Ebaruha Okwa Baebrania
3 Busana n’ekyo, balikyethu ababuyirire, abakasangira omw’ibirikirwa* ly’elhubulha, mulengekanaye oko mukwenda kandi omuhereri mukulhu oyo thukaligha—Yesu. 2 Abya muthaleghulha oko Yuwamusombolha, ngoku Musa nayu anabya omwa nyumba yosi ey’Oyo. 3 Kundi akaghanzawa* ng’oyutholere erihebwa olhukengerwa lhunene kwilhaba olhwa Musa, kundi oyukahimba enyumba ni w’ekitsumbi kwilhaba enyumba. 4 Ni kwenene, obuli nyumba yikahimbawa n’omundu mulebe, aliwe oyuwahimba ebindu byosi ni Nyamuhanga. 5 Neryo Musa abya muthaleghulha ng’omughombe omwa nyumba yosi ey’Oyo ng’obwema bw’emyatsi eyikendi syakanibwako enyuma waho, 6 aliwe Kristo abya muthaleghulha ng’omughalha oyukasondolha enyumba ya Nyamuhanga. Thuli nyumba yiwe, thwamamakirira obwiranda bwethu bw’erikania n’amaha agho thukayihalhambira erihika okwa nduli.
7 Neryo, ngoku omulimu abuyirire akabugha athi; “Munabwire mwamahulikirira omulenge wiwe, 8 isimwakalhaya emithima yenyu ng’omughulhu ow’erihithanibwa erikalire, ngoku kyabya okwa kiro ky’erilengwako omo mbwarara, 9 eyo abathatha-kulhu wenyu banyilengako, nomubanalhangira ebyo nakolha habw’emyaka 40. 10 Eki ky’ekyaleka ingatamwa olhulengo olhu, namabugha indi: ‘Mughulhu wosi bakaghenda lhuhandi omwa mithima yabo, kandi sibathaminya esyonzira syaghe.’ 11 Neryo munalhahirya omw’ihithana lyaghe indi: ‘Sibendi syingira omw’ilhuhuka lyaghe.’”
12 Balikyethu, muyitheghaye, omw’inywe simubye oyukasamo omuthima mubi ow’erithendibya n’erikirirya omw’iyisununulha oku Nyamuhanga oyuliho; 13 aliwe mulhole embere erihimbangana obuli kiro, ibukinahulhawa “Munabwire,” nuku sihabye n’omughuma w’okw’inywe oyukakalhaya omuthima busana n’amathebo w’amaaka w’ekibi. 14 Kundi kwenene thukabya bughuma* na Kristo ithunalyamakirira ndeke eriyikethera eryo thwabya nalyo okw’itsuka erihika okwa nduli. 15 Ngoku kikabughawa kithi, “Munabwire mwamahulikirira omulenge wiwe, isimwakalhaya emithima yenyu ng’omughulhu ow’erihithanibwa erikalire.”
16 Kundi ni bahi abowa aliwe bamamuhithania erikalire? Mbwino kwenene, sib’abosi abalhua e Misiri ibanemusondolhwa na Musa? 17 Kandi ni bahi abo Nyamuhanga atamawa ahabw’emyaka 40? Mbwino sib’abo abahalhaya, abo ebinda byabo byawa omo mbwarara? 18 Kandi ni bahi abo alhahiraya athi sibendi syingira omw’ilhuhuka liwe? Mbwino sib’abo abakolha omwa buthowa? 19 Neryo thukalhangira ngoku babya isibang’ingiramo kundi sibabya bawithe erikirirya.