Әм Тʹӧ Щар Тʹәне Ниньн

1-2. (а) Әм жь кʹӧ заньн ԝәки чәтьнайед гьранда, әме тʹӧ щара тʹәне нәминьн? (б) Ве готареда әме чь пебьһʹәсьн?

ГАВА әм рʹасти чәтьнайед гьран тен, дьбәкә әм хԝә ӧса тʹәхмин кьн, те бежи әм нав мешәда ӧнда бунә у тʹәне манә. Ле бь рʹасти әм тʹәне ниньн. Баве мәйи әʹзмана чәтьнайед мә дьвинә у әԝи бь дьловани соз дайә, кӧ ԝе али мә бькә. Йаһоԝа хьзмәткʹаред хԝәйә амьнрʹа ӧса дьбежә: «Әзе али тә бькьм» (Ишайа 41:10, ДТʹ).

² Ве готареда, әме бьвиньн кӧ Йаһоԝа ча (1) рʹебәрийа мә дькә, (2) бона һʹәԝщед мә хәм дькә, (3) мә дьпʹарезә у (4) бәр дьле мәда те. Йаһоԝа соз дайә кӧ чь жи бьԛәԝьмә, әԝе тʹӧ щар мә бир нәкә у тʹәрка мә нәдә. Ләма жи әм тʹӧ щара тʹәне ниньн.

ЙАҺОԜА РʹЕБӘРИЙА МӘ ДЬКӘ

3-4. Йаһоԝа ча рʹебәрийа мә дькә? (Зәбур 48:14)

³ Бьхунә Зәбур 48:14. Йаһоԝа занә, ԝәки әм нькарьн хԝәха рʹебәрийа гавед хԝә бькьн. Ләма жи әԝ бь сайа Кʹьтеба Пироз рʹебәрийа мә дькә (Зәбур 119:105). Кʹьтеба Пироз али мә дькә ԝәки әм сафикьрьнед баш бькьн у һʹӧнӧред ӧса нав хԝәда пешда биньн, йед кӧ һьм ньһа мә бәхтәԝар дькьн һьм жи гӧмана жийина һʹәта-һʹәтайе дьдьнә мә.a Мәсәлә, Йаһоԝа мә һин дькә, ԝәки әм кʹине жь дьле хԝә дәрхьн, һәр тьштида һʹәлал бьн у жь дьл һәвдӧ һʹәз бькьн (Зәбур 37:8; Ибрани 13:18; 1 Пәтрус 1:22). Чахе әм ԝан һʹӧнӧра нав хԝәда пешда тиньн, әм дьбьнә де-бавед баш, жьн-меред баш у һәвалед баш.

⁴ Ӧса жи Кʹьтеба Пирозда Йаһоԝа бәʹса сәрһатийед һьнә мәрьва дькә, йед кӧ мина мә рʹасти чәтьнайед гьран дьһатьн у һәстед ԝан жи мина һәстед мә бун (1 Корьнтʹи 10:13; Аԛуб 5:17). Гава әм ван сәрһатийа дьхуньн у ширәтед кӧ әм жь ван сәрһатийа педьһʹәсьн, әʹмьре хԝәда дьдьнә хәбате, әм һәри кем бь дӧ щурʹа кʹаре дьстиньн: Йа әʹԝльн, әм фәʹм дькьн ԝәки әм тʹәне ниньн, мина мә кәсед дьн жи рʹасти дәрәщед чәтьн һатьнә у бь аликʹарийа Йаһоԝа ԝана әв чәтьнайед хԝә алт кьрьнә (1 Пәтрус 5:9). Йа дӧда, әм һин дьбьн кӧ ча һьмбәри чәтьнайед хԝә сәбьр кьн у шабуне ӧнда нәкьн (Рʹомайи 15:4).

5. Йаһоԝа бь сайа кʹе рʹебәрийа мә дькә?

⁵ Йаһоԝа ӧса жи бь сайа хушк-бьра рʹебәрийа мә дькә.b Мәсәлә, бәрпьрсийаре мьһале те щьвата мә, ԝәки һелане бьдә мә у мә бьшьдинә. Готаред ԝи баԝәрийа мә дьһа ԛәԝи дькьн у али мә дькьн йәктийе хԝәй кьн (Кʹаред Шандийа 15:40-16:5). Рʹуспийед щьвате жи бона рʹӧһʹанийа һәр мьзгинванәки хәм дькьн (1 Пәтрус 5:2, 3). Де-бав рʹебәрийа зарʹед хԝә дькьн у али ԝан дькьн, ԝәки әԝана Йаһоԝа һʹәз бькьн, сафикьрьнед баш бькьн у хәйсәт-һʹӧнӧред баш нав хԝәда пешда биньн (Мәтʹәлок 22:6). Хушкед мәйә рʹӧһʹанида гьһишти жи бона хушкед щаһьл дьбьнә мәсәлә, ширәтед керһати дьдьнә ԝан у дьле ԝан ԛәԝи дькьн (Тито 2:3-5).

6. Сәва кӧ әм жь рʹебәрийа Йаһоԝа кʹаре бьстиньн, әм гәрәке чь бькьн?

⁶ Гәло әм ча дькарьн нишан кьн, ԝәки әм бона рʹебәрийа Йаһоԝа шекьрдар ьн? Мәтʹәлок 3:5, 6 ӧса дьбежә: «Бь тʹәмамийа дьле хԝә хԝә бьсперә Хӧдан, гӧмана хԝә нәдә ль сәр һʹьше хԝә». Һәрге әм ӧса бькьн, Йаһоԝа ԝе «һʹәму шьвәрʹийед [мә] рʹаст-дуз кә», демәк ԝе али мә бькә, ԝәки әм хԝә жь гәләк кӧл-дәрда дур бьгьрьн у бь әʹмьрәки бәхтәԝар бьжин. Гәло әм шекьрдар ниньн, кӧ Йаһоԝа бь һʹәзкьрьне ширәта дьдә мә? (Зәбур 32:8)

ЙАҺОԜА БОНА ҺʹӘԜЩЕД МӘ ХӘМ ДЬКӘ

7. Йаһоԝа бона кʹижан һʹәԝщед мә хәм дькә? (Филипи 4:19)

⁷ Бьхунә Филипи 4:19. Хенщи ве йәке кӧ Йаһоԝа алийе рʹӧһʹанида рʹебәрийа мә дькә, әԝ ӧса жи али мә дькә кӧ әм хԝәрʹа кʹьнщ, щи-сьтʹар у хԝарьне дәстхьн (Мәтта 6:33; 2 Тʹесалоники 3:12). Һәмьки нормал ә кӧ әм бона һʹәԝщед хԝә хәм дькьн, ле Йаһоԝа дьбежә кӧ әм гәрәке бона тьштед ӧса бь зедәйи хәм нәкьн (Мәтта 6:25). Гәло чьма? Чьмки Баве мә хьзмәткʹаред хԝәйә амьн тʹӧ щар наһелә (Мәтта 6:8; Ибрани 13:5). Йаһоԝа соз дайә ԝәки әԝе бона һʹәԝщед мә хәм бькә, у әм дькарьн итʹбарийа хԝә созе ԝи биньн.

8. Йаһоԝа ча али Даԝьд дькьр?

⁸ Дина хԝә бьдьне кӧ Йаһоԝа ча али Даԝьд Пʹадша дькьр. Гава әԝ жь Шаԝул дьрʹәвийа, Йаһоԝа бона һʹәԝщед ԝи у һәвалед ԝи хәм дькьр. Дәрһәԛа ве йәке Даԝьд ӧса гот: «Әз зарʹ бумә у ньһа жи мәзьн бумә, мьн нәдитийә йе рʹаст ԝеда авити, йан жи зарʹед ԝи кӧ нен пʹарс кьн» (Зәбур 37:25). Мина Даԝьд, дьбәкә тә жи әʹмьре хԝәда гәләк щар дитийә, ԝәки Йаһоԝа ча бь дьловани бона һʹәԝщед хьзмәткʹаред хԝәйә амьн хәм кьрийә.

9. Ԝәʹде тʹәшԛәла Йаһоԝа чаԝа бона һʹәԝщед хьзмәткʹаред хԝә хәм дькә? (Бьньһерʹә ӧса жи шькьл.)

⁹ Ԝәʹде тʹәшԛәла жи Йаһоԝа бона һʹәԝщед хьзмәткʹаред хԝә хәм дькә. Гава ԛьрʹна йәкеда хәлайикә мәзьн пешда һат, Мәсиһийед жь гәләк ԝәлата бона хушк-бьред зьрардити тьштед лазьм шандьн (Кʹаред Шандийа 11:27-30; Рʹомайи 15:25, 26). Иро жи хьзмәткʹаред Хԝәде дәствәкьри нә. Гава тʹәшԛәләк дьԛәԝьмә, Йаһоԝа бь сайа хьзмәткʹаред хԝә тьштед ӧса ча ав, хԝарьн, кʹьнщ у дәрман дьгьһинә ԝан хьзмәткʹаред хԝә, йед кӧ һʹәԝщә нә. Хушк-бьред жь кʹома авакьрьне малед хушк-бьра у Одед Щьвата тʹәзә дькьн. Ӧса жи хьзмәткʹаред Йаһоԝа бь сайа Кʹьтеба Пироз бәр дьле ԝан хушк-бьрада тен, йед кӧ мәрьвед хԝәйә һʹәзкьри ӧнда кьрьнә.c

10-11. Әм жь сәрһатийа Борис чь һин дьбьн?

¹⁰ Хенщи ве йәке, Йаһоԝа бь мәрʹдани бона һʹәԝщед ԝан мәрьва жи хәм дькә, йед кӧ һе нәбунә хьзмәткʹаред ԝи, у әм жи мәщала дьгәрʹьн, ԝәки чʹәʹв бьдьнә Йаһоԝа у һьндава ԝан мәрьвда ԛәнщ бьн (Галати 6:10). Әв йәк дькарә али ԝан бькә ԝәки һьм мә һьм жи Йаһоԝа дьһа баш нас кьн. Ԝәрә әм дина хԝә бьдьнә сәрһатийа директоре мәкʹтәбәкә ль Украинайе, бь наве Борис. Әԝ Шәʹде Йаһоԝа нинә, ле әԝ һәртʹьм һьндава шагьртед хԝә, йед кӧ Шәʹдед Йаһоԝа бун, һʹәйф бу у ԛәдьре баԝәрийа ԝан дьгьрт. Гава Борис сафи кьр жь бо шәрʹ жь гӧнде хԝә бьрʹәвә у һәрʹә щики дьн, бьред мә али ԝи кьрьн. Ԝәхт шунда Борис чу сәр Биранина Мьрьна Иса Мәсиһ. Әԝ дьбежә: «Шәʹдед Йаһоԝа һьндава мьнда гәләк һʹәйф бун у бона мьн хәм дькьрьн. Әз гәләк жь ԝан рʹази мә!»

¹¹ Мина Баве мәйи дьлован, ԝәрә әм жи ԛәнщийе бона һәр кәси бькьн, һьм бона хушк-бьред хԝә һьм жи бона кәсед кӧ Йаһоԝарʹа хьзмәт накьн (Луԛа 6:31, 36). Әм баԝәр ьн кӧ ԛәнщийа мә ԝе али мәрьва бькә, ԝәки әԝана бьбьнә хьзмәткʹаред Йаһоԝа (1 Пәтрус 2:12). Чь жи һәбә, әм дӧдьли набьн, ԝәки «бәхтәԝари һе зедә дайинеда йә, нә кӧ стандьнеда» (Кʹаред Шандийа 20:35).

ЙАҺОԜА МӘ ДЬПʹАРЕЗӘ

12. Йаһоԝа соз дайә кӧ әԝе хьзмәткʹаред хԝә ча бьпʹарезә? (Зәбур 91:1, 2, 14)

¹² Бьхунә Зәбур 91:1, 2, 14. Йаһоԝа соз дайә, кӧ әԝе хьзмәткʹаред хԝә бьпʹарезә жь һәр тьште кӧ дькарә зьраре бьдә достийа ԝан тʹәви ԝи. Әԝе тʹӧ щара изьне нәдә Мире-щьна, ԝәки әԝ рʹийа хьзмәткʹаред Ԝи бьгьрә жерʹа хьзмәт кьн (Йуһʹәнна 17:15). Гава «тәнгасийа мәзьн» дәстпебә, Йаһоԝа ԝе һьм али мә бькә ԝәки әм жерʹа амьн бьминьн, һьм жи ԝе мә бьпʹарезә (Әʹйанти 7:9, 14).

13. Йаһоԝа ча мә дьпʹарезә?

¹³ Гәло Йаһоԝа һәр кәси жь мә чаԝа дьпʹарезә? Мәсәлә, бь сайа Ньвисаред Пироз әԝ али мә дькә, ԝәки әм тедәрхьн кӧ чь рʹаст ә у чь на (Ибрани 5:14). Гава әм хԝә ль ԛанунед Кʹьтеба Пироз дьгьрьн, әм достийа хԝә тʹәви ԝи хԝәй дькьн у сафикьрьнед баш дькьн, йед кӧ али мә дькьн бәхтәԝар бьн у мьԛати сьһʹәт-ԛәԝата хԝә бьн (Зәбур 91:4). Ӧса жи Йаһоԝа бь сайа щьвате мә дьпʹарезә (Ишайа 32:1, 2). Чахе әм хԝә ль ԝан хушк-бьра дьгьрьн, йед кӧ ль гора ԛанунед Йаһоԝа дьжин, әм һелан у ԛәԝате дьстиньн, ԝәки хԝә жь хьрабийе дур бьгьрьн (Мәтʹәлок 13:20).

14. (а) Хԝәде чьма мә жь һʹәму тәнгасийа хԝәй накә? (б) Зәбур 9:10-да чь соз һатийә дайине? (Ӧса жи бьньһерʹә спартьн.)

¹⁴ Ԝәʹде бәре Йаһоԝа һьнә хьзмәткʹаред хԝә жь мьрьне у ԛәзийа хԝәй дькьр. Ле әԝи һәртʹьм ӧса нәдькьр. Щарна тьштед ӧса дькарьн бенә сәре мә, чь кӧ әм һивийе нибун (Ԝаиз 9:11). Ӧса жи ԝәʹде бәре Йаһоԝа изьн дьда, ԝәки хьзмәткʹаред ԝи рʹасти зӧлмийе бен. Һьнә хьзмәткʹаред Хԝәде һәла һе һатьнә кӧштьне жи. Ӧса һатә избаткьрьне кӧ Мире-щьна дәрәԝин ә (Ибо 2:4-6; Мәтта 23:34). Иро жи дьбәкә Йаһоԝа мә жь һʹәму тәнгасийа хԝәй нәкә. Ле диса жи әм дькарьн баԝәр бьн, ԝәки әԝе тʹӧ щар пьшта хԝә нәдә ԝан кәса, йед кӧ ԝи һʹәз дькьнd (Зәбур 9:10).

ЙАҺОԜА БӘР ДЬЛЕ МӘДА ТЕ

15. Әм чаԝа бь сайа дӧа, Кʹьтеба Пироз у хушк-бьра бәрдьлийе дьстиньн? (2 Корьнтʹи 1:3, 4)

¹⁵ Бьхунә 2 Корьнтʹи 1:3, 4. Щарна әм хәмгин дьбьн, дьлтәнг ьн йан дәрде гьран дькʹьшиньн. Дьбәкә хут ньһа тӧ дәрәщәкә гьранда ни у тʹәнебуне тʹәхмин дьки. Гәло кәсәк һʹале тә фәʹм дькә? Бәле, Йаһоԝа һʹале тә рʹьнд фәʹм дькә. Әԝ һаж дәрдед мә һәйә у «нава һʹәму тәʹли-тәнгийада дьл дьдә бәр мә». Гәло чь щурʹәйи? Гава әм Йаһоԝарʹа дӧа дькьн, әԝ «әʹдьлайийа Хԝәде кӧ жь һәр һʹьш-аԛьли дәрбазтьр ә» дьдә мә (Филипи 4:6, 7). Ӧса жи гава әм Кʹьтеба Пироз дьхуньн, дьле мә рʹьһʹәт дьбә, әм педьһʹәсьн кӧ Йаһоԝа чьԛас мә һʹәз дькә у әԝ билани у гӧмане дьдә мә. Хенщи ве йәке, сәр щьвата әм жь Кʹьтеба Пироз у жь һʹәзкьрьна хушк-бьра бәрдьлийа мәзьн дьстиньн.

16. Әм жь сәрһатийа Натʹан у Прискилайе чь һин дьбьн?

¹⁶ Сәрһатийа Натʹан у Прискилайе, йед кӧ ль Америкайе дьжин, нишан дькә, кӧ Йаһоԝа ча бь сайа Кʹьтеба Пироз бәр дьле мәда те у мә ԛәԝи дькә. Чәнд сал пешда, ԝана сафи кьр дәрбази щики дьн бьн, кʹидәре кӧ һʹәԝщәтийа хьзмәткʹара һәбу. Натʹан дьбежә: «Әм баԝәр бун, кӧ Йаһоԝа ԝе сафикьрьна мә кʹәрәм кә». Ле чахе әԝана гьһиштьнә ви щийи, әԝана нәхԝәш кʹәтьн у рʹасти проблемед економики һатьн. Ахьрийеда әԝана мәщбур бун пашда вәгәрʹьн мала хԝә. Ԝедәре жи алийе материалида һʹале ԝан баш нәбу. Натʹан ӧса дьбежә: «Әз бәр хԝә дькʹәтьм, кӧ чьрʹа Хԝәде әм бь ви щурʹәйи кʹәрәм нәкьрьн, чаԝа кӧ әм һивийе бун. Әз һәла һе хәмгин жи дьбун, кӧ дьԛәԝьмә мьн шаши кьрьбу». Ле ԝәхт шунда Натʹан у Прискилайе фәʹм кьрьн, ԝәки Йаһоԝа пьшта хԝә нәдабу ԝан. Натʹан дьбежә: «Ԝан рʹожед чәтьнда, Кʹьтеба Пироз бона мә бьбу ча досте билан, кӧ дьле мә ԛәԝи дькьр у рʹебәрийа мә дькьр. Гава мә дина хԝә дьда нә кӧ чәтьнайед хԝә, ле ве йәке кӧ Йаһоԝа ча али мә дькьр, ԝәки әм һьмбәри тәнгасийа сәбьр кьн, баԝәрийа мә дьһа ԛәԝи дьбу, кӧ Йаһоԝа ԝе ахьрийеда жи тʹьме али мә бькә».

17. Хушка мә Һелга чаԝа бәрдьли дьстанд? (Бьньһерʹә ӧса жи шькьл.)

¹⁷ Хушк-бьред мә жи дькарьн бәр дьле мәда бен. Гәло чаԝа? Ԝәрә әм дина хԝә бьдьнә сәрһатийа хушка мә Һелга, йа кӧ ль Һунгаристане дьжи. Жь бо чәтьнайа, рʹасти кʹижана кӧ әԝ бь дәһа сала дьһат, әԝе хԝә бечʹарә у беԛимәт һʹәсаб дькьр. Ле гава әԝ дәрһәԛа ԝан салед чәтьн дьфькьрә, әԝ фәʹм дькә кӧ Йаһоԝа ча бь сайа щьвате бәрдьли дьда ԝе. Һелга ӧса дьньвисә: «Чахе әз жь бо хәбата хԝә, хԝәйкьрьна кӧрʹе хԝәйи нәхԝәш у чәтьнайед дьн ԛьдум дькʹәтьм, Йаһоԝа тʹьме али мьн дькьр. Нава ван 30 салед пашьнда, рʹожәк жи дәрбаз нәбуйә кӧ Йаһоԝа созе хԝә нәанийа сери ԝәки бәр дьле мьнда бе. Әԝ гәләк щар бь сайа гьлийед кәсед дьн, бәр дьле мьнда дьһат у мьн ԛәԝи дькьр. Щарна чахе әз гәләк бәр хԝә дькʹәтьм, хут һьнге кәсәки мьнрʹа нәʹма йан смс дьшанд у пʹайе мьн дьда».

18. Әм ча дькарьн бәр дьле кәсед дьнда бен?

¹⁸ Мина Хԝәдайе хԝә, әм жи дькарьн бәрдьлийе бьдьнә кәсед дьн. Гәло чь щурʹәйи? Әм дькарьн бь сәбьр гӧһ бьдьнә ԝан, бь дьлгәрми тʹәви ԝан хәбәр дьн у али ԝан бькьн (Мәтʹәлок 3:27). Әм дьхԝазьн бәр дьле һәр кәсида бен, һәла һе бәр дьле ԝан мәрьвада жи, йед кӧ һе Йаһоԝарʹа хьзмәт накьн. Гава мәрьвед дәр-дора мә хәмгин ьн, нәхԝәш ьн, йан жи дәрдәки гьран дькʹьшиньн, әм сәрики ԝан дьхьн, гӧһ дьдьнә ԝан у бь сайа Кʹьтеба Пироз бәрдьлийе дьдьнә ԝан. Гава әм чʹәʹв дьдьнә Йаһоԝа, «Хԝәдейе һʹәму бәрдьлийе», әме нә тʹәне али хушк-бьред хԝә бькьн, йед кӧ кʹәтьнә тәнгасийе, ле мәщале бьдьнә нәбаԝәрмәнда жи, кӧ бьхԝазьн Йаһоԝа нас кьн (Мәтта 5:16).

ЙАҺОԜА ТʹЬМЕ КʹЕЛӘКА МӘ ЙӘ

19. Йаһоԝа ча али мә дькә, у әм ча дькарьн чʹәʹв бьдьнә ԝи?

¹⁹ Йаһоԝа бь дьловани бона ԝан мәрьва хәм дькә, йед кӧ ԝи һʹәз дькьн. Гава әм рʹасти чәтьнайа тен, әԝ мә тʹәне наһелә. Чаԝа кӧ де-бав бь һʹәзкьрьне зарʹед хԝә дьбьнә хԝәйи, Йаһоԝа жи хьзмәткʹаред хԝәйә амьн дьбә хԝәйи. Әԝ рʹебәрийа мә дькә, бона һʹәԝщед мә хәм дькә, мә дьпʹарезә у бәр дьле мәда те. Чахе әм бәрдьлийе у аликʹарийе дьдьнә кәсед дьн, бь ве йәке әм чʹәʹв дьдьнә Баве хԝәйи әʹзмана. Әм рʹасти чь чәтьнайа жи бен, әм дькарьн дӧдьли нәбьн, кӧ Йаһоԝа тʹәви мә йә. Әԝи ӧса соз дайә: «Нәтьрсә, чьмки әз тʹәви тә мә» (Ишайа 41:10, ДТʹ). Әв соз бь рʹасти жи баԝәрийа мә дьһа ԛәԝи дькә, кӧ әме тʹӧ щар тʹәне нәминьн!