Әʹмьре Хԝәйи Мәзьнда Шабуна Хԝә Ӧнда Нәкьн

1-2. Йаһоԝа ча дьньһерʹә сәр хьзмәткʹаред хԝәйә амьн, йед кӧ әʹмьрда мәзьн ьн? (Зәбур 92:12-14; ӧса жи бьньһерʹьн шькьл.)

ҺЬНӘ ԝәлатада, мәрьв кәсед әʹмьрда мәзьн ча кәсед хԝәйиԛәдьр һʹәсаб дькьн. Ле гәләк щийада, мәрьв чь жь дәсте ԝан те дькьн, ԝәки кал у пир нәйенә кʹьфше. Мәсәлә, гава пʹорʹед ԝан сьпи дьбьн, әԝана ԝан дьԛәтиньн, ԝәки кәс ԝан пʹорʹа нәвине. Ле ԝәʹдә дәрбаз дьбә, пʹорʹед сьпи диса дәрдькʹәвьн у һе зедә дьбьн. Бәле, әԝ йәк әʹйан дькә кӧ тʹӧ кәс нькарә калбун-пирбуне бьдә сәкьнандьне.

² Гәло Баве мәйи әʹзмана сәр хьзмәткʹаред хԝәйә кал у пир ча дьньһерʹә? (Мәтʹәлок 16:31) Әԝ ԝана бәрамбәри даред гәш у мәзьн дькә (Бьхунә Зәбур 92:12-14). Ле чьрʹа әв бәрамбәрикьрьнәкә баш ә? Чьмки һәнә даред гәләк кәвьн, йед кӧ диса жи бь бәлг у гӧлед бәдәԝ тʹьжә нә. Мәсәлә, Жапонйайеда, һьнә даред сакурайе йед һәри бәдәԝ, һʹәзар сали зедәтьр ьн. Мина ԝан дара, кәсед амьн, йед кӧ ида кал-пир бунә, илаһи чʹәʹве Хԝәдеда гәләк бәдәԝ ьн. Йаһоԝа нә кӧ рʹәнге пʹорʹе мәрьва дьньһерʹә, ле дьле ԝан. Әԝ гәләк ԛимәт дькә сәбьр у амьнийа ԝан, у ӧса жи салед кӧ ԝана хьзмәтийеда дәрбаз кьрьнә.

3. Ԝәʹде бәре, Йаһоԝа ча бь сайа кәсед әʹмьрда мәзьн ԛьрара хԝә дьани сери?

³ Фьрԛи тʹӧнә мәрьв салада чьԛас мәзьн ә, йәкә ԛимәта ԝи бәр чʹәʹве Йаһоԝа ӧнда набә.a Йаһоԝа гәләк щар бь сайа кәсед әʹмьрда мәзьн нет у ԛьрара хԝә дьани сери. Мәсәлә, гава жьна Бьраһим, Сәраһ, пир бу, Йаһоԝа ԝерʹа гот, кӧ әԝе бьбә дийа мьләтәки мәзьн, у Мәсиһе создайи ԝе жь зӧрʹәта ԝе бе (Дәстпебун 17:15-19). Гава Муса пʹехәмбәр кал бу, Йаһоԝа ԝи кʹьфш кьр, ԝәки әԝ Исраелийа жь ԝәлате Мьсьре дәрхә (Дәркʹәтьн 7:6, 7). Ӧса жи, гава Йуһʹәннайе шанди кал бу, әԝи жь бина бәр Йаһоԝа пенщ кʹьтебед Кʹьтеба Пироз ньвисин.

4. Ль гора Мәтʹәлок 15:15, чь дькарә али кәсед әʹмьрда мәзьн бькә, ԝәки әԝана нава чәтьнайед хԝәда сәбьр кьн? (Бьньһерʹә ӧса жи шькьл.)

⁴ Гава мәрьв кал-пир дьбьн, әԝана рʹасти гәләк чәтьнайа тен. Чаԝа хушкәке бь һʹәнәк готьбу: «Бона калбун-пирбуне мерхаси лазьм ә». Ле шабунb дькарә али кәсед әʹмьрда мәзьн бькә, ԝәки әԝана нава тәнгасийед хԝәда тәйах кьн (Бьхунә Мәтʹәлок 15:15). Ве готареда, әме дина хԝә бьдьнә һьнә тьштед кӧ кәсед әʹмьрда мәзьн дькарьн бькьн, ԝәки шабуна хԝә ӧнда нәкьн. Ӧса жи, әме бьвиньн кӧ кәсед дьн чаԝа дькарьн али хушк-бьред әʹмьрда мәзьн бькьн. Йа пешьн, ԝәрә әм бьвиньн кӧ гава мәрьв кал-пир дьбә, чьрʹа нәһеса йә кӧ әԝ шабуна хԝә хԝәй кә.

КАЛБУН-ПИРБУН ЧА ДЬКАРӘ СӘР ШАБУНА ТӘ ҺʹӦКӦМ КӘ?

5. Һьнә кәсед әʹмьрда мәзьн чьрʹа дьлтәнг дьбьн?

⁵ Бона чь тӧ дькари дьлтәнг би? Дьԛәԝьмә йәк жь мәʹнийа әв ә, кӧ тӧ ида нькари һʹәму тьштед кӧ тә бәре дькьрьн, бьки. Дьбәкә тӧ бира щаһьлтийа хԝә у сьһʹәт-ԛәԝата хԝәйә бәре дьки (Ԝаиз 7:10). Хушка мә Руби ӧса дьбежә: «Һʹәму дәре мьн дешьн у әз нькарьм мина бәре тьшта бькьм, ләма жи мьнрʹа зор ә кӧ әз кʹьнща ль хԝә кьм. Дәстед мьн сьст бунә, у жь бо артрите, мьнрʹа чәтьн ә һәла һе шьхӧлед бьчʹук жи бькьм». Бьре мә Һаролд, йе кӧ Бәйтʹәледа хьзмәт дькьр, ӧса дьбежә: «Әз хԝә ида нас накьм, у щарна әз жь һʹале хԝә гәләк әʹщьз дьбьм. Бәре мьн спорт гәләк һʹәз дькьр, у мьн бейзбол жи һʹәз дькьр. Бәре тʹьме дьготьн: ‹Кʹа тʹопе бьдьнә Һаролд, ԝәки әм сәр кʹәвьн›. Ле ньһа әз дьфькьрьм кӧ әзе ԛә нькарьбьм тʹопе бавежьм жи».

6. а) Кʹижан сәбәбед дьн һәнә кӧ һьнә кәсед әʹмьрда мәзьн дьлтәнг бьн? б) Чь дькарә али кәсед әʹмьрда мәзьн бькә, ԝәки тедәрхьн һәла гәрәке әԝана тʹәрка ажотьна әʹрәбе йан мотосиклете бьдьн йан на? (Ве журналеда, бьньһерʹә готара бь наве «Гәло Ида Ԝәʹдә йә кӧ Тʹәрка Ажотьне Бьдьм?»)

⁶ Мәʹникә дьн жи дьԛәԝьмә әв ә, кӧ тӧ ида нькари һьнә тьшта тʹәне бьки. Дьԛәԝьмә лазьм ә кӧ кәсәк мьԛати тә бә, йан жи тӧ дәрбази мала зарʹәкә хԝә би. Йан жи, дьбәкә сьһʹәт-ԛәԝата тә ида хьраб буйә, йан жи чʹәʹвед тә ида рʹьнд навиньн, у ләма тӧ ида нькари тʹәне һәрʹи щики, йан әʹрәбе йан мотосиклете бажойи. Рʹасти жи әԝ йәк чьԛас чәтьн ә! Ле бир нәкә кӧ бәр чʹәʹве Йаһоԝа у кәсед дьн, ԛимәта тә ве йәкева гьредайи нинә һәла тӧ дькари хԝә хԝәй ки, тʹәне бьжийи йан әʹрәбе бажойи. Бона ԝи фәрз ә кӧ дьле тәда чь йә, демәк кӧ тӧ ԝи у хушк-бьра һʹәз дьки (1 Самуйел 16:7). У тʹӧ щар дӧдьли нәбә кӧ Йаһоԝа тә фәʹм дькә.

7. Чь дькарә али ԝан кәса бькә, йед кӧ дьтьрсьн кӧ әԝана ԝе хьлазийа дьнйайе нәвиньн?

⁷ Тӧ дьбәкә дьтьрси, ԝәки тӧйе Һармәгәдоне пе чʹәʹве хԝә нәвини, чьмки ида әʹмьрда мәзьн и. Һәрге ӧса йә, бинә бира хԝә кӧ Йаһоԝа бь сәбьр һивийе йә, ԝәки ве дьнйа хьраб кʹӧта кә (Ишайа 30:18). Бь сайа сәбьра ԝи, бь милйона мәрьв мәщале дьстиньн, кӧ ԝи нас кьн у бьбьнә хьзмәткʹаред ԝи (2 Пәтрус 3:9). Ләма жи гава тӧ дьлтәнг и, бьдә бәр чʹәʹве хԝә кӧ пешийа хьлазийа ве дьнйайе, чьԛас мәрьв, у дьбәкә нәфәред тә жи, ԝе жь сәбьра Йаһоԝа кʹаре бьстиньн.

8. Гава кәсед әʹмьрда мәзьн нәхԝәш ьн йан еше дькʹьшиньн, дьбәкә әԝана чь бькьн?

⁸ Фьрԛи тʹӧнә әм чәнд сали нә, йәкә чахе әм нәхԝәш ьн, дьбәкә әм һьнә тьштед әʹщеб бежьн йан бькьн у паше пʹошман бьн (Ԝаиз 7:7; Аԛуб 3:2). Мәсәлә, гава Ибойе амьн еш дькʹьшанд, әԝи щара бе һʹәмде хԝә хәбәр дьда (Ибо 6:1-3). Жь бо нәхԝәшийе, дьбәкә кәсед әʹмьрда мәзьн тьштед әʹщеб бежьн йан бькьн. Һәмьки, гәрәке әм сьһʹәт-ԛәԝата хԝә йан әʹмьре хԝәйи мәзьн хԝәрʹа нәкьнә мәʹни, ԝәки һьндава мәрьва сәрт бьн йан гәләк тьшта жь ԝан дәʹԝа кьн. У һәрге әм тедәрхьн кӧ мә дьле кәсәки ешандийә, ԝәрә әм зу бахшандьне жь ԝи бьхԝазьн (Мәтта 5:23, 24).

ТӦ ЧА ДЬКАРИ ШАБУНА ХԜӘ ХԜӘЙ КИ?

9. Чьрʹа тӧ гәрәке жь кәсед дьн аликʹарийе ԛәбул ки? (Бьньһерʹә ӧса жи шькьл.)

⁹ Жь кәсед дьн аликʹарийе ԛәбул кә (Галати 6:2). Серида, дьԛәԝьмә тәрʹа әԝ йәк чәтьн бә. Хушкәкә бь наве Гретел ӧса дьбежә: «Щарна мьнрʹа зор ә аликʹарийе ԛәбул кьм, чьмки әз нахԝазьм кәсәкирʹа бьбьмә баргьрани. Ле ԝәхт дәрбаз бу, мьн фькьра хԝә гӧһаст у мьн бь мьлукти ԛәбул кьр кӧ әз һʹәԝще аликʹарийе мә». Гава тӧ жь кәсед дьн аликʹарийе ԛәбул дьки, бь рʹасти тӧ мәщале дьди ԝан, ԝәки әԝана шабуна кӧ жь «дайине» те, бьстиньн (Кʹаред Шандийа 20:35). Гава тӧ дьвини кӧ кәсед дьн тә чьԛас һʹәз дькьн у дькʹәвьнә һʹәйра тә, дьле тә жи бь шабуне тʹьжә дьбә.

10. Чьрʹа фәрз ә кӧ тӧ шекьрдарийа хԝә нишан ки? (Бьньһерʹә ӧса жи шькьл.)

¹⁰ Шекьрдарийа хԝә нишан кә (Колоси 3:15; 1 Тʹесалоники 5:18). Һәмьки әм дьшекьриньн гава мәрьв мәрʹа ԛәнщийе дькьн, ле әм гәрәке ӧса жи бир нәкьн кӧ гәләк фәрз ә ԝанрʹа бежьн ԝәки әм жь ԝан рʹази нә. Ләма жи ԝәрә әм бь дьлгәрми тʹьме рʹазибуна хԝә ԝанрʹа бьдьнә кʹьфше. Һьнге әԝана ԝе бьзаньбьн кӧ әм ԛәнщийа ԝан дьшекьриньн. Хушка мә Лиа, йа кӧ Бәйтʹәледа мьԛати кәсед әʹмьрда мәзьн дьбә, ӧса дьбежә: «Хушкәк кӧ әз мьԛати ԝе дьбьм, һәр гав мьнрʹа нәʹмед рʹазибуне дьньвисә. Рʹаст ә әв нәʹмед кьн ьн, ле ӧса ширьн ьн. Әԝ нәʹмә гәләк дьле мьн дьгьрьн, у әз ша дьбьм кӧ хушка мьн аликʹарийа мьн дьшекьринә».

11. Тӧ ча дькари али кәсед дьн бьки? (Бьньһерʹә ӧса жи шькьл.)

¹¹ Чьԛас жь дәсте тә те, али кәсед дьн бькә. Гава тӧ дина хԝә бьди кәсед дьн, тӧйе ида һʹьш-аԛьле хԝә зәʹф нәди сәр проблемед хԝә. Готьнәкә Африкайи һәйә, кӧ кәсед әʹмьрда мәзьн бәрамбәри кʹьтебханәке дькә, йа кӧ бь кʹьтебед билани тʹьжә йә. Ле һʹәта кӧ мәрьв ван кʹьтеба нәхунә, әԝ нькарә жь ԝана кʹаре бьстинә. Ләма жи сәва щаһьл бькарьбьн жь тә һин бьн, тʹәви ԝан хәбәр дә. Пьрса бьдә ԝан у рʹьнд гӧһ бьдә ԝан. Ԝанрʹа гьли кә, кӧ Йаһоԝа ча али тә кьрийә у чьрʹа фәрз ә кӧ мәрьв гӧһ бьдә Йаһоԝа. Бе шьк тӧйе гәләк бәхтәԝар би, гава һелана бьди һәвалед хԝәйә щаһьл у ԝана ԛәԝи ки (Зәбур 71:18).

12. Ль гора Ишайа 46:4, Йаһоԝа чь соз дайә кәсед әʹмьрда мәзьн? (Бьньһерʹә ӧса жи шькьл.)

¹² Жь Йаһоԝа ԛәԝате бьхԝазә. Әм бәндә нә, ләма жи әм дькарьн бе һʹал бькʹәвьн у бьԝәстьн, ле Йаһоԝа тʹӧ щара наԝәстә у сьст набә (Ишайа 40:28). Гәло Йаһоԝа енержийа хԝәйә бесинор ча дьдә хәбате? Мәсәлә, әԝ ԛәԝате дьдә хьзмәткʹаред хԝәйә әʹмьрда мәзьн (Ишайа 40:29-31). Әԝи һәла һе соз жи дайә кӧ ԝе али ԝан бькә (Бьхунә Ишайа 46:4). Әм заньн кӧ Йаһоԝа созед хԝә тʹьме тинә сери (Йешу 23:14; Ишайа 55:10, 11). Ләма жи дӧа бькә у аликʹарийа Йаһоԝа бьхԝазә. Һьнге тӧйе тʹәхмин ки, ԝәки әԝ чьԛас тә һʹәз дькә у тӧйе шабуне бьстини.

13. Ль гора 2 Корьнтʹи 4:16-18, гәрәке әм чь бир нәкьн? (Бьньһерʹә ӧса жи шькьл.)

¹³ Бир нәкә кӧ һʹале тәйи ньһа ԝәʹдәлу йә. Гава әм тиньн бира хԝә кӧ чәтьнайед мә ԝәʹдәлу нә, мәрʹа дьһа һеса дьбә сәбьр кьн. Калбун-пирбун жи ӧса йә. Кʹьтеба Пироз нишани мә дькә кӧ рʹожәке, әме жь ви һʹали хьлаз бьн (Ибо 33:25; Ишайа 33:24). Ләма тӧ дькари ша би, чьмки рʹожед һәри хԝәш ида бәр шемике нә (Бьхунә 2 Корьнтʹи 4:16-18). Ле кәсед дьн ча дькарьн али тә бькьн?

КӘСЕД ДЬН ЧА ДЬКАРЬН КʹОМӘКЕ БЬДЬН?

14. Чьрʹа фәрз ә кӧ әм тʹәсәлийа кәсед әʹмьрда мәзьн бькьн у ԝанрʹа тʹеле хьн?

¹⁴ Тʹьме тʹәсәлийа хушк-бьред әʹмьрда мәзьн бькә у ԝанрʹа тʹеле хә (Ибрани 13:16). Кәсед әʹмьрда мәзьн щарна хԝә тʹәне тʹәхмин дькьн. Бьраки бь наве Камил, йе кӧ нькарә жь мале дәркʹәвә, ӧса дьбежә: «Жь шәбәԛе һʹәта еваре, әз мәщбур ьм малда бьм. Ләма жи әз бь рʹасти әʹщьз дьбьм. Щарна әз хԝә мина шерәки кал тʹәхмин дькьм, йе кӧ гьрти йә». Һәрге әм тʹәсәлийа кәсед әʹмьрда мәзьн бькьн, әме нишани ԝан кьн кӧ әм ԝана ԛимәт дькьн у ԝана һʹәз дькьн. Дьԛәԝьмә мә чәнд щара хԝәст һәрʹьн бал хушк йан бьраки әʹмьрда мәзьн, ле ньшкева шьхӧләк пешда дьһат у әм нәчун. Һәмьки әм гьшк мәрьвед бәтал ниньн. Һәрге ӧса йә, әм ча дькарьн «дина хԝә бьдьнә тьштед дьһа фәрз»? (Филипи 1:10) Йәк жь ван тьштед фәрз әв ә, кӧ әм тʹәсәлийа хушк-бьред әʹмьрда мәзьн бькьн. Ләма жи, сәва кӧ әм бир нәкьн сәрледана ԝан бькьн, смс ԝанрʹа бьшиньн йан ԝанрʹа тʹеле хьн, әм дькарьн хԝәрʹа тʹеледа зәнгьл дайньн кӧ ве йәке бькә бира мә. Әм гәрәке тьштед ӧса паш нәхьн.

15. Йед щаһьл у әʹмьрда мәзьн ча дькарьн тʹәвайи ԝәʹдә дәрбаз кьн?

¹⁵ Һәрге тӧ щаһьл и, дьбәкә тӧ ньзани дәрһәԛа чь тʹәви йед әʹмьрда мәзьн хәбәр ди йан жи ча тʹәви ԝан ԝәʹдә дәрбаз ки. Ле бона ве йәке бәр хԝә нәкʹәвә. Тʹәне хирәт бькә кӧ бьби һәвалед ԝан (Мәтʹәлок 17:17). Пешийа у паши щьвата тʹәви ԝан хәбәр дә. Мәсәлә, жь ԝан бьпьрсә кʹижан рʹез әԝана һе зедә һʹәз дькьн, йан жи бежә кӧ бьра әԝана бәʹса дәрәщед һʹәԝас жь зарʹоти йан щаһьлтийа хԝә бькьн. Йан жи тӧ дькари гази ԝан бьки, ԝәки тʹәвайи Бродкастинге бьньһерʹьн. Ӧса жи тӧ дькари бь гәләк щурʹа али ԝан бьки. Мәсәлә, нишани ԝан кә кӧ ча тʹел у планшетед хԝә бьдьнә хәбате у әʹдәбйәтед тʹәзә хԝәрʹа бьдьнә кʹьшандьне. Хушкәкә бь наве Карол ӧса дьбежә: «Гава тӧ йед әʹмьрда мәзьн тʹәглиф дьки, тʹәвайи тьштед ӧса бькьн, чь кӧ тә хԝәш те. Мәсәлә, әз чьԛас әʹмьрда мәзьн дьбьм жи, диса жи әз һʹәз дькьм һәрʹьм дькʹана тьшта бькʹьрʹьм йан кафеда тʹәви һәвала рʹунем, йан жи дәрва щийед бәдәԝда бьгәрʹьм». Хушкәкә бь наве Маира ӧса дьбежә: «Йәк жь һәвалед мьн 90 сали йә. Әз 57 сала жь ԝе бьчʹуктьр ьм, ле әз ве йәке бир дькьм гава әм тʹәвайи һʹәнәка дькьн, дькʹәньн йан жи филма дьньһерʹьн. Гава әм рʹасти тәнгасийа тен, әм ширәта жь һәв дьхԝазьн у али һәв дькьн».

16. Чьма ԝе баш бә, ԝәки әм тʹәви йед әʹмьрда мәзьн һәрʹьн бал дохдьр?

¹⁶ Тʹәви ԝан һәрʹә бал дохдьр. Хенщи ве йәке кӧ бь әʹрәбе йед әʹмьрда мәзьн бьви бал дохдьр, тӧ ӧса жи дькари дина хԝә бьди һәла дохдьр рʹьнд гӧһ дьдә ԝан йан на (Ишайа 1:17). Ӧса жи, дьԛәԝьмә тӧ дькари хԝәрʹа бьньвиси әв йәк чь кӧ дохдьр дьбежә. Хушкәкә әʹмьрда мәзьн бь наве Руф ӧса дьбежә: «Гәләк щара, гава әз тʹәне дьчьм бал дохдьр, әԝ рʹьнд гӧһ надә мьн. Дохдьр дькарә ӧса бежә мьн: ‹Бь рʹасти тӧ нәхԝәш нини, әв тʹәне тәрʹа ӧса те кʹьфше, проблем сәре тәда йә›. Ле гава кәсәк тʹәви мьн те, дохдьр һе зедә дина хԝә дьдә мьн. Әз шекьрдар ьм кӧ хушк-бьра ԝәʹде хԝә бона мьн вәдьԛәтиньн у тʹәви мьн тен».

17. Тӧ ча дькари тʹәви йед әʹмьрда мәзьн хьзмәт ки?

¹⁷ Тʹәви ԝан һәрʹә хьзмәтийе. Ԛәԝата һьнә хушк-бьред әʹмьрда мәзьн тʹерʹа ԝан накә, ԝәки мал бь мал хьзмәт кьн. Гәло тӧ ча дькари али ԝан бьки? Мәсәлә, тӧ дькари гази хушк йан бьраки әʹмьрда мәзьн бьки, ԝәки тʹәвайи бәр стенде бьсәкьньн. Йан жи тӧ дькари кʹӧрсийе бини, ԝәки әԝ бәр стенде рʹуне. Йан жи, дьбәкә тӧ дькари йед әʹмьрда мәзьн тʹәглифи сәр һинбуна Кʹьтеба Пироз бьки, йан жи һинбуне мала ԝанда дәрбаз ки. Рʹуспи дькарьн щьвинед бона хьзмәтийе малед кәсед әʹмьрда мәзьнда дәрбаз кьн, ԝәки ԝанрʹа һеса бә жь ԝан щьвина кʹаре бьстиньн. Гава әм чь жь дәсте мә те дькьн, ԝәки ԛәдьре хушк-бьред әʹмьрда мәзьн бьгьрьн у нишани ԝан кьн кӧ әм ԝана һʹәз дькьн, Йаһоԝа жь мә рʹази дьбә (Мәтʹәлок 3:27; Рʹомайи 12:10).

18. Готара дьнда әме дәрһәԛа чь хәбәр дьн?

¹⁸ Ча мә дит, Йаһоԝа кәсед әʹмьрда мәзьн һʹәз дькә у ԛимәт дькә. Бь рʹасти, әм жи ԝана һʹәз дькьн у ԛимәт дькьн! Калбун-пирбун зәʹмәт ә, ле бь аликʹарийа Йаһоԝа һуне шабуна хԝә ӧнда нәкьн (Зәбур 37:25). Ча баш ә кӧ рʹожед һәри хԝәш һе пешийа ԝә нә! Ле һәрге әм мьԛати мәрьвәки хԝәйи әʹмьрда мәзьн, зарʹәки йан һәваләки нәхԝәш дьбьн, әм чь дькарьн бькьн ԝәки шабуна хԝә ӧнда нәкьн? Готара дьнда әме щаба ве пьрсе бьстиньн.