Ebaruha y’Erimbere Okwa Banya Tesalonika

4 Erighunzerera, balikyethu, ngoku mwanabana obusondoli erilhua okw’ithwe obuhambire okwa mibere mwangalenderamo nuku mutsemesaye Nyamuhanga, ngoku munemulendera oko, thukabasaba n’eribalemba-lemba erilhabira omo Mukama Yesu thuthi mulhole embere eryongera erikolha muthya. 2 Kundi munasi obusondoli* obwa thwabaha erilhabira omo Mukama Yesu.

3 Kundi eri ly’erisonda lya Nyamuhanga, lithi mutholere imwabya babuyirire n’eriyihighulha okwa by’obutswatswa.* 4 Obuli mughuma w’okw’inywe atholere iniaminya ngoku angakakirya omubiri wiwe omwa bubuyirire n’omw’isikya, 5 butsira omwa mururu, omwa syongumbu sy’emyatsi y’engyingo esitheko eriyikakirya ngoku ebihanda ebithasi Nyamuhanga bikakolha. 6 Sihabye oyukalhaba okwa lhubibi olhutholere n’eribendekerya mulikyabo omo mwatsi oyu, kundi Yehova akahiraho erisuyira busana n’emyatsi yosi eyi, ngoku thwasangawa ithwabiribabwira n’eribakunga kutsibu. 7 Kundi Nyamuhanga abirithubirikira, isi busana n’obukine, aliwe busana n’obubuyirire. 8 Neryo kwesi, oyukaghana eki, syali ghana omundu, aliwe akaghana Nyamuhanga, oyukabaha omulimu wiwe abuyirire.

9 Aliwe bikahika oko lhwanzo ng’olhw’abasubeneko, simuli yithagha ithwe eribahandikira, kundi inywe inywibene-bene Nyamuhanga abiribakangirirya erianzana. 10 Ni kwenene, munemukolha eki oko balikyethu abosi omwa Makedonia yosi. Aliwe balikyethu, thukabalemba-lemba thuthi mulhole embere erikolha muthya omwa buswire. 11 Kibye kilhubirirwa kyenyu eribya bukuthu n’erithendi yingirya omo myatsi y’abandi kandi mukole kutsibu, ngoku thwababwira, 12 nuku mwanga lendera imunayithondekenie embere sy’abandu b’eyihya kandi isimubulirwe kindu.

13 Kandi balikyethu, sithwanzire mukabya isimwasi ebihambire okwa baghotsere omwa lhuholho, nuku simubye omwa bulighe ng’abandi abathawithe amaha. 14 Kundi thwamabya n’erikirirya ngoku Yesu mwaholha kandi ku mwalhubuka, kuthya Nyamuhanga akendi syaletha ababirighotsera omwa lhuholho erilhabira omu Yesu eribya haghuma nayu. 15 Kundi kino kya thukababwira erilhabira omwa kinywe kya Yehova, ngoku ithwe, abakendi syabya ibaneho okw’ibyaho ly’Omukama sithwendi syatsuka nahake ababirighotsera omwa lhuholho; 16 kundi Omukama iyuwene-wene akendi syandaghalha erilhua elhubulha inianemubirikira omwa mulenge w’amaaka, omulenge w’omumalaika mukulhu omwa ngubi ya Nyamuhanga, neryo ababiriholha ibanamathikene na Kristo bakendi syatsuka erilhubukibwa. 17 Enyuma waho ithwe thukendi syabya ithukineho, haghuma nabo, thukendi syabakulirwa omwa bithu eriyasanga-sangana n’Omukama omwa kyanya; neryo ithwabya n’Omukama mughulhu wosi. 18 Neryo mulhole embere erihumulikanangania omwa binywe ebi.