Okwa Banya Roma
7 Balikyethu, simwanganabya isimwasi (kundi ngakanaya n’abasi emighambo) ngoku Emighambo yiwithe amaaka oko mundu iniakineho? 2 Ng’eky’erileberyako, emighambo yikabohera omukali muthahibwa oko mwira wiwe, mwira wiwe amabya iniakineho; aliwe mwira wiwe amaholha, akaboholhawa oko mughambo wa mwira wiwe. 3 Neryo kwesi, omughulhu mwira wiwe akineho, iniakendyahulhwamo musingiri amathahibwa n’owundi mulhume. Aliwe mwira wiwe amaholha, akabya bwiranda okwa mughambo wa mwira wiwe, nuku syabye musingiri amathahibwa n’owundi mulhume.
4 Neryo balikyethu, nenyu mumwaholha okwa Mighambo erilhabira omwa mubiri wa Kristo, nuku mubye ab’owundi, oyuwalhubukibawa oko baholi, nuku thuhetheraye Nyamuhanga y’ebighuma. 5 Kundi omughulhu thwabya thukaghondera omubiri,* esyongumbu sy’ekibi esyo Emighambo yabukaya syabya isinemukolha omwa mibiri yethu erihethya ebighuma ebikakolhaya okwa lhuholho. 6 Aliwe lino thwabiriboholhwa okwa Mighambo, kundi thwabiriholha okwa kyabya kithubohire, nuku thwangabya bakobe omwa nzira mbyaka omwa mulimu butsira omwa nzira eya kera ey’Emighambo eyihandikire.
7 Neryo thubughe thuthiki? Mbwino Emighambo ni kibi? Eyihi nahake! Kundi sinangaminyire ekibi kuhathabya Emighambo. Ng’eky’erileberyako, sinangaminyire ngoku eriyighomba ni kibi Emighambo ku yithabugha yithi: “Isiwayighomba.” 8 Aliwe ekibi, kyabere kyabana akaghisa akasa busana n’ekihano, mukyanyilethamo eriyighomba ly’obuli mulingo, kundi ahathe emighambo ekibi kyabya kiholire. 9 Kundi nibya, nanabyaho isihali emighambo. Aliwe ekihano kyabere kyasa, ekibi mukyathasyabyaho, aliwe munaholha. 10 N’ekihano ekyabya ky’erikolya okwa ngebe, munaminya ku kikakolhaya okwa lhuholho. 11 Kundi ekibi, kyabere kyabana akaghisa akasa busana n’ekihano, mukyanyithebererya kandi mukyanyitha erilhabira omw’ikyo. 12 Neryo Emighambo iyoyene-yene yibuyirire, n’ekihano kibuyirire kandi kithunganene kandi ni kibuya.
13 Neryo kwesi, ekibuya mukyalhwiririramo olhuholho lhwaghe? Eyihi nahake! Aliwe ky’ekibi, nuku kyanga kanganibwa ngoku ekibi ky’ekikanyilethera olhuholho erilhabira omwa kibuya, nuku erilhabira omwa kihano, ekibi kyang’ongera eribya kibi. 14 Kundi thunasi ngoku Emighambo ni mwatsi w’obunyakirimu, aliwe ingye indi w’omubiri owabirighulibwa omwa kibi. 15 Kundi sindi kenga ebya ngakolha. Kundi sindi kolha ebyo nganzire, aliwe ebya ngaponire. 16 Aliwe namabya iningakolha ebyo ngathanzire, ngaligha ngoku Emighambo yuwene. 17 Aliwe lino oyukabikolha s’ingye, aliwe ky’ekibi ek’ikere omw’ingye. 18 Kundi nganasi ngoku omw’ingye, ni bugha ambu, omwa mubiri waghe, si muli n’ekibuya; kundi ngayisunza erikolha ekibuya aliwe singawithe amaaka w’erikikolha. 19 Kundi sindi kolha ekibuya ekyanganzire erikolha, aliwe ekibi ekyo ngathanzire erikolha kyangakolha. 20 Neryo kwesi, namakolha ekyo ngathanzire, oyukakikolha s’ingye, aliwe ky’ekibi ek’ikere omw’ingye.
21 Neryo ngabana omughambo ono omw’ingye: Omughulhu nganza erikolha ekihikire, ekibi kikabya ikine naghe. 22 Omo kwenene ngatsemera emighambo ya Nyamuhanga erikwamana n’omundu oyo ngali omwa kathi, 23 aliwe ngalhangira omwa mubiri* waghe mw’owundi mughambo akalhwa n’omughambo w’obulengekania bwaghe, erinyibohera ahisi sy’omughambo w’ekibi owali omwa mubiri* waghe. 24 Ingye ka ngali mundu w’obulighe! Nindi oyukendi nyisabulha okwa mubiri owakalholera eyiri olhuholho olhu? 25 Ewasingya oku Nyamuhanga erilhabira omu Yesu Kristo Omukama wethu! Neryo omwa bulengekania bwaghe ingye indi mukobe w’omughambo wa Nyamuhanga, aliwe omubiri waghe ni mukobe w’omughambo w’ekibi.