Ebaruha y’Erimbere Okwa Banya Korinto

5 Omo kwenene, eby’obutswatswa* byabiryowibwa omw’inywe, eby’obutswatswa* ebithe byathabya n’omwa banya bihanda—omulhume er’imya muka thatha wiwe. 2 Mbwino mukayisyetherakyo? Busana naki imuthasusumana, nuku omulhume oyuwakolha eki angalhusibwa omwa kathi-kathi kenyu? 3 Nomwakine indi sindi nenyu busu kwa busu, ngane nenyu omwa mulimu, kandi nabirisangwa natswera omulhume oyuwakolha eki, nga ngane haghuma nenyu. 4 Omughulhu mukahindana haghuma omwa lina ly’Omukama wethu Yesu, n’eriminya ngoku ngane haghuma nenyu omwa mulimu ingane n’amaaka w’Omukama wethu Yesu, 5 omulhume ng’oyu mutholere imwamulhwikira Sitani busana n’erithoghothibwa ly’omubiri, nuku omulimu angasyalhamibwa okwa kiro ky’Omukama.

6 Eriyihalhamba lyenyu siryuwene. Simwasi ngoku n’ekihamya kike kikapakalhaya omukanyu owosi? 7 Mughuse ekihamya ekikulhu nuku mwangabya mukanyu muhyaka, ngoku mune bwiranda okw’ipakalha. Kundi kwenene, Kristo Ekyana ky’Embuli ky’Erikyuruka lyethu abirihongwa. 8 Neryo kwesi thulhangire thuthi omukonga syalibyako ekihamya ekikulhu, kutse ekihamya ekithuwene kandi eky’obubi, aliwe kubye omuggati owathemo kihamya ow’ekihikire n’eky’okwenene.

9 Omo baruha yaghe munabahandikira indi mulekere aho erisiba haghuma n’abandu abakakolha eby’obutswatswa,* 10 isindi manyisaya erithendi siba nahake n’abakakolha eby’obutswatswa* b’ekihugho kino kutse abandu b’omururu kutse abanyeyi kutse abakaramaya esyosanamu. Bithe bithya, mwangabere b’erilhua omwa kihugho. 11 Aliwe lino ngabahandikira indi mulekere aho erisiba haghuma n’owosi-wosi oyukahulhawamo mulikyethu oyukakolha eby’obutswatswa* kutse ow’omururu kutse oyukaramaya esyosanamu kutse omutsumi kutse omuthamiri kutse omunyeyi, nibya isimwalya n’omundu ng’oyo. 12 Kundi ni kyahi ekyangaleka ingatswera ab’eyihya? Mbwino si b’ab’omwa kathi abo mukatswera, 13 na Nyamuhanga inianemutswera ab’eyihya? “Mulhusaye omundu mubi omwa kathi-kathi kenyu.”