Ebaruha Okwa Baebrania
6 Neryo kundi thwabirilhaba okwa syongangirirya sy’erimbere-mbere esihambire oku Kristo, thulhole embere erikulha, butsira erithasyahimba omusingyi, ni bugha ambu, erikirirya Nyamuhanga n’eriyisubamo erileka emikolere eyiholire, 2 engangirirya okwa mihanda muthina-muthina y’olhubatizo n’erihirwako ebyalha, erilhubuka ly’abaholi n’eritswera erya kera na kera. 3 Kandi eki kyathukendi kolha, Nyamuhanga amakilighira.
4 Bikahika okw’abanabirikangiriribwa kandi abanarozirye okwa kihembo ky’elhubulha ekitheko erithuha kandi abanahebirwe omulimu abuyirire 5 kandi abanarozirye okwa kinywe kibuya kya Nyamuhanga n’amaaka w’omughulhu owakasa, 6 aliwe bamawa, sikyanga thasyathokekana eribasubya okw’iyisubamu, kundi bakathasyakongomerera Mughalha wa Nyamuhanga okwa muthi ahabwabo n’erimuhemulira omwa bandu. 7 Kundi ekithaka kikatsumulhawa na Nyamuhanga omughulhu kikanywa embulha eyikakiwako mughulhu wosi neryo ikyahulhukya ebirimwa ebikaghasira abakakirima. 8 Aliwe kyamahulhukya amahwa n’amatholhu, kikaghanawa kandi kikisiya ikyathakirwa, n’erighunzerera kikendi syahisibwa.
9 Aliwe okw’inywe, banzwa bethu, thukakasirye emyatsi mibuya, emyatsi eyihambire okwa mulhamu, nomwakine indi thukakanaya omo mibere eyi. 10 Kundi Nyamuhanga si mundu oyuthathunganene oyuwang’ibirirwa emibiiri yenyu n’olhwanzo olho mwakanganaya erina liwe omw’iherezya n’erilholha embere eriherezya ababuyirire. 11 Aliwe thwanzire obuli mughuma w’okw’inywe iniakangania omuhwa owali ng’oyo ow’erikolha nuku angakakasya ndeke-ndeke amaha wiwe erihika okwa nduli, 12 nuku simubye baghatha, aliwe mugherereraye abasighalhaya emilhaghe erilhabira omw’ikirirya n’omw’ighumisirizya.
13 Omughulhu Nyamuhanga alhaghanisaya Abrahamu, kundi sihabya owundi oyumulengire oyo angalhahirya omwa lina liwe, mwalhahirya omw’iyo iyuwene-wene, 14 athi: “Omo kwenene, ngendi syakutsumulha kandi omo kwenene ngendi syakanyirirya olhubutho lhwawu.” 15 Neryo Abrahamu abere abirikangania erighumisirizya, mwabana ebyo alhaghawa. 16 Kundi abandu bakalhahiraya omwa lina ly’oyubalengire, n’ekilhahiryo kyabo ky’ekikaghunzaho obuli kakalhukana, kundi okw’ibo likabya kilhaghiro ekikaghumaya ebyo bamabugha. 17 Omwa nzira iyan’eyo, omughulhu Nyamuhanga athwamu erikangania ndeke-ndeke abawetwa ab’omulhaghe obuthahinduka-hinduka bw’ekighendererwa* kiwe, mwabya iniamakihamyako* omwa kilhahiryo, 18 nuku erilhabira omwa bindu bibiri ebithehinduka-hinduka ebyo Nyamuhanga athe angabughamo amabehi, ithwe ababirithibitha omwa busaghiro thwangabya n’omuhwa munene w’eryamakirira amaha awali embere syethu. 19 Thuwithe amaha aya ng’enaanga y’engebe, amaha aw’okwenene kandi awasikire, kandi ak’ingira omwa kisukuliryo, 20 eyo omuthuli w’enzira, Yesu, abiryingiramo busana nethu, oyuwabiribya muhereri mukulhu omwa muhanda wa Melkizedeki kera na kera.