Ebaruha Eyakabiri oku Timoteo
3 Aliwe wuminye kino, ngoku omwa biro by’erighunzerera, hasyabya emighulhu eyikalire erighumira. 2 Kundi abandu basyabya abakayanza, abakanza esyosente, ab’emiyiheko, ab’emiyitumyo, abatsumi, abathyowa ababuthi babu, abathesima, abathe mw’obuyiketherwa, 3 abathawithe olhwanzo lhw’ekibuthiranwa, abathelighirana n’abandi, abahangiriri, abatheyikakiraya, abatsibu, abathanzire kibuya, 4 abaghobya, ab’erighundu, ab’oswire mw’emiyiheko, abanzire eriyitsemesya omwakanya k’erianza Nyamuhanga, 5 abakalhangirika ng’abanzire Nyamuhanga aliwe isibali ghendera okwa by’akabugha; neryo wuyihighule okwa bandu ng’aba. 6 Omw’aba mukahangana abalhume abak’ombombera omwa manyumba w’abandu n’erihamba obulengekania bw’abakali abasebebere busana n’amalholho wabo, abakasondolibawa omwa syongumbu muthina-muthina, 7 mughulhu wosi bak’igha aliwe sibali thoka eribana eriminya erihikire ery’ekwenene.
8 Neryo ngoku Yane na Yambure bahakanisaya Musa, n’aba nabo bakalholha embere erihakanisya ekwenene. Abalhume ng’aba babiritheberwa ighuma omwa bulengekania, bakaghanawa kundi sibalikwama erikirirya. 9 Aliwe, sibendi syakolyahi, kundi obukiru bwabu bukendi syalhangirika embere sy’abosi, ngoku kyabya oko balhume babiri abo. 10 Aliwe wabirikwama ndeke erikangirirya lyaghe, engebe yaghe, ekighendererwa kyaghe, erikirirya lyaghe, erighumisirizya lyaghe, olhwanzo lhwaghe, eriyiyinia lyaghe, 11 eriendereribwa n’eriaghalhwa eriri ng’erya nabana e Antiokia, e Ikonio, e Listra. Munayiyinirya eriendereribwa eri, kandi Omukama mwanyilhamya okwa byosi ebi. 12 Omo kwenene, abosi abanzire eribya omwa ngebe y’eryubaha Nyamuhanga omo bughuma na Kristo Yesu, nabo bakendi syendereribwa. 13 Aliwe abandu babi n’abathebya bakendi syongera eribya babi, erithebya abandi n’erithebibwa.
14 Aliwe iwe, wulhole embere omo myatsi eyo w’igha n’eyo walighisibawa, iwunasi abakukangirirayayo 15 kandi ngoku eritsuka omwa bwana wabiriminya ebihandikire ebibuyirire, ebikaleka iwabana amenge awakendi syakukolya okwa mulhamu erilhabira omw’ikirirya Kristo Yesu. 16 Amasako wosi asondolhawa na Nyamuhanga kandi ni w’omughaso busana n’erikangirirya, busana n’erihabulha, busana n’erilhungulha* emyatsi, busana n’erikunga omwa lithunganene, 17 nuku omundu wa Nyamuhanga angathokesibwa ndeke, inianawithe ebyosi eby’akayithagha erithoka erikolha obuli mubiiri owuwene.