Ebaruha Okwa Banya Filipi
3 Erighunzerera, balikyethu, mulhole embere eritsema omo Mukama. Si muheke okw’ingye eribahandikira emyatsi mighumerere, kandi ni busana n’eribatheya.
2 Muyitheghaye okwa syombwa; muyitheghaye okwa bakahuthalhaya; muyitheghaye okwa bakasaranga emibiri yabo. 3 Kundi n’ithwe thuwithe eribanibwa ly’okwenene, ithwe abanemukolha omubiiri owabuyirire erilhabira omwa mulimu wa Nyamuhanga n’eriyihalhamba omu Kristo Yesu kandi abathaseghemeraya eriyisyetha lyethu omwa mubiri, 4 nomwakine indi ingye, kwilhaba abandi bosi, ngawithe enzumwa y’eriyisyethera omubiri.
Owundi mundu wosi-wosi amalengekania athi anawithe enzumwa y’eriyisyethera omubiri, ingye ni kwilhaba aho: 5 nabanibawa okwa kiro ky’omunani, ow’ekihugho kye Israeli, ow’ekihanda kya Benyamini, Omuhebrania oyuwabuthawa omwa Bahebrania; erikwamana n’emighambo, Omufarisayo; 6 erikwamana n’omuhwa, munendererya ekithunga; erikwamana n’ebithunganene ebiseghemere okwa mighambo, munayikangya ku singaliko lhubanza. 7 Nomwabine, emyatsi eyabya maghoba okw’ingye, nabirilhangirayo ng’iherya* busana n’omwatsi wa Kristo. 8 Eryongera okw’ekyo, kandi kwenene ngalhangira emyatsi yosi nga bindu bbule busana n’eriminya lya Kristo Yesu Omukama waghe ery’obughuli obulengethukire. Busana nayu nabirilhangira emyatsi yosi nga bindu bbule kandi eby’okwa kyabu, nuku nangabana Kristo 9 nanga mathikana nayu, isi busana n’erithunganene lyaghe ery’erikwama Emighambo, aliwe busana n’erithunganene erikasa erilhabira omw’ikirirya omo Kristo, erithunganene erikalhua oku Nyamuhanga eriseghemere okw’ikirirya. 10 Ekilhubirirwa kyaghe ly’erimuminya n’amaaka w’erilhubuka liwe n’erisangira omw’ighalhwa liwe, eriligha olhuholho olhuli ng’olhw’iwe, 11 erilebya nga kyangana thokekana ingye erisyalhubukibwa omwa baholi okw’ilhubuka ly’erimbere.
12 Si bugha indi nabirisangwa nabanalyo kutse indi nabirisangwa nahikana, aliwe nganemulengaho erilebya nga nanganahambirirya okwa kyaleka Kristo Yesu inianyisombolha.* 13 Balikyethu, sindi yithwalha nganabiribanakyo; aliwe hali kino ekya ngasi ndeke: Eribirirwa emyatsi y’enyuma n’erilhandamirira emyatsi eyiri embere, 14 nganemulhubirira erihika okwa kilhubirirwa ky’olhuhembo eky’eribirikirwa endatha na Nyamuhanga erilhabira omu Kristo Yesu. 15 Busana n’ekyo, ithwe thukulire thubye n’obulengekania obu, kandi mwamabya imuwithe obundi bulengekania omwa nzira yosi-yosi, Nyamuhanga iniakendi babisulira obulengekania obuli ahighulhu obu. 16 Mbulha thwabirikulha-kulhana erihika okwa lhulengoki, thulhole embere erilendera omwa buyithondeke omwa nzira iyan’eyi.
17 Balikyethu, inywe bosi haghuma munyigherereraye, muhire ameso wenyu okw’abakalendera omwa nzira eyihambene n’eky’erileberyako ekya thwabiribahiriraho. 18 Kundi hali bangyi—mughulhu mungyi iningab’ahulha aliwe lino ngab’ahulha inganemulira—abakalendera ng’esyonzighu sy’omuthi w’obwaghali* wa Kristo. 19 Enduli yabo ni thoghothibwa, n’enyamuhanga yabo sy’esyonda syabo, kandi olhukengerwa lhwabo, omo kwenene ni hemuka lyabo, kandi babirihira amalengekania wabo oko myatsi y’ekihugho. 20 Aliwe obwikalho bwethu buli elhubulha, kandi thulindirire kutsibu omulhamya erilhua eyo, Omukama Yesu Kristo, 21 oyukendi syahindulha omubiri wethu mwolho eribya* ng’omubiri wiwe ow’olhukengerwa erilhabira omwa buthoki bwiwe bunene obukamuthokesaya erihira emyatsi yosi ahisi siwe.