Гәло Ахьрийа Мәйә Баш Ԛәнщикьрьнева Гьредайи йә?
Нава тʹәрихийеда гәләк мәрьв дьфькьрин кӧ һәгәр әԝана һʹәйф у нав-намус бьн, әԝана ԝе бьгьһижьнә ахьрийа баш. Мәсәлә, мәрьвед жь рʹоһьлате гәләк ԛәдьре дәрсдар-философ бь наве Конфӧсйӧс дьгьрьн (551-479 Б.Д.М.), йе кӧ гьлийед ӧса гот: «Тӧ бона хԝә чь нахԝази, ве йәке мәрьвед дьнрʹа жи нәхԝазә».a
РʹЕ КӦ ГӘЛӘК ДЬЖБЕРЬН
Гәләк мәрьв баԝәр дькьн ԝәки рʹабун-рʹуньштьна баш мәрьварʹа бәхтәԝарийе у ахьрийа баш тинә. Әԝана алийе хԝәда һәр тьшти дькьн ԝәки һьндава мәрьвада бь ԛәдьр у мәʹрифәт бьн, ӧса жи щабдарийед хԝә рʹьнд биньн сери у исафа тʹәмьз хԝәй кьн. Кʹӧлфәтәкә жь Вийәтнаме бь наве Лин дьбежә: «Мьн баԝәр дькьр кӧ һәгәр әз һʹәлал у дьлтʹәмьз бьм, ахьрийа мьн ԝе баш бә».
Һьнәк жи дьхԝазьн мәрьвнә һʹәйф бьн, чьмки религийа ԝан ӧса һин дькә. Мерькәк бь наве Һсу-Йун, жь Тәйԝане, дьбежә: «Мьн һин дькьрьн кӧ һәгәр мәрьв ԛәнщийе бькә, әԝе паши мьрьне ахьрийа баш бьстинә, ле һәгәр хьрабийе бькә, әԝе бьчәрчьрә».
ГӘЛО КʹАРА ВЕ ЙӘКЕ ҺӘЙӘ?
Әва рʹаст ә кӧ гава әм ԛәнщийе дькьн, әм гәләк кʹаре дьстиньн. Ле йәкә гәләк мәрьвед кӧ бь дьл дьхԝазьн һьндава мәрьвада һʹәйф бьн, нә һәр гав ԛәнщийа ԝан те пешийа ԝан. Кʹӧлфәтәкә бь наве Шиу Пин жь Һон-Конге дьбежә: «Мьн жь әʹмьре хԝә дит ԝәки ԛәнщийа мәрьва нә һәр гав те пешийа ԝан. Мьн жь алийе хԝәда һәр тьшт дькьр, ԝәки бона малбәта хԝә хәм бькьм у ԛәнщийе бькьм. Ле сәд һʹәйф, мере мьн жь мьн ԛәтийа у әԝи әз у кӧрʹе мә һишт чу».
Гәләк мәрьва тедәрхьстьнә ԝәки религийа нә һәр гав мәрьва алийе башда дьгӧһезә. Етсуко кʹӧлфәтәкә жь Жапонйайе, дьбежә: «Әз кʹәтьмә религийәке у мьн дәстпекьр бона щаһьла шьхӧлед религи организә кьм. Ле әз мәтʹал мам гава мьн дит ԝәки әндәмед ве религийе намуса хԝә ӧнда кьрьбун, бона һʹӧкӧм һәврʹа дькʹәтьнә ләще у пʹәре дере бона кʹара хԝә хәрщ дькьрьн».
«Мьн жь алийе хԝәда һәр тьшт дькьр, ԝәки бона малбәта хԝә хәм бькьм у ԛәнщийе бькьм. Ле сәд һʹәйф, мере мьн жь мьн ԛәтийа у әԝи әз у кӧрʹе мә һишт чу» (ШИУ ПИН, ҺОН-КОНГ).
Гәләк мәрьвед баԝәрмәнд кӧ кьред ԛәнщ дькьн, дьлшкәсти дьбьн, чьмки тьштед хьраб диса жи тенә сәре ԝан. Кʹӧлфәтәкә жь Вийәтнаме бь наве Ван ӧса дьбежә: «Һәр рʹож мьн емиш, кӧлирк у хԝарьн дькʹьрʹи у датани бәр шькле кал-бавед хԝә, у мьн тʹьре әԝ йәк ԝе мьнрʹа ахьрийеда кʹәрәма бинә. Мьн нава гәләк салада чь дькьр-нәдькьр, у чьԛас әʹйд-ԛәйд дькьр, йәкә мере мьн гьран нәхԝәш кʹәт. Паше ԛиза мьнә щаһьл кӧ ԝәлате хәрибда һин дьбу, мьр».
Ле һәгәр мәрьвед ԛәнщ диса жи бәхтәԝар ниньн, демәк ахьрийа баш у бәхтәԝари чьва гьредайи йә? Сәва кӧ щаба ве пьрсе бьстиньн, мәрʹа лазьм ә рʹебәрийа бь итʹбар, каникә ӧса кӧ рʹаст щаба пьрсед мә дьдә у рʹе бәрбь жийина баш нишан дькә. Гәло кʹидәре әм дькарьн рʹебәрикә ӧса бьвиньн?
a Бона һе зедә информасийа дәрһәԛа һинкьрьнед Конфӧсйӧс дина хԝә бьдьнә кʹьтеба «Инсанәт Хԝәде Дьгәрʹә», сәре 7, абзасед 31-35, кӧ Шәʹдед Йаһоԝа дәрхьстьнә у бь онлайн һәйә сәр www.jw.org.