреж чь бу?

Әԝан мәрьва дьжитьн һьнге, чахе һе гәләк ԝәʹдә дәрбаз нәбьбу, жь ԝи ԝәʹдәйи гава Адәм у Һева кʹамьлийа хԝә ӧнда кьрьн. Демәк ԝи чахи әԝана һе жь кʹамьлийе зʹәф дур нәкʹәтьбун. Ча кʹьфш ә, әв бу мәʹнийа сәрәкә. Ле гәло чь һәвгьредан һәйә ортʹа кʹамьлийе у жийина дьреж? Мьрьн ԝе ча бе һьлдане? Сәва кӧ щаба ԝан пьрса бьстиньн, ԝәрен әм пешийе пебьһʹәсьн, чьма әм кал-пир дьбьн у дьмьрьн.