Ebaruha Yakabiri eya Petero
3 Banzwa, eno ni baruha eyakabiri ingye eribahandikira, ngoku kine omwa baruha y’erimbere eyo nabahandikira, ngabukaya amaaka wenyu w’erilengekania omwa bibukyo, 2 indi mutholere imw’ibuka ebinywe ebyo mwabwirawa* erilhabira omwa baminyereri ababuyirire n’omwa kihano ky’Omukama kandi Omulhamya erilhabira omwa bakwenda benyu. 3 Muminye kino, ngoku omwa biro by’erighunzerera abasininguli bakendi syasa n’erisiningulha lyabu, erikolha erikwamana n’esyongumbu syabo 4 ibakabugha bathi: “Eribyaho liwe eri eryalhaghanisibawa liri hayi? Kundi eritsuka ekiro abathatha-kulhu wethu baghotsera omwa lhuholho, emyatsi yosi yinemulholha embere ngoku yanabya okw’itsuka ly’erihangika.”
5 Kundi bakakighenderera erigheghena ekwenene eno, ngoku kera habya ekyanya n’ekihugho ebyabya ibinahangene omo maghetse buthaseghana, omwa kathi-kathi k’amaghetse erilhabira omwa kinywe kya Nyamuhanga; 6 kandi ngoku erilhabira omwa nzira eyi ekihugho ky’omwa buthuku obo mukyathoghothibwa omughulhu amaghetse akiboghako. 7 Aliwe erilhabira omwa kinywe ikyan’ekyo olhubulha n’ekihugho ebiriho lino bibikirwe busana n’omuliro kandi binemubikwa erihika okwa kiro ky’eritswera n’eky’erithoghothya abandu abathyubaha Nyamuhanga.
8 Aliwe, banzwa, mubye imunasi kino, ngoku ekiro kighuma oku Yehova* kiri ng’emyaka rukumi n’emyaka rukumi ng’ekiro kighuma. 9 Yehova* syalinyoba bikahika okwa milhaghe yiwe, ngoku abandi bandu bakalengekanaya bathi akanyoba, aliwe akabaghumisirizaya kundi syanzire owosi-wosi akathoghothibwa aliwe anzire abosi ibayisubamo. 10 Aliwe ekiro kya Yehova* kikendi syasa ng’omwibi, okwa kiro ekyo olhubulha lhukendi syahwaho omwa mururumo,* aliwe eby’omwa kyanya busana n’eriseruka kutsibu bikendi syabulirana, n’ekihugho n’ebikorwa ebiri mukyo bikendi syaminyikalibwa.
11 Kundi emyatsi yosi eyi yikendi syabulirana yithya, mulebaye nga mutholere imwabya bandu b’omusindo wahi eribya babuyirire omwa mighendere n’omwa mibiiri y’eryubaha Nyamuhanga, 12 munemulinda n’eribya imun’ibukire* eribyaho ly’ekiro kya Yehova,* ekyo olhubulha lhukendi syathoghothibirwamo omwa birimi by’omuliro n’eby’omwa kyanya bikendi syayeya omwa kihuhania kinene kutsibu! 13 Aliwe hali olhubulha lhuhya-lhuhya n’ekihugho kihya-kihya ebyo thulindirire erikwamana n’omulhaghe wiwe, kandi ekithunganene kikendi sy’ikalha omo.
14 Busana n’ekyo, banzwa, kundi mulindirire emyatsi eyi, mukole kutsibu ngoku mwanga thoka nuku erighunzerera asyabeghaya isimuliko kahinira kutse bulema kandi imune buholho. 15 Eryongera okw’ekyo, mulhangire erighumisirizya ly’Omukama wethu ng’omulhamu, ngoku mughalha wethu mwanzwa Paulo nayu anabahandikira erikwamana n’amenge agho ahebawa, 16 akakania oko myatsi eyi ngoku anakolha omwa syobaruha siwe syosi. Aliwe eyindi myatsi omw’isyo yikalire eriyitheghererya, kandi emyatsi eyi abathasiki kandi abathasikire banemuhengemyayo, ngoku bakanakolha n’okwa wandi Masako, busana n’erithoghothibwa lyabo.
17 Busana n’ekyo, inywe banzwa, kundi mwabirisangwa mwahebwa eriminya eri, muyitheghaye mukasyathalibwa haghuma nabo omwa bibi by’esyongoli sy’ebibi, mukalhua okw’isika lyenyu. 18 Eyihi, aliwe mulhole embere erikulha omwa lhukogho n’omw’iminya ly’Omukama wethu kandi Omulhamya Yesu Kristo. Olhukengerwa lhubye lhwiwe lino n’okwa kiro ky’erikotha. Amina.