Ebaruha ya Yakobo
2 Balikyethu, simuhambire ndeke erikirirya ly’Omukama wethu Yesu Kristo ow’olhukengerwa imunemukangania akathondolho, kwabithe? 2 Kundi omulhume oyuwambere esyombeta sy’ehoro omwa minwe yiwe n’esyongyimba sy’obughuli amasa omw’ihindana lyenyu, n’omulhume omunakwa oyuwambere esyongyimba esikinire nayu amasa, 3 mukatsomana oyuwambere esyongyimba esy’obughuli n’eribugha muthi, “Ikalha okwa kithumbi eki ekiri omwa mwanya owuwene,” aliwe imwabwira omunakwa muthi, “Ibya iwun’imene” kutse, “Ikalha ahali ekithumbi ky’ebisandu byaghe”? 4 Kyamabya iky’ekyo, mbwino isimwendibya imuli okw’iyisondekaniamo abalengire abandi, kandi isimwendibya imwamabya batsweri abakakolha erithwamu ly’obubi?
5 Balikyethu banzwa, muhulikirire. Mbwino Nyamuhanga mwathasombolha abo ekihugho kikalhangira mwa banakwa eribya bagaga omw’ikirirya kandi bawetwa b’Obwami, obo alhagha abamwanzire? 6 Aliwe mwabirighaya abanakwa. Mbwino abagaga sibabakabanubaya n’eribakurira omwa syakoti? 7 Mbwino sibali tsuma erina libuya eryo mwabirikirawamo? 8 Neryo lino, mwamaghondera omughambo w’obwami erikwamana n’amasako, “Wutholere iwanza omuliranwa wawu ngoku wuyanzire,” imukendibya imwamakolha ndeke. 9 Aliwe mwamalholha embere erikangania akathondolho, imukakolha ekibi, kandi imwabiribohwa* omwa mighambo ng’abakolha-nabi.
10 Kundi owosi-wosi amaghondera Emighambo eyosi aliwe akathalhuka okwa nzumwa nguma, akabya iniamabirihalya okwa yosi. 11 Kundi oyuwabugha athi, “Siwutholere wukasingira,” kandi mwabugha athi, “Siwutholere wuk’itha.” Neryo wamaghana erisingira aliwe wuk’itha, wukabya iwamabiribya muthwi w’emighambo. 12 Mulhole embere erikania n’eribya n’emibere ng’ey’abo abakayatswerawa omwa mighambo ey’abandu b’obwiranda.* 13 Kundi oyuthe kanganaya obughanyiri akendi syatswerwa ahathe erikanganibwa obughanyiri. Obughanyiri bulengire eritswera.
14 Balikyethu, kiwithe mughasoki, omundu mulebe amabugha athi awithe erikirirya aliwe isyali likanganaya omwa mikolere? Erikirirya eryo siryanga mulhamya, kwa bithe? 15 Mughalha wethu kutse mwali wethu amabya isyawithe eky’eriambalha* n’ebyalya ebikaghunza eby’ekiro ekyo, 16 aliwe omughuma w’okw’inywe iniamubwira athi, “Wughende buholho; wuhuhe kandi wulye ndeke,” aliwe isimwathamuha eby’akayithagha busana n’omubiri wiwe, ekyo ikiwithe mughasoki? 17 Neryo kuthya, erikirirya lisa, eritheko mikolere, liholire.
18 Nomwabine, omundu angana bugha athi: “Wuwithe erikirirya, naghe ngawithe emikolere. Nyikanganaye erikirirya lyawu eritheko mikolere naghe ngendi kukangya erikirirya lyaghe omwa mikolere yaghe.” 19 Wikirirye ngoku hali Nyamuhanga mughuma, kwa bithe? Wukakolha ndeke. N’esyombinga sikirirye kandi sikathithimana. 20 Aliwe iwe mukiru, wunanzire eriminya ngoku erikirirya eritheko mikolere siriwithe mughaso? 21 Mbwino thatha wethu Abrahamu mwathahulhwamo muthunganene busana n’emikolere yiwe abihayo Isaka mughalha wiwe okwa kiherero? 22 Wukalhangira ngoku erikirirya liwe mulyaghenda-ghendania n’emikolere yiwe kandi erikirirya liwe mulyahikanibwa erilhabira omwa mikolere yiwe, 23 n’erisako mulyabererera erikabugha lithi: “Abrahamu mwikirirya Yehova* neryo mwaghanzwa mwa muthunganene kandi mwahulhwamo munywani wa Yehova.*
24 Mwamalhangira ngoku omundu akaghanzawa mwa muthunganene busana n’emikolere yiwe butsira busana n’erikirirya lisa. 25 Omwa nzira iyan’eyo, na Rahabu omumalaya mwahulhwamo muthunganene busana n’emikolere abikokya ndeke abathumwa n’eribabwira athi balhabe omwa yindi nzira, kwa bithe? 26 Omo kwenene, ngoku omubiri owathemo kirimu* aholire, kuthya n’erikirirya eritheko mikolere liholire.