Де-Бавно, Али Зарʹед Хԝә Бькьн кӧ Незики Йаһоԝа бьн

1-2. Гава зарʹ дәрһәԛа баԝәрийе пьрса дьдьн, де-бав гәрәке чь бькьн?

ҺИНКЬРЬНА зарʹа шьхӧләки мәзьн ә. Һәрге зарʹед ԝә һәнә, бе шьк һун гәләк хирәт дькьн, ԝәки баԝәрийа ԝан дьһа ԛәԝи кьн, у Хԝәде хирәта ԝә дьшекьринә (Ԛануна Дӧщари 6:6, 7). Гава зарʹед ԝә мәзьн бьн, дьбәкә әԝана дәрһәԛа баԝәрийа ԝә у һинкьрьнед Кʹьтеба Пироз һьнә пьрсед фәрз бьдьнә ԝә.

² Серида дьбәкә һун жь бо пьрсед зарʹед хԝә бьфькьрьн, кӧ баԝәрийа ԝан сьст буйә. Ле зарʹ чьԛас мәзьн дьбьн, һаԛас һе зедә әԝана гәрәке пьрса бьдьн, сәва кӧ баԝәрийа ԝан дьһа ԛәԝи бә (1 Корьнтʹи 13:11). Ләма жи нәлазьм ә, кӧ һун бьтьрсьн. Гава зарʹед ԝә пьрса дьдьн, һун дькарьн али ԝан бькьн ԝәки кʹур бьфькьрьн, у ӧса баԝәрийа хԝә һьндава Хԝәде у Кʹьтеба Пироз дьһа ԛәԝи кьн.

3. Ве готареда әме чь шеԝьр кьн?

³ Ве готареда әме бьвиньн, кӧ де-бав ча дькарьн али зарʹед хԝә бькьн, ԝәки әԝана (1) баԝәрийа хԝә ԛәԝи кьн, (2) принсипед Кʹьтеба Пироз дьһа зедә бьшекьриньн у (3) баԝәрийа хԝә бьпʹарезьн. Ӧса жи әме бьвиньн кӧ чьрʹа баш ә, ԝәки зарʹ пьрса бьдьн, у һун ча дькарьн мәщала бьвиньн ԝәки тʹәви ԝан дәрһәԛа Кʹьтеба Пироз хәбәр дьн.

АЛИ ЗАРʹЕД ХԜӘ БЬКЬН ԜӘКИ БАԜӘРИЙА ХԜӘ ԚӘԜИ КЬН

4. Дьбәкә зарʹед ԝә чь пьрса бьдьн у чьрʹа?

⁴ Де-бав гәрәке бир нәкьн, ԝәки баԝәрийа ԝан һьндава Йаһоԝа чаԝа мьлкʹ дәрбази зарʹед ԝан набә. Гава һун һатьнә буйине, һун бь баԝәрийа һьндава Йаһоԝа нәһатьнә буйине, у зарʹед ԝә жи ӧса нәһатьнә буйине. Ләма жи дьбәкә ԝәʹдә шунда щәм зарʹед ԝә һьнә пьрс пешда бен, мәсәлә: «Әм жь кʹӧ заньн ԝәки Хԝәде һәйә? Гәло әз дькарьм баԝәрийа хԝә Кʹьтеба Пироз биньм?» Кʹьтеба Пироз дьбежә, ԝәки әм сәрԝахтийе бьдьнә кʹьфше у «тьштед ԛәнщ ԛәԝин бьгьрьн» (Рʹомайи 12:1; 1 Тʹесалоники 5:21). Ле һун ча дькарьн али зарʹед хԝә бькьн, ԝәки әԝана баԝәрийа хԝә дьһа ԛәԝи кьн?

5. Де-бав ча дькарьн али зарʹед хԝә бькьн, ԝәки әԝана баԝәрийа хԝә Кʹьтеба Пироз биньн? (Рʹомайи 12:2)

⁵ Али зарʹед хԝә бькьн, ԝәки әԝана избатийа бьгәрʹьн, кӧ һинкьрьнед Кʹьтеба Пироз рʹаст ьн (Бьхунә Рʹомайи 12:2). Гава зарʹед ԝә пьрса дьдьн, нишани ԝан кьн, кӧ әԝана ча дькарьн бь сайа Индекса Ә′дәбйәта Бьрща Ԛәрәԝьлийе у Рʹебәрийа Лекʹолинкьрьне бона Шәʹдед Йаһоԝа избатийа бьгәрʹьн, кӧ баԝәр бьн ԝәки Кʹьтеба Пироз нә тʹәне кʹьтебәкә керһати йә, йа кӧ мәрьва ньвисийә, ле бь рʹасти жи «Хәбәра Хԝәде» йә (1 Тʹесалоники 2:13). Мәсәлә, зарʹ дькарьн дәрһәԛа бажаре Нинәԝайе лекʹолин бькьн. Бәре һьнә зандаред Кʹьтеба Пироз дьготьн, кӧ империйа Асуреда бажарәки ӧса тʹӧнә бу. Ле сала 1850, археоложа кәвьр-кӧчʹькед Нинәԝайе дитьн у ԝана фәʹм кьр, кӧ гьлийед Кʹьтеба Пироз дәрһәԛа ви бажари рʹаст ьн (Сефанйа 2:13-15). Сәва кӧ зарʹед ԝә һе зедә информасийа бьстиньн, кӧ Кʹьтеба Пирозда ча пешда дәрһәԛа ԝеранкьрьна Нинәԝайе һатьбу пʹехәмбәртикьрьне, әԝана дькарьн лекʹолин кьн журнала Бьрща Ԛәрәԝьлийе йа мәһа Мьждаре, сала 2021, готара бь наве «Ԝә Заньбу?». Бьра зарʹед ԝә информасийа жь әʹдәбйәтед мә бәрамбәри канийед дьн бькьн у хԝәха избат бьн, ԝәки Кʹьтеба Пирозда һәр тьшт рʹаст һатийә ньвисаре.

6. Де-бав ча дькарьн али зарʹед хԝә бькьн, кӧ әԝана тедәрхьн ԝәки гьлийед Кʹьтеба Пироз рʹаст ьн? (Бьньһерʹә ӧса жи шькьл.)

⁶ Али зарʹед хԝә бькьн, кӧ әԝана тедәрхьн ԝәки чьрʹа һинкьрьнед Кʹьтеба Пироз рʹаст ьн. Мәщала бьгәрʹьн кӧ тʹәви зарʹед хԝә дәрһәԛа Кʹьтеба Пироз, йан жи дәрһәԛа баԝәрийа һьндава Хԝәде, хәбәр дьн. Гава һун тʹәвайи дьчьнә мйузейе, парке йан жи Бәйтʹәла Шәʹдед Йаһоԝа, дьбәкә ԝәрʹа мәщал вәбьн, кӧ тʹәви зарʹед хԝә хәбәр дьн. Гава һун мйузейеда дьгәрʹьн, йан жи бь онлайн мйузейе дьньһерʹьн, һун дькарьн дина зарʹед хԝә бькʹьшиньн сәр тьштед тʹәрихи, йед кӧ дькарьн баԝәрийа ԝан дьһа ԛәԝи кьн, ԝәки гьлийед Кʹьтеба Пироз рʹаст ьн. Мәсәлә, һун дькарьн дина ԝан бькʹьшиньн сәр Кәвьре Моԝабе, йе кӧ 3 000 сал пешда һатьбу чекьрьне. Гәло зарʹед ԝә заньн, кӧ сәр ви кәвьре кәвьн наве Хԝәде һәйә? Әв кәвьр ль Парисе, Мйузейа Лувреда те хԝәйкьрьне. Ӧса жи копийәкә Кәвьре Моԝабе ль Офиса Сәрәкә йа Шәʹдед Йаһоԝада һәйә, ль Ԝорԝике (Нийу Йорк). Әв кәвьр ль галерейа бь наве «Кʹьтеба Пироз у Наве Хԝәде» һатийә данине. Ньвисара сәр Кәвьре Моԝабе дьбежә кӧ Пʹадше Моԝабе, Меша, һьмбәри Исраеле дәркʹәт. Кʹьтеба Пирозда жи дәрһәԛа ве йәке те готьне (2 Пʹадшати 3:4, 5). Һәрге зарʹед ԝә бь чʹәʹве хԝә бьвиньн, кӧ гьлийед жь Кʹьтеба Пироз рʹаст ьн, баԝәрийа ԝан ԝе дьһа ԛәԝи бә (Бәрамбәр кә 2 Дирок 9:6).

7-8. (а) Әм жь бәдәԝийа тʹәбийәте чь дькарьн һин бьн? (Бьньһерʹә ӧса жи шькьл.) (б) Сәва кӧ баԝәрийа зарʹед ԝә дьһа ԛәԝи бә, һун дькарьн чь пьрса бьдьнә ԝан?

⁷ Али зарʹед хԝә бькьн, кӧ әԝана дәрһәԛа тʹәбийәте бьфькьрьн. Гава һун дәрва дьгәрʹьн, дина зарʹед хԝә бькʹьшиньн сәр нәхш у щурʹед әʹфринед тʹәбийәтеда. Гәло чьрʹа? Нәхш у щурʹед ԝан әʹфрина нишан дькьн, кӧ әв һәр тьшт кәсәки сәрԝахт чекьрийә. Мәсәлә, зандар гәләк сал әʹфринед бь нәхшед спирал лекʹолин дькьн. Бийофизикван Никола Фамели дьбежә, кӧ чахе һәжмаред нәхшед спиралед тʹәбийәтеда һʹәсаб дьки, һәжмаред ӧса дәртен, кʹижан кӧ тенә һʹәсабе рʹезкьрьна һәжмаред Фибоначи. Гәләк әʹфринада нәхшед бь щурʹе спирал һәнә, мәсәлә һьнә галактикада, әʹфринед бәʹреда, бәлгед шинкайада у гӧлбәрʹожкада.a

⁸ Мәкʹтәбеда зарʹед ԝә һин дьбьн, кӧ тʹәбийәтеда гәләк тьшт ль гора ԛанунед тʹәбийәте пешда тен. Мәсәлә, дьбәкә әԝана һин дьбьн, кӧ һʹәму кӧлийед бәрфе ль гора нәхшед гиометрик чедьбьн, йед кӧ нас ьн ча фрактал. Тʹәбийәтеда, нәхшед фрактал тьштед дьнда жи һәнә. Гәло кʹе әв ԛанун данинә, бь сайа кʹижана әв нәхшед бәдәԝ чедьбьн? Чьԛас зарʹед ԝә сәр пьрсед ӧса бьфькьрьн, һаԛас әԝана ԝе баԝәр бьн, кӧ һәр тьшт чекьрьна дәсте Хԝәде йә (Ибрани 3:4). Гава зарʹед ԝә дьһа мәзьн бьн, һун дькарьн жь ԝана бьпьрсьн: «Һәрге Хԝәде әм чекьрьнә, ԝе аԛьлайи бә баԝәр кьн, кӧ әԝи ӧса жи бона кʹара мә рʹебәри дайә мә, ԝәки әм бәхтәԝар бьн, ӧса нинә?» Паше тӧ дькари бежи, кӧ әв рʹебәрийа ԛимәт Кʹьтеба Пирозда һәйә.

NASA, ESA, and the Hubble Heritage (STScl/AURA)-ESA/Hubble Collaboration

АЛИ ЗАРʹЕД ХԜӘ БЬКЬН ԜӘКИ КʹАРА ПРИНСИПЕД КʹЬТЕБА ПИРОЗ БЬВИНЬН

9. Чьрʹа дьбәкә зарʹед ԝә бьпьрсьн, кӧ принсипед Кʹьтеба Пироз бь рʹасти керһати нә йан на?

⁹ Һәрге зарʹед ԝә бьпьрсьн кӧ принсипед Кʹьтеба Пироз дәрһәԛа нав-намусийе бь рʹасти керһати нә йан на, тедәрхьн кӧ әԝана чьрʹа ве пьрсе дьдьн. Гәло әԝана дьфькьрьн ԝәки принсипед Кʹьтеба Пироз дәрһәԛа нав-намусийе нәбаш ьн? Йан мәʹни әв ә кӧ ԝәʹде хәбәрдана тʹәви кәсед дьн, әԝана ньзаньн ча баԝәрийа хԝә бьпʹарезьн? Мәʹни чь бә жи, сәва кӧ зарʹед ԝә кʹара принсипед Кʹьтеба Пироз дьһа баш фәʹм кьн, кʹьтеба Ша бә Жийинерʹа Һʹәта-Һʹәтайе! тʹәви ԝан лекʹолин кьн.b

10. Һун ча дькарьн али зарʹед хԝә бькьн, ԝәки әԝана дәрһәԛа достийа хԝәйә тʹәви Йаһоԝа бьфькьрьн?

¹⁰ Али зарʹед хԝә бькьн, кӧ әԝана достийа хԝәйә тʹәви Йаһоԝа ԛимәт кьн. Гава һун Кʹьтеба Пироз тʹәви зарʹед хԝә лекʹолин дькьн, бь сайа пьрс у мәсәлед жь кʹьтеба Ша бә Жийинерʹа Һʹәта-Һʹәтайе! тедәрхьн, кӧ ньһерʹандьн у фькьред ԝан чь нә (Мәтʹәлок 20:5). Мәсәлә, дәрса 8 дьбежә, кӧ Йаһоԝа мина достәки дьлован ә, йе кӧ рʹебәрийе у ширәта дьдә, чь кӧ мә хԝәй дькә у кʹаре мәрʹа тинә. Паши шьровәкьрьна 1 Йуһʹәнна 5:3, һун дькарьн ӧса жь ԝан бьпьрсьн: «Йаһоԝа Достәки гәләк баш ә, ләма жи әм ча гәрәке сәр рʹебәрийа ԝи бьньһерʹьн?» Пьрсед ӧса дькарьн али зарʹед ԝә бькьн, ԝәки әԝана ԛанунед Хԝәде ча избаткьрьна һʹәзкьрьна ԝи бьвиньн (Ишайа 48:17, 18).

11. Һун ча дькарьн али зарʹед хԝә бькьн, кӧ әԝана кʹара принсипед Кʹьтеба Пироз фәʹм кьн? (Мәтʹәлок 2:10, 11)

¹¹ Нишан кьн кӧ принсипед Кʹьтеба Пироз чьрʹа керһати нә. Гава һун Кʹьтеба Пироз йан рʹеза рʹоже тʹәвайи дьхуньн, дина ԝан бькʹьшиньн сәр ве йәке, кӧ малбәта ԝә жь принсипед Кʹьтеба Пироз чь кʹаре дьстинә. Мәсәлә, гәло зарʹа ԝә кʹара хәбатһʹәзийе у һʹәлалийе дьвинә? (Ибрани 13:18) Ӧса жи һун дькарьн нишан кьн, кӧ ча хәбьтандьна принсипед Кʹьтеба Пироз, бона сьһʹәт-ԛәԝата физики у емосийали керһати йә (Мәтʹәлок 14:29, 30). Шеԝьред ӧса дькарьн али зарʹед ԝә бькьн, кӧ әԝана ширәтед Кʹьтеба Пироз һе зедә ԛимәт кьн (Бьхунә Мәтʹәлок 2:10, 11).

12. Бьраки мә ча али кӧрʹе хԝә дькә, ԝәки әԝ кʹара принсипед Кʹьтеба Пироз бьвинә?

¹² Бьраки мә бь наве Стив, йе кӧ Франсайеда дьжи, дьбежә кӧ әԝи тʹәви жьна хԝә ча али кӧрʹе хԝә Итьн кьрийә, ԝәки әԝ ԛанунед Йаһоԝада һʹәзкьрьна ԝи бьвинә. «Мәсәлә, әм пьрсед ӧса дьдьнә ԝи : ‹Йаһоԝа чьрʹа дьхԝазә кӧ әм хԝә ль ве принсипе бьгьрьн? Әв принсип ча нишан дькә, кӧ әԝ мә һʹәз дькә? Һәрге тӧ ве принсипе пьшт гӧһе хԝәва бавежи, чь ԝе бьԛәԝьмә?›» Пьрсед ԝи щурʹәйи али Итьн кьрьн кӧ әԝ баԝәр бә, ԝәки ԛанунед Йаһоԝа дәрһәԛа нав-намусийе керһати нә. Стив дьбежә: «Әм дьхԝазьн али Итьн бькьн кӧ әԝ бьвинә, ԝәки биланийа Кʹьтеба Пироз жь биланийа мәрьва четьр ә».

13. Де-бав ча дькарьн али зарʹед хԝә бькьн, ԝәки әԝана хԝә ль принсипед Кʹьтеба Пироз бьгьрьн? Мәсәле биньн.

¹³ Али зарʹед хԝә бькьн, кӧ әԝана хԝә ль принсипед Кʹьтеба Пироз бьгьрьн. Һун дькарьн ве йәке бькьн, мәсәлә, гава зарʹед ԝә жь дәрсдаре хԝә дәрсәке дьстиньн, ԝәки кʹьтебәке бьхуньн. Дьбәкә ве кʹьтебеда мәрьвед һерс йан бенамус ча кәсед баш тенә әʹйанкьрьне. Һун дькарьн зарʹед хԝәрʹа бежьн, кӧ бьра әԝана бьфькьрьн, ԝәки ль гора Кʹьтеба Пироз ньһерʹандьна Йаһоԝа сәр кьред ӧса чь щурʹәйи йә (Мәтʹәлок 22:24, 25; 1 Корьнтʹи 15:33; Филипи 4:8). Әв йәк дькарә али зарʹед ԝә бькә, ԝәки кʹара биланийа Йаһоԝа фәʹм кьн. Ӧса жи гава мәкʹтәбеда дәрсдар фькьра шагьрта дәрһәԛа тʹема кӧ әԝана лекʹолин дькьн, бьпьрсә, дьбәкә мәщал зарʹед ԝәрʹа чебә, кӧ дәрһәԛа баԝәрийа хԝә гьли кьн.

АЛИ ЗАРʹЕД ХԜӘ БЬКЬН, ԜӘКИ БАԜӘРИЙА ХԜӘ БЬПʹАРЕЗЬН

14. Дьбәкә кʹижан тʹема бона щаһьла чәтьн бә у чьрʹа?

¹⁴ Щаһьларʹа щарна һеса нинә, ԝәки баԝәрийа хԝә бьпʹарезьн. Гава теорийа еволусийайе, демәк фькьра кӧ һәр тьшт хԝәха пешда һатийә, мәкʹтәбеда һин дькьн, дьбәкә әԝана бьтьрсьн кӧ бәʹса баԝәрийа хԝә бькьн. Гәло чьрʹа? Дьԛәԝьмә дәрсдар теорийа еволусийайе ча рʹастийа избаткьри нишан кә. Ле де-бавно һун ча дькарьн дьле зарʹед хԝә ԛәԝи кьн, ԝәки әԝана баԝәрийа хԝә бьпʹарезьн?

15. Чь дькарә али щаһьла бькә, ԝәки әԝана баԝәрийа хԝәда дӧдьли нәбьн?

¹⁵ Али зарʹед хԝә бькьн, ԝәки әԝана баԝәрийа хԝәда дӧдьли нәбьн. Бьра зарʹед ԝә шәрм нәкьн, кӧ әԝана баԝәрийа хԝә Әʹфьрандар тиньн (2 Тимотʹейо 1:8). Гәло чьрʹа? Бь рʹасти гәләк зандар жи фәʹм дькьн, кӧ жийин ньшкева хԝәха пешда нәһатийә. Әԝана тедәрдьхьн ԝәки жийин жь алийе кәсәки сәрԝахт пешда һатийә. Ләма жи әԝана теорийа еволусийайе, кʹижан кӧ гәләк мәкʹтәбада те һинкьрьне, ԛәбул накьн. Сәва кӧ баԝәрийа зарʹед ԝә дьһа ԛәԝи бә, бьра әԝана әʹдәбйәтед мәда лекʹолин кьн, кӧ һьнә хушк-бьра чьрʹа избат бунә, ԝәки Хԝәде әʹмьр дайә.c

16. Де-бав чаԝа дькарьн али зарʹед хԝә бькьн, ԝәки әԝана баԝәрийа хԝә һьндава Әʹфьрандар бьпʹарезьн? (1 Пәтрус 3:15) (Бьньһерʹә ӧса жи шькьл.)

¹⁶ Али зарʹед хԝә бькьн, ԝәки әԝана баԝәрийа хԝә һьндава Әʹфьрандар бьпʹарезьн (Бьхунә 1 Пәтрус 3:15). Тʹәви зарʹед хԝә әʹдәбйәтед мәда готаред дәрһәԛа теорийа еволусийайе бьгәрʹьн. Мәсәлә, сәр jw.org рʹеза готара бь наве «Пьрсед Щаһьла—Әʹфьрандьн йан Еволусийа», тʹәви ԝан шеԝьр кьн. Паше тедәрхьн һәла кʹижан фькьр бь тʹәхмина зарʹед ԝә дьһа керһати нә, ԝәки әԝана рʹастийа дәрһәԛа Әʹфьрандар мәрьварʹа избат кьн. Бинә бира зарʹед хԝә кӧ нәлазьм ә, ԝәки әԝана тʹәви һәвалдәрсханед хԝә бькʹәвьнә дәʹԝе. Зарʹед хԝәрʹа бежьн, кӧ һәрге кәсәк бьхԝазә дәрһәԛа ве тʹемайе тʹәви ԝан хәбәр дә, бьра әԝана фькьред хԝә пе гьлийед һеса у бь логики шьровәкьн. Мәсәлә, дьбәкә һәвалдәрсханәки ԝан ӧса бежә: «Әз тʹәне тьштед кӧ пе чʹәʹве хԝә дьвиньм, баԝәр дькьм, ле һʹәта ньһа мьн Хԝәде нәдитийә». Зарʹа ԝә дькарә ӧса щаба ԝи бьдә: «Бьдә бәр чʹәʹве хԝә, ԝәки тӧ нав мешәда дьгәрʹи у ньшкева бирәк дьвини, йа кӧ жь кәвьр чекьри йә. Һьнге тӧйе чь бьфькьри? Әв йәк кӧ ԝедәре бир һәйә, әшкәрә нишан дькә, ԝәки мәрьвәки сәрԝахт әԝ бир чекьрийә, ӧса нинә? Ле гәло әв йәк кӧ әʹрд у әʹзман һәнә, нишан накә ԝәки кәсәки сәрԝахт әԝ чекьрьнә?»

17. Де-бав ча дькарьн али зарʹед хԝә бькьн, ԝәки әԝана кәсед дьнрʹа дәрһәԛа рʹастийед Кʹьтеба Пироз гьли кьн? Мәсәле биньн.

¹⁷ Али зарʹед хԝә бькьн, ԝәки әԝана кәсед дьнрʹа рʹастийед Кʹьтеба Пироз гьли кьн (Рʹомайи 10:10). Хәбәрдана дәрһәԛа Кʹьтеба Пироз мина лехьстьна һащәта музике йә. Әԝе кӧ тʹәзә һин дьбә, серида дәстпедькә мьԛамәкә һеса һин бә. Ԝәʹдә шунда әԝ ида дьбә һостә. Мина ве йәке, гава Мәсиһики щаһьл кәсәкирʹа дәрһәԛа баԝәрийа хԝә гьли дькә, әԝ дькарә серида тьштед һеса бежә. Мәсәлә, әԝ дькарә жь һәвалдәрсхане хԝә ӧса бьпьрсә: «Тә заньбу кӧ инжинер гәләк щар дизайна әʹфринед тʹәбийәте копи дькьн? Әз дьхԝазьм видеокә һʹәԝас нишани тә кьм». Паши нишанкьрьна видеойа жь пʹара бь наве Гәло Әԝ Йәк Кәсәки Әʹфьрандийә?, әԝ дькарә ӧса бежә: «Һәрге зандар тьштед кӧ тʹәбийәтеда һәнә, копи дькьн у пʹайа дьстиньн, гәло йе кӧ хԝәха әԝ әʹфринед тʹәбийәте чекьрьнә, һежайи пәсьна нинә?» Бь сайа шеԝьред ӧса, дьбәкә һьнә щаһьл бьхԝазьн дәрһәԛа Әʹфьрандар һе зедә пебьһʹәсьн.

БӘРДӘԜАМ КЬН АЛИ ЗАРʹЕД ХԜӘ БЬКЬН, КӦ ӘԜАНА ҺЕ НЕЗИКИ ЙАҺОԜА БЬН

18. Де-бав ча дькарьн бәрдәԝам кьн али зарʹед хԝә бькьн, ԝәки баԝәрийа ԝан дьһа ԛәԝи бә?

¹⁸ Дьнеда гәләк мәрьв Йаһоԝа баԝәр накьн (2 Пәтрус 3:3). Ләма жи де-бавно, гава һун Кʹьтеба Пироз тʹәви зарʹед хԝә лекʹолин дькьн, дина ԝан бькʹьшиньн сәр тʹемед ӧса, йед кӧ ԝе али ԝан бькьн ԛәдьре Кʹьтеба Пироз у ԛанунед дәрһәԛа нав-намусийе бьгьрьн. Али ԝан бькьн, кӧ әԝана сәр әʹфринед тʹәбийәте бьфькьрьн. Дина ԝан бькʹьшиньн сәр тьштед кӧ Кʹьтеба Пирозда һатьбунә пʹехәмбәртикьрьне, у ида һатьнә сери. У йа лапә фәрз жи, һьм бона зарʹед хԝә, һьм жи тʹәви ԝан дӧа бькьн. Баԝәр бьн кӧ һәрге һун чь жь дәсте ԝә те бькьн, кӧ баԝәрийа зарʹед хԝә дьһа ԛәԝи кьн, Йаһоԝа ԝе әмәке ԝә кʹәрәм кә! (2 Дирок 15:7)