Ebaruha Okwa Banya Efeso
2 Eryongera okw’ekyo, Nyamuhanga mwabasubya, nomumwanabya muholire omwa malholho n’omwa bibi byenyu, 2 omughulhu mwabya mukalendera erikwamana n’omulembe* w’ekihugho kino, erikwamana n’omuthabali w’obuthoki bw’ekyanya, ekirimu ekikakolha lino omwa baana abathyowa. 3 Ee, ithune mubo ithwe bosi muthwanaghendera okwa syongumbu sy’omubiri wethu, ithukakwama erisonda ly’omubiri n’ery’amalengekania wethu, kandi kibuthiranwa thwabya baana b’erihithana ng’abandi ku bali. 4 Aliwe, Nyamuhanga eribya inioswire n’obughanyiri, busana n’olhwanzo lhwiwe lhunene olho athwanzamo, 5 mwathusubya haghuma na Kristo, nomuthwanabya thuholire omwa malholho—omwa lhukogho mwabirilhamibwa. 6 Kandi mwathulhubukya haghuma n’erithwikalya haghuma omwa myanya y’elhubulha omw’imathikana na Kristo Yesu, 7 nuku omwa mighulhu eyikasa angasyakangania obubuya bunene bw’olhukogho lhwiwe omwa lhukeri lhwiwe okw’ithwe omw’imathikana na Kristo Yesu.
8 Omwa lhukogho olhu mwabirilhamibwa busana n’erikirirya, kandi eki si busana n’akaghalha kenyu; aliwe ni kihembo erilhua oku Nyamuhanga. 9 Eyihi, si busana n’ebya thukakolha, nuku sihabye oyukabana eky’eriyihalhambira. 10 Thuli mubiiri w’ebyalha* bya Nyamuhanga kandi muthwahangikwa ithumathikene na Kristo Yesu busana n’emikolere eyuwene, eyo Nyamuhanga asangwa athwamu nuku thulendere muyo.
11 Busana n’ekyo, mwibuke ngoku inywe, abandu b’ebihanda kinyamubiri, n’inywe abakahulhawamo “ababanibwe” bahulhamo “abathabanibwe,” eribanibwa erikakolhawa okwa mubiri omwa byalha by’abandu. 12 Okwa buthuku obo, mwabya butsira Kristo, imuli haali oko kihanda kye Israeli, isimwasibwe omwa syondaghane sy’omulhaghe; simwabya n’amaha kandi mwabya butsira Nyamuhanga omwa kihugho. 13 Aliwe lino omw’imathikana na Kristo Yesu, inywe mwanabya haali mwabiryasa hakuhi busana n’omusasi wa Kristo. 14 Kundi iyo ni buholho bwethu, oyuwakolha esyogurupu ibiri mwa nguma n’erighunzaho olhuhimbo olhwabya lhukasighabulha. 15 Erilhabira omwa mubiri wiwe mwaghunzaho obuyighu, Emighambo y’ebilhaghiro eyirimo amahamulho, nuku esyogurupu ibiri simathikane nayu eribya mundu mughuma omuhyaka n’erihiraho obuholho, 16 n’eriwathikya syogurupu ibiri erisubanamu ndeke eribya mubiri mughuma oku Nyamuhanga erilhabira omwa muthi w’obwaghali,* kundi abya iniabirighunzaho obuyighu erilhabira omw’iyo iyuwene-wene. 17 Kandi mwasa amababwira engulhu yuwene y’obuholho inywe mwabya haali, n’obuholho okwa bali hakuhi, 18 kundi erilhabira omw’iyo, ithwe syogurupu ibiri, thuwithe obwiranda bw’erihikira Thatha erilhabira omwa mulimu mughuma.
19 Neryo simukiri b’ehandi kandi babunga, aliwe muli bikalhani haghuma n’ababuyirire kandi muli b’omwa nyumba ya Nyamuhanga, 20 kandi mwabirihimbwa okwa musingyi w’abakwenda n’abaminyereri, na Kristo Yesu iyuwene-wene iya libwe ly’esonda ery’omusingyi. 21 Omw’imathikana nayu, enyumba eyosi, ebitsweka byayo ebyosi ibinayunga-yungene ndeke, yinemukanyirira eribya hekalhu eyibuyirire busana na Yehova. 22 Omw’imathikana nayu nenyu munemuhimbwa haghuma mo mwanya wa Nyamuhanga ow’erikalhamo erilhabira omwa mulimu.