Ebaruha Eyakabiri oku Timoteo
4 Embere sya Nyamuhanga na Kristo Yesu, oyukendi syatswera abaliho n’abaholi, n’omw’iminyikalibwa liwe n’Obwami bwiwe, ngakulhaghira indi: 2 Thulha ekinywe; kithule n’omuhwa kandi omwa byalhuba omwa mighulhu eyuwene n’omwa mighulhu eyikalire; habulha, kunga, hana, omw’ighumisirizya lyosi n’omwa mibere eyuwene y’erikangirirya. 3 Kundi omughulhu akendi syahika ibaghana erighendera okw’ikangirirya erihikire,* aliwe erikwamana n’eriyisunza lyabo, bakendi syayithimbyako abakangirirya abakababwira ebyo amathwe wabo akatsemera. 4 Bakendi syaleka erihulikirira ekwenene, ibahulikirira esyongano sy’amabehi. 5 Aliwe iwe, wutheghaye obulengekania bwawu omo myatsi yosi, wuyiyiniraye ebitsibu, wukole omubiiri w’omuthuli w’enjiri,* wuberereraye ndeke omubiiri wawu.
6 Kundi ingye nabirisangwa n’uthulhwa ng’obuhere bw’ebinyu, kandi obuthuku bwaghe bw’eriboholhwa buli hakuhi. 7 Nabirilhwa amalhwa awuwene, nabirihikya amathibitho waghe okwa muhindo, nabirikwama erikirirya. 8 Eritsuka-tsukana na lino, nabiribikirwa embiitha y’erithunganene, eya Omukama, omutsweri oyuthunganene, akendi syanyiha ng’olhuhembo okwa kiro ekyo, is’ingye ingyuwene, aliwe n’abosi ababirianza eriminyikalibwa liwe.
9 Wulhangire wuthi wukanyihikako lhuba. 10 Kundi Dema abirinyisighania, habw’erianza emyatsi y’omulembe ono, kandi abirighenda e Tesalonika, na Kresesi e Galatia, na Tito e Dalmatia. 11 Luka musa yuli naghe. Wasanaye na Mariko kundi akanyiwathikaya omw’ithulira. 12 Aliwe nabirithuma Tikiko ye Efeso. 13 Wukendibya wukasa, wunyilethaniraye erikoti eryo nasighira Karipo e Troa, n’emikunzo, kwilhabirirya ey’esyongobi.
14 Alekzanda omuhesi w’ekopa mwanyaghalya kutsibu. Yehova akendi syamuliha erikwamana n’ebyo anyikolhako. 15 Nawu wutholere iwayitheya okw’iyo, kundi mwahakanisya omwatsi wethu wa kutsibu.
16 Omw’iyilhwirako lyaghe ly’erimbere muhathabya n’oyukabya okwa lhuhandi lhwaghe, aliwe abosi mubanyisighania—ambi isibahirawako olhubanza. 17 Aliwe Omukama mwimana hakuhi naghe kandi amanyihiramo amaaka, nuku erilhabira omw’ingye erithulira lyangaberereribwa ndeke n’ebihanda byosi byangowalyo; kandi munalhamibwa okwa buno bw’endale. 18 Omukama akendi nyilhamya okwa buli mubiiri mubi kandi akendi nyisabulha busana n’Obwami bwiwe bw’elhubulha. Olhukengerwa lhubye lhwiwe kera na kera. Amina.
19 Wunyiramukiraye Priska na Akwila n’ab’omwa nyumba ya Oniziforo.
20 Erasto mwasighalha e Korinto, aliwe munasigha Trofimo ye Mileto inianalhwere. 21 Wulhangire wuthi wukahika eno eritsuku lithelyabya.
Eubulo amakuramukya, kuthya na Pude na Lino na Klaudia n’abalikyethu abosi.
22 Omukama atsumule omuthima owawukakanganaya. Olhukogho lhwiwe lhubye nawu.