Ebaruha Yakabiri Okwa Banya Korinto
1 Paulo, omukwenda wa Kristo Yesu omw’isonda lya Nyamuhanga, na mughalha wethu Timoteo, okwa kithunga kya Nyamuhanga ekiri e Korinto, imwamune n’ababuyirire abosi abali omwa Akaya eyosi:
2 Ambi olhukogho n’obuholho erilhua oku Nyamuhanga Thatha wethu n’Omukama Yesu Kristo ibyabya haghuma nenyu.
3 Nyamuhanga kandi Thatha w’Omukama wethu Yesu Kristo apipawe, Thatha w’obughanyiri kandi Nyamuhanga w’erihumulikania lyosi, 4 oyukathuhumulikanaya* omwa bitsibu* byethu byosi nuku thwanga thoka erihumulikania abandi omwa buli mulingo w’ekitsibu* omw’ihumulikania eryathukahebawa erilhua oku Nyamuhanga. 5 Ngoku eriaghalhwa busana na Kristo likakanyirira omw’ithwe, n’erihumulikania eryathukahebawa erilhabira omu Kristo nalyo likakanyirira. 6 Neryo thwamabana ebitsibu,* ni busana n’erihumulikanibwa lyenyu n’omulhamu wenyu; kandi thwamahumulikanibwa, ni busana n’erihumulikanibwa lyenyu, erikabawathikaya eriyiyinirya eriaghalhwa eryo nethu thukabana. 7 Kandi amaha wethu busana nenyu aghumire, ithunasi ngoku nenyu munemwaghalhwa ng’ithwe, neryo nenyu mukendi humulikanibwa.
8 Balikyethu, sithwanzire mukabya isimwasi amalighe agho thwabana omwa provisi ye Asia. Muthwabana ebitsibu binene ebilhabire okwa maaka wethu, isithwasi engebe yethu nga yikalholhaya hayi. 9 Kundi nibya muthwayowa nga thwabiritswerwa olhw’erikwa. Eki kyabya nuku sithuyikethere amaaka wethu, aliwe Nyamuhanga oyukalhubukaya abaholi. 10 Mwathulhamya okwa kabi akakalire ak’olhuholho kandi akendi thulhamya, kandi amaha wethu ali omw’iyo ngoku kandi akendi lholha embere erithulhamya. 11 Nenyu mwangana thuwathikya omw’ithulemba-lembera Nyamuhanga, nuku abangyi bangaha ewasingya busana nethu habw’eriwathikibwa eryathukabana omw’isubirya ly’emisabe y’abangyi.
12 Kundi ekya thukayihalhambira kya kino, obunyamuthima-thima bwethu bukaha obwema ngoku omwa kihugho kandi kutsibu-tsibu okw’inywe, thwabiribya n’emibere ey’obubuyirire n’erikenga Nyamuhanga omo kwenene, butsira omo menge w’ekinyamubiri, aliwe omo lhukogho lhwa Nyamuhanga. 13 Kundi kwenene sihali kindi ekya thukabahandikira athe iw’omwatsi ogho mwanga soma* n’eriyitheghererya, kandi ngawithe amaha ngoku mukendi lholha embere eriyitheghererya emyatsi eyi ya ndeke,* 14 ngoku nenyu mwabiriyitheghererya erihika okw’ibya imukayihalhamba busana nethu, ngoku nethu thukendi syayihalhamba busana nenyu okwa kiro ky’Omukama wethu Yesu.
15 Neryo busana n’eriyikethera eri, nabya nganzire eritsuka eryasa eyo muli, mwangatsema omurundi wakabiri;* 16 kundi ingane omwa nzira ingaya e Makedonia, munalengekania okw’ibabungira, indi ngendi syabahikako ingalhua e Makedonia, neryo imwanyitsindika ingaghenda e Yudea. 17 Omughulhu nabya n’ekirengekanio ekyo, munathalhangira omwatsi oyo mwa lhutseghe-tseghe, kwa bithe? Kutse ngathegheka emyatsi kinyamubiri, ng’oyukabugha athi “Ee, ee” kandi athi “Eyihi, eyihi”? 18 Aliwe ngoku Nyamuhanga ni w’eriyikethera, ebya thukababwira si “ee” kandi ini “eyihi.” 19 Kundi Mughalha wa Nyamuhanga, Yesu Kristo, oyuwathulhughanibawa omwa kathi-kathi kenyu erilhabira omw’ithwe, ni bugha ambu, erilhabira omw’ingye na Silvano* na Timoteo, mwathabya “ee” kandi ini “eyihi,” aliwe “ee” yabiribya “ee” omw’iyo. 20 Kundi emilhaghe ya Nyamuhanga nomuyangabya mingahi, yabiribya “ee” erilhabira omw’iyo. Busana n’ekyo, ne “Amina” eyathukaha Nyamuhanga eyikamulethera olhukengerwa erilhabira omw’ithwe, thukahayo erilhabira omw’iyo. 21 Aliwe oyukakakasaya ngoku inywe nethu thuli ba Kristo n’oyuwathuhakabaya amaghutha ni Nyamuhanga. 22 Kandi abirithuhirako ekiminyikalho kiwe n’erithuhererya omutsimbo w’ebikendi syasa,* ni bugha ambu, omulimu, omwa mithima yethu.
23 Lino Nyamuhanga angananyimira ngoku ingye eribya isindi nasa e Korinto ni busana n’eribabalya. 24 Si bugha indi thukathabalha okw’ikirirya lyenyu, aliwe thuli bakoli balikyenyu busana n’eribalethera etseme, kundi mw’imene busana n’erikirirya lyenyu.