Emibiiri y’Abakwenda
10 Neryo e Kaisaria yabya omulhume oyukahulhawamo Kornelio, omukulhu w’amahe* w’ekigurupu* ky’abasirikali ekye Itale. 2 Abya mulhume oyuyihereyo oyuk’ubaha Nyamuhanga iyo n’ab’enyumba yiwe bosi, kandi iniakaha abandu b’ebihembo bingyi by’olhukeri kandi mughulhu wosi iniakasaba Nyamuhanga omw’imulemba-lemba. 3 Saha nga mwenda esy’erithungyi, omw’ibonokerwa mwalhangira ndeke-ndeke omumalaika wa Nyamuhanga akasa eyo ali n’eribugha athi: “Kornelio!” 4 Kornelio mwamuthungerera kandi inianakwire obuba, mwabugha athi: “Wuthiki Mukama?” Mwamubwira athi: “Emisabe yawu n’ebihembo byawu by’olhukeri byabirihethukira oku Nyamuhanga ng’ekibukyo okw’iyo. 5 Neryo lino wuthume abalhume e Yopa, bayabirikire Simoni oyukahulhawamo Petero. 6 Omulhume oyu ni mugheni wa Simoni, oyukakolha ebindu by’omwa syongobi oyuwithe enyumba hakuhi n’engetse.” 7 Omumalaika oyuwakanaya nayu abere akanaghenda, Kornelio mwabirikira ababiri b’okwa baghombe biwe n’omughuma w’okw’abasirikali biwe oyukubaha Nyamuhanga, 8 neryo mwababwira obuli kindu n’eribathuma e Yopa.
9 Ekiro ekyakwamako ibanemulholha embere n’olhughendo lhwabo kandi ibakayahika hakuhi n’etawuni, Petero mwahethukira okwa nyumba kw’endatha saha nga mukagha* akayasaba. 10 Aliwe mwakwa enzalha nene neryo amanza erirya. Babere banemutsumba ebyalya, mwabya omwa thuli nga thulho 11 neryo mwalhangira olhubulha ilhunakyungukere n’ekindu kinene ekiri ng’ekitambara ky’ekitani ikinahambirwe okwa syosonda syakyo ini ikinemwandaghalibirwa okwa kihugho; 12 kandi omw’ikyo mwabya obuli mulingo wosi w’ebisoro eby’amaghulhu ani n’ebikakulhulhuka okwa kithaka n’esyonyonyi sy’omwa kyanya. 13 Neryo omulenge mwabugha nayu athi: “Petero, hangana, kera wulye!” 14 Aliwe Petero mwabugha athi: “Eyihi nahake, Mukama, kundi sindi nathalya ekindu kyosi-kyosi ekitsandire kandi ekithahenirye.” 15 Neryo omulenge mwathasyabugha nayu engendo yakabiri athi: “Lekera aho eryahulha ebindu ebya Nyamuhanga abiryerya, mwa bitsandire.” 16 Eki mukyabya omurundi wakasathu, neryo aho n’aho mukyathwalhwa elhubulha.
17 Petero abere akinabulha eribonokerwa eryo abya iniamabirilhangira nga likamanyisayaki, abalhume abo Kornelio athuma mubabulya enyumba ya Simoni nga yiri hayi neryo mub’imana okwa lhukyo. 18 Mubabirikira n’eribulya bathi Simoni oyukahulhawamo Petero nga n’eyo ng’omugheni. 19 Petero abere akinalengekanaya okw’ibonokerwa, omulimu mwabugha athi: “Lebaya! Abalhume basathu banemukusondya. 20 Neryo hangana wundaghalire eyikwa wughende nabo, siwuthike-thike nahake, kundi nabiribathuma.” 21 Neryo Petero mwandaghalira eyiri abalhume n’eribugha athi: “Ingye yono, oyo mukasondaya. Mukabugha muthiki?” 22 Mubabugha bathi: “Kornelio, omukulhu w’abasirikali, oyuthunganene kandi oyuk’ubaha Nyamuhanga oyo ekihanda kyosi ky’Abayuda kikakanayako ndeke, mwahebirwe obusondoli bwa Nyamuhanga erilhabira omwa mumalaika oyubuyirire erikuthumirako athi wase ewiwe nuku ahulikirire ebya wukendi bugha.” 23 Neryo mwabakokya omwa nyumba, amabya nabo ng’abagheni biwe.
Ekiro ekyakwamako mwahangana, amaghenda nabo, n’abandi balikyabo erilhua e Yopa mubaghenda nayu. 24 Ekiro ekyakwamako mwahika e Kaisaria. Kornelio abya inianabalindire kandi abya iniabiribirikira abahughu biwe n’abanywani biwe b’okwa ndungu bo haghuma. 25 Petero abere ak’ingira, Kornelio mwamuthangirira, amawa embere sy’ebisandu biwe, n’erimunamira. 26 Aliwe Petero mwamuhangania n’eribugha athi: “Hangana; naghe ngali mundu.” 27 Abere anemukania nayu, mw’ingiramo, am’eya abandu bangyi ibanahindene haghuma. 28 Mwababwira athi: “Munasi ndeke ngoku sikilighirwe Omuyuda eribya haghuma kutse erihika hakuhi n’omundu w’ekindi kihanda, aliwe Nyamuhanga abirinyikangania ngoku singatholere ng’ahulha omundu mwa oyutsandire kutse oyuthahenirye. 29 Neryo omughulhu indyathumirawako, mungasa, mungathethaghana. Neryo ngakubulhaya nga ni kyahi ekiryaleka iwanyithumirako.”
30 Neryo Kornelio mwabugha athi: “Hamabirilhaba biro bbini namabaririra eritsuka okwa saha eno, nabya inganemusaba omwa nyumba yaghe oko saha mwenda;* neryo omulhume oyumbere esyongyimba esikangabasenie mw’imana embere syaghe 31 n’eribugha athi: ‘Kornelio, erisaba lyawu lyabiryowibwa, n’ebihembo byawu by’olhukeri byabiryibukwa embere sya Nyamuhanga. 32 Neryo wuthumire oku Simoni oyukahulhawamo Petero e Yopa. Omulhume oyu ni mugheni omwa nyumba ya Simoni oyukakolha ebindu omwa syongobi, oyuli hakuhi n’engetse.’ 33 Neryo aho n’aho munakuthumireko, nawu muwalighire eryasa. Neryo ithwe bosi thwebabano embere sya Nyamuhanga eriowa ebyosi ebya Yehova abirikuhana athi wubughe.”
34 Neryo Petero mwatsuka erikania, n’eribugha athi: “Lino namayitheghererya ngoku kwenene Nyamuhanga syawithe kasolholho, 35 aliwe omwa buli kihanda omundu oyukamubaha n’erikolha ebihikire akamuligha. 36 Mwathumira abaana be Israeli b’ekinywe nuku babwirawe engulhu yuwene y’obuholho erilhabira omu Yesu Kristo—oyu ni Mukama w’abosi. 37 Munasi omwatsi owakanibawako omwa Yudea yosi, eritsuka e Galilaya enyuma w’olhubatizo olho Yohana athulhughanaya: 38 owahambire oku Yesu owe Nazareti, ngoku Nyamuhanga amuhakabaya omwa mulimu abuyirire n’obuthoki, kandi mwaghenda omwa kihugho kyosi ekyo akakolha ebibuya n’erilhamya abosi abo Diabolo abya iniabirinubya kundi Nyamuhanga abya haghuma nayu. 39 Kandi thuli bema b’ebyosi ebyo akolha omwa kihugho ky’Abayuda n’omwa Yerusalemu; aliwe mubamw’itha omw’imuhanika okwa muthi.* 40 Nyamuhanga mwamulhubukya okwa kiro kyakasathu kandi amaleka alhangirike, 41 butsira okwa bandu bosi, aliwe okw’ithwe, abema abo Nyamuhanga asangawa iniabirisombolha, ithwe thwalya n’erinywa haghuma nayu alilhubukire okwa baholi. 42 Kandi mwathulhaghira erithulira abandu n’eriha ndeke obwema ngoku oyu yo Nyamuhanga abiriha ehamuli y’eribya mutsweri w’abaliho n’ababiriholha. 43 Oyo y’abaminyereri abosi bakahera obwema, bathi obuli mundu oyukamw’ikiriraya akaghanyirawa ebibi erilhabira omwa lina liwe.”
44 Petero abere akinakanaya oko myatsi eyi, omulimu abuyirire mwahika okwa bosi ababya bakahulikirira ekinywe. 45 N’abikirirya* ababya babanibwe abasa na Petero mubasweka, kundi n’abandu b’ebihanda mubahebwa ekihembo ky’omulimu abuyirire ekikahebawa ahathe eriliha. 46 Kundi mub’owa bakakania omwa yindi mibughe n’erihamya Nyamuhanga. Neryo Petero mwabugha athi: 47 “Mbwino hane oyuwanga ghanira amaghetse erikakirya abandu aba eribatizibwa ababirihebwa omulimu abuyirire ng’ithwe?” 48 Busana n’ekyo, mwahamulha athi babatizibawe omwa lina lya Yesu Kristo. Neryo mubamusaba bathi abye nabo habw’ebiro birebe.