Гәло Ида Ԝәʹдә йә кӧ Тʹәрка Ажотьне Бьдьм?
МӘРЬВӘКИ әʹмьрда мәзьн бь дәһа сала әʹрәбе йан мотосиклете дажо. Әԝ ша дьбә кӧ әʹрәбә йан мотосиклета ԝи һәйә у әԝ дькарә бь азайи кʹәнге жи бьхԝазә һәрʹә һʹәму щийа. Ле малбәт у һәвалед ԝи сәва ԝи бәр хԝә дькʹәвьн у дьхԝазьн, ԝәки әԝ тʹәрка ажотьне бьдә. Әԝ фәʹм накә кӧ чьма әԝана бәр хԝә дькʹәвьн.
Гәло дәрәща тә жи ӧса йә? Чь дькарә али тә бькә сафикьрьна рʹаст бьки, һәла тʹәрка ажотьне бьди йан на?
Һьнә ԝәлатада ажованед әʹмьрда мәзьн, йед кӧ дьхԝазьн документа ажотьне тʹәзә кьн, пешийе гәрәке һәрʹьн бал дохдьр ԝәки дохдьр ԝана бьньһерʹә. Мәсиһийед кӧ ԝан ԝәлатада дьжин, һәмьки хԝә ль ван ԛанунед ԝәлет дьгьрьн (Рʹомайи 13:1). Ле һәрге ԝәлате ԝәда ԛанунәкә ӧса тʹӧнә йә, дьбәкә диса жи лазьм бә рʹьнд бьфькьри һәла тӧ һе дькари әʹрәбе йан мотосиклете ӧса бажойи кӧ әʹмьре тʹӧ кәси нәки бьн ԛәзийе.
ТЕДӘРХӘ КӦ ҺʹАЛЕ ТӘ ЧЬ ЩУРʹӘЙИ ЙӘ
Ль гора малпәра тʹәшкиләтәкә кӧ дина хԝә дьдә чәтьнайед мәрьвед әʹмьрда мәзьн (National Institute on Aging), ԝе баш бә кӧ тӧ ван пьрса бьди хԝә:
Чʹәʹвед мьн рʹьнд дьвиньн гава тәʹри йә, у әз дькарьм нишанед сәр рʹе рʹьнд бьвиньм у бьхуньм?
Мьнрʹа чәтьн нинә сәре хԝә бь тʹәмами бьзьвьрʹиньм, ԝәки нәйнькерʹа у дәр-доре хԝә рʹьнд бьвиньм?
Реаксийа мьн диса жи зу пешда те? Мәсәлә, гәло әз һе дькарьм ньге хԝә зу жь газе дәрбази тормозе бькьм?
Әз гәләк һеди нажом у рʹийа әʹрәба нагьрьм?
Ван пашԝәхтийа әз чәнд щара кʹәтьмә дәрәщед хоф, йан жи мьн әʹрәба хԝә чәнд щара лехьстийә йан һʹәрʹьшандийә?
Полис жь бо ажотьна мьн ԛә әз дамә сәкьнандьне?
Ԝәʹде ажотьне, әз ԛә хәԝрʹа чумә?
Әз дәрманед кӧ дькарьн сәр ажотьна мьн һʹӧкӧм кьн, дьхԝьм?
Нәфәр йан һәвалед мьн мьнрʹа ԛә готьнә кӧ әԝана жь бо щурʹе ажотьна мьн дьтьрсьн?
Һәрге тә сәр йәк йан дӧ пьрса готийә «бәле», жь кʹәрәма хԝә бьфькьрә кӧ дьбәкә ида ԝәʹдә һатийә һьнә гӧһастьна бьки. Мәсәлә, ԝе баш бә кӧ тӧ ида әʹрәбе йан мотосиклете һаԛас нәжойи, илаһи шәв. Щар-щара щурʹе ажотьна хԝә контрол бькә. Дьбәкә тӧ дькари жь нәфәрәки йан жь һәваләки хԝә бьпьрси кӧ ль гора ньһерʹандьна ԝи, тӧ ча дажойи. Ӧса жи, дьбәкә тӧ дькари һәрʹи курсәке сәва кӧ щурʹе ажотьна хԝә һе баш ки. Ле һәрге тә сәр гәләк пьрсед жоре готийә «бәле», дьԛәԝьмә ԝе дьһа баш бә кӧ тӧ бь тʹәмами тʹәрка ажотьне бьди.a
ЛЬ ГОРА ПРИНСИПЕД КʹЬТЕБА ПИРОЗ САФИКЬРЬНА БЬКЬН
Дьԛәԝьмә тӧ хԝәха нькари тедәрхи ԝәки фәрәсәтед тәйә ажотьне ида мина бәре ниньн. Ӧса жи, дьбәкә тә хԝәш найе сәр ве йәке бьфькьри. Гәло кʹижан принсипед Кʹьтеба Пироз дькарьн али тә бькьн, ԝәки тӧ сафикьрьнәкә баш бьки? Дина хԝә бьдә ван дӧ принсипа:
Синоре хԝә бьзаньбә (Мәтʹәлок 11:2). Чьԛас әм кал-пир дьбьн, чʹәʹве мә, гӧһе мә, һәрәкʹәт у реаксийед мә сьст дьбьн. Мәсәлә, гәләк мәрьв гава кал-пир дьбьн, тʹәрка һьнә щурʹә спорта дьдьн, чьмки нахԝазьн зийане бьдьнә хԝә. Мина ве йәке, йед әʹмьрда мәзьн кӧ синоре хԝә заньн ԝе тедәрхьн ԝәки ида ԝәʹдә йә тʹәрка ажотьне бьдьн, сәва әʹмьре хԝә нәкьнә бьн ԛәзийе (Мәтʹәлок 22:3). Ӧса жи, мәрьве мьлук ԝе гӧһ бьдә ԝан, йед кӧ дьбежьн ԝәки сәва ԝан бәр хԝә дькʹәвьн (Бәрамбәр кә 2 Самуйел 21:15-17).
Әʹмьре мәрьва нәкә бьн ԛәзийе (Ԛануна Дӧщари 22:8). Әʹрәбә йан мотосиклет дькарә бьбә сәбәбе бьриндарбун йан мьрьна кәсәки. Мәрьве кӧ ида нькарә баш әʹрәбе бажо, ле диса жи тʹәрка ажотьне надә, һьм әʹмьре хԝә һьм жи әʹмьре мәрьвед дьн дькә бьн ԛәзийе у дькарә мьрьна кәсәкида нәһәԛ бә.
Һәрге тәрʹа лазьм ә сафикьрьне бьки кӧ тʹәрка ажотьне бьди йан на, нәфькьрә кӧ тӧ ньмьз буйи йан жи тә ԛимәта хԝә ӧнда кьрийә. Йаһоԝа тә һʹәз дькә чьмки тӧ синоре хԝә зани, мьлук и у хера мәрьвед дьн дьхԝази. Ӧса жи, әԝи соз дайә ԝәки ԝе аликʹарийе у дьлбинийе бьдә тә (Ишайа 46:4). Әԝе тʹӧ щара тʹәрка тә нәдә. Ләма жи, жь Йаһоԝа биланийе бьхԝазә ԝәки сафикьрьнәкә баш бьки кӧ тʹәрка ажотьне бьди йан на.
a Сәва кӧ һе зедә пебьһʹәсьн, бьньһерʹьн готара бь наве «Гәло Һун жь Ԛәзийед бь Әʹрәбе Хԝәйкьри нә?» жь журнала Һʹьшйар Бьн!, сәва 22 Тʹәбахе, сала 2002.