Ebaruha y’Erimbere Okwa Banya Korinto
9 Mbwino sindi bwiranda? Mbwino sindi mukwenda? Mbwino sinathalhangira Yesu Omukama wethu? Mbwino simuli mubiiri waghe omo Mukama? 2 Nomungathe mukwenda oko bandi, ahathe erithika-thika ngali mukwenda okw’inywe! Kundi inywe muli kiminyisyo ekikaghumaya ku ngali mukwenda omo Mukama.
3 Eriyilhwirako lyaghe okwa bakanyitswera lya lino: 4 Thuwithe obughabe* bw’erirya n’erinywa, kwa bithe? 5 Thuwithe obughabe, obuli mundu erighenda na mukali* wiwe oyuwikirirye, ngoku abandi bakwenda na baghalha bobu Mukama na Kefa* bakakolha, kwa bithe? 6 Kutse mbwino ingye na Baranaba n’ithwe basa abathawithe obughabe bw’erileka erikolha busana n’ebiyithawa? 7 Ni musirikali wahi oyukakolha kandi akayithuha? Nindi oyukahera eririma ly’emizabibu akathendirya okwa bighuma byayo? Kutse nindi oyukalisaya ekihangulho akathendinywa okwa mathe aw’akalhua omwa kihangulho?
8 Mbwino ngabugha emyatsi eyi erikwamana n’amalengekania w’abandu? Kutse emyatsi eyi y’eyithebughawa n’omwa Mighambo? 9 Kundi kihandikire omwa Mighambo ya Musa kithi: “Isiwaboha obuno bw’enume omughulhu yikakolesibawa okw’ihumba engano.” Mbwino Nyamuhanga atsomene esyonume sisa? 10 Kutse akabugha eki busana nethu? Omo kwenene kyahandikawa busana nethu, kundi omundu oyukalima n’oyukahumba bakakolha ekyo ibanawithe amaha w’eribana omughabo.
11 Thwamabya ithwabiribaheramo emyatsi y’obunyakirimu, mbwino ithukendibya ithwamalhabirirania thwamabasolhomamo obuwathikya bw’ekinyamubiri? 12 Abandi bandu bamabya ibanabawitheko obughabe obu, mbwino ithwe sithubuwithe kwilhaba n’aho? Nomwabine, sithwathakolesya obughabe* obu, aliwe thunemuyiyinirya emyatsi yosi nuku omwa nzira yosi-yosi sithukakiraye engulhu yuwene eyihambire oku Kristo. 13 Simwasi ngoku abakakolha emibiiri eyibuyirire bakalya okwa bindu by’ehekalhu, kandi ngoku abakakolera okwa kiherero mughulhu wosi bakahebawa omughabo erilhua okwa kiherero? 14 Kuthya, Omukama mwalhaghira athi abakathulhughanaya engulhu yuwene batholere ibalya okwa by’engulhu yuwene.
15 Aliwe sihali n’ekighuma ky’okw’ebi ekyo nabirithakolha. Nomwabine, sibugha ambu namahandika emyatsi eyi nuku ngakolerawe eki, kundi ikikendibya kibuya ingye eriholha omwakanya—sihali mundu oyukendi ny’ihako ebikaleka ingayihalhamba! 16 Neryo namabya iningathulhughanaya engulhu yuwene, eyo si nzumwa eyangaleka ingayihalhamba, kundi ekyo kyangatholere ingakolha. Omo kwenene, obulighe okw’ingye namathendi thulhughania engulhu yuwene! 17 Namakolha eki ahathe erikakwa, ngawithe olhuhembo; aliwe namakikolha isinganzire, iningendibya ingakinawithe omubiiri w’obwimaniri ogho nabirihebwa. 18 Neryo olhuhembo lhwaghe lhw’olhwahi? Indi omughulhu ngathulhughanaya engulhu yuwene, ngathulha engulhu yuwene ahathe erithuhwa, eriyihighulha okw’ikolesya obuthoki* bwaghe bwa nabi omwa ngulhu yuwene.
19 Nomwakine indi ngali bwiranda okwa bandu bosi, nabiriyiyira mwa mukobe w’abosi, nuku nangabana abangyi ngoku nangathoka. 20 Okwa Bayuda munabya Muyuda nuku ngabane Abayuda; okwa bali ahisi sy’emighambo munabya ahisi sy’emighambo, nomwakine indi ingye sindi ahisi sy’emighambo, nuku ngabane abali ahisi sy’emighambo. 21 Okw’abo abathawithe mighambo munabya ng’oyuthawithe mighambo, nomwakine indi sindi ng’oyuthawithe mighambo oku Nyamuhanga, aliwe ngali ahisi sy’emighambo oku Kristo, nuku ngabane abathawithe mighambo. 22 Okwa batseke munabya mutseke, nuku ngabane abatseke. Nabiribya myatsi yosi okwa bandu b’emisindo yosi, nuku kyamathokekana omwa nzira yosi-yosi inalhamya abaghuma b’okw’ibo. 23 Aliwe ngakolha ebyosi busana n’engulhu yuwene, nuku ngabwire kuyo kw’abandi.
24 Mbwino simwasi ngoku abali omo mathibitho w’amalingwatha abosi bakathibitha, aliwe omughuma musa ku yukahebawa olhuhembo? Muthibithe omwa mibere eyangaleka imwasinga. 25 Neryo obuli mundu oyukasangira omwa malingwatha* akayikakiraya omo myatsi yosi. Ibo bakasangira mugho ini b’erihebwa embiitha eyangana hwaho, aliwe ithwe thukabana eyithe yanga hwaho. 26 Busana n’ekyo, emithibithire yaghe siyiri ng’ey’oyuthawithe kilhubirirwa; ngalengerera esyongumi syaghe nuku singasighuse omo mwanya buyira; 27 aliwe ngaghalhaya* omubiri waghe n’erisondolhagho ng’omukobe, nuku ngendibya nabirithulira abandi, naghe ingyuwene-wene singabyeko ekyangaleka inaghanwa.