Ebaruha y’Erimbere oku Timoteo
1 Paulo, omukwenda wa Kristo Yesu omw’ihamulha lya Nyamuhanga Omulhamya wethu n’erya Kristo Yesu, oyuli maha wethu, 2 oku Timoteo,* omwana waghe-waghe omw’ikirirya:
Ambi olhukogho n’obughanyiri n’obuholho erilhua oku Nyamuhanga Thatha na Kristo Yesu Omukama wethu ibyabya nawu.
3 Ngoku nanakubwira indi wubye e Efeso omughulhu nabya iningayaghenda e Makedonia, na lino ngakubwira, nuku wanga kunga abandi wuthi sibakangiriraye engangirirya eyiri mbaghane, 4 kutse erihulikirira esyongano sy’amabehi n’eby’esyondengo. Emyatsi ng’eyo siyirighasaki aliwe yikaleka ihabya eriteberezya omwakanya k’eriha ekyosi-kyosi ekikalhua oku Nyamuhanga ekihambene n’erikirirya. 5 Omo kwenene, ekilhubirirwa ky’erikangirirya* eri ly’eribya n’olhwanzo olhukalhua okwa muthima owahenirye n’okwa bunyamuthima-thima obuwene n’okw’ikirirya erithemo mathebo. 6 Omw’iyisununulha oko myatsi eyi, abandi babirikwama emikania eyitheghasaki. 7 Banzire ibabya bakangirirya b’emighambo, aliwe sibaliyitheghereraya ebya bakabugha kutse emyatsi eyo bakakaghathirako.
8 Thunasi ngoku Emighambo yuwene omundu amaghendera kuyo ngoku kitholere,* 9 kundi emighambo yahirawaho, isi busana n’omundu oyuthunganene, aliwe busana n’abakathwa ebilhaghiro kandi abayisamambuli, abathekenga Nyamuhanga kandi bakolha-nabi, abathebayiketherwa* kandi batsumi, abak’itha abathatha wabo kandi abak’itha abamama wabo, abatsindi, 10 abakakolha eby’obutswatswa,* abalhume abakakolhanako emyatsi y’engyingo,* abakaheka abandu, ababehi, abakalhahiraya omwa mabehi, n’ebindi ebyosi ebithehambana n’erikangirirya erihikire* 11 erikwamana n’engulhu yuwene y’olhukengerwa eya Nyamuhanga oyutsemire, eyo nahebawa.
12 Ngasima Kristo Yesu Omukama wethu, oyuwany’iha amaaka, kundi mwanyighanza mwa muthaleghulha omw’inyithuma omwa buherezya, 13 nomwakine indi kera nabya mutsumi n’oyuk’endereraya kandi ow’akaghayo. Nomwabine, munakanganibwa obughanyiri kundi nabikolha omwa buthaminya n’omw’ithendibya n’erikirirya. 14 Aliwe olhukogho lhw’Omukama wethu mulhwakanyirira kutsibu kuthya n’erikirirya n’olhwanzo olhuli omu Kristo Yesu. 15 Ebinywe bino ni by’eriyikethera kandi bitholere ibyaliwa ndeke: Kristo Yesu mwasa okwa kihugho erilhamya abakolha-nabi. Omw’aba, n’ingye mukolha-nabi kwilhaba abosi. 16 Nomwabine, munakanganibwa obughanyiri nuku erilhabira omw’ingye ng’omukolha-nabi kwilhaba abosi, Kristo Yesu angakangania erighumisirizya liwe lyosi, omw’inyiyiramo ky’erileberyako okw’abo abakendi mw’ikirirya erithoka eribana engebe y’erikotha.
17 Neryo Omwami w’erikotha, oyuthehonda, oyuthelhangirawa, Nyamuhanga mughuma, ahebawe erisikya n’olhukengerwa kera na kera. Amina.
18 Ngakuha erikangirirya* eri, mwana waghe Timoteo, erikwamana n’amaminyereri awahebawa awakuhambireko, indi erilhabira omw’ebi, wanga lholha embere erilhwa amalhwa awuwene, 19 ery’amakirira erikirirya n’obunyamuthima-thima obuwene, ebyo abandi babirighusa lhuhandi, ekyabirileka erikirirya lyabo iryatsandalikana ng’obwathu obwabirithulhangikira omwa ngetse. 20 Himeneo na Alekzanda ni baghuma b’okw’aba, kandi nabiribalhwikira Sitani nuku banga kangiriribwa omw’ikungwa baleke eritsuma.