Ebaruha Okwa Banya Galatia
5 Busana n’obwiranda ng’obo, Kristo mwathuyira bwiranda. Neryo musike, kandi muleke erisyathasyasuba omwa ngomo y’obukobe.
2 Lhangira! Ingye Paulo, ngababwira nyithi mukendibya mwamabanibwa, Kristo isyendibayirira mughaso. 3 Ngathasyaha obwema okwa buli mulhume oyukabanibawa indi atholere iniaghendera okwa Mighambo eyosi. 4 Mwabirighabulhwa oku Kristo, inywe mukalengaho erighanzwa mwa bathunganene erilhabira omwa mighambo; mwabiriseghera haali okwa lhukogho lhwiwe. 5 Okw’ithwe, omwa mulimu thulindirire kutsibu kandi thuwithe amaha w’erithunganene erikasa busana n’erikirirya. 6 Kundi omw’imathikana na Kristo Yesu, eribanibwa kutse erithendi banibwa siriwithe mughaso wosi-wosi, aliwe ly’erikirirya erikakolha erilhabira omo lhwanzo.
7 Mwabya imunemuthibitha ndeke. Nindi yuwabalemesaya erilholha embere erighondera ekwenene? 8 Omulingo w’erilemba-lemba oyu syalilhua okwa Oyukababirikira. 9 Ekihamya kike kikapakalhaya omukanyu owosi. 10 Ngayikethere ngoku inywe abamathikene n’Omukama simwendibya n’awandi malengekania; aliwe oyukabatabura, mbulha nindi, akendi syabana eritswera erimutholere. 11 Neryo balikyethu, namabya ingakinathulhughanaya eribanibwa, busana naki ngakin’endereribawa? Kyamabya iky’ekyo, ekikathwikalhaya eky’omuthi w’obwaghali* kyabirilhusibwaho. 12 Ngayisunza indi ambi abalhume abakanza eribaghangya-ghangya ibayibarura.*
13 Balikyethu, mumwabirikirwa eribya bwiranda; ambi isimwakolesaya obwiranda obo ng’akaghisa k’erikwamirira esyongumbu sy’omubiri, aliwe erilhabira omo lhwanzo, mukolerane. 14 Kundi Emighambo eyosi yabiribererera* omwa kihano kighuma, kithi: “Wutholere iwanza omuliranwa wawu ngoku wuyanzire.” 15 Aliwe mwamabera erilhumangana n’eriryangana, muyitheghaye mukasyaghunzanaho.
16 Aliwe ngabugha indi, Mulhole embere erilendera omwa mulimu neryo isimwendi kolha erikwamana n’esyongumbu sy’omubiri nahake. 17 Kundi omubiri akalhwa n’omulimu omwa syongumbu syawu, n’omulimu akalhwa n’omubiri; ebi sibirikolongana, eribalemesya erikolha emyatsi eyo munanzire erikolha. 18 Eryongera okw’ekyo, mwamabya imukasondolhawa n’omulimu, isimuli ahisi sy’emighambo.
19 Neryo emikolere y’omubiri yilhangirikire ndeke-ndeke, nayu yeno, eby’obutswatswa,* obukine, emibere y’obukamya meso,* 20 eriramya esyosanamu, obukumu,* obuyighu, amalhwa, erihali, obutsurumi, erikakalhukana, erighabulhana, erighabana omwa nyikirirya, 21 obuha, obuthamiri, eriyitsemesya ly’ebyughungu,* n’ebindi ng’ebi. Ngasangwa nabaghusako akasali busana n’ebindu ebi, ngoku nanabya inabiribaghusako akasali, indi abakakolha ebindu ng’ebi sibendi syasighalya Obwami bwa Nyamuhanga.
22 Okwa lhundi lhuhandi, ekighuma ky’omulimu ni olhwanzo, obutseme, obuholho, erighumisirizya, olhukeri, obubuya, erikirirya, 23 obwolho, eriyikakirya. Sihali mughambo ow’akahakanisaya ebi. 24 Kandi abali oku Kristo Yesu babirikongomerera omubiri n’eriyisunza lyagho n’esyongumbu syagho okwa muthi.
25 Thwamabya ithuliho erilhabira omwa mulimu, thulhole embere erilendera n’omwa buyithondeke erilhabira omwa mulimu. 26 Thulekere aho emiyihalhambo, eribukya omwa bandi mw’amalingwatha, eritsurana.