Бьред Щаһьл, Чʹәʹв Бьдьнә Маркос у Тимотʹейо

1-2. Чь дькарьбу рʹийа Маркос у Тимотʹейо бьгьрта, ԝәки хьзмәтийеда һе зедә кʹар нәкьрана?

БЬРЕД щаһьл, гәло һун нахԝазьн хьзмәтийеда дьһа зедә кʹар бькьн у али хушк-бьра бькьн? Әм баԝәр ьн ԝәки һун дьхԝазьн ве йәке бькьн. Чьԛас баш ә кӧ гәләк хорт һазьр ьн аликʹарийе бьдьнә кәсед дьн! (Зәбур 110:3) Ле дьбәкә щарна тӧ дьфькьри, ԝәки тәрʹа һеса нинә али хушк-бьра бьки. Йан тӧ хԝә жь ве йәке паш дьхи, чьмки ньзани кӧ ча әв йәк ԝе сәр әʹмьре тә һʹӧкӧм кә. Йан жи дьбәкә тә щабдари ԛәбул нәкьрийә, чьмки фькьри йи кӧ тӧйе нькарьби ве щабдарийе бини сери. Һәрге ӧса нә, баԝәр бә кӧ кәсед дьн жи мина тә рʹасти ԝан чәтьнайа һатьнә.

² Мәсәлә, ԛьрʹна йәкеда Маркос у Тимотʹейо рʹасти чәтьнайед ӧса дьһатьн. Рʹаст ә ԝана ньзаньбу кӧ әʹмьре ԝан ԝе ча бе гӧһастьне у әԝана һаԛас щерʹьбанди нибун, ле йәкә әԝана һазьр бун дьһа зедә хьзмәтийеда кʹар бькьн у али кәсед дьн бькьн. Дьбәкә Маркос тʹәви дийа хԝә маләкә башда дьжит, гава Паԝлосе шанди у Барнабас гази ԝи кьрьн, ԝәки тʹәви ԝан һәрʹә рʹеԝитийа мисйонертийә пешьн (Кʹаред Шандийа 12:12, 13, 25). Сәва кӧ хьзмәтийа хԝә зедә кә, Маркос һазьр бу мала хԝә бьһелә. Бәри пешьн, әԝ дәрбази Әнтакйайе бу. Паше әԝ тʹәви Паԝлос у Барнабас чу щийед дьһа дур жи (Кʹаред Шандийа 13:1-5). Гава Паԝлос гази Тимотʹейо кьр ԝәки тʹәви ԝи һәрә у мьзгинийе бәла кә, Тимотʹейо жи дьбәкә тʹәви де-баве хԝә дьжит. Тимотʹейо һе щаһьл у нәщерʹьбанди бу, ләма жи әԝи дькарьбу бьфькьрийа, ԝәки әԝ һазьр нинә тʹәви Паԝлос һәрʹә рʹеԝитийе (Бәрамбәр кә 1 Корьнтʹи 16:10, 11 у 1 Тимотʹейо 4:12). Ле диса жи әԝ тʹәви Паԝлос чу у гәләк кʹәрәм стандьн (Кʹаред Шандийа 16:3-5).

3. (а) Әм жь кʹӧ заньн ԝәки Маркос у Тимотʹейо бона Паԝлос гәләк ԛимәт бун? (2 Тимотʹейо 4:6, 9, 11) (Бьньһерʹә ӧса жи шькьл.) (б) Ве готареда әме щабед кʹижан пьрса бьстиньн?

³ Маркос у Тимотʹейо щаһьлтийа хԝәда һин бун, кӧ ча щурʹә-щурʹә щабдарийа щьватеда биньн сери у бунә кәсед щерʹьбанди. Паԝлос гәләк ԝан хортед щаһьл ԛимәт дькьр. Гава әԝи фәʹм кьр кӧ мьрьна ԝи ида незик ә, әԝи гази ԝан кьр ԝәки бенә щәм ԝи (Бьхунә 2 Тимотʹейо 4:6, 9, 11). Гәло Паԝлос чьрʹа Маркос у Тимотʹейо һʹәз дькьр? Бьред щаһьл ча дькарьн чʹәʹв бьдьнә ԝан? У ча бьред щаһьл дькарьн жь ширәтед Паԝлосе шанди кʹаре бьстиньн? Ве готареда әме ԝан пьрса шеԝьр кьн.

МИНА МАРКОС БЬ ХИРӘТ ХЬЗМӘТ КӘ

4-5. Маркос ча нишан кьр, ԝәки әԝ һазьр ә бь хирәт хьзмәт кә у али кәсед дьн бькә?

⁴ Ль гора канике, әв йәк кӧ мәрьв кәсед дьнрʹа хьзмәт дькә, те һʹәсабе ԝәки әԝ бь дьл у щан али ԝан дькә. Ве йәкеда Маркос мәсәләкә баш һишт. Гава Паԝлос нәхԝәст Маркос тʹәви хԝә бьвә рʹеԝитийа дӧда, дьбәкә Маркос хәмгин бу (Кʹаред Шандийа 15:37, 38). Ле диса жи Маркос тʹәрка хьзмәтийе нәда у бәрдәԝам кьр али хушк-бьра бькә.

⁵ Маркос тʹәви мәрьве хԝә Барнабас, чу щийе дьн хьзмәт кә. Ԝәкә 11 сал шунда, гава Паԝлос щара пешьн Рʹомеда кʹәтә кәле, Маркос у чәнд кәсед дьн аликʹари данә ԝи (Фьлимон 23, 24). Паԝлос бона аликʹари у бәрдьлийе гәләк жь Маркос рʹази бу (Колоси 4:10, 11).

6. Маркос жь һәвалтийа тʹәви хушк-бьред рʹӧһʹанида гьһишти чь кʹар дьстанд? (Бьньһерʹә спартьн.)

⁶ Маркос жь һәвалтийа тʹәви хушк-бьред гьһишти кʹарәкә мәзьн дьстанд. Паши ве йәке кӧ әԝ чәндәке ль Рʹоме щәм Паԝлос мабу, әԝ чу Бабилоне, бал Пәтрусе шанди. Маркос у Пәтрус һаԛас незики һәв бун, ԝәки Пәтрус жерʹа гот «лаԝе мьн Марԛос» (1 Пәтрус 5:13). Ча те кʹьфше, Пәтрус һәвале хԝәйи щаһьлрʹа бәʹса жийин у хьзмәтийа Иса кьр, у Маркос әв йәк Мьзгинийа хԝәда ньвиси.a

7. Бьраки щаһьл бь наве Сенг-Ԝу ча чʹәʹв да Маркос? (Бьньһерʹә ӧса жи шькьл.)

⁷ Бәле, Маркос бәрдәԝам дькьр бь хирәт хьзмәт кә у хԝә ль бьред гьһишти дьгьрт. Гәло тӧ ча дькари чʹәʹв бьди Маркос? Дьԛәԝьмә тә дьхԝәст бьби рʹуспи йан жи бәрдәстийе щьвате, ле һʹәта ньһа әв щабдари тәрʹа нәһатийә дайине. Һәрге ӧса нә, сәбьр кә у мәщалед дьн бьгәрʹә ԝәки Йаһоԝарʹа у щьватерʹа хьзмәт ки. Ԝәрә әм дина хԝә бьдьнә сәрһатийа бьре мә Сенг-Ԝу, йе кӧ ньһа рʹуспи йә. Гава әԝ щаһьл бу, әԝи хԝә бәрамбәри бьред дьн дькьр. Жь ԝан бьра, һьнәка пешийа ԝи щабдари стандьн. Жь бо ве йәке Сенг-Ԝу бәр хԝә кʹәт, чьмки фькьри ԝәки шьхӧлед ԝи навиньн у чу дьле хԝә бьред гьһиштирʹа вәкьр. Рʹуспики жерʹа гот, кӧ һәрге һьнә шьхӧлед кӧ әԝ дькә найен дитьне жи, бьра әԝ бәрдәԝам кә чь жь дәсте ԝи те бькә, ԝәки али кәсед дьн бькә. Сенг-Ԝу гӧһ да ве ширәте у дәстпекьр хушк-бьред әʹмьрда мәзьн у кәсед дьн бьвә щьвина. Әԝ ӧса дьбежә: «Мьн фәʹм кьр кӧ чь те һʹәсабе бь хирәт хьзмәт кьн у али кәсед дьн бькьн. Чахе мьн ӧса дькьр, әз гәләк бәхтәԝар дьбум».

МИНА ТИМОТʹЕЙО БЬ ҺʹӘЗКЬРЬНЕ БОНА КӘСЕД ДЬН ХӘМ БЬКӘ

8. Паԝлосе шанди чьма Тимотʹейо бьжарт кӧ тʹәви ԝи һәрʹә рʹеԝитийе? (Филипи 2:19-22)

⁸ Гава Паԝлос вәдьгәрʹийа ԝан шәһәра, кʹидәре кӧ әԝ рʹасти пәйкʹәтьне һатьбу, жерʹа һәвалед мерхас лазьм бун ԝәки тʹәви ԝи һәрʹьн. Пешийе әԝи бьраки щерʹьбанди бь наве Силас бьжарт, кӧ тʹәви хԝә бьвә (Кʹаред Шандийа 15:22, 40). Ԝәхт шунда Паԝлос Тимотʹейо жи бьжарт, ԝәки тʹәви ԝи һәрʹә рʹеԝитийе. Гәло чьрʹа? Мәʹник әв бу, кӧ Тимотʹейо хԝәйе навәки баш бу (Кʹаред Шандийа 16:1, 2). Ӧса жи әԝи жь дьл дина хԝә дьда һʹәԝщед мәрьва у бона ԝан хәм дькьр (Бьхунә Филипи 2:19-22).

9. Тимотʹейо ча дьда кʹьфше, ԝәки әԝ дькʹәтә һʹәйра хушк-бьра?

⁹ Тимотʹейо жь дәстпека хьзмәтийа хԝәйә тʹәви Паԝлос, һе зедә дькʹәтә һʹәйра кәсед дьн, нә кӧ һʹәйра хԝә. Ләма жи Паԝлос әԝ ль Бәройайе һишт, ԝәки әԝ һелане бьдә ԝан мәрьва, йед кӧ тʹәзә һатьбун сәр рʹийа рʹастийе (Кʹаред Шандийа 17:13, 14). Ԝи чахи Тимотʹейо бе шьк жь мәсәла Силас кʹарәкә мәзьн дьстанд, йе кӧ тʹәви ԝи Бәройайеда ма. Ле паше Паԝлос Тимотʹейо тʹәне шандә Тʹесалонике, ԝәки хушк-бьред ԝедәре ԛәԝи кә (1 Тʹесалоники 3:2). Паши ве йәке, нава 15 салада һʹәзкьрьна Тимотʹейо һьндава хушк-бьра дьһа ԛәԝи дьбу у әԝ һин бу «тʹәви йед дьгьрин [бьгьри]», демәк әԝ дькʹәтә һʹәйра ԝан мәрьва, йед кӧ кӧл-дәрд дькʹьшандьн (Рʹомайи 12:15; 2 Тимотʹейо 1:4). Гәло бьред щаһьл ча дькарьн чʹәʹв бьдьнә Тимотʹейо?

10. Бьраки бь наве Ԝу Щей ча һин бу кӧ дьһа зедә бькʹәвә һʹәйра мәрьва?

¹⁰ Бьраки бь наве Ԝу Щей, һин бу кӧ дьһа зедә бькʹәвә һʹәйра мәрьва. Гава әԝ щаһьл бу, ԝирʹа чәтьн бу тʹәви хушк-бьред әʹмьрда мәзьн бькʹәвә хәбәрдане. Ләма жи әԝи Ода Щьватеда тʹәне сьлав дьда ԝан у дьчу. Рʹуспики ширәт да Ԝу Щей, ԝәки әԝ бежә хушк-бьра кӧ чьма ԝана ԛимәт дькә, у ӧса тʹәви ԝан бькʹәвә хәбәрдане. Ӧса жи әԝи жерʹа гот, кӧ әԝ бьфькьрә ԝәки дәрһәԛа чь дькарә тʹәви хушк-бьра хәбәр дә, кӧ ԝанрʹа һʹәԝас бә. Ԝу Щей гӧһ да ве ширәте у дәстпекьр дьһа зедә бькʹәвә һʹәйра хушк-бьра. Ньһа әԝ рʹуспи йә у ӧса дьбежә: «Ньһа бона мьн дьһа һеса йә һьм тʹәви щаһьла, һьм жи тʹәви кәсед әʹмьрда мәзьн дәрһәԛа тʹемед кʹур хәбәр дьм. Әз ша мә ԝәки әз һʹале хушк-бьра дьһа баш фәʹм дькьм, чьмки бь сайа ве йәке әз дькарьм али ԝан бькьм».

11. Бьред щаһьл ча дькарьн бькʹәвьнә һʹәйра хушк-бьра? (Бьньһерʹә ӧса жи шькьл.)

¹¹ Бьред щаһьл, һун жи дькарьн һин бьн бькʹәвьнә һʹәйра мәрьва. Гава һун дьчьн щьвата, һьм тʹәви кәсед щаһьл һьм жи тʹәви кәсед әʹмьрда мәзьн хәбәр дьн. Бьпьрсьн кӧ әԝ чаԝа ньн у гӧһ бьдьнә ԝан. Һеди-һеди һуне тедәрхьн кӧ ча дькарьн али ԝан бькьн. Мәсәлә, дьбәкә һун бьвиньн кӧ хушк йан бьраки әʹмьрда мәзьнрʹа аликʹари лазьм ә кӧ һин бә JW Library ^® бьдә хәбате. Йан жи, дьбәкә һун бьвиньн ԝәки ԝана хԝәрʹа кәсәк нәдитийә кӧ тʹәвайи дәркʹәвьнә хьзмәтийе. Гәло һун дькарьн али ԝан бькьн, ԝәки әԝана һин бьн һащәтед хԝәйә електроник бьдьнә хәбате, йан жь тʹәви ԝан дәркʹәвьн хьзмәтийе? Гава һун али кәсед дьн дькьн, һун бона щьвате дьбьнә мәсәләкә баш.

ЖЬ ШИРӘТЕД ПАԜЛОСЕ ШАНДИ КʹАРЕ БЬСТИНӘ

12. Бьред щаһьл ча дькарьн жь ширәтед, кӧ Паԝлос дабун Тимотʹейо, кʹаре бьстиньн?

¹² Сәва кӧ Тимотʹейо әʹмьр у хьзмәтийа хԝәда пешдачуйи буйа, Паԝлос һьнә ширәтед керһати да ԝи (1 Тимотʹейо 1:18; 2 Тимотʹейо 4:5). Бьред щаһьл, һун жи дькарьн жь ширәтед Паԝлосе шанди кʹаре бьстиньн. Гәло чаԝа? Дӧ нәʹмед Паԝлос Тимотʹейорʹа, ӧса бьхуньн ԛәй те бежи әԝ ԝәрʹа һатьнә ньвисаре у тедәрхьн кӧ һун кʹижан ширәта дькарьн әʹмьре хԝәда бьдьнә хәбате. Ньһа әме чәнд мәсәла шеԝьр кьн.

13. Сәва кӧ әм дьһа незики Йаһоԝа бьн, әм гәрәке чь бькьн?

¹³ «Хԝә хԝәденасийеда һиндар кә» (1 Тимотʹейо 4:7б). Әм найнә буйине бь амьнийа һьндава Йаһоԝада, ләма жи лазьм ә ви һʹӧнӧри нав хԝәда пешда биньн. Хәбәра Йунани «һиндар кә», йа кӧ ве рʹезеда ньвисар ә, гәләк щар бона спортсменәки хирәт дьданә хәбате. Сәва кӧ спортсмен сәркʹәти бьн, лазьм ә ԝәки әԝана тʹьме дина хԝә бьдьнә нета хԝә. Мина ԝан, лазьм ә ԝәки әм жи дина хԝә бьдьнә нета хԝә у тьштед ӧса хԝәрʹа бькьнә хәйсәт, йед кӧ али мә дькьн дьһа незики Йаһоԝа бьн.

14. Гава әм Кʹьтеба Пироз дьхуньн, нета мә гәрәке чь бә? Мәсәләке бинә.

¹⁴ Гәләк фәрз ә ԝәки әм хԝәрʹа бькьнә хәйсәт, кӧ Кʹьтеба Пироз һәр рʹож бьхуньн. Чахе әм Кʹьтеба Пироз дьхуньн, гәрәке нета мә әв бә, кӧ дьһа незики Йаһоԝа бьн. Мәсәлә, гава әм сәрһатийа Иса у хорте дәԝләти дьхуньн, әм дәрһәԛа Йаһоԝа чь педьһʹәсьн? (Маркос 10:17-22) Әԝи хорти баԝәр кьр ԝәки Иса бь рʹасти жи Мәсиһе создайи йә, ле баԝәрийа ԝи һаԛас ԛәԝи нибу, ԝәки пәй Иса һәрʹә. Ле диса жи, Иса «һьндава ԝида бь һʹәзкьрьне тʹьжә бу». Гәло әв йәк кӧ Иса ча тʹәви ԝи хорти хәбәр да, дьле тә нагьрә? Әшкәрә йә, Иса хԝәст ԝәки әԝ сафикьрьнәкә билан бькә. Ӧса жи әв йәк кӧ Иса һьндава ԝида бь һʹәзкьрьне тʹьжә бу, нишани мә дькә, ԝәки Йаһоԝа жи ԝи һʹәз дькьр (Йуһʹәнна 14:9). Гава тӧ дәрһәԛа ве сәрһатийе у сәр дәрәщед әʹмьре хԝә дьфькьри, жь хԝә бьпьрсә: «Әз чь дькарьм бькьм, ԝәки дьһа незики Йаһоԝа бьм у дьһа зедә али кәсед дьн бькьм?»

15. Бьре щаһьл чьрʹа гәрәке бона хушк-бьра бьбә мәсәлә? Шьровәкә. (1 Тимотʹейо 4:12, 13)

¹⁵ Бона хушк-бьра бьбә мәсәлә (Бьхунә 1 Тимотʹейо 4:12, 13). Паԝлос Тимотʹейорʹа гот, ԝәки әԝ нә тʹәне һʹӧнӧред ӧсада ча хԝәндьн у һинкьрьнеда пешда һәрʹә, ле һʹәзкьрьн, баԝәри у һʹәлалийеда жи. Гәло чьма? Чьмки ԛәԝата кьред мә дьһа мәзьн ә, нә кӧ ԛәԝата хәбәрдане. Мәсәлә, бьдә бәр чʹәʹве хԝә ԝәки тӧ гәрәке пе готарәке дәркʹәви, дәрһәԛа ве йәке кӧ хьзмәтийеда дьһа хирәт бьн. Һәрге тӧ хԝәха жи хьзмәтийеда йәки хирәт и, тӧйе бькарьби готара хԝә бь сәрфьрази бежи, чьмки кьред тә ԝе ԛимәта хәбәрдана тә зедә кьн (1 Тимотʹейо 3:13).

16. (а) Бьред щаһьл кʹижан пенщ тьштада дькарьн бьбьнә мәсәлә? (б) Бьре щаһьл ча дькарә «хәбәрданеда» бьбә мәсәлә?

¹⁶ Паԝлосе шанди 1 Тимотʹейо 4:12-да, бәʹса пенщ тьшта кьр, кʹижанада кӧ бьре щаһьл гәрәке бьбә мәсәлә. Дьбәкә тӧ дькари ԝәʹде лекʹолина шәхси дәрһәԛа ԝан тьшта бьфькьри. Бьдә бәр чʹәʹве хԝә, ԝәки тӧ дьхԝази «хәбәрданеда» мәсәләкә баш би. Сәва кӧ бьгьһижи ве нета хԝә, бьфькьрә кӧ тӧ ча дькари кәсед дьн бь гьлийед хԝә һелан ки. Һәрге тӧ һе мала де-баве хԝәда дьжи, гәло тӧ дькари дьһа зедә рʹазибуна хԝә ԝанрʹа бьди кʹьфше? Паши щьвате, гәло тӧ дькари пʹайе ԝан хушк-бьра бьди, йед кӧ пе дәрс йан готаре дәркʹәтьбун? Ӧса жи хирәт бькә кӧ бь гьлийед хԝә коментарийа бьди, нә кӧ жь абзасе бьхуни. Гава тӧ һәр тьшти дьки, ԝәки «хәбәрданеда» бьби мәсәлә, кәсед дьн ԝе бьвиньн кӧ тӧ рʹӧһʹанида пешда дьчи (1 Тимотʹейо 4:15).

17. Чь дькарә али бьраки щаһьл бькә, ԝәки әԝ бьгьһижә нетед хԝәйә рʹӧһʹани? (2 Тимотʹейо 2:22)

¹⁷ Жь хԝәстьнед щаһьлтийе бьрʹәвә у хԝә ль рʹастийе бьгьрә (Бьхунә 2 Тимотʹейо 2:22). Хԝәстьнед щаһьлтийе дькарьн зьраре бьдьнә достийа ортʹа бьред щаһьл у Йаһоԝа, у бьбьнә сәбәб ԝәки әԝана дьһа зедә хьзмәт нәкьн. Паԝлосе шанди Тимотʹейорʹа готьбу, ԝәки әԝ жь хԝәстьнед ӧса бьрʹәвә. Дьбәкә тә жи дина хԝә дайе, ԝәки һьнә тьштед кӧ бь рʹасти хьраб ниньн жи, дькарьн ԝәʹде тә бьдьзьн у мәщале нәдьн, ԝәки тӧ дьһа зедә хьзмәт ки. Мәсәлә, һʹәсаб кә кӧ тӧ сәр спорте, сәр интернете йан сәр листькед компӧтәре чьԛас ԝәʹдә хәрщ дьки. Гәло тӧ нькари һьнә жь ви ԝәʹдәйи бона шьхӧле Йаһоԝа жи хәрщ ки? Мәсәлә, дьбәкә тӧ дькари хԝәйкьрьна Ода Щьватеда кʹар бьки, йан жи бәр стенде хьзмәт ки. Гава тӧ шьхӧлед ӧсава мьжул би, тӧйе бькарьби хԝәрʹа һәвалед тʹәзә бьвини, йед кӧ дькарьн тә һелан кьн у али тә бькьн нетед рʹӧһʹани дайни пешийа хԝә у бьгьһижи ԝан.

АЛИКʹАРИЙА КӘСЕД ДЬНРʹА КʹӘРӘМА ТИНӘ

18. Әм жь кʹӧ заньн, ԝәки жийина Маркос у Тимотʹейо гәләк бәхтәԝар бу?

¹⁸ Маркос у Тимотʹейо гәләк гӧһастьн әʹмьре хԝәда кьрьн, ԝәки дьһа зедә хьзмәт кьн у али хушк-бьра бькьн. У әв йәк әʹмьре ԝан дьһа бәхтәԝар кьр (Кʹаред Шандийа 20:35). Маркос дьчу ԝәлатед дур, ԝәки кʹомәке бьдә хушк-бьра. Ӧса жи әԝи кʹьтебәкә һʹәԝас дәрһәԛа жийин у хьзмәтийа Иса Мәсиһ ньвиси. Тимотʹейо али Паԝлосе шанди кьр, ԝәки щьватед тʹәзә саз бькә у һелане бьдә хушк-бьра. Бе шьк, Йаһоԝа гәләк жь Маркос у Тимотʹейо рʹази бу, чьмки ԝана гӧһастьнед мәзьн әʹмьре хԝәда кьр, ԝәки һе зедә бона Йаһоԝа у хушк-бьра кʹар бькьн.

19. Чьрʹа фәрз ә ԝәки бьред щаһьл дина хԝә бьдьнә ширәтед кӧ Паԝлос дабу Тимотʹейо, у һәрге әԝана ӧса бькьн, ахьри ԝе чь бә?

¹⁹ Нәʹмед кӧ Паԝлос Тимотʹейорʹа ньвисин, әшкәрә нишан дькьн, ԝәки әԝи һәвале хԝәйи щаһьл чьԛас һʹәз дькьр. Бь рʹасти, Йаһоԝа Паԝлос да хәбате, ԝәки әв нәʹмә бенә ньвисаре, ләма жи чь кӧ әм ԝан нәʹмада дьхуньн, дьдьнә кʹьфше кӧ Йаһоԝа чьԛас ԝә һʹәз дькә, хортед щаһьл! Әԝ дьхԝазә ԝәки һун пешдачуйи бьн. Ләма жи ширәтед Паԝлосе шанди ԛимәт кьн у хԝәстьна хԝә зедә кьн, ԝәки дьһа зедә хьзмәт кьн у али кәсед дьн бькьн. Һәрге һун ӧса бькьн, һуне бь әʹмьрәки хԝәш бьжин у ахьрийеда «жийина кӧ рʹасти жийин ә ԛазьнщ кьн» (1 Тимотʹейо 6:18, 19).