Ebaruha Yakabiri Okwa Banya Korinto
8 Balikyethu, thwanzire imwaminya ebihambire okwa lhukogho lhwa Nyamuhanga olhwabirikanganibwa ebithunga bye Makedonia. 2 Omughulhu balengawako kutsibu ibanemwaghalhwa, obutseme bwabu bunene n’obunakwa bwabo bunene mubyaleka ibongera* omubere wabu w’erihithya. 3 Kundi kyabya erikwamana n’ebya bawitheko, ee, ngakikakasaya, mukyabya kwilhaba n’ebya bawitheko, 4 ibo ibobene-bene mubabera erithulemba-lemba bathi bahebawe olhusunzo lhw’erihithya, erisangira omwa mubiiri w’eriwathikya ababuyirire. 5 Kandi mubakolha kwilhaba ngoku thwabya thukalengekania, aliwe erimbere, mubayihayo oko Mukama n’okw’ithwe erilhabira omw’isonda lya Nyamuhanga. 6 Neryo muthwahira omu Tito mw’omuhwa thuthi, ngoku anabya iniabiritsukisya omubiiri oyu omwa kathi-kathi kenyu, atholere kandi iniaghunzerera omubiiri iwan’oyo ow’erisorokya ebyo mwahayo ahathe erikakwa. 7 Nomwabine, ngoku munemwongera erikolha kutsibu omwa buli kindu, omw’ikirirya n’omwa kinywe n’omw’iminya n’omwa muhwa wosi n’omwa lhwanzo olhu olho thubawithire, kwamunongere muthya erikolha kutsibu n’omwa mulingo w’erihithya oyu.
8 Ngabugha kino, si kilhaghiro, aliwe erianza muminye omuhwa w’abandi n’erilebya olhwanzo lhwenyu nga nina lhw’okwenene. 9 Kundi munasi olhukogho lhw’Omukama wethu Yesu Kristo, ngoku nomwakine indi abya mugaga, mwabya munakwa busana nenyu, nuku mwangabya bagaga erilhabira omwa bunakwa bwiwe.
10 Kandi okw’eki ngaha ekirengekanio kyaghe: Eki ni busana n’erighasirwa lyenyu, erilhangira ngoku hamabirilhaba omwaka mwalitsukisirye omubiiri oyu n’erikangania eriyisunza lyenyu ly’erikolhagho. 11 Neryo lino, mughunzerere ebyo mwabiritsuka erikolha, nuku eriyisunza lyenyu ly’erikolha libererere erikwamana n’ebya muwithe. 12 Kundi erimbere eriyisunza lyamabya irineho, kutsibu-tsibu ekikalighawa, ky’ekikahebawayo erikwamana n’eby’omundu awithe, butsira ebyo athawithe. 13 Kundi singanzire ngabyolhoberya abandi, aliwe inywe ngabakaliryabyo; 14 aliwe indi erilhabira omw’ilingirirania, obungyi bw’ebya mukahayo lino bwanga sokera obuyithawa bwabu, nuku obungyi bw’ebyabakahayo nabo bwanga sokera erikehererwa lyenyu, nuku hangabya erilingirirania. 15 Ngoku kihandikire kithi: “Oyuwithe bingyi sy’abya awithe bingyi kutsibu, n’oyuwithe bike sy’abya awithe bike kutsibu.”
16 Neryo ngasima Nyamuhanga habw’erihira omwa muthima wa Tito mw’omubere iwan’oyo ow’eribatsomana kutsibu, 17 kundi kwenene abiriligha ebya thwamubwira, aliwe kundi anzire kutsibu eryasa, anemwasa eyo muli ahabwiwe. 18 Aliwe thukayamuhirako mughalha wethu oyo eripipwa liwe busana n’engulhu yuwene lyabirilhandaghana omwa bithunga byosi. 19 Si ky’ekyo kisa, aliwe kandi ebithunga mubyamusombolha eribya akaghenda nethu thukaghaba ebihembo ebikahebawayo ebi busana n’olhukengerwa lhw’Omukama n’omw’ikangania ku thunayitheghekire eriwathikya. 20 Busana n’ekyo, thukayitheghaya okw’ibya owosi-wosi iniangana thubana kw’akahinira omwa mubiiri w’erihayo oyu owathukakolha. 21 Kundi ‘thukakolha ebyosi omo kwenene, butsira embere sya Yehova musa aliwe n’embere sy’abandu.’
22 Kandi thukabahirako owundi mughalha wethu oyo thwabirilengesya mughulhu mungyi neryo thwabirilhangira kw’awithe omuhwa omo myatsi mingyi, aliwe lino awithe omuhwa munene kutsibu kundi abayikethere. 23 Hamabya ihane ekibulyo kyosi-kyosi ekihambire oku Tito, ngaghenda* nayu kandi thukakolha haghuma busana n’erighasirwa lyenyu; kutse hamabya ihane ebibulyo ebihambire oko baghalha bethu, ni bakwenda b’ebithunga kandi ni lhukengerwa lhwa Kristo. 24 Neryo mubakanganaye ku mubanzire, kandi mukanganaye ebithunga enzumwa eyaleka ithwayihalhamba busana nenyu.