Ebaruha y’Erimbere Okwa Banya Korinto
2 Neryo balikyethu, omughulhu nasa eyo muli, munathasa n’ebinywe kutse amenge ebilhabirirenie ingababwira embitha eyibuyirire eya Nyamuhanga. 2 Munathwamu erithendi kania okwa kyosi-kyosi omwa kathi-kathi kenyu kwihaho ebihambire oku Yesu Kristo, n’okw’ihanikwa liwe okwa muthi. 3 Kandi munasa eyo muli omwa butseke n’omw’ubaha n’erithithimana linene; 4 n’ebinywe byaghe n’ebyo nathulhughanaya si byabya binywe by’amenge eby’erisona-sona aliwe ebikakanganaya omulimu n’amaaka, 5 nuku erikirirya lyenyu lyangabya omwa maaka wa Nyamuhanga butsira omwa menge w’abandu.
6 Lino thukakanaya amenge omwa kathi-kathi k’abakulire, aliwe butsira amenge w’omulembe ono kutse aw’abathabali b’omulembe ono, abakendi syahwaho. 7 Aliwe thukakanaya amenge wa Nyamuhanga omwa mbitha yibuyirire, amenge awabisamire, agho Nyamuhanga asangwa atheghekania emilembe yithe yabyaho busana n’olhukengerwa lhwethu. 8 Aya w’amenge aw’athaminyawa n’owosi-wosi w’okwa bathabali b’omulembe ono, kundi ku babya ibabiriminyagho, sibangahanikire* Omukama w’olhukengerwa. 9 Aliwe ngoku kihandikire kithi: “Eriso siryathalhangira n’okuthwe sikuthowa, kutse omuthima w’omundu syali athaghanirya oko myatsi eyo Nyamuhanga abiritheghekera abamwanzire.” 10 Kundi n’ithwe abo Nyamuhanga abiribisulirayo erilhabira omwa mulimu wiwe, kundi omulimu akasekulhaya omo myatsi yosi, emyatsi ya Nyamuhanga ey’omwakathi.
11 Kundi omwa bandu, nindi oyuwasi emyatsi y’omundu athe iy’omundu wiwe w’omwakathi? Kuthya, sihali oyuwabiriminya emyatsi ya Nyamuhanga athe iw’omulimu wa Nyamuhanga. 12 Neryo muthwahebwa, butsira ekirimu ky’ekihugho aliwe omulimu owakalhua oku Nyamuhanga, nuku thwanga minya emyatsi eyo Nyamuhanga abirithuha omwa lhukeri. 13 Emyatsi eyi kandi thukabughayo, butsira omwa binywe ebya kangiriribawa omwa menge w’abandu, aliwe ebya kangiriribawa erilhabira omwa mulimu, omughulhu thukasoborera* emyatsi y’obunyakirimu omwa binywe by’obunyakirimu.
14 Aliwe omundu w’ekinyamubiri syali ligha* emyatsi y’omulimu wa Nyamuhanga, kundi ni bukiru okw’iyo; kandi syanga minyayo, kundi yikakubungulhawa bunyakirimu. 15 Aliwe, omundu w’obunyakirimu akakubungulha emyatsi yosi, kandi iyo iyuwene-wene syali kubungulhawa n’omundu wosi-wosi. 16 Kundi “nindi oyuwabiriminya obulengekania bwa Yehova, nuku angamukangirirya?” Aliwe ithwe thuwithe obulengekania bwa Kristo.