Тӧ Дькари Бәхтәԝар би

1. Әм һʹәԝще чь нә, у әв йәк чаԝа бәхтәԝарийева гьредайи йә?

БӘХТӘԜАРИЙА рʹаст тьштәкә ӧса нинә, кӧ зу те у дьчә. Мәрьв дькарә тʹәмамийа әʹмьре хԝәда бәхтәԝар бә. Гәло чаԝа? Иса Мәсиһ ӧса готьбу: «Бәхтәԝар ьн әԝ, йед кӧ фәʹм дькьн һʹәԝщәтийа хԝәйә рʹӧһʹани, чьмки Пʹадшатийа Әʹзмана йа ԝан ә» (Мәтта 5:3, ДТʹ). Иса Мәсиһ заньбу кӧ хԝәстьна инсана һәйә, ԝәки Йаһоԝа Хԝәде нас бькьн у ԝи бьһʹәбиньн. У чьмки Йаһоԝа «Хԝәдейе хԝәзьли» йә, йед кӧ жерʹа хьзмәт дькьн жи дькарьн бәхтәԝар бьн (1 Тимотʹейо 1:11).

2-3. (а) Ль гора готьнед Иса, кʹе дькарә бәхтәԝар бә? (б) Ве готареда, әме дәрһәԛа чь хәбәр дьн, у әв йәк чьрʹа фәрз ә?

² Гәло бәхтәԝари те һʹәсабе кӧ жийина мәда ԛә дәрд ԝе тʹӧнә бьн? На. Иса ԝәʹде хьзмәткьрьна сәр чʹийе тьштәки һʹәԝас готьбу. Әԝи гот ԝәки кәсед кӧ сәва гӧнед хԝә йан сәва тьштед дьн дьлтәнг ьн, дькарьн бәхтәԝар бьн. Ӧса жи, кәсед кӧ «бона рʹастиԛәдандьне тенә зерандьне» у кәсед кӧ сәва баԝәрийа хԝә тенә беһӧрмәткьрьне жи, дькарьн бәхтәԝар бьн (Мәтта 5:4, 10, 11). Гава мәрьв дькʹәвә һʹаләки ӧса, гәло әԝ ча дькарә бәхтәԝар бә?

³ Иса һин дькьр кӧ бәхтәԝари нә әв ә гава жийина мәда ԛә чәтьнайи тʹӧнә нә, ле әв ә, гава әм һаш жь һʹәԝщед хԝәйә рʹӧһʹани һәнә у незики Хԝәде дьбьн (Аԛуб 4:8). Гәло әм чаԝа дькарьн ве йәке бькьн? Ве готареда, әме дәрһәԛа се гавед сәрәкә хәбәр дьн, йед кӧ бәрбь бәхтәԝарийа рʹаст дьбьн.

КʹЬТЕБА ПИРОЗ БЬХУНӘ У ЛЕКОЛИН КӘ

4. Сәва кӧ әм бәхтәԝарийа рʹаст бьстиньн, гава пешьн чь йә? (Зәбур 1:1-3)

⁴ ГАВА 1: Сәва бь рʹасти бәхтәԝар бьн, гәрәке әм хԝарьна рʹӧһʹани бьстиньн. Бона жийине, һьм инсан һьм жи һʹәйԝан һʹәԝще хԝарьна физики нә. Ле тʹәне инсан һʹәԝще хԝарьна рʹӧһʹани нә. Ләма Иса ӧса готьбу: «Инсан тʹәне бь нен нажи, ле бь һәр хәбәра кӧ жь дәве Хԝәде дәрдькʹәвә» (Мәтта 4:4). Ләма бьра рʹожәк жи ӧса дәрбаз нәбә, кӧ әм Хәбәра Хԝәде нәхуньн. Кʹьтеба Пироз дьбежә ԝәки кәсед кӧ ԛануна Йаһоԝа һәр рʹож дьхуньн, бәхтәԝар ьн (Зәбур 1:1-3 бьхунә).

5-6. (а) Әм дькарьн жь Кʹьтеба Пироз чь һин бьн? (б) Хԝәндьна Кʹьтеба Пироз ча дькарә али мә бькә?

⁵ Бь сайа Кʹьтеба Пироз, Йаһоԝа бь һʹьзкьрьне мә һин дькә кӧ әм чаԝа дькарьн бь жийинәкә бәхтәԝар бьжин. Жь ве кʹьтебе әм педьһʹәсьн, кӧ ԛьрара ԝи бона мә чь йә. Ӧса жи, әм һин дьбьн кӧ әм чаԝа дькарьн незики ԝи бьн у гәрәке әм чь бькьн, ԝәки Әԝ гӧнед мә бьбахшинә. Хенщи ве йәке, әм педьһʹәсьн кӧ Йаһоԝа бона ахьрийе чь соз дайә (Йерәмйа 29:11). Гава әм Кʹьтеба Пироз леколин дькьн, рʹастийа дәрһәԛа ван тьшта дьле мә ша дькә.

⁶ Ӧса жи Кʹьтеба Пироз ширәтед бона жийина һәррʹожи дьдә мә. Һәрге әм ль гора ван ширәта бьжин, әме бәхтәԝар бьн. Гава әм сәва проблемед жийине дьлтәнг дьбьн, ԝе баш бә ԝәки әм Хәбәра Йаһоԝа һе зедә бьхуньн у сәр ԝе кʹур бьфькьрьн. Иса готьбу «йед кӧ хәбәра Хԝәде дьбьһед у пек тиньн», бәхтәԝар ьн (Луԛа 11:28).

7. Тӧ чаԝа дькари жь хԝәндьна Хәбәра Хԝәде дьһа зедә кʹаре бьстини?

⁷ Гава тӧ Хәбәра Хԝәде дьхуни, ләз нәкʹәвә. Бәʹса хәбәре, кәсәки тәрʹа хԝарьнәкә тәʹмхԝәш чекьрийә. Ле жь бо ве йәке кӧ тӧ ләз дькʹәви ԝәки щикида һәрʹи, йан жи һʹьше тә сәр тьштәки дьн ә, тӧ хԝарьне зу-зу дадьԛӧртини. Паши хԝарьне тӧ фәʹм дьки, ԝәки тә чьԛас зу хԝар у дьбежи: «Хԝәзьл мьн һеди-һеди бьхԝара у тәʹма хԝарьне һе рʹьнд тедәрхьста». Хԝәндьна Кʹьтеба Пироз жи дькарә ӧса бә. Гәло тә Кʹьтеба Пироз ԛә ӧса зу хԝәндийә кӧ тә рʹьнд фәʹм нәкьрийә, ԝәки әԝ дьхԝазә тәрʹа чь бежә? Ләма жи Кʹьтеба Пироз һеди-һеди бьхунә. Сәрһатийа бьдә бәр чʹәʹве хԝә, дәнга бьбьһе, у сәр тьштед кӧ тӧ дьхуни, кʹур бьфькьрә. Әв йәк ԝе бәхтәԝарийа тә зедә кә.

8. «Хӧламе амьн у сәрԝахт» щабдарийа хԝә ча тинә сери? (Ӧса жи бьньһерʹә спартьн.)

⁸ Иса «хӧламе амьн у сәрԝахт» кʹьфш кьрийә, ԝәки ԝәʹдәда хԝарьна рʹӧһʹани бьдә мә, ләма жи әм рʹӧһʹанида тʹӧ щар бьрʹчи наминьнb (Мәтта 24:45). Сәр һʹиме Хәбәра Хԝәде, хӧламе амьн тʹер-тʹьжә хԝарьна рʹӧһʹани һазьр дькә (1 Тʹесалоники 2:13). Әв хԝарьна рʹӧһʹани али мә дькә кӧ әм фькьред Йаһоԝа фәʹм бькьн, йед кӧ Кʹьтеба Пирозда һәнә. Ләма жи гәләк фәрз ә ԝәки әм журналед «Бьрща Ԛәрәԝьлийе» у «Һʹьшйар Бьн!» у готаред сәр jw.org бьхуньн, хԝә бона һʹәму щьвина һазьр кьн у һәр мәһ бәрнама JW Бродкастинг, йа кӧ сәр гәләк зьмана те дәрхьстьне, бьньһерʹьн. Бь сайа ве хԝарьна рʹӧһʹани, әме бькарьбьн гава дӧда бавежьн, йа кӧ бәрбь бәхтәԝарийа рʹаст дьбә.

ГӦҺ БЬДӘ ԚАНУНЕД ЙАҺОԜА

9. Гава дӧда, йа кӧ бәрбь бәхтәԝарийа рʹаст дьбә, чь йә?

⁹ ГАВА 2: Сәва кӧ әм бь рʹасти бәхтәԝар бьн, гәрәке әм ль гора ԛанунед Йаһоԝа бьжин. Кʹьтеба Пироз ӧса дьбежә: «Хԝәзи ль ԝан һʹәмуйед кӧ жь Хӧдан хоф дькьн у рʹийа Ԝида дьмәшьн» (Зәбур 128:1). Әм жь Йаһоԝа дьтьрсьн, демәк әм һаԛас ԛәдьре ԝи дьгьрьн кӧ әм нахԝазьн дьле ԝи бь кьред хԝә бешиньн (Мәтʹәлок 16:6). Кʹьтеба Пироз нишани мә дькә кӧ бь дитьна Хԝәде чь рʹаст ә у чь нә рʹаст ә, у гәләк фәрз ә кӧ әм хԝә ль ван принсипа бьгьрьн (2 Корьнтʹи 7:1). Һәрге әм ван тьшта бькьн, чь кӧ Йаһоԝа һʹьз дькә, у тьштед кӧ әԝ нәфрʹәт дькә, нәкьн, әме бәхтәԝар бьн (Зәбур 37:27; 97:10; Рʹомайи 12:9).

10. Ль гора Рʹомайи 12:2, гәрәке әм чь бькьн?

¹⁰ Рʹомайи 12:2 бьхунә. Бәс нинә ԝәки кәсәк тʹәне бьзаньбә кӧ һʹӧкӧме Йаһоԝа һәйә, ԝәки ԛануна дайнә; гәрәке әԝ ӧса жи ль гора ван ԛануна бьжи. Ве мәсәле бинә бәр чʹәʹве хԝә: Дьбәкә кәсәк бьзаньбә кӧ изьна дәԝләте һәйә ԝәки ԛанунед ажотьне дайнә. Ле һәрге әԝ гӧрʹа ван ԛануна нәкә, ԛә кʹара ве йәке ԝе һәбә? Мина ве йәке, гәрәке әм пе рʹабун-рʹуньштьна хԝә нишан кьн, ԝәки әм бь рʹасти баԝәр ьн кӧ ԛанун-принсипед Йаһоԝа бона кʹара мә нә (Мәтʹәлок 12:28). Даԝьд жи ӧса дьфькьри, ләма жи әԝи Йаһоԝарʹа гот: «Те рʹийед әʹмьр мьнва әʹйан ки. Шабунәкә мәзьн ә ль бәр диндара Тә, һʹәта-һʹәтайе хер у хԝәши дәсте Тәйи рʹастеда йә» (Зәбур 16:11).

11-12. (а) Гава дәрдед мә һәнә, гәрәке әм чьда мьԛати хԝә бьн? (б) Готьнед жь Филипи 4:8 чаԝа дькарьн али мә бькьн, ԝәки әм хԝәрʹа ԝәʹдәдәрбазкьрьнед щайиз бьжберьн?

¹¹ Гава дәрдед мә һәнә йан әм тәнгасийеда ньн, дьбәкә әм бьхԝазьн бь тьштәки дьн мьжул бьн, ԝәки дәрһәԛа проблемед хԝә нәфькьрьн. Әв хԝәстьн нормал ә, ле гәрәке әм мьԛати хԝә бьн, ԝәки пе ван тьшта мьжул нәбьн, йед кӧ Йаһоԝа нәфрʹәт дькә (Әфәси 5:10-12, 15-17).

¹² Паԝлосе шанди хушк-бьред бажаре Филипйайерʹа ньвисибу, ԝәки сәр ԝан тьшта бьфькьрьн, «чь кӧ бь рʹастийе йә . . . чь кӧ бь һʹәлалийе йә . . . [у] чь кӧ бь хԝәшийе йә» (Филипи 4:8 бьхунә). Рʹаст ә готьнед Паԝлос рʹастә-рʹаст дәрһәԛа ԝәʹдәдәрбазкьрьна нинә, ле диса жи гьлийед ԝи нишан дькьн ԝәки лазьм ә әм ԝәʹдәдәрбазкьрьнед хԝә ль гора ве принсипе бьжберьн. Һәла ӧса бькә: Ве рʹезеда кʹидәре кӧ хәбәра «тьшт» ньвисар ә, дәԝса ве, хәбәра «стьран», «филм», «кʹьтеб» йан «листька компӧтәре» дайнә. Бь ви щурʹәйи, тӧ дькари тедәрхи кӧ бәр чʹәʹве Хԝәде чь баш ә у чь на. Әм дьхԝазьн пе принсипед Йаһоԝайә бьльнд бьжин (Зәбур 119:1-3). Әв йәк ԝе али мә бькә ԝәки исафа мә тʹәмьз бә, у әме һазьр бьн кӧ гавәкә дьн бавежьн, йа кӧ бәрбь бәхтәԝарийа рʹаст дьбә (Кʹаред Шандийа 23:1).

ПЕШИЙА ҺӘР ТЬШТИ ДИНА ХԜӘ БЬДӘ ҺʹӘБАНДЬНА ЙАҺОԜА

13. Гава сьсийа чь йә, йа кӧ бәрбь бәхтәԝарийа рʹаст дьбә? (Йуһʹәнна 4:23, 24)

¹³ ГАВА 3: Һʹәбандьна Йаһоԝарʹа дайнә сәр щийе пешьн. Йаһоԝа Хԝәде һежайи һʹәбандьна мә йә, чьмки әԝи әм хӧльԛандьнә (Әʹйанти 4:11; 14:6, 7). Ләма жи гәрәке әм бь щурʹе рʹаст, чаԝа ль ԝи хԝәш те, демәк бь «рʹӧһʹ у рʹастийе» ԝи бьһʹәбиньн (Йуһʹәнна 4:23, 24 бьхунә). Әм дьхԝазьн ԝәки рʹӧһʹе пироз рʹебәрийа һʹәбандьна мә бькә, ԝәки һʹәбандьна мә ль гора рʹастийа Хәбәра Хԝәде бә. Һәрге шьхӧлед Шәʹдед Йаһоԝа ԝәлате мәда бь тʹәмами йан һьнә тьштада ԛәдәхәкьри нә, лазьм ә ԝәки әм пешийа һәр тьшти дина хԝә бьдьн һʹәбандьна Йаһоԝа. Ньһа зедәтьри 150 хушк-бьред мә сәва баԝәрийа хԝә кәледа ньн.c Диса жи әԝана чь жь дәсте ԝан те дькьн, кӧ дӧа бькьн, Кʹьтеба Пироз леколин бькьн у мәрьварʹа дәрһәԛа Хԝәде у Пʹадшатийа ԝи гьли кьн. Гава мәрьв мә ньмьз дькьн йан жи дьзериньн, әм дькарьн бәхтәԝар бьн, чьмки әм заньн кӧ Йаһоԝа тʹәви мә йә у ԝе мә хәлат кә (Аԛуб 1:12; 1 Пәтрус 4:14).

БЬРАКИ КӦ БӘХТӘԜАРИЙА ХԜӘ ӦНДА НӘДЬКЬР

14. Чь һатә сәре бьраки щаһьл жь Тащикьстане у чьрʹа?

¹⁴ Сәрһатийед хушк-бьред мә нишан дькьн ԝәки һʹале мә чь бә жи, се гавед кӧ мә ньһа шеԝьр кьрийә, бәрбь бәхтәԝарийа рʹаст дьбә. Мәсәлә, ԝәрә бьньһерʹьн, кӧ Тащикьстанеда чь һатә сәре бьраки 19 сали бь наве Щовидон Бобощонов. Жь бо ве йәке кӧ әԝи инкʹар кьр һәрʹә әскәрийе, 4 Щотмәһе, сала 2019, ԝи жь мале зоре дәрхьстьн, әԝ бь мәһа кәледа гьрти ма у һьндава ԝида ӧса бун, ча һьндава криминаләки. Ве нәһәԛийе дина ԝәлатед дьн жи кʹьшанд. Әԝ һатә кʹӧтане, ԝәки сонда әскәрийе бьхԝә у кʹьнщед әскәрийе ль хԝә кә. Паше, ԝана бәр диԝане әԝ сущдар кьрьн у шандьнә зомәкә хәбате, һʹәта кӧ президенте Тащикьстане әԝ афу кьр у фәрман да, ԝәки әԝ бе азакьрьне. Һʹәта хьлазийе, гәло Щовидон чь кьр кӧ амьн бьминә у шабуна хԝә ӧнда нәкә? Әԝи һʹәԝщед хԝәйә рʹӧһʹани тʹӧ щар пьшт гӧһе хԝәва нәдавит.

15. Гава Щовидон кәледа бу, әԝи ча хԝарьна рʹӧһʹани дьстанд?

¹⁵ Чахе Щовидон кәледа бу у дәсте ԝида Кʹьтеба Пироз у әʹдәбйәтед мә тʹӧнә бун жи, әԝи хԝарьна рʹӧһʹани дьстанд. Гәло чаԝа? Хушк-бьред кӧ ԝирʹа хԝарьн дьшандьн, рʹеза рʹоже сәр тʹорба дьньвисин. Бь ви щурʹәйи, мәщала ԝи һәбу кӧ һәр рʹож Кʹьтеба Пироз бьхунә у сәр ԝе кʹур бьфькьрә. Паши кӧ әԝ жь кәле дәркʹәт, әԝи ԝан кәсарʹа, йед кӧ һе рʹасти тәнгасийед гьран нәһатьбун, ӧса гот: «Һʹәта кӧ һун аза нә, гәләк фәрз ә кӧ һун Хәбәра Хԝәде у әʹдәбйәтед мә рʹьнд бьхуньн, ԝәки һун Йаһоԝа дьһа рʹьнд нас кьн».

16. Щовидон сәр чь дьфькьри?

¹⁶ Бьре мә ль гора ԛанунед Йаһоԝа дьжит. Әԝи хԝәстьнед нәбаш дьле хԝәда мәзьн нәдькьрьн у тьштед нәрʹаст нәдькьрьн, ле әԝи дина хԝә дьда Йаһоԝа у ԛьрара ԝи. Щовидон тʹәбийәтерʹа һʹәйр-һʹӧжмәкʹар дьма. Һәр шәбәԛ, әԝ жь дәнге чʹьвика һʹьшйар дьбу. Шәв әԝи сәр һив у стәйрка дьньһерʹи. Әԝ дьбежә: «Әв пʹешкʹешед жь Йаһоԝа дьле мьн ша дькьрьн у дьл дьданә бәр мьн». Һәрге әм бона тьштед физики у рʹӧһʹани, йед кӧ Йаһоԝа дайә мә, рʹази бьн, дьле мә ԝе ша бә у әв бәхтәԝари ԝе ԛәԝате бьдә мә, ԝәки әм сәбьр кьн.

17. Ль гора 1 Пәтрус 1:6, 7, чәтьнайи чаԝа дькарьн сәр баԝәрийа кәсәки һʹӧкӧм бькьн?

¹⁷ Ӧса жи Щовидон жь һәр тьшти зедәтьр дина хԝә дьда һʹәбандьна Йаһоԝа. Әԝи заньбу кӧ чьԛас фәрз ә ԝәки әԝ Хԝәдерʹа амьн бьминә. Иса ӧса готьбу: «Сәре хԝә ль бәр Хӧдан Хԝәдейе хԝә дайнә у тʹәне ԝи бьһʹәбинә!» (Луԛа 4:8). Фәрмандар у әскәра дьхԝәстьн ԝәки Щовидон тʹәрка баԝәрийа хԝә бьдә. Әԝи шәв у рʹож бь дьл у щан жь Йаһоԝа аликʹари дьхԝәст, ԝәки әԝ нәԝәстә у амьн бьминә. Щовидон зоре жь мал дәрхьстьн, әԝ һатә ледане у ԝи кьрьнә кәле, ле диса жи әԝ Йаһоԝарʹа амьн ма. Әԝи баԝәрийа хԝә чәтьнайада избат кьрийә, у әв йәк дьле ԝи ша дькә (1 Пәтрус 1:6, 7 бьхунә).

18. Әм чаԝа дькарьн бәхтәԝарийа хԝә хԝәй кьн?

¹⁸ Йаһоԝа мә һин дькә ԝәки әм чаԝа дькарьн бь рʹасти бәхтәԝар бьн. Һәрге әм се гавед кӧ мә шеԝьр кьр, бавежьн, әме бькарьбьн бәхтәԝарийа хԝә хԝәй кьн. Һьнге әм дькарьн ӧса бежьн: «Хԝәзи ль ԝи мьләти, кӧ ви һʹалида йә. Хԝәзи ль ԝи мьләти, кӧ Хӧдане ԝан Хԝәде йә» (Зәбур 144:15).