Ebaruha Okwa Banya Filipi
2 Neryo hamabya ihane ekikahimba omu Kristo, ihane erihumulikania ery’olhwanzo, ihane erihindana ly’obunyakirimu,* ihane olhwanzo lhw’eribuya-buya n’erikwira abandi b’obulighe, 2 muleke ng’usule n’obutseme omw’ibya n’obulengekania bughuma n’eribya n’olhwanzo lhughumerere, erilhughirirana ndeke omwa bughuma, eribya n’ekirengekanio kighuma. 3 Simukole ekyosi-kyosi omw’ikakalhukana kutse omw’iyihalhamba, aliwe omw’iyikehya mulhangire abandi nga babalengire, 4 isimulitsomana ebyenyu inywibene, aliwe eritsomana n’eby’abandi.
5 Mubye n’amalengekania aya agho Kristo Yesu nayu abya nagho, 6 kundi nomwakine indi abya omwa kisosekanio kya Nyamuhanga, mwathasamo n’amalengekania aw’erianza erilingirirana na Nyamuhanga. 7 Eyihi, aliwe mwayithuthulha amabya ng’omughombe kandi amabya mundu w’omubiri.* 8 Kwilhaba naho, abere asa ng’omundu,* mwayikehya n’eribya mwowa erihika okwa lhuholho, ee, olhuholho okwa muthi w’obwaghali.* 9 Busana n’enzumwa eyi, Nyamuhanga mwamuhamya omw’imuha ekitsumbi kinene kandi omo lhwanzo mwamuha erina erilengire awandi mena wosi, 10 nuku omwa lina lya Yesu obuli lirwe likukame—ery’ab’omwa lhubulha n’ery’ab’okwa kihugho n’abali eyikwa omwa kithaka— 11 n’obuli lhulimi lhutholere ilhwaligha kinyamwisi ngoku Yesu Kristo ni Mukama busana n’eriha Nyamuhanga Thatha y’olhukengerwa.
12 Busana n’ekyo, banzwa baghe, ngoku mwabiribya imune bowa, isi w’omughulhu ngali nenyu lisa aliwe mukowa kwilhaba naho n’omughulhu ngatheho, mulhole embere erikolera omulhamu wenyu omw’ubaha n’erithithimana. 13 Kundi Nyamuhanga busana n’eriyisunza liwe libuya yukabaha akaghalha, eribaha eriyisunza kuthya n’amaaka w’eriyira eky’erikolha. 14 Mulhole embere erikolha emyatsi yosi isimuli yineghenaya n’erikakalhukana, 15 nuku mwangabya abatheko lhubanza kandi abahenirye, abaana ba Nyamuhanga abatheko kahinira omwa kathi-kathi k’olhulengo olhuhengemire kandi olhuthere, olho mukakolerayamo ng’esyotara omwa kihugho, 16 imunamakirire ekinywe ky’engebe. Aho iningendibya n’enzumwa eyangaleka inatsema omwa kiro kya Kristo, kundi ngaminya ngoku mundathibithira busa kutse erikolera busa. 17 Aliwe, nomunang’uthulhwa ng’obuhere bw’ebinyu okwa kihongo n’omubiiri owabuyirire* ogho erikirirya lyenyu lyabiribakolyako, ngatsemire kandi ngayisyandira haghuma nenyu inywe bosi. 18 Omwa nzira iyan’eyo, nenyu mutholere imwatsema n’eriyisyandira haghuma naghe.
19 Ngawithe amaha omo Mukama Yesu ngoku ngakisiya ingabathumira Timoteo, nuku nangaghumibwa ingabana omwatsi owabahambireko. 20 Kundi singwithe owundi ow’omuthima ng’owiwe oyukendi bawathikya ndeke omwa bikabalyambaya. 21 Kundi abandi abosi batsomene erisondekania ebyabo, butsira ebya Yesu Kristo. 22 Aliwe munasi obwema obo ayihako, ng’omwana na thatha, mwakolha haghuma naghe erilholya engulhu yuwene y’embere. 23 Busana n’ekyo, oyo ya ngalengekanaya eribathumira inganaminya emyatsi nga yamanyighendera yithi. 24 Kandi kwenene, omo Mukama, nganayikethere ngoku naghe ingyuwene-wene ngakisiya ingasa.
25 Aliwe lino ngalhangira ikikayithaghisibawa eribathumira Epafrodito, mughalha wethu kandi mukoli mulikyaghe kandi musirikali mulikyaghe, kandi muthumwa wenyu kandi mughombe waghe busana n’obuyithawa bwaghe, 26 kundi akakandira eribalholhako inywe bosi kandi ali omwa maghaniryo kundi mumwowa kw’alhwere. 27 Kandi kwenene mwalhwalha erisind’iholha; aliwe Nyamuhanga mwamukwira obulighe, isi busana nayu iyuwene aliwe kandi busana naghe, nuku singabye omwa bulighe obundi omwa bundi. 28 Busana n’ekyo, ngabathumirayo omwa byalhuba, nuku mukendibya mukamulhangira imwathasyatsema, n’amaghaniryo waghe iniakeha. 29 Neryo mumwangirire ndeke omo Mukama n’etseme yosi ngoku mukanakolha kandi mubye mukalhangira abalhume ng’abo mwa b’obughuli, 30 kundi abalha hake eriholha busana n’omubiiri wa Kristo,* eritsama engebe* yiwe nuku anganyiwathikya kundi mwabya isimuliho.